၂၅။ စာတန်လှေံလှန်ယေသှု

ယေသှုဒုၚ်ၜါတ္တိဇာံတုဲဂှ် ဗွဲပြဟ်ဝိညာန်မသ္အးဇ္ၚးပလံၚ်ဗစိုပ်ညး ပ္ဍဲဂြိုပ်ရ။ ယေသှုဝွံ နွံဒၟံၚ်ပ္ဍဲဂြိုပ် ပွိုၚ်ပန်စှ်ောတ္ၚဲ၊ပန်စှ်ောဗ္တံတုဲ ဟွံစစၞရ။ အခိၚ်ဂှ် စာတန်ဝွံ စိုပ်ကၠုၚ်ပ္ဍဲယေသှုတုဲ ညံၚ်ဂွံကၠောန်ဒုဟ်ဂှ် လှေံလှန်ရ။

ကၠာအိုတ်၊ စာတန်ဟီုဂးဂှ် “ ယဝ်ရ မၞးဒှ်ကောန်ကျာ်ဍာံမ္ဂး တၟံဏံညံၚ်ဂွံဒှ်ကွာၚ်ဂှ် သ္ပတုဲ စညိ ”လှေံလှန်ယေသှုရ။

ယေသှုလေဝ်“ ပ္ဍဲလိက်သၠပတ်ချူလဝ်ဂှ်၊” မၞိဟ်တံဝွံ နကဵုကွာၚ်ဂှ် ဂွံဂျိုၚ်လမျီုဟွံသေၚ်၊ အတိုၚ်ကျာ်ဟီုပၟိၚ်လဝ်ဂှ် ဒးဂျိုၚ်လမျီုရောၚ် ”ကလေၚ်ဟီုကဵုစာတန်ရ။

မွဲဝါပၠန် စာတန်ဝွံ ကော်ဏာယေသှု လ္တူလွဳမာန်သၠုၚ်အိုတ်တုဲ “ ယဝ်ရ မၞးဒှ်ကောန်ကျာ်ဍာံမ္ဂး ဆၚ်စှ်ေသၟဝ်တေံညိ၊ ဇိုၚ်မၞးဟွံဒးတၟံဂှ် ကလုတ်အကာသတံဝွံ ထ္ၜကဵုရောၚ်ဂှ် ပ္ဍဲသၠပတ်ချူလဝ်ဟွံသေၚ်ဟာ? ”စာတန်လှေံလှန်ရ။

ဆမ္ဂး ယေသှုဝွံ အရာစာတန်စကာဂှ် ဟွံကၠောန်တုဲ ကလေၚ်ဟီုရ။“ ဇၟာပ်မၞိဟ်ကျာ်ဟီုလဝ်ဂှ် လ္ပစမ်ၜတ်ကျာ်ထာဝရညိ။”

တုဲပၠန် စာတန်ဝွံ ဍုၚ်လ္တူဂၠးတိသီုဖအိုတ်တံ ဇၞော်ကီု၊ ပိုန်ဒြပ်ဂၠိုၚ်ကီုဂှ်ထ္ၜးကဵုယေသှုတုဲ “ ယဝ်ရမၞးဖျေံက္ဍိုပ်တုဲ ရေဟ်သေဟ်အဲမ္ဂး အဲကဵုမၞးအရာသီုဖအိုတ်ရောၚ်”ဟီုရ။

ယေသှုလေဝ် “ မၞးစာတန်၊ တိတ်အာသ္ၚောဲသ္ၚောဲစမ်! ကျာ်ထာဝရမွဲဇကုဟေၚ် ဒးရေဟ်သေဟ်၊ဒးသ္ပဝတ်ရောၚ်ဂှ် ကျာ်ထာဝရဟီုပၟိၚ်လဝ်ကဵုမၞိဟ်တံရ”။

စာတန်ဝွံ လှေံလှန်ယေသှုဟွံမာန်တုဲ တိတ်အာနူယေသှုရ။ တုဲဂှ် ကလုတ်အကာသတံစိုပ်ကၠုၚ်ဇရေၚ်ယေသှုတုဲ လွဳဝတ်ညးရ။

ပုံသၠပတ်သမ္မာ : ခရေတ်ဝၚ်မာတ်သာဲ ၄း၁-၁၁၊ ခရေတ်ဝၚ်မာကု ၁း၁၂-၁၃၊ ခရေတ်ဝၚ်လုကာ ၄း၁-၁၃