၂၇။ ပုံမၞိဟ်သှမာရိခိုဟ်

မွဲတ္ၚဲဂှ် ညးမစိုန်သ္ကီုဓဝ်ယုဍ မွဲတၠဝွံ ကၠုၚ်ပ္ဍဲယေသှုတုဲ အရာယေသှုဗ္တောန်ထ္ၜးလဝ် ဗၠေတ်ဒၟံၚ်ရောၚ်ဂှ် မိက်ဂွံဟီုကဵုမၞိဟ်ဂမၠိုၚ်တံရ။ သာ်ဂှ်ရ ညးဝွံ “ ယွံ တဳလဂုန်၊ ပိုဲဍိက်တံ ဂွံဒုၚ်စအာဲကၟာဲလမျီုထာဝရဂှ် သာ်လဵုဂွံကၠောန်ရော? ”သၟာန်ရ။ ယေသှုလေဝ် “ ပ္ဍဲပညပ်ကျာ်ဂှ် မူချူလဝ်ရော?”ကလေၚ်သၟာန်ရ။

မၞိဟ်မစိုန်သ္ကီုဓဝ်ယုဍဝွံ “ ချူလဝ်ပ္ဍဲပညပ်ကျာ်ဂှ် ဒဵုကဵုမအိုတ်ကောန်စိုတ်၊ သီုစိုတ်ဝိညာန်၊ အစောံသတ္တိဆမနွံ၊ ညာန်ဆမနွံဂှ် ဒးဆာန်ကျာ်ရ၊ ညးမဆေၚ်စပ်ကဵုဇကုတံဂှ်လေဝ် ဒးဆာန်ညံၚ်ရဴဇကုကီုရ”။ ယေသှုဝွံ “ မၞးဍာံရ! ယဝ်ရမၞးကၠောန်အတိုၚ်ဏံမ္ဂး လမျီုထာဝရဂှ် ဂွံရောၚ် ”သာ်ဂှ်ဟီုဂးရ။

မၞိဟ်မစိုန်သ္ကီုဓဝ်ယုဍဝွံ ဇကုဇကုမဒှ်မၞိဟ်ဍာံပြရောၚ်ဂှ် မိက်ဂွံထ္ၜးကဵုမၞိဟ်တံပၠန်ရ။ သာ်ဂှ်ရ ညးဝွံ “ ခိုဟ်သန်ရ၊ မၞိဟ်လဵုဂှ် ဒှ်မၞိဟ်မဆေၚ်စပ်ကဵုအဲရော? ”ကလေၚ်သၟာန်ယေသှုပၠန်ရ။

ဟိုတ်ဂှ်ရ ယေသှုဝွံ လဴထ္ၜးပုံဥပမာမွဲရ။ ပုံဂှ်“ ဂကူယုဍမွဲတၠဝွံ နူဍုၚ်ယေရုသလေၚ်ကဵုဍုၚ်ယေရိခေါဂှ် တိတ်ကၠုၚ်တရဴရ။

မၞိဟ်အာတရဴဝွံ ပ္ဍဲဂၠံၚ်ဂှ် ဆဵုဂဗဓမၠတံရ။ ဓမၠတံလေဝ် ၜုၚ်တက်ကေတ်ဏာဒြပ်ညးသီုဖအိုတ်တုဲ တိတ်အာသ္ၚောဲသ္ၚောဲရ။ “

” ခြာဟွံလအ် အ္စာတွံဓဝ်ဂကူယုဍမွဲတၠဝွံ ကွာ်စှ်ေကၠုၚ်ပ္ဍဲဂၠံၚ်ဂှ်ကီုရ။ ညးဝွံ ဆဵုညာတ်မၞိဟ်လောတ်ဒၟံၚ်ပ္ဍဲဂၠံၚ်ကီုလေဝ် ပါဲအာသ္ၚောဲသ္ၚောဲတုဲ ဆက်အာရ။ ညးဝွံ ဟွံသ္ပဂရုကဵုမၞိဟ်လောတ်ဒၟံၚ်ပ္ဍဲဂၠံၚ်ဂှ်ရ။

“ ဟွံလအ်မွဲခဏပၠန်ဂှ် ဂကူလေဝိမွဲတၠလေဝ် ကွာ်စှ်ေကၠုၚ် ပ္ဍဲဂၠံၚ်ဂှ်ကီုရ။ ( ဂကူလေဝိဟီုဂှ် ပ္ဍဲကဵုဘာလွဳမာန်ကျာ်ဂှ် ဒှ်မၞိဟ်ရီုဗၚ်အစာတွံဓဝ်ယုဍတံရ)။ မၞိဟ်လေဝိဂှ်လေဝ် ဟွံသ္ပဂရုကဵုမၞိဟ်လောတ်ဒၟံၚ်ပ္ဍဲဂၠံၚ်ဂှ်တုဲ ပဲါအာသ္ၚောဲသ္ၚောဲကီုရ။ ”

ဆက်တုဲ မၞိဟ်မွဲတၠပၠန်လေဝ် ကွာ်စှ်ေကၠုၚ်ပ္ဍဲဂၠံၚ်ဂှ်ရ။ ညးဝွံ ဒှ်'ဂကူသှမာရိ'ရ။ ( ဂကူသှမာရိကဵုဂကူယုဍတံဂှ် က္ဍုဟ်မၠေံဒၟံၚ်ညးသ္ကံရ။ ) ဆမ္ဂး မၞိဟ်သှမာရိဝွံ ညာတ်မၞိဟ်လောတ်ဒၟံၚ်ပ္ဍဲဂၠံၚ်ဂှ်တုဲ ဆာန်ဍူဗွဲမလောန်ရ။ သာ်ဂှ်ရ ညးဝွံ အာဗ္ဒာဲဂှ်တုဲ ဂွဳကဵုသရမၞိဟ်လောတ်ဒၟံၚ်ပ္ဍဲဂၠံၚ်ဂှ်ရ။

တုဲဂှ် ယိုက်ပ္တိုန်လ္တူမာဲညးတုဲ ဂွံဆက်လွဳမၞိဟ်ယုဍဂှ် ကော်ဏာပ္ဍဲဇြပ်မနွံဒၟံၚ်ဗ္ဒာဲဂၠံၚ်ရ။

မွဲတ္ၚဲပၠန်ဂှ်၊ မၞိဟ်သှမာရိလေဝ် သွက်ဂွံဆက်အာတရဴနွံဒၟံၚ်တုဲ ကဵုလှဲမၞိဟ်နွံဒၟံၚ်ပ္ဍဲဇြပ်ဂှ်ရ။ တုဲဂှ် ဟီုကဵုညး“ ဆက်လွဳဝတ်ကဵု မၞိဟ်ယုဍဏံညိ။ ယဝ်ရလှဲဟွံရုံမ္ဂး အခိၚ်အဲစဴကၠုၚ်တှ်ေ အဲကလေၚ်ထပ်ကဵုပၠန်ရောၚ်”သာ်ဂှ်ဟီုဂးရ။

ယေသှုဝွံ လဴထ္ၜးပုံဥပမာဂှ်တုဲ သၟာန်မၞိဟ်စိုန်သ္ကီုဓဝ်ယုဍဂှ်ရ၊ “ ဗီုလဵုမၞးထေၚ်ဟယျပုံဏံရော? ပ္ဍဲမၞိဟ်ပိတၠဏံဂှ် မၞိဟ်လဵု ဒှ်ညးဆေၚ်စပ်ကဵုဇကုရော?ကလေၚ်သၟာန်ရ။ ညးဝွံ“ညးမဆာန်ဍူ မၞိဟ်လောတ်ဒၟံၚ်လ္တူဂၠံၚ်ဂှ် ဒှ်ညးမဆေၚ်စပ်ကဵုဇကုရ”သာ်ဂှ်ကလေၚ်ဟီုရ။ ယေသှုလေဝ် “ စဴသ္ၚိတုဲ ကၠောန်သာ်ဂှ်ညိ” ဟီုကဵုညးရ။

ပုံသၠပတ်သမ္မာ : ခရေတ်ဝၚ်လုကာ ၁၀း၂၅-၃၇