၄၉။ ကတ္တိကကျာ်တၟိ
ကလုတ်အကာသဟီုကဵုသၟတ်ဗြဴမာရိဂှ် မၞးသၠးဂွံဂဗ္ဘ ကောန်ကျာ်ရောၚ်။ မာရိဝွံ ၜိုန်ရဒှ်ဒၟံၚ်ဝုတ်ကညှာကီုလေဝ် ဝိညာန်မသ္အးဇ္ၚးစှ်ေစိုပ်လ္တူညးတုဲ ပ္တိဂွံသန္ဓိရ။ မာရိဝွံ သၠးဂွံကောန်တြုံမွဲတုဲ တၚ်ယၟု "ယေသှု"ရ။ သာ်ဂှ်ရ နာဲယေသှုဝွံ ကျာ်လေဝ်ဒှ်၊ မၞိဟ်လေဝ်ဒှ်ကီုရ။
ယေသှုဝွံ ကၠောန်ထ္ၜးကဵုအရာမအံသဝ်ဗွဲမဂၠိုၚ်တုဲ ထ္ၜးသက်သဳညးဒှ်ဒၟံၚ်ကျာ်ဂှ်ရ။ ညးဝွံ ကွာ်လ္တူဍာ်တုဲ ဗ္ဒေံါကျာမေလေံၚ််ရ။ညးဝွံ လွဳကဵုမၞိဟ်ယဲဗွဲမဂၠိုၚ်တုဲ မၞိဟ်ကၠော်မလုပ်တံလေဝ်ဒဍေၚ်ပ္တိတ်ကဵုကလော်မာတံရ။ မၞိဟ်ချိုတ်ဒၟံၚ်ဂှ် ကဵုကလေၚ်ဂျိုၚ်တိုန်ရ။ နကဵုကွာၚ်မသုန်ကလောံကဵု ကဍောတ်ၜါဂှ်လေဝ် ဖာပ်ဗ္စမၞိဟ်မသုန်လ္ၚီပြၚ်ပြၚ်ဒဵုကဵုဖဲလဲရ။
နာဲယေသှုဝွံ အ္စာမခိုဟ်ပြဲအိုတ်လေဝ်ဒှ်ရ။အရာညးဗ္တောန်လဝ်ဂှ်လေဝ် ဍာံပြဒၟံၚ်ရ။ညးဝွံ ဒှ်ကောန်ကျာ်တုဲ နကဵုအခေါၚ်ဣဓိကျာ်ဂှ်ဟီုတွံဒၟံၚ်ရ။ နာဲယေသှုဝွံ ညံၚ်ရဴဆာန်ဇကုဇကုဂှ် ဂွံကလေၚ်ဆာန်ညးတၞဟ်မာန်ကီုဂှ် ဒလောံဗ္တောန်လဝ်ရ။
နာဲယေသှုဝွံ မၞးတံဒးဆာန်ကျာ်ထာဝရ ဂၠိုၚ်နူကဵု ပိုန်ဒြပ်မၞးတံကဵုအရာမနွံသီုဖအိုတ်ရောၚ်ဂှ် ဒလောံဗ္တောန်လဝ်ကီုရ။
နာဲယေသှုဟီုပၟိၚ်မွဲဝါပၠန်ဂှ် သန်ထာန်ကျာ်ထာဝရဝွံ ခိုဟ်လောန်နူကဵုအရာမနွံဒၟံၚ်ပ္ဍဲလောကရောၚ်။ မၞးတံဂွံလုပ်ပ္ဍဲသန်ထာန်ကျာ်မာန်ဂှ် ဒးဒုၚ်ဟံၚ်ပြာ်ဒုဟ်မၞးတံရောၚ်။
နာဲယေသှုဟီုတွံမ္ဂးဂှ် မၞိဟ်လ္ၚဵုတံဝွံ ဒုၚ်တဲညးရ။ မၞိဟ်ဒုၚ်တဲညးဂှ် ကျာ်ဟံၚ်ပြာ်ရောၚ်။ မၞိဟ်ဟွံဒုၚ်တဲညးလေဝ်နွံဒၟံၚ်ရ။ သာ်ဂှ်ရ ညးဟီု “ ညးလ္ၚဵုတံဝွံ တုပ်ညံၚ်ရဴတိခိုဟ်ရ။ မူဟိုတ်ရောမ္ဂး ညးတံဝွံ ဒုၚ်တဲအရေဝ်နာဲယေသှုတုဲ ကျာ်ဟံၚ်ပြာ်ညးတံရ။ မၞိဟ်လ္ၚဵုတံဝွံ တုပ်ညံၚ်ရဴတိပြေံလ္တူဂၠံၚ်ရ။ ဂလာန်ကျာ်ဝွံ တုပ်ညံၚ်ရဴမတၞံဆုတုဲ ဒတုံစှ်ေပ္ဍဲတိပြေံမ္ဂး ကၠုတ်တိုန်ဟွံမာန်ရ။ တေံမၞိဟ်ဂှ် ဟိုတ်နူ တၚ်ပဲါအရေဝ်နာဲယေသှုတုဲ ဟွံဂွံလုပ်သန်ထာန်ကျာ်ရ။”
ကျာ်ထာဝရဝွံ ဆာန်ကောန်ဒုဟ်တံဗွဲမလောန်ရ။ ညးဝွံ ဂွံဗၠးကဵုဒုဟ်မၞိဟ်တံတုဲ မၞိဟ်တံဂွံဒှ်ကောန်ကျာ်မာန်ဂှ် ပၟိက်နွံဒၟံၚ်ရောၚ်ဂှ်ယေသှုဟီုတွံလဝ်ရ။
ယေသှုဟီုမွဲဝါပၠန်မ္ဂးဂှ် “ ကျာ်ထာဝရဝွံ က္ဍုဟ်မၠေံဒုစရိုတ်ရ။ ဟိုတ်နူအာဍာံကဵုဨဝကၠောန်လဝ်ဒုဟ်တုဲ တၞောဝ်ဒတောဝ်ညးတံသီုဖအိုတ်လေဝ် ဒှ်ကၠုၚ်ကောန်ဒုဟ်ကီုရ။ ဟိုတ်ဂှ်ရ ဇၟာပ်မၞိဟ်တံကၠောန်ကၠုၚ်ဒၟံၚ်ဒုဟ်တုဲ သ္ၚောဲခြာအာကဵုကျာ်ရ။သာ်ဂှ်ရ ဇၟာပ်မၞိဟ်တံဝွံ ဒှ်သၞကျာ်အိုတ်ရ။
ဆမ္ဂး ကျာ်ထာဝရဝွံ ဟိုတ်နူဆာန်ဒၟံၚ်ကောန်လောကတံတုဲ ကောန်ဇကုနွံဒၟံၚ်ဆမွဲဂှ် ကဵုကောန်ဒုဟ်တံရ။ ဇၟာပ်မၞိဟ်တံ ပ္တေဟ်ကောန်ကျာ်မ္ဂး ဟွံဒးဒုၚ်စဳရေၚ်ဒုဟ်တုဲ ဂွံဂျိုၚ်လမျီုကရောံညးလၟိုန်ထာဝရရောၚ်။
ဟိုတ်နူမၞိဟ်တံဒုဟ်နွံဒၟံၚ်တုဲ ထေက်တန်ကဵုဒးချိုတ်ရ။ ကျာ်ထေဲဒၟံၚ်ကဵုဒုဟ်မၞးတံကီုလေဝ်ဒေါသညးဂှ် စဝ်ဖျေံလ္တူနာဲယေသှုရ။ သွက်ဒုဟ်ဒန်မၞိဟ်တံဒးဒုၚ်ဂှ်လေဝ် နာဲယေသှုဒုၚ်ဂစိုတ်ကဵုလ္တူတိုၚ်ညးမဒၚ်ရ။
ယေသှုဝွံ ဒှ်ညးဟွံမွဲကဵုဒုဟ်ရ။ ညးဝွံ ဇၟာပ်ဒုဟ်မၞိဟ်မနွံပ္ဍဲလောကဏံသီုဖအိုတ်ဂွံကေတ်ဏာသ္ၚောဲသ္ၚောဲဂှ် ဒုၚ်ပူဇဴရ။ သာ်ဂှ်ရ နဲကဲပူဇဴနာဲယေသှုဂှ် ဂွံဗၠးဒုဟ်အရာခိုဟ်အိုတ်ရ။ ယေသှုဝွံ ဇကုညးဂှ်ဟိုတ်နူပူဇဴကဵုကျာ်တုဲ ၜိုန်လဵုဒုဟ်ဇၞော်ဇၞော် ကျာ်ဗၠးကဵုမာန်ရ။
ဒုဟ်မၞးဂွံဒုၚ်ကေတ်ဟံၚ်ပြာ်ဂှ် မၞးသ္ပကုသိုလ်ဂၠိုၚ်ဂၠိုၚ်ကီုလေဝ် ဗၠးဟွံမာန်ရ။ သွက်ဂွံသ္ပမိဿဟာဲကဵုကျာ်ဂှ် ဗီုလဵုလေဝ်ကၠောန်ဟွံဂွံရ။ ဆမ္ဂး မၞးပ္တေဟ်ကောန်ကျာ်နာဲယေသှုမ္ဂး ဒုဟ်မၞးဗၠးမာန်ရ။ နာဲယေသှုဝွံ ဒှ်ကောန်ကျာ်ကီု၊ သွက်ဒုဟ်ပိုဲတံဂှ် ညးဒုၚ်ဂစိုတ်လဝ်လ္တူတိုၚ်ညးမဒၚ်တုဲ ကျာ်ထာဝရကဵုညးဂျိုၚ်တိုန်လဝ်နူဂမ္စိုတ်ကီုဂှ် ယဝ်ရမၞးဒုၚ်တဲပ္တေဟ်မ္ဂး ဒုဟ်မၞးတံသီုဖအိုတ်ဂှ် ကျာ်ဗၠးကဵုရောၚ်။
မၞိဟ်ပ္တေဟ်ယေသှုတုဲဒုၚ်တဲညးနကဵုတဳလပိုန်မ္ဂး ကျာ်ဟံၚ်ပြာ်ကဵုရောၚ်။ ဆမ္ဂး မၞိဟ်ဟွံပ္တေဟ်ယေသှုဂှ် ကျာ်ဟွံဟံၚ်ပြာ်ရ။ မၞးဂွံဒုၚ်ဟံၚ်ပြာ်မာန်ဂှ် မၞးဝွံ(သေဌဳ၊ တၠဒဒိုက်၊ မၞိဟ်ဗြဴ၊ မၞိဟ်တြုံ၊ အဝဲဗျု၊ အဝဲဍောတ်၊ ဒၞာဲမၞးတံဒၟံၚ်ဒၟံၚ်ဂှ်) အဓိကဟွံသေၚ်ပုဟ်။ ကျာ်ဝွံ ဆာန်မၞးတံတုဲ မၞးတံဂွံဒုၚ်တဲပ္တေဟ်နာဲယေသှုဂှ် ပၟိက်နွံဒၟံၚ်ရ။ နဲကဲဏံဟေၚ် အခေါၚ်မၞးတံဂွံသ္ပမိဿဟာဲကဵုကျာ်ထာဝရဂှ် ဂွံမာန်ရ။
နာဲယေသှုဝွံ မၞးတံဂွံပ္တေဟ်ညးကီု၊ ဂွံဒုၚ်ၜါတ္တိဇာံကီုဂှ် ကော်ဘိက်ဒၟံၚ်ရ။ နာဲယေသှုဝွံမဒှ်တၠညးဟံၚ်ပြာ်၊ မဒှ်ကောန်ကျာ်ဆမွဲဇကုဟေၚ်ဂှ် မၞးပ္တေဟ်ဟာ?။ မၞးဝွံ ဒှ်ကောန်ဒုဟ်တုဲ ထေက်တန်ကဵုဒးဒုၚ်စဳရေၚ်ဒုဟ်ဒန်ဂှ် မၞးဒုၚ်တဲဟာ? နာဲယေသှုဝွံ ဒုၚ်ဂစိုတ်လဝ်လ္တူတိုၚ်ညးမဒၚ်တုဲ ကေတ်ဏာဒုဟ်မၞးတံသီုဖအိုတ်ဂှ် မၞးပ္တေဟ်ဟာ?
အရာယေသှုကၠောန်လဝ်ကဵုသွက်မၞးဂှ် ယဝ်ရ ပ္တေဟ်မ္ဂး မၞးဒှ်ကောန်ခရေတ်ယာန်မွဲရ။ ကျာ်ထာဝရဝွံ နုက်ကေတ်မၞး နူဍုၚ်စာတန် ပ္ဍဲဒမၠုတုဲ ကော်နၚ်မၞးပ္ဍဲသန်ထာန်ကျာ်ဒၞာဲယးတၟးဂှ်ရ။ ကျာ်ဝွံ ဒုစရိုတ်မဆေၚ်စပ်ကဵုဘဝတြေံဂှ် နုက်ကေတ်တုဲ ဘဝတၟိမဆေၚ်ကဵု ဂၠံၚ်ဓဝ်ဍာံကဵုမဂျိုၚ်လမျီုဂှ် ကဵုလဝ်ရ။
ယဝ်ရမၞးကောန်ခရေတ်ယာန်မွဲမ္ဂး ဒုဟ်မၞးဂှ် ကျာ်ဗၠးကဵုတုဲရ။ မူဟိုတ်ရောမ္ဂး နာဲယေသှုဒုၚ်ဂစိုတ်လဝ်လ္တူတိုၚ်ညးမဒၚ်တုဲရ။ လၟုဟ်ဝွံ မၞးဂှ်သၞကျာ်ဟွံသေၚ်ရ။ မၞးဝွံ သ္ပမိသဟာဲကဵုကျာ်ထာဝရဂွံရ။
ယဝ်ရ မၞးဂှ် ဒှ်မိသဟာဲကျာ်ထာဝရကဵုနာဲယေသှုမ္ဂး အရာနာဲယေသှုဒလောံဗ္တောန်ကဵုနာနာသာ်တံဂှ် မၞးဒးဒ္ဂေတ်ဗက်ရောၚ်။ ၜိုန်ရ မၞးဒှ်ဒၟံၚ်ခရေတ်ယာန်မွဲကီုလေဝ် ဒးဒုၚ်လှေံလှန်ဒုဟ်ကီုရောၚ်။ဆမ္ဂး ကျာ်ထာဝရဝွံ မဒှ်ညးမနွံကဵုသစ္စတုဲ မၞးဒုၚ်ဝန်ဒုဟ်မၞးမ္ဂး ညးဗၠးဒုဟ်ရောၚ်။ ဇြဟတ်ဂွံဗ္တိုက်ကဵု ဒုဟ်စရိုတ်မာန်ဂှ်လေဝ် ညးကဵုမၞးရောၚ်။
ကျာ်ဝွံ မၞးဂွံရာဒနာမိက်ကီု၊ဂွံဗှ်သၠပတ်ကီု၊ဂွံရာဒနာမိက်ကဵုခရေတ်ယာန်တၞဟ်တံမွဲစွံဂှ် ညးဟီုလဝ်ကီုရ။ အရာကျာ်ကၠောန်လဝ်လ္တူမၞးဂှ်လေဝ် မၞးဒးလဴထ္ၜးကဵုညးတၞဟ်ရ။ ယဝ်ရမၞးကၠောန်သာ်ဏံမ္ဂး ကျာ်ကဵုဒှ် မိဿာဟာဲညးမဍိုက်ပေၚ်ကဵုဇြဟတ်ရ။
ပုံသၠပတ်သမ္မာ : ရဝ်မသြဝါဒ ၃း၂၁-၂၆၊ ၅း၁-၁၁၊ ခရေတ်ဝၚ်ယဝ်ဟာန် ၃း၁၆၊ ခရေတ်ဝၚ်မာကု ၁၆း၁၆၊ ကဝ်လဝ်သေသြဝါဒ ၁း၁၃-၁၄၊ ကဝ်ရိန်သုသြဝါဒ ဒုတိယဝက် ၅း၁၇-၂၁၊ ယဝ်ဟာန်သြဝါဒ ပထမဝက် ၁း၅-၁၀