၄။ ကတ္တိကကျာ်ကဵုအာဗြဟာမ်
ဍာ်ဇၞော်တုဲလအ်ကၠုၚ်သၞာံဗွဲမဂၠိုၚ်တုဲဂှ် မၞိဟ်ဂမၠိုၚ်တံပေၚ်ကၠုၚ်လ္တူဂၠးတိမွဲဝါပၠန်ရ။ မၞိဟ်တံကၠောန်ဒုဟ်စရိုတ်ပၠန်ရ။ ညးတံသီုဖအိုတ်တံဝွံ ဟိုတ်နူသုၚ်စောဲအရေဝ်ဘာသာတုပ်ဒၟံၚ်တုဲ စၞးကျာ်ဟီုပၟိၚ်လဝ် ဂွံမံၚ်ဗပေၚ်ဂၠးတိဂှ် မၞိဟ်တံပကောံညးသ္ကအ်တုဲ သိုၚ်ခၞံတိုန်ဍုၚ်ရ။
ညးတံဝွံ မာနသၠုၚ်ဒၟံၚ်တုဲ အရေဝ်ကျာ်ဟီုပၟိၚ်လဝ်ဂှ် ဟွံကလၚ်တုဲမံၚ်ဒၟံၚ်ရ။ ညးတံလေဝ် စၚ်စၟဳစဵုစိုပ်အာကာသသၠုၚ်သၠုၚ်မွဲဂှ် စဒက်ပ္တန်ရ။ ယဝ်ရ မၞိဟ်တံသီုဖအိုတ် ဆက်ကၠောန်မံၚ်အရာဟွံခိုဟ်မွဲစွံဏီမ္ဂး ဒုဟ်ဒုစရိုတ်ဂၠိုၚ်တိုန်ရောၚ်ဂှ် ကျာ်ညာတ်ဒၟံၚ်ရ။
ဟိုတ်ဂှ်ရ နူအရေဝ်ဘာသာညးတံတုပ်ဒၟံၚ်ဂှ် ကျာ်ပါ်ခြာကေတ် အရေဝ်ဘာသာနာနာသာ်တုဲ ကဵုပြးချာဲတိတ်အာ အလုံဂၠးတိဇၞော်ရ။ကၟာၚ်ဍုၚ်ညးတံစဒက်ပ္တန်ဂှ်လေဝ် ကော်ခဴစ ဍုၚ်ၜါၜုလုၚ်ရ။ အဓိပ္ပါဲဂှ် “ထုဲနှဴ” မဒှ်ရ။
လအ်ကၠုၚ်ကၠံသၞာံတုဲ ကျာ်ဟီုရေဝ်ကဵုမၞိဟ်မနွံယၟုအာဗြာမ်မွဲဂှ်ရ။ ကျာ်ဟီုပၟိၚ် “မၞးကဵုသ္ၚိကၟိန်မၞးတံ တိတ်အာနူဍုၚ်ဂှ်တုဲ ဒၞာဲတိဂွံအာဂှ်အဲထ္ၜးဂှ်မၞးရောၚ်။ အဲကဵုမ္ၚဵုမၚ်္ဂလကဵုမၞးတုဲ ကဵုဒှ်ဂကူဇၞော်ဇၞော်မွဲရောၚ်။ ယၟုမၞးဂှ်လေဝ် အဲကဵု ဒယှ်ရောၚ်။ မၞိဟ်ကဵုမ္ၚဵုမၚ်္ဂလကဵုမၞးဂှ် အဲကဵုမ္ၚဵုမၚ်္ဂလတုဲ မၞိဟ်ချဴမၞးဂှ်လေဝ် ဒးဒုၚ်ချဴကီုရောၚ်။ ဟိုတ်နူကဵုမၞးတုဲ သ္ၚိကၟိန် လ္တူတိဇၞော်သီုဖအိုတ်ဂှ် ဂွံဒုၚ်မ္ၚဵုမၚ်္ဂလအိုတ်ရောၚ်။”
ဟိုတ်ဂှ်ရ အာဗြာမ် ကလၚ်အရေဝ်ကျာ်ရ။ အာဗြာမ်ဝွံ ကော်ဏာ ဗြဴညးတေံသာရာဲ၊ကောန်လိၚ်သီုဖအိုတ်ကဵု ပိုန်ဒြပ်ညးသီုဖအိုတ်ဂှ်တုဲ တိတ်ကၠုၚ်တိဍာ် ကျာ်ထ္ၜးလဝ်တိရးခါနာန်ဂှ်ရ။
အခိၚ်အာဗြာမ်စိုပ်အာ ပ္ဍဲတိခါနာန်ဂှ် ကျာ်ဟီု " ဒိုဟ်နာနာသာ်ဂှ် ဗဵုညိ၊ တိဍာ်သီုဖအိုတ်ဏံဂှ် အဲကဵု မၞးရောၚ်။ကောန်စဴကောန်စေက်မၞးတံလေဝ် ဂွံပိုၚ်ပြဳတိဍာ်ဏံ လၟိုန်ကာလရောၚ်။” တုဲဂှ် အာဗြာမ်လေဝ် ဖျေံဒၞာဲပ္ဍဲဲတိဍာ်ဂှ်ရ။
မၞိဟ်မနွံယၟုမေလခိဇေဍေက်ဝွံ ဒှ်ယတ်ပရောဟိတ်ဇၞော်မွဲရ။အာဗြာမ်ဝွံ ဗတိုက်ပၞာန်တုဲမွဲတ္ၚဲဂှ် ဆဵုဂဗးကဵုမေလခိဇေဍေက်ရ။ ညးဝွံ ကဵုမ္ၚဵုမၚ်္ဂလကဵုအာဗြာမ်တုဲ ဟီုဂး “ညးမပိုၚ်ပြဳအာကာသကဵုတိဇၞော်၊ကျာ်မသၠုၚ်ပြဲအိုတ်ဝွံ လ္တူအာဗြာမ်ဂှ် ကဵုမ္ၚဵုမၚ်္ဂညိ" တုဲဂှ် အာဗြာမ်ဝွံ အရာအိုတ်သီုညးပိုၚ်ပြဳလဝ်စှ်ဂအုံမွဲဂအုံဂှ် ကဵုမေလခိဇေဍေက်ရ။
ၜိုန်ရလောန်ကၠုၚ်သၞာံဗွဲမဂၠိုၚ်ကီုလေဝ် အာဗြာမ်ကဵုသာရာဲဝွံ ဟွံဂွံကောန်ဏီရ။ ကျာ်ကဵုကတိကဵုအာဗြာမ်မွဲဝါပၠန်မ္ဂးဂှ် “ညးဝွံ ဂွံကောန်တြုံမွဲတုဲ ကောန်စဴကောန်စေက်တံလေဝ် ညံၚ်ရဴသၞံၚ်လ္တူအကးဂှ် ဂၠိုၚ်တဴရောၚ်။” အာဗြာမ်လေဝ် ပ္တေဟ်ဒၟံၚ်ဂတိကျာ်ရ။ ဟိုတ်နူအာဗြာမ် ပ္တေဟ်ဒၟံၚ်ဂတိကျာ်တုဲ ကျာ်ဝွံ လလောၚ်တြးပရိုၚ်အာဗြာမ် မဒှ်မၞိဟ်သ္တပ်လ္ဂူရ။
တုဲဂှ်ကျာ်ကဵုအာဗြာမ်ဝွံ စွံကတ္တိကမွဲရ။ ကတ္တိကဟီုမ္ဂးဂှ် ဒှ်အရာမတုပ်စိုတ် အကြာမၞိဟ်ၜါလ္ပာ် ရ။ အဃောအာဗြာမ်တိတ်လှိၚ်ဒၟံၚ်ဗွဲမဇၞော်ဂှ် ကျာ်ကဵုလဝ်ဂတိဏံရ၊ ၜိုန်ဂှ်တိက်လှိၚ်မံၚ်ကီုလေဝ် ကျာ်ဟီုဒၟံၚ်ဂှ် ညးမိၚ်မံၚ်ရ။ ကျာ်ဟီု “နူကဵုခန္ဓဇကုမၞးဂှ် အဲကဵုကောန်တြုံမွဲရောၚ်။ တိခါနာန်ဂှ်လေဝ် အဲကဵုကောန်စဴကောန်စေက်မၞး ပၠန်ရောၚ်” ဆမ္ဂး အခိၚ်ဂှ် အာဗြာမ် ဟွံဂွံ ကောန်ဏီရ။
ပုံ သၠပတ်သမ္မာ : သၠပတ်ပထမကဝ် ၁၁-၁၅