၄၀။ ယေသှုဒးဒုၚ်ဂစိုတ််လ္တူတိုၚ်မဒၚ်

ကောန်ပၞာန်တံဝွံ သ္ပပြေံၜုၚ်တက်ယေသှုတုဲ ဂွံဂစိုတ်ညးလ္တူတိုၚ်မဒၚ်ဂှ် ကော်ဏာရ။ အဃောကော်ဏာဂှ် တိုၚ်မဒၚ်ညးဂှ်လေဝ် ကဵုယိုက်ကေတ်ရ။

ကောန်ပၞာန်တံဝွံ ဒၞာဲဂေါဝ်လဂေါဝ်သ မကော်ခဴစ အရာပ်ဂၞာက္ဍိုပ်ဂှ် ကော်ဏာယေသှုရ။ ဇိုၚ်တဲညးဂှ် တက်လဝ်လ္တူတိုၚ်မဒၚ်ရ။ ယေသှုလေဝ်“ မအံက်၊ အရာညးတံကၠောန်ဒၟံၚ်ဂှ် ညးတံဟွံတီတုဲ ဒုဟ်ညးတံဂှ် ဗၠးကဵုညိ” ဒုန်ဂုန်မအံက်ရ။ သၟိၚ်ပိလာတ်ဝွံ ကဵုချူမလိက် “ ဨကရာတ်ယုဍ ” တုဲ လ္တူတိုၚ်မဒၚ်ယေသှုဂှ် တက်လဝ်ရ၊

ကောန်ပၞာန်တံဝွံ ယာတ်ပလောံယေသှုဂှ်ဝေၚ်လံၚ်ရ။ အတိုၚ်ပရောဗက်ကၠာတေံဟီုတွံလဝ်“ မၞိဟ်တံဝေၚ်လံၚ်ယာတ်ပလောံ တၠညးဟံၚ်ပြာ်ဂရောၚ်ဂှ်”လၟုဟ်ဍိုက်ပေၚ်ကၠုၚ် ရ။

ကောန်ပၞာန်တံဝွံ ပ္တိုန်ယေသှုလ္တူတိုၚ်မဒၚ် လ္ဒေါဝ်တိုၚ်မဒၚ်ကမၠတ်ၜါဂှ်ရ ။ ကမၠတ်မၞိဟ်မွဲတၠဂှ် သ္ပပြေံညးရ။ မၞိဟ်မွဲတၠဂှ်လေဝ် “ကျာ်ကဵုဒုဟ်ဒန်ဂှ် ဟွံဖေက်ပုဟ်ဟာ၊ ပိုဲတံဂှ် ဒုဟ်နွံကီုလေဝ် ညးဝွံ ဒုဟ်ဟွံမွဲပုဟ်" ကလေၚ်ဟီုတုဲ ဂတးလ္ပာ်ယေသှုမ္ဂး “ တဳလဂုန် ၊ သ္ပဂုန်တုဲ ပ္ဍဲသန်ထာန်တဳလဂုန်ဂှ် စၟတ်သမ္တီကဵုအဲဍိက်ညိ ” ဒုၚ်ဂုန်ရ။ ယေသှုလေဝ်“ တ္ၚဲဏံမၞးနွံကရောံအဲ ပ္ဍဲဘုံပါရာဍဳသုတေံရောၚ်” ကလေၚ်ဟီုဂးရ။

မၞိဟ်က္ဍိုပ်သ္ကိုပ်ဘာသာယုဍကဵု မၞိဟ်ဂမၠိုၚ်တံဝွံ “မၞးဒှ်ကောန်ကျာ်ဍာံမ္ဂး နူလ္တူတိုၚ်မဒၚ်ဂှ် စှ်ေကၠုၚ်တုဲ ဟံၚ်ပြာ်ဇကုဇကုညိ၊ ယဝ်ရဟံၚ်ပြာ်မာန်မ္ဂး ပိုဲတံပ္တေဟ်ရောၚ်”သာ်ဂှ် သ္ပပြေံယေသှုရ။

နူကဵုအခိၚ်အဒေါဝ်တ္ၚဲဂှ် ဂၠုကၠုၚ်အလုံဂၠးအကာသတုဲ ပွိုၚ်ပိနာဍဳဂှ် ဒမၠုဂြောပ်ဓလီုဒၟံၚ်ရ။

ယေသှုဝွံ “ 'အမှုတုဲယျ'၊ ဝိညာန်အဲဂှ် ပ္အပ်ပ္ဍဲတဲမအံက်ရ”ကရေဲလရိုအ်တုဲ က္ဍိုပ်ညးဒစေၚ်စှ်ေအာမ္ဂး လမျီုအိုတ်အာရ။ လမျီုယေသှုတိတ်တုဲ ဗွဲမပြဟ်ဂှ် တဳချဳရ။ ပ္ဍဲလွဳမာန် ဒၞိက်ဒၞာလဝ်အခန်ကျာ်ဂှ်လေဝ် စာ်ထကးအာၜါကရေက်ရ။

ဟိုတ်နူနာဲယေသှုဒုၚ်ဂစိုတ်လဝ်တုဲ သွက်မၞိဟ်တံဂွံကၠုၚ်ပ္ဍဲထာန်ကျာ်ဂှ် ဂၠံၚ်ပံက်အာရ။ကောန်ပၞာန်မၚ်ဒၟံၚ်ယေသှုမွဲဂှ် ဆဵုညာတ် ဒဒှ်ဂှ်တုဲ “ မၞိဟ်ဏံဂှ် ဒုဟ်ဟွံမွဲပုဟ်၊ ဒှ်ကောန်ကျာ်ဍာံဍာံရ” သာ်ဂှ်ဟီုရ။

မၞိဟ်က္ဍိုပ်သ္ကိုပ်ဘာသာယုဍ မနွံယၟုယဝ်သာတ်ကဵုနိကဝ်ဍဳမာတ်တံဝွံ နာဲယေသှုမဒှ်တၠညးဟံၚ်ပြာ်ဂှ် ပ္တေဟ်ဒၟံၚ်ရ။ညးတံဝွံပ္ဍဲသၟိၚ်ပိလာတ်ဂှ် ကၠုၚ်အာတ်ကေတ်ဇွယေသှုရ။ ဇွယေသှုဂှ် ညးတံဂွဳကဵုယာတ်တုဲ ပၠုပ်စွံပ္ဍဲသုသာန်ဂူတၟံရ။ ညးတံဝွံ နကဵုတၟံလးဇၞော်ဂှ် ပၠောကၟာတ်တြၚ်ရ။

ပုံသၠပတ်သမ္မာ : ခရေတ်ဝၚ်မာတ်သာဲ၂၇း၂၇-၆၁၊ ခရေတ်ဝၚ်မာကု ၁၅း၁၆-၄၇၊ ခရေတ်ဝၚ်လုကာ ၂၃း၂၆-၅၆၊ ခရေတ်ဝၚ်ယဝ်ဟာန် ၁၉း၁၇-၄၂