၈။ ကျာ်ဟံၚ်ပြာ်ယဝ်သေပ်ကဵု သ္ၚိကၟိန်ယဝ်သေပ်

လောန်ကၠုၚ်သၞာံဗွဲမဂၠိုၚ်တုဲဂှ် ယျာကောပ်လေဝ် ဗျုရ။ ယျာကောပ်ဗလးဏာ ကောန်ဆာန်အိုတ်ယဝ်သေပ် ဒၞာဲကောဒေံညးမၚ်လွဳဒၟံၚ်တိရစ္ဆာန်ဂှ်ရ။

ကောဒေံယဝ်သေပ်ဝွံ က္ဍုဟ်မၠေံဒၟံၚ်ယဝ်သေပ်ရ။ဟိုတ်နူအပါညးတံဂှ် ဆာန်ယဝ်သေပ်ဂၠိုၚ်လောန်ရ။ မ္ၚးနူဂှ် ပ္ဍဲလ္ပအ်ညာတ်ယဝ်သေပ် ဂှ် ညးတေံအုပ်လဒံလ္တူကောဒေံရ။ အခိၚ်ယဝ်သေပ်စိုပ်ကၠုၚ် ဒၞာဲမၚ်လွဳဒၟံၚ်တိရစ္ဆာန်ဂှ် ကောဒေံညးတေံသ္ပသၞတုဲ သွံကဵုသၟာရဲကူသွံဍိက်လ္ၚဵုတံဂှ်ရ။

ကောဒေံယဝ်သေပ်တံဝွံ ကၠာဟွံကလေၚ်စဴသ္ၚိဏီဂှ် ညးတံဂစာ်ပလောံယဝ်သေပ်တုဲ ဗလိုက်ထောံပ္ဍဲဆီဗၜေံရ။ တုဲဂှ် အပါညးတံ ညံၚ်ဂွံထေၚ်ဟယျ သတ္တိရစ္ဆာန်အရိုၚ်တံ ဂစိုတ်ထောံယဝ်သေပ်ဂှ် ညးတံထ္ၜးကဵုယာတ်ပလောံယဝ်သေပ်ဂှ်ရ။ သာ်ဂှ်ရ ယျာကောပ်ဝွံ အောန်စိုတ်ဗွဲမလောန်ရ။

သၟာရဲကူသွံဍိက်တံဝွံ ကော်ဏာယဝ်သေပ်ပ္ဍဲဍုၚ်အာဲဂုတ္တုရ။ ဍုၚ်အာဲဂုတ္တုဝွံ ဒှ်ဍုၚ်ဇၞော်ဇၞော်၊ ဒှ်ဍုၚ်မဇၞော်ကဵုဇြဟတ်မွဲတုဲ နွံဒၟံၚ်မွဲဒမြိပ်( Nile )ၜဳရ။ သၟာရဲကူသွံဍိက်တံဝွံ နကဵုဍိက်ဂှ် သွံယဝ်သေပ်ကဵုမၞိဟ်ဇၞော်အာဲဂုတ္တုမွဲဂှ်ရ။ ယဝ်သေပ်လေဝ် ဂစာန်ကမၠောန်သွက်တၠညးတေံခိုဟ်ခိုဟ်ရ။ ကျာ်လေဝ်ကဵု မ္ၚဵုမၚ်္ဂလကဵုယဝ်သေပ်ရ။

ဗြဴတၠအ္စာ ယဝ်သေပ်ဝွံ လှေံလှန်ဂွံတိက်ကဵုယဝ်သေပ်ရ။ ဆမ္ဂး ဂၠံၚ်ကျာ်ဟွံဒးစိုတ်ဂှ် ယဝ်သေပ်တီဒၟံၚ်တုဲ ပါဲထောံဗြဴဂှ်ရ။ ဗြဴဂှ်လေဝ် ထေဲတုဲ သ္ပဒုဟ်ကဵုယဝ်သေပ်ရ။ သာ်ဂှ်ရ ယဝ်သေပ်ဒးဒုၚ်ရပ်တုဲ ဒးပၠုပ်စွံလဝ်ပ္ဍဲထံၚ်ရ။ ၜိုန်ရယဝ်သေပ်နွံဒၟံၚ််ပ္ဍဲထံၚ်ကီုလေဝ် ပ္တေဟ်ဒၟံၚ်ကျာ်ဏီရ။ ကျာ်ကဵုဒၟံၚ်မ္ၚဵုမၚ်္ဂလညးတေံရ။

ၜိုန်ရယဝ်သေပ်ဒုဟ်ဟွံမွဲကီုလေဝ် နွံဒၟံၚ်ပ္ဍဲထံၚ်ဂှ် လောန်ကၠုၚ်ၜါသၞာံတုဲရ။ မွဲဗ္တံဂှ် မဒှ်သၟိၚ်ကောန်ဍုၚ်အာဲဂုတ္တု၊ ဨကရာတ်ဖာရောဝ်ဝွံ လ္ပအ်ညာတ်လ္ပအ်ၜါသာ်တုဲ စိုတ်ယှုက်ထုဲဒၟံၚ်ရ။အဓိပ္ပါဲလ္ပအ်ဏံဂှ် အမာတ်မွဲလေဝ် လဴထ္ၜးကဵုဟွံမာန်ရ။

ကျာ်ဝွံ ယဝ်သေပ် ဂွံပံက်ထ္ၜးကဵုအဓိပ္ပါဲလ္ပအ်မာန်ဂှ်ကဵုလဝ်ဣဓိရ။ သာ်ဂှ်ရ ဨကရာတ်ဖာရောဝ်ဝွံ ကဵုပ္တိတ်နၚ်ယတ်သေပ်ပ္ဍဲကဵုထံၚ်ရ။ယဝ်သေပ်လေဝ်လဴထ္ၜးအဓိပ္ပါဲလ္ပအ်ဨကရာတ်ဂှ် "သွက်ထပှ်သၞာံကၠာဂှ် ကျာ်ကဵုဇွောံမသတ်ဒကောၚ်ဗွဲမဂၠိုၚ်ရောၚ်။ ကြဴထပှ်သၞာံဂှ် ကဵုစၞစကၠောဝ်ဗျဵုရောၚ်။

ဨကရာတ်ဖာရောဝ်ဝွံ အထေၚ်ဇၞော်ကဵုယဝ်သေပ်တုဲ ခါန်ကၞက်စွံဒၞာဲ အဆံၚ်ဒုတိယျ ပ္ဍဲဍုၚ်အာဲဂုတ္တုမၞိဟ်ဝဵုဇၞော်အိုတ်ရ။

အခိၚ်သြောံခိုဟ်ဒၟံၚ်ပွိုၚ်ထပှ်သၞာံဂှ် ယဝ်သေပ်ဝွံ ဂွံပကောံစွံလဝ်ဇွေံာမဂၠိုၚ်ဂၠိုၚ်ဂှ် ဟီုကဵုမၞိဟ်ဂမၠိုၚ်တံရ။ဟိုတ်ဂှ်ရ စိုပ်ကၠုၚ်အခိၚ်ကၠောဝ်ဗျဵုဂှ် စၞစရုံဂပ်တုဲ ဇွောံမပဵုဂှ် ယဝ်သေပ်ဝွံ သွံကဵုမၞိဟ်တၞဟ်တၞဟ်တံမာန်ရ။

ဒဒိုက်မကၠောဝ်ဗျဵုဝါတ်ဂါတ်ဒၟံၚ်ဂှ် ပ္ဍဲဍုၚ်အာဲဂုတ္တုသၟးသၟးဟွံသေၚ်၊ ပ္ဍဲရးခါနာန်ဒၞာဲသ္ၚိကၟိန်ယျာကောပ်တံ မံၚ်ဒၟံၚ်ဂှ်လေဝ် စၞစကၠောဝ်ဗျဵုကီုရ။

သာ်ဂှ်ရ ယျာကောပ်ဝွံ သွက်ဂွံရာန်စၞစပ္ဍဲဍုၚ်အာဲဂုတ္တုတေံဂှ် ဗၠးဏာကောန်ဇၞော်တံဂှ်ရ။ကောဒေံယဝ်သေပ်တံဝွံ သွက်ဂွံရာန်စၞစဂှ် ၜိုန်ရဒတဴဒၟံၚ်ဂတမုက်ယဝ်သေပ်ကီုလေဝ် ညးတံသမ္တီဟွံဒးရ။ဆမ္ဂး ယဝ်သေပ်ဝွံ ပ္တီဒးဒၟံၚ်ညးတံရ။

ယဝ်သေပ်စၟဳစၟတ်ကောဒေံတံတုဲ ယဝ်သေပ်ဟီု၊ “ အဲဂှ် ဒေံမၞးတံ ယဝ်သေပ်ရ၊ လ္ပဖေက်အိုတ်ညိ။ ကောဂၠုတံသွံထောံအဲ နကဵုဍိက်မွဲတုဲ ကၠောန်လဝ်လ္တူအဲဟွံခိုဟ်ကီုလေဝ် နူကဵုအရာဟွံခိုဟ်ဏံဂှ် ကျာ်ကဵုဒှ်အရာခိုဟ်ရ။ပြံၚ်ကၠုၚ်ပ္ဍဲဍုၚ်အာဲဂုတ္တုညိ။ကောဂၠုတံကဵုသ္ၚိကၟိန်ကောဂၠုတံသီုဖအိုတ် သွက်ဂွံစသုၚ်မံၚ်စံၚ်ဂှ် အဲထံက်ပၚ်ကဵုရောၚ်။

ကောဂၠုယဝ်သေပ်တံဝွံ ကလေၚ်စိုပ်သ္ၚိတုဲ ပရူယဝ်သေပ်ဂျိုၚ်ဒၟံၚ်ဏီဂှ် လဴထ္ၜးကဵုအပါညးတံရ။ ညးမိၚ်ပရိုၚ်ဂှ်တုဲ မိပ်သၠောၚ်ကွေံရ။

ၜိုန်ရယျာကောပ်ဗျုဒၟံၚ်ကီုလေဝ် သီုကဵုသ္ၚိကၟိန်ညးသီုဖအိုတ်ဂှ် ပြံၚ်ကၠုၚ်ပ္ဍဲဍုၚ်အာဲဂုတ္တုတုဲ မံၚ်ဒၟံၚ်ဒၞာဲဂှ်ရ။ကၠာယျာကောပ်ဟွံချိုတ်ဏီဂှ် ညးကဵုမ္ၚဵုမၚ်္ဂလကဵုဇၟာပ်ကောန်တြုံရ။

ကတ္တိကကျာ်ကဵုလဝ်အာဗြဟာမ်ဂှ် စှ်ေကၠုၚ်လ္တူဣဇက်၊ တုဲဂှ် လ္တူယျာကောပ်ကဵုကောန်တြုံယျာကောပ်စှ်ၜါသီုကဵုသ္ၚိကၟိန်ညးတံရ။ တၞောဝ်ဒတောဝ်ကောန်တြုံစှ်ၜါတံဝွံ ဒှ်ကၠုၚ်ဂကူဣသရေလ စှ်ၜါဂကူရ။

ပုံသၠပတ်သမ္မာ: သၠပတ်ပထမကဝ် ၃၇-၅၀