၂၈။ သၞောဝ်သေဌဳသၟတ်
မွဲတ္ၚဲဂှ် သေဌဳသၟတ်မွဲ စိုပ်ကၠုၚ်ပ္ဍဲယေသှုတုဲ “ အစာခိုဟ်ပြဲ သွက်လမျီုထာဝရဂှ် ပိုဲဍိက်တံမူဒးကၠောန်ထေက်ရော?” ယေသှုလေဝ် “ မူဟိုတ်မၞးကော်အဲ အစာခိုဟ်ပြဲရော? ညးခိုဟ်ပြဲအိုတ်ဂှ် နွံဆကျာ်ထာဝရမွဲဟေၚ်ရ။ ယဝ်ရ မၞးနွံပၟိက်လမျီုထာဝရမ္ဂး အတိုၚ်သၞောဝ်ကျာ်ထာဝရဂှ် ဒ္ဂေတ်ဗက်ညိ၊”သာ်ဂှ်ကလေၚ်ဟီုရ။
သေဌဳသၟတ်ဝွံ “သၞောဝ်လဵု ပိုဲတံဒးဒ္ဂေတ်ဗက်ရော?” သၟာန်မ္ဂး ယေသှုလေဝ် “လ္ပဂစိုတ်လမျီုညး၊ လ္ပပလီုသမ္ဘာညး၊ လ္ပလီလာန်ညး၊ လ္ပကၠတ်ဒြပ်ညး၊ ရေဟ်သေဟ်မိမ၊ မၞိဟ်မဆေၚ်စပ်ကဵုဇကုဂှ် ညံၚ်ရဴဇကုဆာန်ညိ” သာ်ဂှ်ဟီုဂးရ။
သေဌဳသၟတ်ဝွံ “ နူဍောတ်ဍောတ်ဂှ် အဲဍိက်ဒ္ဂေတ်ဗက်လဝ်သၞောဝ်သီုဖအိုတ်တုဲရ။ သၞောဝ် ဂွံဂျိုၚ် လမျီုထာဝရဂှ် မူဒးကၠောန်နွံဒၟံၚ်ဏီရော? ”သာ်ဂှ်ကလေၚ်ဟီုမ္ဂး ယေသှုလေဝ် ရံၚ်မုက်ညးတုဲ ဆာန်ညးရ။
ယေသှုဝွံ “မၞးသေဌဳသၟတ်၊ ယဝ်ရ မၞးမိက်ဂွံဒှ် မၞိဟ်မခိုဟ်ပြဲအိုတ်တှ်ေ ပိုန်ဒြပ်သီုဖအိုတ်ဂှ် သွံတုဲ ပရအ်ကဵု မၞိဟ်ဝါတ်ဝါတ်တံညိ၊ သာ်ဂှ်သ္ပမ္ဂး ဗာန္ဒာမဆေၚ်ကဵုအကာသဂှ် မၞးဂွံဒုၚ်စရောၚ်၊ တုဲဂှ် ဗက်ကၠုၚ်လက်ကြဴအဲညိ”သာ်ဂှ်ဟီုပၟိၚ်ရ။
သေဌဳသၟတ်ဂှ်လေဝ် မိၚ်အရေဝ်ယေသှုဟီုဂှ်တုဲ ဒှ်တဴအောန်စိုတ်ဗွဲမလောန်ရ။ မူဟိုတ်ရောမ္ဂး ညးဝွံ ပိုန်ဒြပ်နွံဒၟံၚ် ဗွဲမဂၠိုၚ်ကီုလေဝ် ဟွံမိက်ပရအ်ကဵုညးတၞဟ်ရ။ သာ်ဂှ်ရ ညးဝွံ နူကဵုယေသှုဂှ် တိတ်အာသ္ၚောဲသ္ၚောဲရ။
အခိၚ်ဂှ် ယေသှုဝွံ “သေဌဳမ္ဂး ဂွံလုပ်ပ္ဍဲသန်ထာန်ကျာ်ဂှ် ဝါတ်လောန်ကွေံရ။ အုက်မွဲဝွံ ဂွံလုပ်ပ္ဍဲပထောၚ်ကၞိၚ်ဂှ် လောဲဒၟံၚ်ဏီရောၚ်”သာ်ဂှ် ဟီုကဵုကောန်ကွးတံရ။
ကောန်ကွးတံလေဝ် မိၚ်အရေဝ်ယေသှုတုဲ ဒှ်တဴအံသဝ်မ္ဂး “ဟီုသာ်ဂှ်မ္ဂး မၞိဟ်ဗီုလဵုဂှ် ကျာ်ဟံၚ်ပြာ်ရော?” သၟာန်ယေသှုရ။
ယေသှုလေဝ် ရံၚ်ကေတ်ကောန်ကွးတံတုဲ ” မၞိဟ်ဟီုမ္ဂး ဇကုဇကုဂွံဟံၚ်ပြာ်ကေတ်ဂှ် ဒှ်ဟွံမာန်ရ။ ဆမ္ဂး သွက်ကျာ်တှ်ေ အရာဒှ်ဟွံမာန်ဂှ် ဟွံမွဲရ။”
ပေတရုလေဝ် “ ပိုဲဍိက်တံ ထောံအရာအိုတ်သီုတုဲ ဗက်ကၠုၚ်လက်ကြဴတဳလပိုန်အိုတ်ရ၊ သွက်ပိုဲဂှ် ဂုန်ဖဵု မူဂွံရော?”သၟာန်ယေသှုရ။
ယေသှုဝွံ “ ဟိုတ်နူအဲဂှ် သ္ၚိ၊ ဗ္ၚ၊ ကောဒေံ၊ ၝဲဒေံ၊ ၊ မိ၊ အပါ၊ ကောန် ကဵု ပိုန်ဒြပ်ဆမနွံဂှ်မၞးတံထောံမ္ဂး လမျီုထာဝရကဵု ဂုန်ဖဵုကၠံဆဂှ် ဂွံဒုၚ်ကေတ်ရောၚ်။ ဟိုတ်ဂှ်ရ မၞိဟ်စိုပ်ကၠာဂှ် ဂွံလက်ကြဴတုဲ မၞိဟ်လက်ကြဴဂှ် စိုပ်ကၠာရောၚ်” သာ်ဂှ်ကလေၚ်ဟီုရ။
ပုံသၠပတ်သမ္မာ : ခရေတ်ဝၚ်မာတ်သာဲ ၁၉း၁၆-၃၀၊ ခရေတ်ဝၚ်မာကု ၁၀း၁၇-၃၁၊ ခရေတ်ဝၚ်လုကာ ၁၈း၁၈-၃၀