၃၇။နာဲယေသှု ကဵုလာဇရုဂျိုၚ်တိုန်နူချိုတ်
မွဲတ္ၚဲဝွံ 'လာဇရု'ဇွဟ်တိုန်တုဲယဲဒၟံၚ်ဂှ် ယေသှုမိၚ်ပရိုၚ်ရ။ မိၚ်ပရိုၚ်တုဲ ဗွဲမပြဟ်ဂှ် “ လၟုဟ် လာဇရု ဒှ်ဒၟံၚ်ယဲဇွဟ်ဂှ် သွက်ဂွံချိုတ်ဟွံသေၚ်။ သွက်တြဳဇှ်ကျာ်ထာဝရ ဂွံပြာကတ်ရောၚ်”ဟီုဂးရ။ မဒှ်ၝဲဒေံ လာဇရု 'မာရိ'ကဵု'မာသ' တံဝွံ ဒှ်ဒၟံၚ်သဟာဲယေသှုရ။ ၜိုန်ရဒှ်ဒၟံၚ်သဟာဲယေသှုကီုလေဝ် ညးဂွံကၠုၚ်စိုပ်ဒၞာဲဂှ် မၚ်ဒၟံၚ်ပွိုၚ်ၜါတ္ၚဲရ။
လောန်ကၠုၚ်ၜါတ္ၚဲတုဲဂှ် “ အာပ္ဍဲဍုၚ်ယုဍစိုအ်” ယေသှုဟီုကဵုကောန်ကွးတံတုဲ ကောန်ကွးတံလေဝ် “ တဳလဂုန်၊ ခြာဟွံလအ်ဂှ် မၞိဟ်ပ္ဍဲဍုၚ်ယုဍတံ မိက်ဂွံဂစိုတ်ဒၟံၚ်တဳလဂုန်ဟွံသေၚ်ဟာ”ကလေၚ်ဟီုရ။ ယေသှုလေဝ် “ ရဲသဟာဲအဲလာဇရု သ္တိက်လှိၚ်ဒၟံၚ်ဂှ် အဲဒးပ္ၚုဟ်ရောၚ်” သာ်ဂှ်ကလေၚ်ဟီုရ။
ကောန်ကွးတံလေဝ် “ တဳလဂုန်၊ ယဝ်ရ လာဇရုသ္တိက်လှိၚ်ဒၟံၚ်မ္ဂး ခိုဟ်လောန်သန်ရ” ။ ယေသှုဝွံ “ အဲဟွံမွဲပ္ဍဲအခိၚ်လာဇရုချိုတ်ဂှ် သွက်အဲတှ်ေ ခိုဟ်ကွေံရ။ မူဟိုတ်ရောမ္ဂး မၞးတံဂွံပ္တေဟ်အဲမာန်ရောၚ်”သာ်ဂှ် ဟီုဂးရ။
အခိၚ်ယေသှု စိုပ်ကၠုၚ်ဍုၚ်လာဇရုနွံဂှ် လာဇရုဝွံ ချိုတ်ဒၟံၚ်ပွိုၚ်ပန်တ္ၚဲလအ်ဒၟံၚ်ရ။'မာသ'လေဝ် ကၠုၚ်ဒုၚ်ယေသှုတုဲ “ တဳလဂုန်၊ ယဝ်ရ တဳလဂုန် နွံဒၟံၚ်ဒၞာဲဏံမ္ဂး လာဇရု ဟွံချိုတ်ပုဟ်၊ ယဝ်ရတဳလဂုန် အာတ်မိက်မ္ဂး အရာလဵုဒှ်ဒှ် ကျာ်ကဵုရောၚ်ဂှ် အဲဍိက်ဗြဴ ပ္တေဟ်ဒၟံၚ်ရ” သာ်ဂှ်ဟီုဂးရ။
ယေသှုလေဝ် “ အဲဂှ် မဒှ်လမျီုကီု၊မဒှ်ဂျိုၚ်တိုန်ကီုရ။ မၞိဟ်မပ္တေဟ်အဲသီုဖအိုတ်တံဝွံ ၜိုန်ရချိုတ်အာကီုလေဝ် ကလေၚ်ဂျိုန်တိုန်ပၠန်ရောၚ်။ ညးမပ္တေဟ်အဲတံဂှ် ဆလအ်ဟွံချိုတ်ပုဟ်ဂှ် မၞး ပ္တေဟ်ဟာ?” သာ်ဂှ်သၟာန်ရ။ 'မာသ'လေဝ် “ ယွံ၊ တဳလဂုန် ။ တဳလဂုန်ဂှ် ဒှ်တၠညးဟံၚ်ပြာ်၊ မဒှ်ကောန်ကျာ်ဂှ် အဲဍိက်ဗြဴပ္တေဟ်ဒၟံၚ်ရ။”
တုဲဂှ် မာရိစိုပ်ကၠုၚ်ရ။ မာရိဝွံ အောပ်မာတံဇိုၚ်ယေသှုတုဲ “ တဳလဂုန် ယဝ်ရတဳလဂုန်နွံဒၟံၚ်ဒၞာဲဏံမ္ဂး လာဇရု ဟွံချိုတ်ပုဟ်” သာ်ဂှ်ဟီုဂးရ။ ယေသှုလေဝ် “ ဒၞာဲလဵုစွံလဝ် လာဇရုရော? ” ကလေၚ်သၟာန်မ္ဂး“ စွံလဝ် ပ္ဍဲသုသာန်တေံရ၊ ကၠုၚ်ဗဵုညိ” ကော်ညးရ။ ယေသှုလေဝ် ဒှ်တဴအောန်စိုတ်တုဲ ဍာ်ရမတ်ဒဇူရ။
အခိၚ်အခါတေံဂှ် သုသာန်ဝွံ ဒှ်သုသာန်ထီုရ။ ပထောၚ်သုသာန်ဂှ် ပၠောကေတ်တၟံလးတုဲ ပံက်ကၟာတ်ဂွံရ။ ယေသှုဝွံ စိုပ်ကၠုၚ်သုသာန်ဂှ်တုဲ “ ပါၚ်တြၚ်သုသာန်ထီုဂှ် ပံက်ညိ” ဟီုကဵုညးတံရ။'မာသ'လေဝ် “ လာဇရုချိုတ်ဒၟံၚ်ဂှ် ပေၚ်ပန်တ္ၚဲတုဲယျ၊ သၟူလေဝ်ပသအုဲဒၟံၚ်ရောၚ်” ဟီုဂးရ။
ယေသှုလေဝ် “ ပ္တေဟ်အဲမ္ဂး ဂွံဆဵုဣဓိကျာ်ရောၚ်ဂှ် အဲဟီုလဝ်ဟွံသေၚ်ဟာ” သာ်ဂှ်ဟီုဂးရ။ ဟိုတ်ဂှ်ရ ညးတံဝွံ ပံက်တြၚ်တၟံဂှ်ရ။
တုဲဂှ် ယေသှုဝွံ လ္ၚာ်ရံၚ်အကာသတုဲ “ မအံက်တၚ်ဂုန်ရ၊၊ မအံက်ဝွံ ကလၚ်ဒၟံၚ်ရမျှာၚ်အဲလၟိုန်ဂှ် အဲတီရ။။ အခိၚ်လၟုဟ် မၞိဟ်ဒတဴဒၟံၚ်ဒၞာဲဏံ ဂွံပ္တေဟ် မအံက်ဗၠးနၚ်အဲဂှ် အဲဟီုသာ်ဏံရ၊”တုဲဂှ် “လာဇရု တိတ်ကၠုၚ်မ္ၚးညိ” ယေသှုကော်ရ။
သာ်ဂှ်ရ လာဇရုလေဝ် သီုကဵုယာတ်ဇွဂှ် တိတ်ကၠုၚ်ရ။ ယေသှုဝွံ ကဵုသဟ်ယာတ်ဇွ ဂွဳလဝ်လာဇရုဂှ်ရ။ မၞိဟ်ယုဍဂမၠိုၚ်တံဝွံ ဆဵုညာတ်အရာဂှ်တုဲ ပ္တေဟ်ကၠုၚ်ယေသှုရ။
ဆမ္ဂး က္ဍိုပ်သ္ကိုပ်ဘာသာယုဍတံဝွံ ဟိုတ်နူမၞိဟ်ယုဍတံပ္တေဟ်ယေသှုတုဲ စိုတ်ၚံက်အာရ။ သာ်ဂှ်ရ ညးတံဝွံ ကောံဓရီုညးသ္ကအ်တုဲ သွက်ဂွံဂစိုတ်ယေသှုကဵု လာဇရုဂှ် ပ္တိတ်ကသပ်ရ။
ပုံသၠပတ်သမ္မာ : ခရေတ်ဝၚ်ယဝ်ဟာန် ၁၁:၁-၄၆