၉။ ကျာ်ကော်မဝ်သေ
ယဝ်သေပ်ချိုတ်အာတုဲ မဇညးသီုဖအိုတ်တံ မံၚ်ဒၟံၚ်ပ္ဍဲဍုၚ်အာဲဂုတ္တုရ။ မဇယဝ်သေပ်ကဵုတၞောဝ်ဒတောဝ်ညးတံဝွံ သၞာံဗွဲမဂၠိုၚ် ဆက်မံၚ်ပ္ဍဲဍုၚ်အာဲဂုတ္တုဂှ်တုဲ ကောန်ဇာတ်ဗွဲမဂၠိုၚ်လေဝ်က္တဵုဒှ်ကၠုၚ်ရ။ညးတံဂှ် ကော်ခဴစ"ဂကူဣသရေလ" ရ။
လောန်ကၠုၚ်ကၠံစှ်ောသၞာံတုဲဂှ် လၟိဟ်ကောန်ဂကူဣသရေလတံလေဝ် ဂၠိုၚ်တိုန်ကၠုၚ်ရ။ကောန်ဍုၚ်အာဲဂုတ္တုတံဝွံ ၜိုန်ရယဝ်သေပ်ကၠောန်လဝ်သွက်ညးတံဗွဲမဂၠိုၚ်ကီုလေဝ် ညးတံဟွံတီဂုဏ်ရ။ ဟိုတ်နူဂကူဣသရေလတံဂၠိုၚ်ဒၟံၚ်တုဲ ညးတံဖေက်ရ။သာ်ဂှ်ရ သၟိၚ်အုပ်ဓုပ်ဍုၚ်အာဲဂုတ္တု ဨကရာတ်ဖာရောဝ်ဝွံ ဂကူဣသရေလတံဂှ် ကဵုသ္ပဍိက်အာဲဂုတ္တုတံရ။
ကောန်ဍုၚ်အာဲဂုတ္တုတံဝွံ ဂွံသိုၚ်ပ္တန်အလုံမွဲဍုၚ်ဂှ် စကာပျဲဂကူဣသရေလတံရ။ ညးတံဝွံ ဂကူဣသရေလတံဂှ် စွံကဆံၚ်ပြေံပြေံတုဲ စကာကၠောန်ကမၠောန်ရ။ ဆမ္ဂး ကျာ်ဝွံ ကဵုဒၟံၚ်မ္ၚဵုမၚ်္ဂလကဵုဂကူဣသရေလတုဲ လၟိဟ်ကောန်ဇာတ်ညးတံလေဝ် ဂၠိုၚ်တိုန်ဒၟံၚ်ရ။
ဨကရာတ်ဖာရောဝ်ဝွံ ညာတ်ကောန်ၚာ်ဂကူဣသရေလတံဂၠိုၚ်ဒၟံၚ်တုဲ ဂွံဂစိုတ်ကောန်ၚာ်ဂကူဣသရေလသီုဖအိုတ်ဂှ် ပ္တိတ်ပၟိၚ်ဂွံထောံဖျေံပ္ဍဲဍာ်ၜဳ ( Nile )ရ။
မၞိဟ်ဗြဴဂကူဣသရေလမွဲဂှ် ၜံၚ်ဂွံကောန်တြုံမွဲရ။ မိကဵုအပါဂှ် ဒဵုကဵုပၞုက်မာန်ဂှ် ပၞုက်လဝ်ကောန်ၚာ်ဂှ်ရ။
အခိၚ်မိမကောန်ၚာ်ဝွံ ဆက်ပၞုက်ကောန်ၚာ်ဟွံမာန်မ္ဂး ဂွံဗၠးနူပၟိၚ်ဂစိုတ်ဂှ် ညးတံ စုတ်ပ္ဍဲနတုဲ နူချောဲ ဗ္ဒာဲဇိုၚ်သြၚ်ၜဳ( Nile ) ဂှ် ဖဳဏာရ။ ၝဲကောန်ၚာ်ဂှ်လေဝ် ဗက်ဗဵုဒၟံၚ် ကောန်ၚာ်ဂှ်ရ။
ကောန်ဝုတ်ဨကရာတ်ဖာရောဝ်ဝွံ ညာတ်နဂှ်တုဲ ပံက်ဗဵုဂှ်ရ။ အခိၚ်ဗြဴဂှ်ညာတ်ဒးကောန်ၚာ်ဂှ် ယိုက်ကေတ်တုဲသ္ပကောန်ဇကုရ။ သွက်ဂွံလွဳဝတ်ကောန်ၚာ်ဂှ်လေဝ် လိၚ်ကေတ်မၞိဟ်ဗြဴဂကူဣသရေလမွဲရ။ ကောန်ၚာ်ဂှ် အယုက်ပေၚ်တုဲ စိုပ်အခိၚ်ထပိုတ်တှ်မ္ဂး မၞိဟ်ဗြဴလွဳဗ္စလဝ်ကောန်ၚာ်ဝွံ ကၠုၚ်ပလံၚ်ဗစိုပ်ကဵု ကောန်ဝုတ်ဨကရောတ်ဖာရောဝ်ပၠန်ရ။၊ ယၟုကောန်ၚာ်ဂှ် "မဝ်သေရ။”
မဝ်သေဝွံ ဇၞော်တိုန်တုဲဲ မွဲတ္ၚဲဂှ် ညးတေံညာတ်ကောန်ဍုၚ်အာဲဂုတ္တုမွဲဂှ် တက်ဒၟံၚ်ဍိက်ဣသရေလမွဲရ။ မဝ်သေလေဝ် ဒစာန်ရီုဗၚ်ဍိက်ဂကူဣသရေလဂှ်ရ။
မဝ်သေဝွံ အခိၚ်ညးမွဲ ဟွံဆဵုညာတ်ဏီဂှ် ဂစိုတ်ထောံကောန်ဍုၚ်အာဲဂုတ္တုဂှ်တုဲ တိုပ်ထောံရ ။ ဆမ္ဂး အရာမဝ်သေကၠောန်လဝ်ဂှ် မၞိဟ်မွဲဂှ် ဆဵုညာတ်အာရ။
ဨကရာတ်ဖာရောဝ်ဝွံ အရာမဝ်သေကၠောန်လဝ်ဂှ်တီတုဲ ဂွံဂစိုတ်မဝ်သေဂှ် ဖျေံပၟိၚ်ရ။ ဆမ္ဂး နူဍုၚ်အာဲဂုတ္တုဂှ် မဝ်သေဂြိပ်တိတ်အာ ပ္ဍဲဂြိုပ်ဇၞော်ဇၞော်မွဲရ။ ကောန်ပၞာန်ဖာရောဝ်တံလေဝ် ဂၠာဲဟွံဆဵုရ။
မဝ်သေဝွံ ပ္ဍဲဂြိုပ်သ္ၚောဲနူဍုၚ်အာဲဂုတ္တုမွဲဒၞာဲဂှ် ဒှ်ဒၟံၚ်တၠမၚ်သဵုရ။ ညးဝွံစှ်ေဒၞာဲကဵု ဗြဴပ္ဍဲဒေသဂှ်တုဲ ဂွံလဝ်ကောန်တြုံၜါရ။
မဝ်သေဝွံ မၚ်ဒၟံၚ်သဵုသ္ကအ်ခါံသဳညးတေံရ။မွဲတ္ၚဲဂှ်၊ မဝ်သေဝွံ အုပ်ခြုံမွဲတူဒၟံၚ်ဂှ် ဆဵုညာတ်ရ။ ဆမ္ဂး အုပ်ခြုံဂှ် တူတုဲဟွံသ္ၚေက်ရ။ မဝ်သေလေဝ် အာဗ္ဒာဲ အုပ်ခြုံတုဲ ကြပ်ကၠုၚ်ဗ္ဒာဲဂှ်မ္ဂး ကျာ်ဟီုကဵုညးတေံ “ မဝ်သေ ခလောတ်ဒၞပ်ညိ။ ဒၞာဲမၞးဒတဴဒၟံၚ်ဂှ် ဒှ်တိမသ္အးဇ္ၚးရ"။
ကျာ်ဟီု “ မၞိဟ်အဲတံ ဒးဒုၚ်ဒၟံၚ်ဒဒိုက်ဂှ် အဲညာတ်ဒၟံၚ်ရ။ အဲဗၠးဏာမၞး ပ္ဍဲဨကရာတ်ဖာရောဝ်ရောၚ်။ ပ္ဍဲဍုၚ်အာဲဂုတ္တုဂကူဣသရေလတံဂှ် မၞးကေတ်ပ္တိတ်နၚ်နူဘဝဍိက်အာဲဂုတ္တုညိ ။ တိဍာ်ခါနာန် အဲကဵုလဝ်ဂတိကဵုအာဗြဟာမ်၊ ဣဇက်၊ ယျာကောပ်တံဂှ် အဲကဵုညးတံရောၚ်။"
မဝ်သေကလေၚ်သၟာန် "ယဝ်ရညးတံသၟာန်အဲ ညးဂှ်ပလံၚ်နၚ်မၞးရောတှ်ေ အဲဗီုလဵုဂွံကလေၚ်သွဟ်ရော?" ကျာ်လေဝ် “အတိုၚ်အဲမဒှ်ဂှ် အဲဒှ်ရ၊ ဟီုကဵုညးတံညိ! အဲဂှ် ပလံၚ်ဏာမၞးရ’ဟီုကဵုညးတံပၠန် ‘အဲဂှ် ဒှ်ကျာ်ထာဝရ၊ ကျာ်ဇုဇဗဴလအာဗြဟာမ်၊ ကျာ်ဣဇက်၊ကျာ်ယျာကောပ်ရ’ ။ ဣဏံဂှ် ဒှ်ယၟုအဲလၟိုန်ကာလရ။”
မဝ်သေဝွံ ဂွံအာပ္ဍဲကဵုဨရောတ်ဖာရောဝ်ဂှ် ဖေက်ဒၟံၚ်ရ။ မူဟိုတ်ရောမ္ဂးဂှ် ညးထေၚ်ဟယျဒၟံၚ်ညးဟီုအရေဝ်ခိုဟ်ခိုဟ်ဟွံမာန်ရ။သာ်ဂှ်ရ ဂွံရီုဗၚ်မဝ်သေဂှ် ကျာ်ဗၠးဏာကောမဝ်သေ အာရုန်ရ။
ပုံသၠပတ်သမ္မာ : သၠပတ်ဗၠးတိတ် ၁း၄