၂၂။ ယဝ်ဟာန်က္တဵုဒှ်မၞိဟ်
အခိၚ်ကၠာတေံဂှ် ကျာ်ဟီုအရေဝ်ကဵုပရောဗက်တံတုဲ ပရောဗက်တံကလေၚ်ဟီုထ္ၜးကဵုမၞိဟ်တံရ။လက်ကြဴဂှ် ဗွိုၚ်ပန်ကၠံသၞာံကျာ်ဟွံဟီုအရေဝ်ကဵုမၞိဟ်တံရ။စိုပ်မွဲတ္ၚဲ ပ္ဍဲကဵုယတ်ရောဟိတ်မနွံယၟု'ဇာခရိ'မွဲဂှ် ကျာ်ဗၠးနၚ်ကလုတ်အကာသမွဲရ။ ဇာခရိကဵုဨလိသၜေတ်တံဝွံ ရှ်ေသှ်ေရဴဂဴကျာ်ရ။ ညးတံဝွံ ဗျုလောန်တုဲ ကောန်မွဲလေဝ်ကလိဟွံဂွံရ။
ကလုတ်အကာသဝွံ “ဇာခရိ! ဗြဴမၞးဂှ် သၠးဂွံကောန်တြုံမွဲရောၚ်”။ ကောန်တြုံဂှ် “ယဝ်ဟာန်" ဒးခုတ်ယၟုရ။ ကျာ်ဝွံ ဝိညာန်သ္အးသ္ၚးဂှ်ကဵုဍိုက်ပေၚ်လ္တူယဝ်ယာန်တုဲ မၞိဟ်တံဂွံဒုၚ်တဲတၠညးဟံၚ်ပြာ်မာန်ဂှ်လေဝ် ယဝ်ဟာန်ပလေဝ်ပလေတ်လဝ်ကဵုရောၚ်” ဟီုဂးသာ်ဂှ်ရ။ 'ဇာခရိ'လေဝ် “အဲကဵုဗြဴအဲဂှ် အယုက်ဇၞော်ဒၟံၚ်တုဲ သွက်ဂွံကလိဂွံကောန်ဂှ် ဒှ်ဟွံမာန်ရ၊ ဟိုတ်ဂှ်ရ အရာဏံဒှ်ကၠုၚ်ရောၚ်ဂှ်ဗီုလဵု အဲဂွံပ္တေဟ်ရော?”
ကလုတ်အကာသလေဝ် “အဲဂှ်ကျာ်ဗၠးနၚ် သွက်ဂွံကေတ်နၚ်ကဵုပရိုၚ်ခိုဟ်ရ။ဟိုတ်နူမၞးဟွံပ္တေဟ် အရာဏံတုဲ ဒဵုကဵုအခိၚ်ဟွံဂွံၜံၚ်ကောန်ဏီဂှ် ဟီုအရေဝ်ဟွံဂွံ "ဟီုဂးတုဲ ကလုတ်အကာသ ကလေၚ်စဴအာရ။ ဗွဲမပြဟ်ဂှ် ဇာခရိ လေဝ် ဟီုအရေဝ် ဟွံဂွံရ။ အခိၚ်ညးတေံကလေၚ်စဴ စိုပ်သ္ၚိဂှ် ဗြဴညးတေံလေဝ် ဗုၚ်ဒၟံၚ်ရ၊
အခိၚ်ဨလိသၜေတ်ဗုၚ်ဒၟံၚ်တြဴဂိတုဂှ် ကလုတ်အကာသ ကၠုၚ်ပ္ဍဲဇာခရိဂှ် မံက်ကၠုၚ် ပ္ဍဲဂတမုက် မသဨလိသၜေတ် မာရိရ။မာရိဝွံ ဒှ်ဝုတ်ကညှာတုဲ သွက်ဂွံသ္ပမ္ၚဵုထပ်တဲကဵုယောဝ်သေပ်ဂှ် သၟာန်သၟုက်လဝ်တုဲရ။ကလုတ်အကာသလေဝ် “ မၞးဝွံ တန်ဗ္တိသန္ဓိတုဲ သၠးဂွံကောန်တြုံရောၚ်။တေံကောန်တြုံဂှ် ဒးခုတ်ယၟု “ယေသှု” ရောၚ်။ညးဝွံ ဒှ်ကောန်ကျာ် မသၠုၚ်ပြဲအိုတ်တုဲ အုပ်ဓုပ်လၟိုန်ထာဝရ ရောၚ်” ဟီုဂးရ။
မာရိလေဝ် “ အဲဂှ် ဒှ်ဝုတ်ကညှာရ၊ ဗီုလဵုဂွံဒှ်မာန်ရော? ” သာ်ဂှ်ဟီုရ။ ကလုတ်အကာသလေဝ် “ ဝိညာန်မသ္အးသ္ၚးကဵုဣဓိကျာ်ဂှ် စိုပ်ကၠုၚ်ပ္ဍဲမၞးရောၚ်" ဟိုတ်ဂှ်ရ ကောန်ၚာ်ဂှ် သ္အးသ္ၚးတုဲ ဒှ်ကောန်ကျာ်ရောၚ်”ကလေၚ်သောၚ်ထ္ၜးရ။ ။ မာရိလေဝ် အတိုၚ်ကလုတ်အာကာသဟီုဂှ် ဒုၚ်တဲပ္တေဟ်ရ။
ကလုတ်အကာသကဵုမာရိဟီုအရေဝ်တုဲခြာဟွံလအ် မာရိအာဝေၚ်သ္ၚိဨလိသၜေတ်ရ။ အခိၚ်မာရိဆက်မိက်ကဵုဨလိသၜေတ်ဂှ် ကောန်ၚာ်ပ္ဍဲဗုၚ်ဂှ် ချဳဒၟံၚ်ရ။ဟိုတ်နူအရာကျာ်ကၠောန်ကဵုလဝ်လ္တူညးတံဂှ် မိပ်သၠောၚ်ဒၟံၚ်ရ။ မာရိအာဝေၚ်သ္ၚိဨလိသၜေတ်ပွိုၚ်ပိဂိတုတုဲ ကလေၚ်စဴကၠုၚ်သ္ၚိပၠန်ရ။
ဨလိသၜေတ်ၜံၚ်ဂွံကောန်တြုံတုဲ အတိုၚ်ကလုတ်အကာသဗ္ကန်လဝ်ဂှ် ခုတ်ယၟု"ယောဝ်ယာန်"ရ။ ကျာ်လေဝ် ကဵုအခေါၚ် ဇာခရိဟီုအရေဝ်ပၠန်ရ။ဇာခရိလေဝ် "ထိုၚ်သးဂုန်ကျာ်အိုတ်ညိ၊ မူဟိုတ်ရောမ္ဂး ကျာ်ဝွံ မၞိဟ်ညးဂှ် ဗှ်သၞာဒၟံၚ်ရ! ကောန်ဗၠာဲအဲ၊မၞးဝွံ ဒှ်ပရောဗက်ကျာ်မသၠုၚ်ပြဲအိုတ်ရ။ မၞိဟ်ဂမၠိုၚ်တံ သွက်ဂွံသံၚ်ဝေဂဂှ် မၞးဒးလဴထ္ၜးရောၚ်!။"
ပုံသၠပတ်သမ္မာ : ခရေတ်ဝေၚ်လုကာ ၁