၁၃။ ကတ္တိကကျာ်ကဵုမၞိဟ်ဣသရေလ
မၞိဟ်ကျာ်ထ္ၜးကဵုဂၠံၚ်ဂကူဣသရေလတံဝွံ တတ်အာၜဳဗ္ကေတ်ကဵုကန္တာရဗ္တဳတုဲ စိုပ်ကၠုၚ်ဒၞာဲဒဵု 'သိဏာ'ရ။ ။ ဒဵုဏံဂှ် ဒၞာဲဒဵုမဝ်သေ ညာတ်လဝ်အုပ်ခြုံတူဒၟံၚ်ဂှ်ရ။ မၞိဟ်တံဝွံ သြိုၚ်တာဲဇိုၚ်ဒဵုဂှ်တုဲ ဖျေံဒပ်ဒၞာဲဂှ်ရ။
ကျာ်ဟီုပၟိၚ်မဝ်သေကဵုမၞိဟ်ဣသရေလတံသီုဖအိုတ်ဂှ် “မၞးတံ ကလၚ်အရေဝ်အဲလၟိုန်ကာလတုဲကတ္တိက အဲစွံလဝ်လ္တူမၞးတံဂှ် ဒးမၚ်မွဲရောၚ်။ ယဝ်ရကၠောန်သာ်ဏံမ္ဂး ဂကူမၞးဂှ် အဲကဵုဒှ်ဂကူမသ္အးဇ္ၚးတုဲ မၞိဟ်မဆေၚ်စေပ်ကဵု ဘုံအကာသဂှ်လေဝ် အဲကဵုဒှ်ရောၚ်"
မၞိဟ်ဂမၠိုၚ်တံဝွံ ကျာ်ဂွံက္ညစှ်ေကၠုၚ်ဗ္ဒာဲညးတံဂှ် ပွိုၚ်ပိတ္ၚဲကၠောန်ဒၟံၚ်ရ။ တုဲဂှ် ကျာ်က္ညစှ်ေကၠုၚ် လ္တူက္ဍိုပ်ဒဵုသိဏာဂှ်မ္ဂး ဂဵုဂတးပန်၊ ဆေဝ်ပလေဝ်ထလိုက်၊ ယက်ဂၠုသီုကဵုရမျာၚ်ခပဵုတံ က္တဵုဒှ်ကၠုၚ်ရ။ တုဲဂှ် မဝ်သေတိုန်အာလ္တူဒဵုဂှ်ရ။
တုဲဂှ် ကျာ်ဟီု “အဲဝွံ ဒှ်ကျာ်ဇုဇဗဴလ မၞးတံတုဲ ကျာ်ဟံၚ်ပြာ်မၞးတံ နူကဵုဘဝဍိက်ပ္ဍဲဍုၚ်အာဲဂုတ္တုဂှ်လေဝ် မဒှ်ကီုရ။ လ္ပရေဟ်သေဟ် ကျာ်တၞဟ်တၞဟ်ညိ” စွံကတ္တိကကဵုမၞိဟ်တံရ။
“ပတ္တိမာရုပ်ဂှ် လ္ပကၠောန်တုဲလ္ပပဝတ်ညိ၊ မူဟိုတ်ရောမ္ဂး အဲဂှ် ဒှ်ကျာ်ဇုဇဗဴလ၊ ဒှ်ကျာ်မၞးတံဆမွဲဇကုဟေၚ်ရ။ ဒဒှ်ဟွံမွဲကဵုမရေဟ်သေဟ်ဂှ် လ္ပသုၚ်စောဲနာမအဲညိ။တ္ၚဲသဳဂှ်မၚ််မွဲတုဲ ကဵုသ္အးဇ္ၚးညိ ။ကၠောန်ကမၠောန်ပွိုၚ်တြဴတ္ၚဲရ။တ္ၚဲသဳဂှ် ဇူကမၠောန်တုဲသ္ပတ္ၚဲဗှ်သၞာအဲညိ။”
“လွဳဝတ်ရေဟ်သေဟ်မိမဇကုညိ၊ လ္ပဂစိုတ်လမျီုညးတၞဟ်ညိ၊ လ္ပပလီုကောန်သမ္ဘာညးတၞဟ်ညိ၊ လ္ပကၠတ်ဒြပ်ညးတၞဟ်ညိ လ္ပဠီဠာန်ညးတၞဟ်ညိ။ လ္တူသမ္ဘာညးတၞဟ်ကဵုပိုန်ဒြပ်ဗ္ဒာဲသ္ၚိမၞးဂှ် လ္ပဆန္ဒနွံညိ”
တုဲပၠန်ကျာ်ဝွံ လ္တူတၟံလးၜါမဂှ် ချူပညပ်စှ်သာ်တုဲ ကဵုမဝ်သေရ။ ကျာ်ဝွံ မၞိဟ်တံဂွံဒ္ဂေတ်ဗက်သၞောဝ်ကဵုပညပ်တၞဟ်တၞဟ်ဂမၠိုၚ်လေဝ် ကဵုလဝ်ကီုရ။ ယဝ်ရမၞိဟ်တံဒ္ဂေတ်ဗက်အတိုၚ်ဓဝ်ပညပ်မ္ဂး ကျာ် ကဵုမ္ၚဵုမၚ်္ဂလတုဲ ရံၚ်စံၚ်ရောၚ်ဂှ်ဂတိနွံဒၟံၚ်ရ။ ယဝ်ရမၞိဟ်တံဟွံဒ္ဂေတ်ဗက်အတိုၚ်ဓဝ်ပညပ်မ္ဂး ကဵုဒုဟ်ဒန်ရောၚ်ဂှ်ကျာ်ဟီုလဝ်ရ။
ကျာ်လေဝ် ဟီုဂးကဵု မၞိဟ်ဣသရေလတံ ဂွံသိုၚ်တာဲ ကောံဓရီု တာဲဇၞော်မွဲမရ။ ကျာ်ဝွံ ဗီုလဵုဂွံသိုၚ်တာဲ ကပေါတ်လဵုဂွံစုတ်ပ္ဍဲတာဲထေက်ဂှ်လဴထ္ၜးချိုတ်တ်ပၠိုတ်တ်ရ။ ကၠောန်ယာတ်ဇၞိက်ဇၞော်မွဲတုဲ ပ္ဍဲတာဲဂှ် ပါ်ခြာအခန်ၜါခန်ရ။ ကျာ်ဝွံ က္ညစှ်ေကၠုၚ်ပ္ဍဲအခန်လက်ကြဴယာတ်ဇၞိက်ဂှ်တုဲ မံၚ်ဒၟံၚ်ဒၞာဲဂှ်ရ။ ညးမဒှ်ယတ်ပရောဟိတ်ဇၞော်မွဲဟေၚ် ဂွံလုပ်ပ္ဍဲအခန်ကျာ်ဂှ် အခေါၚ်နွံရ။
မၞိဟ်တံလေဝ် ပ္ဍဲဂတမုက်တာဲကောံဓရီုဂှ် ကၠောန်လဝ်ပၞၚ်ယတ်မွဲကီုရ။မၞိဟ်မွဲမွဲဖံက်သၞောဝ်ဓဝ်ပညပ်ကျာ်မ္ဂး ဒးကေတ်နၚ်သတ္တိရိစ္ဆာန်ပ္ဍဲပၞၚ်ယတ်ဂှ်ရ။ ဂွံပူဇဴကဵုကျာ်ဂှ် ယတ်ပရောဟိတ်မွဲဝွံ ဂစိုတ်သတ္တိရိစ္ဆာန်ဂှ်တုဲ စံၚ်လ္တူပၞၚ်ယတ်ရ။ ဆီသတ္တိရိစ္ဆာန်ဂှ် ဂြောပ်ကဵုဒုဟ် တေံမၞိဟ်ဂှ်ရ။ နဲကဲသာ်ဏံဂှ် ကျာ်ဟွံညာတ်ဒုဟ်မၞိဟ်တံ အောန်ကၠုၚ်ရ။ ပ္ဍဲလညာတ်ကျာ်ဂှ် တေံမၞိဟ်ဝွံ သ္အးဇ္ၚးဒၟံၚ်ရောၚ်။ ကျာ်ရုဲကံက် ကောမဝ်သေ 'အာရုန်'ကဵု တၞောဝ်ဒတောဝ် 'အာရုန်'တံဂွံသ္ပယတ်ပရောဟိတ်ရ။
မၞိဟ်သီုဖအိုတ်တံလေဝ် ဂွံဒ္ဂေတ်ဗက်အတိုၚ်ဓဝ်ပညပ်ကျာ်ဂှ် တုပ်စိုတ်ရ။ ပွမဆေၚ်စပ်ကဵုကျာ်၊ ဂွံသ္ပဝတ်ကဵုကျာ်မွဲဟေၚ်ဂှ်လေဝ် တုပ်စိုတ်ရ။
မဝ်သေဝွံ မံၚ်ဒၟံၚ်လ္တူက္ဍိုပ်ဒဵုသိဏာဗွဲမလအ်တုဲ ဟီုဒၟံၚ်အရေဝ်ကဵုကျာ်ရ။ မၞိဟ်တံလေဝ် အခိၚ်မဝ်သေကလေၚ်စှ်ေကၠုၚ်နူဒဵုဂှ် မၚ်လၟဳဒၟံၚ်ရ။ သာ်ဂှ်ရ မၞိဟ်တံဝွံ စၞးဂွံသ္ပဝတ်ကဵုကျာ်ဂှ် ကေတ်နၚ်ထဝ်ပ္ဍဲအာရုန်တုဲ ကဵုကၠောန်ပတ္တိမာရုပ်မွဲရ။ အရာဏံဂှ် ပၠန်ဂတးကျာ်တုဲ ဒှ်ကၠုၚ်ဒုဟ်ရ။
အာရုန်ဝွံ နကဵုထဝ်ဂှ် ကၠောန်ပတ္တိမာရုပ်ကောန်ဂၠဴမွဲရ။မၞိဟ်တံလေဝ် ပူဇဴသ္ပဝတ်ပတ္တိမာရုပ်ဂှ်ရ။ ဟိုတ်နူညးတံကၠာန်သာ်ဂှ်တုဲကျာ်ပၞောတ်တိတ်ဗွဲမလောန်ရ။ကျာ်ဝွံ မိက်ဂွံပလီုပလာ်မၞိဟ်တံကီုလေဝ် ညံၚ်ဟွံဂွံပလီုပလာ်ဂှ်မဝ်သေဒုၚ်ဂုန်ကျာ် သွက်ညးတံရ။ ကျာ်လေဝ် ကလၚ်ရမျာၚ်မဝ်သေရာဒနာမိက်တုဲ ဟွံပလီုပလာ်ညးတံရ။
ကြဴအိုတ်ဂှ် မဝ်သေစှ်ေကၠုၚ်နူလ္တူဒဵုသိဏာ၊ သီုကဵု တၟံလးမချူလဝ်ပညပ်စှ်သာ်ၜါမရ။ တုဲဂှ် မဝ်သေဆဵုညာတ် ကၠောန်လဝ်ပတ္တိမာရုပ်ကောန်ဂၠဴဂှ်တုဲ စိုတ်ထေဲဗွဲမလောန်မ္ဂး ကျာ်ကဵုလဝ်ပညပ်စှ်သာ်တၟံလးၜါမဂှ် ကရေက်ထ္ကးထောံရ။
တုဲဂှ် မဝ်သေတက်လှေက်ပတ္တိမာရုပ်ဂှ်ရ။ ခၟိက်ပတ္တိမာရုပ်ဂှ် မဝ်သေကၠဟ်ဖျေံပ္ဍဲဍာ်တုဲ ကဵုမၞိဟ်တံသုၚ်ရ။ မၞိဟ်တံလေဝ် က္တဵုဒှ်ယဲပလိတ်တုဲ မၞိဟ်ဂမၠိုၚ်တံချိုတ်အိုတ်ရ။
မဝ်သေဝွံ တိုန်အာဒဵုမွဲဝါပၠန်တုဲ ကျာ်ဂွံသၠးကဵုအခေါၚ်မၞိဟ်တံဂှ် ရာဒနာမိက်ရ။ကျာ်ကလၚ်ရာဒနာမိက်မဝ်သေတုဲ ဗၠးကဵုဒုဟ်မၞိဟ်တံရ။မဝ်သေဝွံ စၞးညးတေံပလီုပလာ်လဝ် တၟံလးၜါဂှ် ကလေၚ်ကၠောန်တၟံဂတှ်ေတၟိတုဲ ချူပညပ်စှ်သာ် လ္တူတၟံလးတၟိဂှ်ပၠန်ရ။ တုဲဂှ် မဝ်သေ က္ညစှ်ေကၠုၚ်နူကဵုဒဵုသိဏာ သီုကဵုတၟံဂတှ်ေတၟိပညပ်စှ်သာ်ဂှ်ရ။ တုဲဂှ် ကျာ် ထ္ၜးကဵုဂၠံၚ်မၞိဟ်ဣသရေလတံဂွံတိတ်အာသ္ၚောဲသ္ၚောဲ နူကဵုဒဵုသိဏာ ပ္ဍဲတိဍာ်ကဵုလဝ်ဂတိဂှ်ရ။
ပုံသၠပတ်သမ္မာ : သၠပတ်ဗၠးတိတ် ၁၉-၃၄