၁၄။ လန်ဂ္ၚေၚ်ဒၟံၚ်ပ္ဍဲကန္တာရဗ္တဳ
ကျာ်ဟီုကဵုမၞိဟ်ဣသရေလတံ ဂွံဒ္ဂေတ်ဗက် သၞောဝ်သီုဖအိုတ်ရ။မူဟိုတ်ရောမ္ဂး ကတ္တိကညးဂှ် နွံဒၟံၚ်လ္တူမၞိဟ်ဣသရေလတံရ။ တုဲဂှ် ညးထ္ၜးကဵုမၞိဟ်တံ ဂၠံၚ်သ္ၚောဲကဵု ဒဵုသိဏာဂှ်ရ။ ညးမိက်ဂွံကော်ဏာမၞိဟ်တံ ဒၞာဲတိဍာ်ကတိရ။ တိဍာ်ဏံဝွံ "ခါနာန်"လေဝ် ကော်ခဴရ။ ကျာ်ဝွံ နကဵုတိုၚ်မတ်ဗြဲဂှ် ထ္ၜးဂၠံၚ်မ္ဂး မၞိဟ်တံလေဝ် ဗက်ကၠုၚ်လက်ကြဴညးအိုတ်ရ။
ကျာ်ကဵုလဝ်ကတိကဵု အာဗြဟာမ်၊ ဣဇက်ကဵုယျာကောပ်တံတုဲ တိဍာ်ဂတိဂှ် ကျာ်ကဵုကောန်စဴကောန်စေက်ညးတံပၠန်ရောၚ်၊ ဆမ္ဂးလၟုဟ်ဂှ် မၞိဟ်ဗွဲမဂၠိုၚ် နွံဒၟံၚ်ဒၞာဲတိကတိဂှ်ရ။ ညးတံဂှ် ကော်ခဴစ "ဂကူခါနာနိ"ရ။ ဂကူခါနာနိတံဝွံ ဟွံသ္ပဝတ်ကျာ်တုဲ ဟွံကလၚ်အရေဝ်ကျာ်ရ။ ညးတံသ္ပဝတ်ကဵုကျာ်တၞဟ်တုဲ ကၠောန်ဒၟံၚ်အရာဟွံခိုဟ်ရ။
ကျာ်ဟီုကဵုဂကူဣသရေလတံဂှ် “မၞးတံအာပ္ဍဲတိဍာ်ဂတိဂှ်တုဲ ဒ္ဍေၚ်ပ္တိတ်ဂကူခါနာနိသီုဖအိုတ်တံဂှ်ရောၚ်။လ္ပကေတ်ပြေၚ်ၜိုဟ်လလီုကဵုညးတံတုဲ လ္ပထပ်တဲကဵုဂကူညးတံညိ။ တုဲပၠန် မၞးတံဒးပလီုပလာ် ပတ္တိမာရုပ်ညးတံသီုဖအိုတ်တံရောၚ်။ ယဝ်ရမၞးတံဟွံကလၚ်အရေဝ်အဲမ္ဂး၊ စၞးဂွံသ္ပဝတ်ကဵုအဲဂှ် မၞးတံလေဝ်ဒးလီုလာ်အိုတ်အာအကြာပတ္တိမာရုပ်ညးတံကီုရောၚ်။”
အခိၚ်မၞိဟ်ဣသရေလတံ စိုပ်အာဒပ်ခါနာန်ဂှ်၊ မဝ်သေဝွံ ရုဲကံက်မၞိဟ်တြုံစှ်ၜါ ပ္ဍဲကဵုဂကောံမၞိဟ်ဣသရေလတံရ။မၞိဟ်စှ်ၜါတံ ဂွံကၠတ်ထံၚ်ပရိုၚ်ပ္ဍဲတိဍာ်ကတိဂှ်ရ။မၞိဟ်စှ်ၜါတံလေဝ်ဂွံတီ မၞိဟ်ခါနာနိတံ ဇြဟတ်ဇၞော်၊ ဇြဟတ်ဍောတ်ဂှ် ဒးကၠတ်ထံၚ်ပရိုၚ် ပ္ဍဲဒေသခါနာနိဂှ်ရ။
မၞိဟ်စှ်ၜါတံလေဝ် ပ္ဍဲဍုၚ်ခါနာန်ဂှ် ကၠတ်ထံၚ်ပရိုၚ်ပွိုၚ်ပန်စှ်ောတ္ၚဲတုဲ ကလေၚ်စဴကၠုၚ်ရ။ မၞိဟ်စှ်ၜါတံကလေၚ်လဴထ္ၜးကဵု မၞိဟ်တံဂှ် “တိဂှ် ဒှ်တိဝါဲခိုဟ်လောန်တုဲ သြောံ၊သ္ၚု၊တံလေဝ် ဂၠိုၚ်လောန်ကွေံ”၊ ဆမ္ဂး “ဍုၚ်ဂှ် ဇြဟတ်ဇၞော်လောန်တုဲ မၞိဟ်တံလေဝ် ဇၞော် ဒၟံၚ်ရောၚ်!၊ယဝ်ရပိုဲတံဗ္တိုက်တိဍာ်ဂှ်မ္ဂး ညးတံကလေၚ်ကေတ်ဇၞး ပိုဲတုဲ ဂစိုတ်ပိုဲတံရောၚ်။”
ဗွဲမပြဟ် မၞိဟ်ကၠတ်ထံၚ်ပရိုၚ်ကာလေပ်ကဵုယဝ်သှုတံဝွံ ဟီုဂးညးသ္ကအ်ရ။ “ကွေံရ၊ မၞိဟ်ပ္ဍဲဍုၚ်ခါနာန်တံဂှ် သၠုၚ်တုဲဇြဟတ်ဇၞော်ကွေံရ၊ ပိုဲတံကေတ်ဇၞးညးတံချိုတ်တ်ပၠိုတ်တ်မာန်ရ။ ကျာ်ဗ္တိုက်ကဵုသွက်ပိုဲတံရောၚ်။”
မၞိဟ်တံဝွံ ဟွံကလၚ်အရေဝ် ကာလေပ်ကဵုယဝ်သှုရ။ ညးတံဒေါသတိတ်ကဵုမဝ်သေကဵုအာရုန်တုဲ ဟီု “မူဟိုတ်မၞးကော်နၚ်ပိုဲ ဒၞာဲမဖေက်လကိုတ်ဏံရော? ပိုဲတံ ပ္ဍဲဍုၚ်အာဲဂုတ္တုဂှ် ဒးဒၟံၚ် ထေက်ရ။ ယဝ်ရ ပိုဲတံအာဒၞာဲတိကတိဂှ်မ္ဂး၊ ဒးချိုတ်ပ္ဍဲပေါဲဗ္တိုက်ဂှ်တုဲ သမ္ဘာပိုဲကဵုကောန်ပိုဲတံလေဝ် မၞိဟ်ခါနာနိတံကဵုသ္ပဍိက်ရောၚ်။” မၞိဟ်တံလေဝ်မိက်ဂွံရုဲကံက်မၞိဟ်ထ္ၜးကဵုဂၠံၚ်တၟိ သွက်ဂွံကလေၚ်စဴပ္ဍဲဍုၚ်အာဲဂုတ္တုတေံဂှ်ပၠန်ရ။
ဟိုတ်နူမၞိဟ်တံဟီုသာ်ဂှ်တုဲ ကျာ်ပၞောတ်တိတ်ဗွဲမလောန်ရ။ကျာ်က္ညစှ်ေကၠုၚ် ပ္ဍဲတာဲကောံဓရီုတုဲ ဟီုပၟိၚ်ရ။ “ မၞးတံပၠန်ဂတးအဲပၠန်ရ၊ ဟိုတ်ဂှ်ရ မၞးတံသီုဖအိုတ်ဒးဂေတ်ဂ္ၚေၚ်အာဒၟံၚ်ပ္ဍဲကဵုဂြိုပ်ဏံရောၚ်။ မၞိဟ်အယုက်ၜါစှ်ောကဵု လ္တူၜါစှ်ောတံလေဝ် အခိၚ်လန်ဂၚေၚ်ဒၟံၚ်ပ္ဍဲဂြိုပ်ဂှ် ဒးချိုတ်ရောၚ်။ ဒၞာဲတိဍာ်ကတိအဲကဵုလဝ်ဂှ် ဆလအ်မှဟွံဂွံလုပ်ပုဟ်။ ယဝ်သှုကဵုကာလေပ်ဟေၚ် ဂွံလုပ်တိဍာ်ကတိဂှ်ရောၚ်။”
အခိၚ်မၞိဟ်တံမိၚ်ကျာ်ဟီုတုဲ၊ ညးတံဒုဟ်နွံဒၟံတုဲ အောန်စိုတ်တုဲကေတ် ကိရိယာလွဟ်ဇကုဇကုမ္ဂး ဂွံဗ္တိုက်မၞိဟ်ဍုၚ်ခါနာန်တံဂှ်ဖျေံသ္ဂုတ်သွာတ်တုဲ တိတ်အာရ။။ ညံၚ်ရဴညးတံဟွံဂွံဗ္တိုက်ဂှ် မဝ်သေကဵုသတိကဵုညးတံရ။ မူဟိုတ်ရောမ္ဂး ပ္ဍဲပေဲါဗ္တိုက်ဏံဂှ် ကျာ်ဟွံမွဲကြောံညးတံရ။ ဆမ္ဂး ညးတံဟွံကလၚ်အရေဝ်မဝ်သေရ။
ကျာ်ဟွံမွဲ ကရောံညးတံတုဲ ပ္ဍဲကဵုပေဲါဗတိုက်ဂှ် မၞိဟ်ခါနာနိတံ ဂစိုတ်မၞိဟ်ဣသရေလဗွဲမဂၠိုၚ်ရ။ တုဲဂှ် မၞိဟ်ဣသရေလဝွံ နူဍုၚ်ခါနာန်ဂှ် ကလေၚ်စဴကၠုၚ်ရ။ ပွိုၚ်ပန်စှ်ောသၞာံဂှ် မၞိဟ်ဣသရေလတံဝွံ ဒးဂေတ်ဂ္ၚေၚ်အာဒၟံၚ်ပ္ဍဲကဵုကန္တာရဗ္တဳဂှ်ရ။
ပွိုၚ်ပန်စှ်ောသၞာံဂှ် မၞိဟ်ဣသရေလတံဝွံ ဂေတ်ဂ္ၚေၚ်အာဒၟံၚ် ပ္ဍဲကဵုကန္တာရဗ္တဳဂှ်ရ။ ကျာ်လေဝ် ရီုဗၚ်ဒၟံၚ်သွက်ညးတံကီုရ။ ကျာ်ကဵုကွာၚ်ဂျုၚ် နူလ္တူအကာသ၊ ကော်ခဴစ “ကွာၚ်မာန်န” ရ။ ကျာ်ပလံၚ်နၚ်ကဵု ဖျုန်ဂစေံဒဂိုတ်( ဂစေံဏံဂှ် ဒှ်ဂစေံအဝဲလဒေါဝ်) သွက်ညးတံဂွံစရ။ အခိၚ်ဂှ်၊ ကျာ်ဝွံ ကဵုညးတံဂၠိက်ယာတ်ကဵု ဒၞပ်ကီုရ။
ဍာ်ဂွံတိတ်ကၠုၚ်နူကဵုတၟံတုဲ မၞိဟ်တံဂွံသုၚ်ဍာ်ဂှ် ကျာ်ထ္ၜးကဵုဣဓိရ။ ၜိုန်ရကျာ်ကၠောန်ဒၟံၚ်အရာဂှ်ကီုလေဝ် မၞိဟ်ဣသရေလတံဝွံ တၚ်ဒုဟ်ကဵုကျာ်တုဲ ပၠန်ဂတးမဝ်သေမွဲဝါပၠန်ရ။ ၜိုန်ဂှ်လေ ကျာ်ဝွံ သစ္စနွံဒၟံၚ်လ္တူဂတိညးစွံလဝ်ကဵု အာဗြဟာမ်၊ ဣဇက်၊ယျာကောပ်ကေုာံ ကောန်ဇာတ်ညးတံဏီရ၊
စိုပ်မွဲအခိၚ် မၞိဟ်တံသွက်ဂွံသုၚ်ဍာ်ဟွံမွဲဂှ်၊ ကျာ်ဟီုကဵုမဝ်သေ “ဟီုအရေဝ်ကဵုတၟံမ္ဂး ဍာ်တိတ်ကၠုၚ်ရောၚ်။” ဆမ္ဂး မဝ်သေဝွံ ဟွံပ္တိတ်ရမျှာၚ်ကဵုတၟံဂှ်တုဲ တက်ကဵုလေံ ၜါဝါရ။ အရာဏံဂှ် ဒှ်ညံၚ်ဟွံသ္ပဂရုကဵုကျာ်ရ။ ဍာ်လေဝ်တိတ်ကၠုၚ်နူကဵုတၟံတုဲ မၞိဟ်တံဂွံသုၚ်ဍာ်ရ။ ဆမ္ဂး ကျာ်ပၞောတ်တိတ်ကဵုမဝ်သေရ။“ဟိုတ်နူမၞးကၠောန်သာ်ဂှ်တုဲ မၞးဟွံဂွံလုပ်ပ္ဍဲတိဍာ်ဂတိဂှ်ရ။”
မၞိဟ်ဣသရေလတံဝွံ ဂေတ်ဂ္ၚေၚ်ဒၟံၚ်ပ္ဍဲဂြိုပ်ပွိုၚ်ပန်စှ်ောသၞာံတုဲဂှ် မၞိဟ်ပၠန်ဂတးကျာ်သီုဖအိုတ်တံလေဝ် ချိုတ်အာအိုတ်ရ။ ကျာ်လေဝ် ထ္ၜးကဵုဂၠံၚ်မၞိဟ်တံ ဒၞာဲတိဍာ်ဂတိမွဲဝါပၠန်ရ။ လၟုဟ်ဝွံ မဝ်သေလေဝ် ဗျုလောန်တုဲ သွက်ဂွံရီုဗၚ်ထ္ၜးကဵုဂၠံၚ်မၞိဟ်တံဂှ် ကျာ်ရုဲကံက်လဝ်ယဝ်သှုရ။ ကျာ်လေဝ် ကဵုမဝ်သေဂတိမွဲဂှ် အခိၚ်မွဲတ္ၚဲ ပရောဗက်ညံၚ်ရဴမဝ်သေမွဲဂှ် ပလံၚ်ကဵုရောၚ်။
ကျာ်ကဵုမဝ်သေတိုန်အာ ကၞောတ်ဒဵုတုဲဂှ် ဆဵုညာတ် တိဍာ်ဂတိ 'ခါနာန်' ဂှ်ရ။ ၜိုန်ရဆဵုညာတ်ကီုလေဝ် မဝ်သေဂွံလုပ်ပ္ဍဲတိဍာ် 'ခါနာန်' ဂှ် ကျာ်ဟွံကဵုအခေါၚ်ရ။ မဝ်သေချိုတ်အာတုဲ မၞိဟ်ဣသရေလတံဝွံလၞီဗှ်သၞာ အောန်စိုတ်ဒၟံၚ် ပွိုၚ်ပိစှ်ောတ္ၚဲရ။ ယဝ်သှုဝွံ ဒှ်ကၠုၚ်က္ဍိုပ်သ္ကိုပ်တၟိရ။ မူဟိုတ်ရောမ္ဂး ညးပ္တေဟ်ကျာ်တုဲ ကလၚ်ဒၟံၚ်အရေဝ်ကျာ်ရ။
ပုံသၠပတ်သမ္မာ : သၠပတ်ဗၠးတိတ် ၁၆-၁၇၊ သၠပတ်ဂၚေၚ်ဂြိုပ် ၁၀-၁၄၊ ၂၀း၂၇၊ သၠပတ်တွံဓဝ် ၃၄