၄၅။ သထေဖာန်ကဵုဖိလိပ္ပိ
ပ္ဍဲညးမပ္တံသၚ်က္ဍိုပ်သ္ကိုပ်ဂှ် မၞိဟ်မနွံယၟု'သထေဖာန်'မွဲတၠ နွံဒၟံၚ်ကီုရ။ ညးဝွံ ဍိုက်ပေၚ်ကဵုဥာဏ်ပညာ၊ ဝိညာန်မသ္အးဇ္ၚးတုဲ ဇၟာပ်မၞိဟ်တံလေဝ် ရေဟ်သေဟ်ညးရ။ သထေဖာန်ဝွံ မၞိဟ်တံဂွံပ္တေဟ်ကၠုၚ်ယေသှုဂှ် ထ္ၜးနိမိတ်လက္ခဏာဗွဲမဂၠိုၚ်တုဲ ကဵုဇြဟတ်ညးတံရ။
မွဲတ္ၚဲဂှ် သထေဖာန်ဝွံ ဒလောံဗ္တောန်ကဵုမၞိဟ်ဂမၠိုၚ်တံပရူယေသှုမ္ဂး မၞိဟ်ဟွံပ္တေဟ်ယေသှုဂကူယုဍ ကဵု သထေဖာန်ဝွံ ကယျာန်ညးသ္ကအ်ရ။ ဂကူယုဍတံဝွံ ဒေါသတိတ်ဗွဲမလောန်တုဲ တေၚ်ကဵုက္ဍိုပ်သ္ကိုပ်ဘာသတံရ။ သာ်ဂှ်ရ က္ဍိုပ်သ္ကိုပ်ဘာသာတံဝွံ ကၠေၚ်ဒက်သထေဖာန်တုဲ ကော်ဏာပ္ဍဲယတ်ပရောဟိတ်တၞဟ်ဟ်ကဵု က္ဍိုပ်သ္ကိုပ်တၞဟ်ဟ်တံရ။ ညးတံဝွံ ပရူသထေဖာန်ဂှ် နကဵုသက်သဳဟွံသ္ဍာံသၟတ်ဗွဲမဂၠိုၚ်ဂှ် ဟီုဂးလဴထ္ၜးအိုတ်ရ။
သၟိၚ်ယတ်ပရောဟိတ်တံဝွံ “အရာညးတံဟီုဒၟံၚ်ပရူမၞးဂှ် ဍာံဟာ” သၟာန်မ္ဂး သထေဖာန်လေဝ် “ နူကဵုအခိၚ်အာဗြဟာံ ဒဵုကဵုအခိၚ်ယေသှုဂှ် ကျာ်ထာဝရ ကၠောန်ကဵုသွက်ဂကူယုဍတံ အရာမအံသဝ်ဗွဲမဂၠိုၚ်ကီုလေဝ် မၞိဟ်တံဟွံကလၚ်အရေဝ်ကျာ်ကီုဂှ်” ကလေၚ်ဟီုသွဟ်ရ။ တုဲပၠန် “မၞိဟ်က္ဍိုပ်မ္ၚိုဟ်တံဝွံ ပၠန်ဂတးကျာ်၊ ပၠန်ဂတးဝိညာန်ကျာ်၊ ညံၚ်ရဴ ဇုဇဗဴလတံဂှ် တၚ်ပါဲကျာ်တုဲ ဂစိုတ်လဝ် ပရောဗက်ညးအိုတ်ရ။လောန်နူဂှ်ပၠန်ဂှ် မၞးတံ ဂစိုတ်လဝ်တၠညးဟံၚ်ပြာ် မေသိ တုဲယျ” ဟီုဂးရ။
က္ဍိုပ်သ္ကိုပ်ဘာသာတံလေဝ် မိၚ်အရေဝ်ဂှ်တုဲ ဒေါသတိတ်မ္ဂး ကၟာတ်က္တောဝ်တုဲ ကရေဲထတ်ထတ်ရ။ တုဲပၠန်ဂှ် ညးတံဂြဲပ္တိတ် သထေဖာန်မ္ၚးဍုၚ်တုဲ ဒဵုကဵုချိုတ်ဂှ် ကၠဟ်ကဵုတၟံအိုတ်ရ။
ကၠာဟွံချိုတ်ဂှ် သထေဖာန်ဝွံ “နာဲယေသှု ဒုၚ်တဲဝိညာန်အဲဍိက်ညိ”ကရေဲဒုန်ဂုန်ရ ။ လက်ကြဴဂှ် ထံက်ဖျေံက္ၜံၚ်တုဲ “တဳလဂုန် အရာညးတံကၠောန်လဝ်ဂှ် လ္ပကေတ်ဒုဟ်ညိ” သာ်ဂှ် ရာဒနာမိက်တုဲ ချိုတ်အာရ။
'သဝ်လု'မနွံယၟုသၟတ်မွဲဂှ် မံၚ်လ္ပာ်မၞိဟ်ဂစိုတ်သထေဖာန်တုဲ အဃောညးတံကၠဟ်ဒၟံၚ်တၟံဂှ် ဒးမၚ်ဒၟံၚ်ဂၠိုက်ယာတ်ညးတံရ။ နူတ္ၚဲဂှ်တုဲ ကောန်ဍုၚ်ယေရုသလေၚ်တံဝွံ ပျဲပျာံကၠုၚ် မၞိဟ်ပ္တေဟ်ယေသှုတံတုဲ ညးမပ္တေဟ်ယေသှုတံလေဝ် ဂြိပ်တိတ်အာဒေသတၞဟ်တၞဟ်အိုတ်ရ။ ညးတံဝွံ ၜိုန်ရဆဵုဂဗ ဒဒိုက်ဒုက္ခကီုလေဝ် ဒၞာဲညးတံစိုပ်ဂှ် လလောၚ်တြးပရိုၚ်ယေသှုရ။
ပ္ဍဲမၞိဟ်ဂြိပ်တိတ်ကၠုၚ် နူဍုၚ်ယေရုသလေၚ်ဂှ် မၞိဟ်မနွံယၟု'ဖိလိပ္ပိ' ကောန်ကွးယေသှုမွဲနွံဒၟံၚ်ရ။ ညးဝွံ အာပ္ဍဲ'ရးသှမာရိ'တုဲ လလောၚ်တြးပရိုၚ်ယေသှုရ။ မၞိဟ်ဗွဲမဂၠိုၚ်တံလေဝ် ပ္တေဟ်ကၠုၚ်ယေသှုတုဲ ဂွံဒုၚ်ကေတ်ဟံၚ်ပြာ်အိုတ်ရ။ မွဲတ္ၚဲဂှ် ကလုတ်အကာသမွဲဝွံ ဗၠးဏာဖိလိပ္ပိ ပ္ဍဲဂၠံၚ်ကန္တာရဗ္တဳရ။ အခိၚ်ညးကွာ်ဒၟံၚ်ပ္ဍဲဂၠံၚ်ဂှ် ဆဵုဂဗမၞိဟ်ဍိုက်ကၠုၚ်ဒၟံၚ်ကွဳစက္ကရတ်မွဲရ။ မၞိဟ်ဂှ် ကၠုၚ်နူကဵု'ရးအာဲသအဝ်ပိ'တုဲ ဒှ်ဂအုပ်ဇၞော်မွဲရ။ ဝိညာန်မသ္အးဇ္ၚးဝွံ ဖိလိပ္ပိ ဂွံဟီုအရေဝ်ကဵုမၞိဟ်ဂှ် ဗၠးဏာရ။
သာ်ဂှ်ရ ဖိလိပ္ပိဝွံ ညောန်ကၠုၚ်ဗ္ဒာဲကွဳစက္ကရတ်ဂှ်မ္ဂး ကောန်ဍုၚ်အာဲသအဝ်ပိ ဗှ်ဒၟံၚ်လိက်ပရောဗက်ဟေသှာယျချူလဝ်ဂှ် မိၚ်အာရ။ညးလေဝ် “မၞိဟ်တံဝွံ ညံၚ်ရဴဂွံဂစိုတ်သဵုသၟတ်ဂှ် ကေတ်ဏာညးရ။ သဵုဝွံ ညံၚ်ရဴသ္ၚိတ်ဇြဒၟံၚ်ဂှ် ညးလေဝ်အရေဝ်မွဲပါၚ်လေဝ်ဟွံဟီုရ။ မၞိဟ်တံဝွံ ဟွံမွဲကဵု ဓဝ်မတပ်၊ဓဝ်မရေဟ်သေဟ်တုဲ နုက်ကေတ်လမျီုညးအိုတ်ရ ” သာ်ဂှ် ဗှ်ဒၟံၚ်ရ။
ဖိလိပ္ပိဝွံ “အဓိပ္ပဲါလိက်မၞးဗှ်ဒၟံၚ်ဂှ် ကၠိုဟ်ဒၟံၚ်ကီုဟာ” သာ်ဂှ်သၟာန်ကောန်ဍုၚ်အာဲသအဝ်ပိမ္ဂး ညးဝွံ “ ညးမွဲမွဲဟွံသောၚ်ထ္ၜးကဵုအဲ မ္ဂး အဲကၠိုဟ်ဟွံမာန်ရ၊ ကၠုၚ်ဂဇအ်ဗ္ဒာဲအဲတုဲ ဟေသှာယျဂှ် ချူလဝ် ပရူညးဟာ၊ ချူလဝ်ပရူညးမွဲမွဲဟာဂှ် သ္ပဂုန်တုဲ သောၚ်ထ္ၜးကဵုအဲညိ” သာ်ဂှ် ကလေၚ်ဟီုရ။
ဖိလိပ္ပိလေဝ် ဟေသှာယျဝွံ ချူလဝ်ပရူယေသှုမဒှ်ရ။သာ်ဂှ် သောၚ်ထ္ၜးကဵုကောန်ဍုၚ်အာဲသအဝ်ပိတုဲ ထပ်ဗပေၚ်စုတ်တၚ်သၠပတ်တၞဟ်မ္ဂး လဴထ္ၜးပရူဓဝ်သမ္မာနာဲယေသှုရ။
ဖိလိပ္ပိကဵု ကောန်ဍုၚ်အာဲသအဝ်ပိတံဝွံ ဆက်ကၠုၚ်တြဴမ္ဂး စိုပ်ကၠုၚ် ဒၞာဲဍာ်ခၠိုၚ်မွဲဒၞာဲရ။ကောန်ဍုၚ်အာဲသအဝ်ပိလေဝ် “ ဗဵုညိ၊ ဂတမုက်ဂှ် ဍာ်ခၠိုၚ် နွံဒၟံံၚ်ရ၊ အဲဒုၚ်ၜါတ္တိဇာံဂွံမာန်ဟာ” ဟီုတုဲ ကဵုဒေါံမၞိဟ်ဗက်ကွဳစက္ကရတ် ဂှ်ရ။
ညးတံဝွံ စှ်ေနူကွဳစက္ကရတ်တုဲ အာပ္ဍဲဍာ်ခၠိုၚ်ဂှ်ရ။ ဖိလိပ္ပိဝွံ ကဵုၜါတ္တိဇာံကဵုကောန်ဍုၚ်အာဲသအဝ်ပိရ။ ညးတံတိုန်ကၠုၚ်နူဍာ်ခၠိုၚ်တုဲ ဗွဲမပြဟ်ဂှ် ဝိညာန်မသ္အးဇ္ၚးဝွံ ဖိလိပ္ပိဂွံဆက်တွံပရူဓဝ်သမ္မာနာဲယေသှုဂှ် ပလံၚ်ဏာဒၞာဲတၞဟ်ဟ်ရ။
ကောန်ဍုၚ်အာဲသအဝ်ပိဝွံ ဂွံတီမိၚ်ပရိုၚ်ဓဝ်သမ္မာယေသှုတုဲ မိတ်စိုတ်ဗွဲမလောန်မ္ဂး စဴကၠုၚ်သ္ၚိညးရ။
ပုံသၠပတ်သမ္မာ - ဝတ္ထုကလုတ် ၆း၈-၈း၅၊ ၈း၂၆-၄၀