၄၁။ကျာ်ကဵုယေသှုကလေၚ်ဂျိုၚ်တိုန်နူဂမ္စိုတ်

ကောန်ပၞာန်တံဂစိုတ်ယေသှု လ္တူတိုၚ်ညးမဒၚ်တုဲဂှ် မၞိဟ်ဟွံပ္တေဟ်ယေသှု က္ဍိုပ်သ္ကိုပ်ဘာသာယုဍတံဝွံ “ယေသှု မၞိဟ်ဠီဠာန်ဂှ် ပိတ္ၚဲလောန်တုဲမ္ဂး ကလေၚ်ဂျိုၚ်တိုန်နူကဵုဂမ္စိုတ်ရောၚ်ဂှ် ဗ္ကန်လဝ်ကဵုကောန်ကွးညးရ။ သာ်ဂှ်ရ ကောန်ကွးတံဟွံဂွံကၠတ်ကေတ်ဇွညးမာန်ဂှ် ကောန်ပၞာန်မွဲမွဲ ကဵုမၚ်ဂူသုသာန်ဂှ်ညိ”ဟီုကဵုသၟိၚ်ပိလာတ်ရ။

သၟိၚ်ပိလာတ်ပၟိၚ်ဝွံ ပ္ဍဲဂူသုသာန်ဂှ် ပၠုပ်စွံဇွယေသှုတုဲ ပထောၚ်ဂူဂှ် ကဵုကၟာတ်ကဵုတၟံဇၞော်ရ။ ကောန်ပၞာန်တံလေဝ် ဂွံမၚ်ဒၟံၚ်ချိုတ်တ်ပၠိုတ်တ်ဂှ် ဗ္ကန်လဝ်ရ။

ယေသှုချိုတ်အာတုဲ စိုပ်တ္ၚဲသဳဂှ် ညးမွဲဟွံကၠောန်ကမၠောန်ရ။ တ္ၚဲသဳမ္ဂးဂှ် ဂကူယုဍတံ ဂွံအာပ္ဍဲသုသာန်ဂှ်အခေါၚ်ဟွံမွဲတုဲ သဟာဲယေသှုတံလေဝ် ဟွံအာရ။ တ္ၚဲသဳလောန်အာတုဲ ပယာံဂယးပြဟ်ဂှ် မၞိဟ်ဗြဴၜါတၠဝွံ ဂွံလံက်ဇွယေသှုဂှ် ကေတ်ကၠေၚ်မြမောဝ်တုဲ တိတ်ကၠုၚ်ရ။

မွဲချိုန်ခဏဂှ် တိချဳဗွဲမဇၞော်တုဲ ကလုတ်နူလ္တူအကာသတေံ စှ်ေကၠုၚ်ရ။။ ကလုတ်အကာသဝွံ တၟံကၟာတ်လဝ်ဂူသုသာန်ဂှ်ပၠောတုဲ ဂဇအ်ဒၟံၚ်လ္တူတၟံဂှ်ရ။ ကောန်ပၞာန်မၚ်ဒၟံၚ်တံလေဝ် ဖေက်လကိုတ်ဗွဲမလောန်တုဲ လောတ်စှ်ေလ္တူတိ ညံၚ်ရဴမၞိဟ်ချိုတ်တ်ကီုရ။

အခိၚ်မၞိဟ်ဗြဴတံစိုပ်ကၠုၚ်သုသာန်ဂှ် ကလုတ်အကာသဝွံ “လ္ပဖေက်အိုတ်ညိ၊ နာဲယေသှုဟွံမွဲဒၞာဲဏံရပုဟ်၊ အတိုၚ်ညးဟီုလဝ်ဂှ် ညးကလေၚ်ဂျိုၚ်တိုန်နူဂမ္စိုတ်ယျ၊ ယဝ်ရဟွံပ္တေဟ်မ္ဂး ကၠုၚ်ဗဵုပ္ဍဲဏံညိ” ဟီုဂးရ။ မၞိဟ်ဗြဴတံလေဝ် လုပ်ရံၚ်ပ္ဍဲဂူသုသာန်ဂှ်မ္ဂး ဟွံံဆဵု ဇွယေသှုရ။

ကလုတ်အကာသလေဝ် “ ယေသှုကလေၚ်ဂျိုၚ်တိုန်ပၠန်ယျ၊ ညးစိုပ်ဒၟံၚ်ပ္ဍဲရးဂါလိလဲတေံကၠာရောၚ်၊ စဴအာတုဲ လဴထ္ၜးကဵုကောန်ကွးတံညိ၊ ”ဟီုကဵုညးတံဂှ်ရ။

မၞိဟ်ဗြဴတံလေဝ် အံသဝ်တုဲ မိပ်စိုတ်ဗွဲမလောန်ရ။ ညးတံဝွံ ဂွံလဴထ္ၜးကဵုကောန်ကွးယေသှုတံပရိုၚ်ခိုဟ်ဂှ် ဒြေပ်အာဗွဲပြဟ်ရ။

အခိၚ်ကလေၚ်စဴကၠုၚ်ဒၟံၚ််ဂှ် ယေသှုမံက်ကၠုၚ်ဂတမုက်ညးတံရ။ ညးတံဆဵုညာတ်ယေသှုတုဲ အောပ်မာရေဟ်သေဟ်အိုတ်ရ။ ယေသှုလေဝ် “လ္ပဖေက်အိုတ်၊ ပိုဲတံဆဵုဂဗ ပ္ဍဲရးဂါလိလဲတေံရောၚ်ဂှ် အာဟီုကဵုကောန်ကွးတံညိ၊” ဗ္ကန်လဝ်ကဵုညးတံရ။

ပုံသၠပတ်သမ္မာ : ခရေတ်ဝၚ်မာတ်သာဲ၂၇း၆၂-၂၈း၁၅၊ ခရေတ်ဝၚ်မာကု၁၆း၁-၁၁၊ ခရေတ်ဝၚ်လုကာ၂၄း၁-၂၊ ခရေတ်ဝၚ်ယဝ်ဟာန်၂၀း၁-၁၈