၃။ လွင် ပုန်အိုမ်တာင်

Frame 03-01

ဆီနမ် အန်န့ဘော လှေန်၊ ဒူအီ မိူဝ်ဟဲ့ဝီကိူန့် ကွယ်ဒဲင် ကာဒါယ်။ ဒူအီ ကိူန့်ဂေတီ၊ ဂေတူမိုဝ်း နဝ်း မွှိုမ်ဂေ ဘော ကာဂ့လျီတ့်၊ ဟဲ့ဘူင် အီဆီစီဝ့် ဆီစာဝ် ဆေဆေ။ ခုဝ်ဒူအီ ကိူန့်တီ ဟဲ့ဘူင်နာ ဆီစီဝ့်၊ ဇဝ်ဖြာ ဘောဝီ ဆုင်ဖျာတ်တဲး အိုမ် တာင်ပုန်ဒဲင် ကာဒါယ်။

Frame 03-02

မာလဲန့မိုဝ်း ပီလွင့်နဝ်း အန်ဇဝ်ဖြာ အီစိူဝ်အာနုဝ်၊ အန်အူဝီမုး ဒူအီ မွှိုမ် ကာတဲဒူအီ မက်ဂေ၊ ခုဝ်အန်ဇဝ်ဖြာ ကာ လာင် ဒီအာနုဝ်၊ အုဝ်ဒီဘူင် တဲးအိုမ်တာင်ပုန် တူတ့် ဒဲင်ကာဒါယ်နီ၊ အန်ဇဝ်ဖြာ ဝီစ်ုအာနုဝ် ရန်ရိုဝ်ဆမ်ဖုဝ်၊ အန်တဝ်းပါယ် တီ။

Frame 03-03

ဇ၀်ဖြာ၊ ဟဲ့စ္ု ဒါအာနုဝ် ဘူင်ရိုဝ်ဆမ်ဖုဝ် ပါယ်တီ၊ နာတူင့် အန်ကာနိး အူယ်မာယဝ်း။ နာတျီမ် အန်ကာနိး ဖန်ဂိုဝ်။ နာစာ အန်ကာနိး အူယ်ဂိုဝ်။ မဲလုဝ်တာဘဲန် ဘူင် ရိုဝ်ဆမ်ဖုဝ်တဲး န့မိုဝ်း အူယ်ခြွင့်၊ နာခြိုမ်အူခြွင့်၊ နာဒဲင်အူခြွင့်၊ နာကာတဲ အူခြွင့် ဂါယ်ဘော မာလုဝ်း အူဘူင့် မဲလုဝ်ဘူင် ရိုဝ်ဆမ်ဖုဝ်ပါယ်တီ။ ခုဝ်၊ ရိုဝ်ဆမ်ဖုဝ်တီ တဲးဒါအာနုဝ်ဂေ အီဘေန့် အန်ဂေ ဂွန်အန်ဘောဂေ ဒုဝ်ဆတ်တာဝါဂေ ဆေအိုမ်ဟဲတာ တဲးဂေပွိုန် ဒီကွယ်ဆီချာ ခဲင်ရိုဝ်တီ။

Frame 03-04

ဒါအာနု၀်တွိုန်၊ အန်ဝီဘူင် တူတ့်ပဲဟဲ့ ဒမ်အုန်ဇဝ်ဖြာ ဒီအန်။ အန်ဘော ထူမ်ဂြုဝ်းဇဝ်ဖြာ။ ဘော ဂွန်အန်အူယ် ဝီတွိုန်၊ ဂေဘော ဘူင်ရိုဝ်ဆမ်ဖုဝ်တီ၊ ပီတဝ်းဇဝ်ဖြာ ဒီဂေ။ ခုဝ်ရိုဝ်ဆမ်ဖုဝ် တီ န့ဘောတာင် ကာဆဝ် ဆီနမ် အန်ဂေ ဆီငဲအန် န့ဘောလှေန့်။ ဒါအာနုဝ် တွိုန် အန်ဟဲ့ကာလာင် လွင်အိုမ် ဒီတာင် ဒီဒူအီဂေ တဲးဂေထူမ် ဒူပ်၊ ပီတဝ်းဇဝ်ဖြာ၊ ဂေအူဝီ မိူဝ်တူထူမ်တူ ညှိုမ်ပီတဝ်း အန်ဒီဂေ။

Frame 03-05

ဇဝ်ဖြာ ဟဲ့စ်ု ဒါအာနုဝ် ဒိုဝ်းဘ့လေး အုန်ပီ ဒီဟူမ်ခဲင်ရိုဝ်၊ တဲးန့မိုဝ်း ပီဒီဟူမ်ဂေ။ အီဘေန့် အန်ဂေ ဂွန်အန် ဘောဂေ ဒုဝ် ဆတ်တာဝါ တဲးန့ ဂ့လိုမ် ပီဒီဟူမ်ဂေ။ ဟဲ့ဇမ် အာဝ်ခြာဝ် အန်ဇဝ်ဖြာ ဝီစ်ု ဒါအာနုဝ်။ ဂေအဝ် အန်ဘော ဂွန်အန်အူယ် အီဒီအီဘေန့် အန်ဂေဘော ကာဂ့လျီတ့် ဟဲ့မုးဒါအီ။ ဇဝ်ဖြာ ဟဲ့စ်ု ဂေလိုပ်ဒွန် အီခဲင် ရိုဝ်ဆမ်ဖုဝ် တာင်တွိုန်။

Frame 03-06

ဇဝ်ဖြာ ဟဲ့တဲး၊ ဒုဝ် ဆတ်တာဝါ ဂေလိုပ်ခဲင် ရိုဝ်ဆမ်ဖုဝ်တွိုန်။ အာလူင့်ဘူဒုဝ်၊ အာဟျာင်ဘူဒုဝ် တဲးဂေ လွတ်တ အိုမ် တာင်။ ခဲင်အာမျုဝ် ဒုဝ် ဆတ်တာဝါ ပီတဝ်း အန်ဇဝ်ဖြာ အီဟဲ့ဟွတ့်။ အာလူင့်ဘူဒုဝ်၊ ဘော အာ ဟျာင် ဘူဒုဝ်တီ၊ န့ဟဲ့ပွှိုန် ဒီတာ ဒီလှူ ကာဆိူမ်ခဲင်ငဝ်။ ဂေဘော ကာဂ့လျီတ့် ဟဲ့ဟွတ့် လိုပ်တူတ့်၊ ပန်တီဒုဝ် ဇဝ်ဖြာ ဘောဝီ ကာဘိတ် မာလုဝ်းတီ။

Frame 03-07

၀ါယ်အန်တီ၊ ဂ့လာယ်တာင် ဘောတး။ ဘောဂ့လာယ် အာဝ်နပ်ဒီဟ၊ အာဒါဖွုန် ဂိုဝ်ဆီငဲ ဖွုန်ဂိုဝ်မှိုဝ်။ အိုမ်ဘော ကိူန့် ကာဖြတ့်လေး ခဲင်ကာဒါယ် ဘောပုန် တူတ့်ဒဲင် ကာဒါယ်ဒွန်နာ ဒွန်ပ့လုဝ့်။ အိုမ်ယီ ဟဲ့တာင် ကာဆဝ်ဒဲင်ကာဒါယ်၊ ခုဝ် အိုမ်ဘောပုန် တူတ့်နွန်စာ ဘောနွန် အီဟဲ့ကွယ်ဒဲင်ကာဒါယ်။

Frame 03-08

ဟဲ့ဂီတ်၊ ဒူအီဂေ ဒုဝ် ဆတ်တာဝါ အီဟဲ့လိုပ်ကွယ် ခဲင်ရိုဝ်ဆမ်ဖုဝ် တွိုန်၊ နာတအန်တီ ဘောကာဂ့လျီတ့် ဒူအီဂေ ဒုဝ်ဆတ်တာဝါ ဘောယမ်တူတ့်။ ရိုဝ်ဆဝ်ဖုဝ် တာင်တွိုန် အန်ယီလှဲ နာဒဲင်အိုမ်။ ဒူအီဂေ ဒုဝ် ဆတ်တာဝါ အီဟဲ့ကွယ် ခဲင်ရိုဝ် ဆမ်ဖုဝ်တီ၊ ဂေတူလုဝ်ယမ်။

Frame 03-09

ဝါယ်အန်တီ၊ ဂ့လာယ်ဘောဝီဟး။ ရိုဝ်ဆမ်ဖုဝ် တာင်တွိုန် ဘောလှဲနာ ဒဲင်အိုမ် အာဒါဖန်မာဂျီန်။ အာဝ် ခြာဝ်အန်တီ၊ အိုမ်ဘောကြဲဒီဟိတ်။ အူဆီငဲ၊ ရိုဝ်ဆမ်ဖုဝ် တာင်တွိုန်။ ဘောစေတ့်ကွယ်ဒဲင်နွန် အူဘူင့်။ ခုဝ်အန် တီ၊ အိုမ်ဟဲ့ဆီပုန်ဒင်ကာဒါယ်။ ဝါယ်ဟဲလှေန် အူယ် မာဂျီန် ဘောဝီ ပွိုန်ဒီ ယိုဝ်ကာဒဲတ့်နွန်။

Frame 03-10

ဟဲ့ ၀ီနု၀့်ဆီငဲဖွုန်ဂို၀်၊ ဒါအာနု၀်တွိုန်၊ အန်ဝီဒိုဝ်း မာကာအာတ် အူဒု၀်၊ ဘ့လေးနာရေတ့် တဲးအန်နပ် အိုမ်ဟဲ့ဟွတ့် တူဟိတ်။ မာကာအာတ်တွိုန်၊ အန်ဘောဘေန့် ဝီဒီလဲ၊ ဘေန့်ဝေန့်၊ ဟြေတ့်ကာဒူင့် ဒီလုဝ်စုးအန်၊ အန်တူယိုဝ်၊ နပ်ဝီဘေန့်တး နာရိုဝ်ဆမ်ဖုဝ်တွိုန်။

Frame 03-11

ဝါယ်အန်တီ၊ ဒါအာနုဝ် ဘောဝီဒိုဝ်းဘ့လေး မာဘ့လူယ် အီဟဲ့မုး မာဆိမ် အူဒုဝ်၊ တဲး အန်နပ်ယုဝ်အိုမ် ဒဲင် ကာဒါယ်ဟဲ့ဟိတ်။ ခုဝ်၊ မာဘ့လူယ်တီ အန်ယီတူယိုဝ် ကာဒူင့်ပွိုန် ဒီစုး။ ဟဲ့ဟွတ့် အန်ဘောဝီတး၊ ဒူပ်ဒါအာ နုဝ်။ ဝါယ်အန်တီ ဒါအာနုဝ် ဝီကွယ်ပေါဘူဆီငဲ။ ဟဲ့ဟွတ့် အန်ဝီတဲး မာဘ့လူယ်လေး ပေါအူစိုပ်။ မာဘ့လူယ် တွိုန်၊ အန်ဘောဝီ ကာပ်တး လှာဟေ ဒီမန်၊ အီလတ်ကာမာယ်။ ပန်တီ၊ ဒါအာနုဝ် ကော ဟဲ့နပ်၊ အိုမ်ဟဲ့ဟိတ် ဒဲင်ကာဒါယ်။

Frame 03-12

ဒါအာနု၀်၊ ၀ီကွယ်ဘောဘူဆီငဲ၊ ဟဲ့ဟွတ့် အန်ပီ၀ီဘ့လေးမာဘ့လူယ်ပေါအူဇေန့်၊ ဟဲ့ နု၀့်အူယ် ဇေန့်ဘ့လေး အန် မာဘ့လူယ်။ ဟဲ့ ဟွတ့်၊ မာဘ့လူယ်တွိုန်တူ၀ီတး။ ခုဝ်၊ အိုမ်ဟဲ့ ဟွတ့်၊ ဟိတ်တူတ့် ဒဲင် ကာဒါယ်။

Frame 03-13

ဆီနမ်နီ၊ န့ဟဲ့ ဇမ်အာမာဂျီန်၊ ဇ၀်ဖြာတ၀်း၊ ဒီဒါအာနု၀်တွိုန်၊ “တဲးမဲလေးခဲင်ရို၀်ဆမ်ဖု၀်တီဘောမဲ၊ ဘောအီဘေန့် မဲဂေဂွန်မဲ၊ ဘောဒု၀်ဆတ်တာ၀ါဘောကာဂ့လျီတ့်။ တဲးမဲတဲးဂေဒူပ်မဲ။ တဲးဂေ၀ီမို၀်းဂွန်၊ တဲး ဂေ၀ီဘြဲကိူန့်ဒဲင်ကာဒါယ်”။ ဇ၀်ဖြာဟဲ့ ဟွတ့်၊ ကာလာင်ပါယ်တီ၊ ဒါအာနု၀်ဂေအီဘေန့်ဂေ ဂွန်အန်၊ဘောလေး တူတ့်ဒဲင်ရို၀်ဆမ်ဖု၀်တွိုန်။

Frame 03-14

ဒါအာနု၀်၊ ဟဲ့ဟွတ့် လေးဒဲင်ရို၀်ဆမ်ဖု၀်တွိုန်၊ အန်၀ီဘူင်မာလာင်ပီဒီလှူ ဒီ ဇ၀်ဖြာ။ အန်ဟဲ့ဟွတ့်၊ ဘူင်မာလာင် ပီဒီလှူဒီဇ၀်ဖြာအန်၀ီဒို၀်းမာဒု၀် အီ ဟဲ့ဘွတ်မင်မျု၀်လှူဒီဇ၀်ဖြာ။ န့ဟဲ့ လ၀်းန၀်းဇ၀်ဖြာ၊ ပီဘူင်ဒါအာနု၀်တွိုန်၊ ဇ၀်ဖြာ၀ီမွင့် ကာရာဒီဂေအီဘေန့်အန်ဂေဂွန်အန်။ ဘောအီဘေန့် အန်ဘောကာဂ့လျီတ့်။

Frame 03-15

ဇ၀်ဖြာဝီတ၀်း၊ "အုဝ်ဟဲ့နပ်၊ ဒူအီ ဂေ အီဟဲ့ကွယ် ဒဲင်ကာဒါယ် တူမွှိုမ်၊ ခုဝ် အုဝ်ဟဲ့ ကာဝေဂေ ဒူအီ၊ အီကွယ် ဒဲင်ကာဒါယ်၊ ခုဝ် အုဝ် အာဝ်ဒိူက် ဒမ်ဒဲင် ကာဒါယ် တီ ဒေါမှဝ်။ ခုဝ် ဘောအိုမ် တာင်ကွဲ့တဲး ကာဒါယ် ကာပျာတ့်။ ခုဝ် မှဝ်န့ပါယ်၊ ဒူအီ ကိူန့်။ အူဆိန့် ဒီတဲတ် ဂေ၊ နဝ်းဂေ အာဝ်မွှိုမ်ဂေ ဟဲ့နပ် ဒီဘူင်မှာပ်" ။ ခုဝ်ဇဝ်ဖြာ ဟဲ့ကာလာင်ပါယ်တီ။

Frame 03-16

၀ါယ်အန်တီ၊ ဇ၀်ဖြာဝီတဝ်း၊ "အုဝ်ဟဲ့ဒွါ ကာဒိက်ဆတ်ဇာ ဒီဘေအူ ဆိန့်ဒေါဂုဝ် အာတီ န့ဟဲ့မုး ခုန်မာ ယဲင်။ ဆေ ခုန် မာယဲင် ဟဲ့ယီလေးခဲင် ဂါင်ဟြာဝ်၊ အုဝ်ဟဲ့နပ်၊ အုဝ်ဟဲ့ဘ့လေး ကာဒိက်ဆတ်ဇာ ဒီဒူအီ။ တဲး ဘောဂေ ဒူအီတီ၊ ဟဲ့နပ် ကာဒိက်ဆတ်ဇာ ပီဒွါ အုဝ်ဒီဂေ"။

A Bible story from: Genesis 6-8

open-licensed biblical content

Ruching Palaung: Open Bible Stories

၃။ လွင် ပုန်အိုမ်တာင်