၄၃ - လွင်စုးဂေဒဲ ဇူင်ကြိုင်ဇဝ်ဖြာ

ဝါယ်ဟဲဟွတ့် ဝီအန်ဇဝ်ယေဆူ ခဲင်မိူင်ခြီဝ်တီ၊ ဒါဘဲဂေ အီဒူပ် အန်ဇဝ်ယေဆူ မိူဝ်နပ်ဝီကွယ် ခဲင်မိူင် ယေရု ဆာလဲမ်တီ၊ ခုဝ်အန်ဇဝ်ယေဆူ ဟဲ့ဟွတ့်ဒမ်အုန် ဒီဂေပါယ်တီ။ ဒူအီဂေ အီညှိုမ်ကွယ် ဒီတီမိူဝ်၊ အာဝ်မိုဝ်း ဒီလှဝ်အန် ဂေကွယ်ရိုမ်၊ ကွယ်ကာ ဇုဆာခိုဝ် ဒီဇဝ်ဖြာ။

ဒွန်ဆီနမ် ဝါယ်ဟဲ့ဟွတ့် ဘ့ကွယ် ပါဆာခါ၊ ကာဘက် ဆီငဲ ဖန်ဂိုဝ်တီ၊ န့မိုဝ်း ဘ့လွယ် ဆီငဲ တာင်ဒူအီ အာမျုဝ် စူဂေ၊ ဆီငဲတီ န့စိူဝ် ဖေန်ထေခူတ် ခုဝ်လုဝ် ဘူင်ဂေ ဆီငဲ ဖေန်ထေခူတ်နီ၊ န့မုး ဆီငဲ လုဝ်ဆုဝ့် ဇုင်ဒူအီ အာမျုဝ်ဇူဂေ ဘောကာဒါယ် တးလာယ် ကာဇုခဲင်မိူင် ယေရုဆာလဲမ် တီ၊ ဆီငဲ ဖေန်ထေခူတ် တီ န့မုးဝါယ်ဟုဝ့် အန်ဇဝ်ယေဆူ ခဲင် မိူင် ခြီဝ်ကာဘက် ဘူဆီငဲန့မုး။

ဒူအီ ညှိုမ်ဂေတီ ဒေါကွယ်ကာ ဒိုမ်ဂေ ခဲင်ကာင်တွိုန်၊ ပန်တီမိူဝ် ဒေါမှဝ် ဒေါအန် န့ပီဟမ် ခုန်တး နုဝ့်ခဲင်အန် တီ၊ ကာရူယ် ဂိန့်ဒူအီ ညှိုမ်ဂေတီ၊ န့ပီငဝ်း ကာပ့လုး နာဒဲင်ဂေ၊ နဝ်းဖွိုမ် အန်ဇဝ်ဖြာ မိူဝ်ဘောနုဝ့် ခဲင်ဒုဝ်ဂေ။ ဂေမိူဝ် ဘောတာဂြုဝ်း ပီဟာဝ် အိူပ်ဗျူက် အန်ဇဝ်ဖြာ၊ ဂေမိူဝ်တူ နပ်ပီ ဘောတဝ်းဂေ၊ မာလဲဂြုဝ်း ပီကာလာင်ဂေနီ၊ န့မုး နဝ်း ဖွိုမ် အန်ဇဝ်ဖြာတဲးဂေ ပဲဒီကာလာင်၊ တဲးဂေနပ်ဂြုဝ်းဂေတီ။

ဒူအီဂေ အီကွယ်ခဲင်မိူင် ယေရုဆာလဲမ်တွိုန် ဘောယိုဝ်ဟမ် အာတီ၊ ဂေတဝ်းမာဆေ န့မုးဟမ်တီ။ ဂေဘော ကာဂ့လျီတ့်တး၊ တးယွတ် အာတီ၊ ဒူအီ ညှိုမ်ဂေတဝ်း ဘေဟဲ့ယိုဝ် ပီဘူင်ဇဝ်ဖြာ အီမိုဝ်းပွုန်တာင်နီ၊ ဂေနီဂေကာ လာင်ဂြုဝ်း အာဝ်လာယ် ခါနှဲမ် ဇမ်မိူဝ်၊ ခဲင်ကွယ်မိူင် ဒွန်မိူင် ဂြုဝ်း ပီကာလာင်ဂေနီ၊ ဂေဟဲလာယ် နပ်၊ ခုဝ်န့မွှိုမ် အာမ် ကာဆာဝ်၊ ဒူအီဒူပ် အန်ဇဝ်ဂေတီ မုးဒူအီ အီဆာရေလ၊ အာရေမိတ် (အာရမစ်) ဟေဘ့ရူ ဂါယ်ဂ့ရိတ် ဂြုဝ်းပီကာလာင် ဂေတီ မိူဝ်၊ န့ပီဇဝ်ဖြာ ကာလာင်ဂြုဝ်း ဒီဂေ၊ န့ပီဂြုဝ်းဒင် ဂေဆိန့်အာတ့်နီ၊ ဂေဘောဝီအာမ်ကာဆဝ်။

ဒူအီ ဂေမင်ကာလွင့် တဝ်းဒီဘဲ အန်ဂေတီ ဟဲ့ယိူတ့်၊ ပန်တီ ပေတရုတွိုန် ဘောဝီယိတ့်စွင့် "ထူမ်ဂြုဝ်းအုဝ်၊ ဒူအီ ဂေနီ အာဝ်မုး ယိူတ့်၊ ပီယိုဝ်ဘေ အာနီ၊ န့ပီ ဆိန့်ဒေါမွိုမ် ဒါအီမိုဝ်း အာငျာန် နပ်ဒီခဲဟာဝ်နာအာတ့် အီစိူဝ် ယော လာ ပန်ဒီဟွတ့်အန်တီ၊ အန်ဇဝ်ဖြာ ဒီဟုး ဆီဂ့လုး နဝ်းဖွိုမ် အန်တဝ်းပါယ်တီ၊ ခုဝ်ဘဲန် အန်ပါယ်တီ၊ အန်ကာလာင် ဂေပါယ်တီ"။

"အိုယ်ဘေ ဒူအီ အီကွယ် ခဲင်မိူင် အီဆာရေလ ဘေဒွန်အီ၊ အန်ဇဝ်ယေဆူနီ၊ မာဆေအန်မုး ခုဝ်ပီဘျာကိူန် လွင် မွှိုမ် အာမ်ဒွန်မျုဝ်နီ၊ အန်တီ၊ အန်တာပွုန် အန်ဇဝ်ဖြာ ဘူင်လီမွှိုမ်အာမ် ဒွန်မျုဝ်" ဘေမိူဝ်ဟဲ့ဟွတ့်နပ် ဘေယိုဝ်အာနီ၊ မာလဲ ဂေဝီ ဒါင်အန်၊ ဒဲင်ရွက့်ကာဝဲ့။

"အန်ဇဝ်ယေဆူ ဘောဝီဟွတ်ယမ်၊ မာလဲ အန်ဇဝ်ဖြာ ဝီတဲး အန်ဇဝ်ယေဆူ ဝီယိတ့်ဝီအိမ်၊ လွင် အန်နီ မုး ပီဒဲမ်အုန်ဂး၊ ဒါအီ မိုဝ်းအာငျာန် အီနပ်နာအာတ့် "ဘေတီ ကွယ်တဲး ဒါအီမိုဝ်း ပွုန်တာင်တွိုန် ကောဝီမုး အမ်ခဲင် ကာဒဝ်တီ"။ လွင်ပီးတဝ်း အန်တီဟဲဝီ ကာဇီ၊ အန်ဇဝ်ဖြာနီ အန်တဲး အန်ဇဝ်ယေဆူ ဝီယိတ့်ဝီအိမ် ခုဝ်အေမုး ဆက်ဆေအန်တီ"။

“အန်ဇဝ်ဖြာတီ ဘောဝီတဲး အန်ဇဝ်ယေဆူ ကွယ်ဘ့လာင် အာအးအန်၊ ဟဲ့ဟွတ့်န့ပီ၊ ပီဟဲဟွတ့် တဲးအန် ကာဒိက်ဒီအေ၊ အန်ဘောဝီ ဘ့လေးလူင် နဝ်းဖွိုမ် အန်ဇဝ်ဖြာ။ ပီယိုဝ်ဘေနီ မိူဝ်န့မုးနဝ်းဖွိုမ် အန်ဇဝ်ဖြာ ဟဲဘူင် ပါယ်နီ"။

“ဘေမိူဝ် ဝီဒါင် အန်ဇဝ်ယေဆူ ဒဲင်ရွက့် ကာဝဲ့၊ မာလဲ ဘေလုဝ်နပ်ဆီချာ၊ လွင်အန်တီ မုးအန်ဇဝ်ဖြာ ဟဲ့ ဟွတ့်ဘူင်ခဲင် ကွယ်ဒွန်မျုဝ် ဘောကာဂ့လျီတ့်၊ အန်မုး ကာညာ၊ ဘော မေဆီယ တဲး န့မုး ဘော အာမျုဝ် အန်ဘူင် ပါယ်တီ"။

ကူပ်ကာလာင် ပေတာရူ လွင်အန်ဂေတီ၊ ဒူအီ အီထူမ်ဂြုဝ်း အန်နဝ်း ဂေကွယ် ဝီဒီဒုး ဒီယေန့်၊ ပန်တီ ဂေ ဘောဝီတဝ်း ဒီ အာပေတာရူ ဘောဂေအီ ဒူပ်အန်ဇဝ်ဂေတီ၊ "အိုယ်ဘေအူကတ် အူဝါမှဝ် ယေဒီလုဝ်ပါယ် ဒီဘူင် အာနီ"။ ဝီဒီမွှတ်ပါယ်တီ။

ပေတာရူ ဘောဝီတဝ်း ဒီဂေ၊ "ဘေဘော ကာဂ့လျီတ့် အန်ဇဝ်ဖြာ၊ တူဆီအုန်နဝ်း အန်ဒီဘေ၊ ခုဝ်အန်ကူပ် မှာပ်ဘေဇိုဝ်တီ၊ တဲးဘေန့လှုဝ်းနဝ်းဘေ၊ ဘေအူဝီ ဒေါအူဝီ တဲးဘေ ဂဝ်ပွုန်အန်ဇဝ်ယေဆူ တဲးဘေ စိုပ်ခဲင်အိုမ်၊ ဟဲ့ ဟွတ့် အန်ဇဝ်ဖြာ ဒီတဲး နဝ်းဖွိုမ် ဆီငါဘွတ် အန်ဒီဘေ၊ တဲးန့ပီ လာယ်ဆွင်အန်"။

ကာဘက် ဒူအီ အူယ်ဟြဲန် ညှိုမ်ပီကာလာင် အာပေတာရူတီ၊ ဂေဝီဘဲန် ဒီဘဲ အန်ဇဝ်ယေဆူ၊ ဂေမိူင်ဝီ ဟွတ့်စိုပ် ဂေ ခဲင်အိုမ်၊ ခုဝ်ဝီ ဘဲန်မိုဝ်း အန်ဇိူင်ကြိုပ် ဇဝ်ဖြာ ဒီတဲတ့် ခဲင်မိူင် ယေရုဆာလဲမ်တီ။

ဂေအီ ညှိုမ်တီမိူဝ် အာဝ်မိုဝ်း ဒီလှဝ်အန်၊ ဂေထူမ်ဂြုဝ်း အီမာနဝ် ဒီဂေတီ၊ ဂေဇိုဝ်တီ အူကာစန်၊ အူကာစန် ဂေဝီလာယ်ယိုဝ်၊ ဘောဝီဟူမ် ရိုမ်၊ ဘောဝီကြိုပ်ရိုမ်ဇဝ်ဖြာ၊ ဂေဘောဝီ အိုပ်မျုက်ရိုမ်ဒီဇဝ်ဖြာ၊ ဘောဝီမိုဝ်း ဂေဒွန်မျုဝ်၊ ဂေလာယ် ကာဆာင် ခါနာဂေ၊ ဒူအီ ခဲင်မိူင်ဂေတီ၊ ဝီယွတ်ဂေ ဝီညာမ်နာကျ၊ နာမွိုမ်၊ အူဆီငဲ ဒါအူ ဆီငဲ ဒူအီစှိုမ် ဂေနဝ် ကာပွါဟာဝ်ပါယ်တီ။

A Bible story from: Acts 2