၃၈ - လွင်တူ မိုဝ်းဂေ၊ ကာ ဒိ ဆတ်ဇာ ဒီအန်ဇဝ်ယေဆူ

ဒူအီ ယူဒါ ဂေ ဒွန် ဆီ နမ် ဂေဘူင် ဘ့လွယ် လှုဝ်း ဇဝ်ဖြာ အီစိူဝ် ပဆာခါ နီ၊ ခုဝ် လုဝ် ဘူင်ဂေ ဘ့လွယ် နီ။ လွင်ဆီ ဖါဝ်အန်၊ ဆိန့် ဘာန် ဒေါ် မွှိုမ် ဆီ နမ် အန်ဟဲ လှေန့်၊ အန်ဇဝ်ဖြာ ဟဲစွယ်ဂေ၊ တဲးဂေ လုတ် ဘဲန် မှာယ်၊ ဒီ ဒူအီ အီဇိပ် ဂေ၊ အန်ဇဝ်ယေဆူ ဘောဝီစုး ဒီမာ နုဝ် တဲး ဒီ ဒါ ဘဲ အန် ဂေ။ ဆီ ဒါင် အန် ဘော ဂြဲ ဒီ ဟူင် ဟာဝ် ဘော ဝီ နုဝ့် အူယ် ဆီနမ်၊ အန်ဇဝ်ယေဆူ၊ ဘော ဒါ ဘဲ အန် ဂေ မိူဝ် လုဝ် ဝီ ဘူင် ရိူမ် ဘ့လွယ် ပဆာခါ တီ ခဲင် မိူင် ယေရု ဆာလဲမ် ခဲင် ဘ့လွယ် တီ မိူဝ် ဂေ ဒီ ငဝ်း ဘော အန်၊ ဘော လွင် အန် တီ။ အန်ကာလာင် ဝဲန် ဒီ ဂေ ပါယ်တီ။

အန်ဇဝ်ယေဆူ မိုဝ်း ဒါ ဘဲ အူ ဝီ အန် စိူဝ် အာ ယူဒတ်၊ အာ ယူဒတ် တီ အန် ဟဲဟွတ့် ဂဲပ် ရွိုန် လှူ ဆေဆေ အန်န့ ပြာ ဒီ ဒိုဝ်း ရွိုန် ဂေတီ၊ ဒေါ တး ဇမ် ဂေ၊ အန်ဇဝ်ယေဆူ၊ ဘော ဒီဘဲ အန် ခဲင်မိူင် ယေရူဆာလဲမ် တီ အာ ယူဒါ တွိုန် မိူဝ် ဘော ဟာဝ် လာယ် ယိုဝ် ဒီ ဒူ အီ တာင် ယူဒါ ဂေ၊ အန် အာဝ် မိုဝ်း ကာ ဒိက် ဆတ်ဇာ၊ အန် ဘောကာလာင် အာ ရိုပ် အာရာင် အန် ဇဝ်၊ ဒီ ဒါ တာင် ယူဒါ ဂေ၊ ဘော ဝီ မှာန် ရွိုန် ဒီ ဂေ၊ အန် ယိုဝ် ဒီ အာငျာန် ပါယ်တီ၊ အန် မိူဝ် ဟဲဟွတ့် နပ် ခုဝ် ဒါတာင် ယူဒါ ဂေ ဆီငဝ်း အန်ဇဝ်ယေဆူ၊ ဘော ဝီ တူ အိုင် အန်ဇဝ်တဝ်း အန်မုး မေဆီယာ ခုဝ်ဆီငဝ်း ဝဲန်ဂေ ဒီ အန်ပါယ်တီ။

န့မိုင်း ဒါတာင် ဂေ၊ အီဘူင်ဂါန် ဇဝ်ဖြာ၊ အီတာင် လွှိုမ် ဒါတာင် ယူဒါဂေ၊ တဲး ကာဒိက် ဆတ်ဇာ အာ ယူဒတ် လိုဝ် ဒွါ ရွိုန် ဒီ အန် အူယ် ဂိုဝ်၊ ဘော တဲး အန် ဒဲ့တး အန်ဇဝ်ယေဆူ ခဲင် လာယ်ဒဲ ဂေ။ လွင် အာ နီ မိူဝ်၊ ဒါဂေ အီ မိုဝ်း အာ ငျာန် ဆိန့် အာတ့် နီ ဟဲဟွတ့် ဒွိုမ်မိုဝ်း ဒီ ကာလာင် ဝဲန် လွင် ပီ ဒီ လုဝ် ပါယ် အန်ဂေ နီ ဒွန်မျုဝ်၊ ပန်တီ အာ ယူ ဒတ် တွိုန် ဘော ဝီ ဒိုဝ်း ရွိုန် ဂေ၊ ဘော ဝီ လေး ဟာဝ် တူင့် အူဇေန်၊ ပန် တီ လွင် စုး ဒီ ဘဲန် လုဝ် မှေတ့် ဒူ အီ ယူ ဒါဂေ ဒီ အန်ဇဝ်ယေဆူ။

အန်ဇဝ်ယေဆူ ဂါယ်ဒီဘဲဂေ၊ ဘောဝီ ဘူင် ဘ့လွယ် ပဆာခါ ခဲင်မိူင် ယေရူဆာလဲမ် တီ၊ ဒေါဟူမ်ဂေ ဘ့လွယ် ပဆာခါ တီ၊ အန်ဇဝ်ယေဆူ ဝီဒိုဝ်းခါမုန်၊ ဝီကာဘက် လှီဝ်ဒီဂေ၊ ဒိုဝ်းဘေဟူမ် အာနီ၊ ခါမုန်နီ၊ န့မုး ဒုဝ်အုဝ်၊ အုဝ်လှီဝ် ဒီဘေ တဲး ဘေဘူင်လီနီ၊ တဲးဘေန့လှုဝ်း အုဝ်ဆေဆေ အန်ဇဝ်ယေဆူ တဝ်းပါယ်တီ၊ လွင်ပီဘူင် အန်နီ၊ န့ပီ အန်ဇဝ် ယေဆူ လုဝ်အာပ်ဒုဝ်အန်၊ အန်ကာလာင်ပါယ်တီ။

ဟဲ့ဟွတ့် အန်ဇဝ်ဝီဒိုဝ်း ဆီလာတ့် ပေါအူဘ့လ၊ "ဒိုဝ်းဘေဒျီင် အိုမ် ဆာဘျိတ်၊ န့ပီ ကာဒိက်ဆတ်ဇာ ကာ မာယ်၊ န့မုး နှာမ်အုဝ်၊ ကူပ်နှာမ်အုဝ်နီ၊ ပီဘူင်ဘေ လီတူအ၊ တူမွှီုမ်ဒွန်မျုဝ် အန်ဇဝ်ဖြာ တူအုန်နဝ်းအန်ဒီဘေ၊ ဘေ မိူဝ်နပ် လုဝ်ဘူင်ဟာဝ် လီပီဘူင်အုဝ်နီ၊ ဒေါဘူင်ဘေဇိုဝ်နီ၊ တဲးဘေ ဝီဝ်န့လှုဝ်းအုဝ်။

ဟဲ့ဟွတ့်အာတီ အန်ဇဝ်ယေဆူ ဘောဝီတဝ်းဒီ၊ ဒါဘဲအန်ဂေ၊ ခဲင်ဘေတီ န့မိုဝ်း ဒါအူဝီ၊ အန်ဒီပျာတ့် ကာဒိက် ဆတ်ဇာဒီအုဝ်၊ အန်ဇဝ် ဟဲဟွတ့်တဝ်းပါယ်တီမိူဝ်၊ ဒီဘဲအန်ဂေ ဘောဝီအာမ် ကာဆဝ်၊ အာဆေန့ဒီမုး၊ ဒူအီ အီဘူင်ဇိုဝ် တီ၊ အန်ဇဝ်ယေဆူ ဘောဝီတဝ်း "ဒါပီလှီဝ်အုဝ် ခါမုန်ဒီအန်၊ အန်မုးဒူအီတူမိုဝ်း ကာဒိတ်ဆတ်ဇာ ဒီအုဝ်" အန်ဇဝ်တဝ်း ပါယ်တီ၊ ဟဲဟွတ့် အန်ဇဝ်ယေဆူ ဘောဝီလှီဝ် ခါမုန် ဒီအာယူ ဒါတွိုန်။

ဘောဝီ ဟဲ့ဟွတ့် ဒိုဝ်းအာယူဒါ ခါမုန် တီမိူဝ် ကာနမ်စါဝ် ဘောဝီလိုပ် ခဲင်ဒုဝ်အန်၊ အန်မိူဝ် ဘောဝီလေး ဟာဝ်စွယ်၊ ဒါတာင် ယူဒါဂေ တဲးဂေ ပွိုန်ဒီမှေတ့် အန်ဇဝ်ယေဆူ၊ ဒေါအန်တီ ကာတဲဆွိုမ်န့မုး။

ဂေဟဲ့ဟွတ့် ဟူမ်ဘူမ်မိူဝ်၊ အန်ဇဝ်ယေဆူ၊ ဂေဒါဘဲအန်၊ ဂေဝီဟုဝ့် ဒဲင်နွန်နာမန်၊ အန်ဇဝ်ယေဆူတဝ်း၊ "ခဲင်မှိုဝ်နီ ဘေဒီဘ့လေးဝဲန်အုဝ်၊ လွင်အန်ဂေနီမိူဝ်၊ ပီဟဲဟွတ့်" ဒဲမ်အုန်ဂေနာအာတ့်နီ "ဂေဒီကာယာင်မး ဒါအီဟျီင်မာဘူ၊ အန်ကောဝီကာဒေတ့်၊ ဘဲန်ဒီဂ်ု ဒီဂ်ု" အန်ဇဝ်တဝ်းပါယ်တီ။

အာပေတာရူ တွိုန်ဝီတဝ်း၊ "ဂေဟာဝ် ဘောဝဲန်ဇမ် မဲဇဝ်၊ အုဝ်အာခါ၊ တူဝဲန်မဲ ဒေါမှဝ်" အန်တဝ်းပါယ်တီ၊ အန်ဇဝ်ယေဆူ ဝီတဝ်း ဒီအာပေတရူ၊ ကာနမ်စာဝ်ဂေ ဟဲဆီပွိုန် တူတ့်ဘေ။ မာလဲ အုဝ်ဟဲ ဆာခိုဝ်ဒါင်ဘေနဝ်း ညှိုမ်ဘေတူစှိုမ်တီ၊ မာလဲ ခဲင်မိူဝ်နီ၊ အာတ့် ကာတွုန်အျီန်၊ မဲဒီမိုဝ်း ဒီတဝ်း တူနပ်အုဝ် အူယ်ဇေန်၊ အန်ဇဝ်တဝ်း ပါယ်တီ။

ပန်တီ အာပေတာရူ ဘောဝီတဝ်း ဒီအန်ဇဝ်ယေဆူ၊ "အုဝ်ခမ်ဒီယမ်၊ အုဝ်တူတဝ်းဒေါမှဝ်၊ အုဝ်တူနပ်မဲ" အန်ဝီတဝ်းပါယ်တီ၊ ဘောဒီဘဲ အန်ဂေဟာဝ်တဝ်း ဒီအန်ဇဝ်ပါယ်တီ။

ပန်တီအန်ဇဝ်ဘောဝီ ဒဲ့ဟာဝ်ဂေ၊ ကာဒူင့်စိူဝ်၊ ဂေတ်ဆေမာနေ၊ တဲးဂေဆာခိုဝ် ကွဲတဲး ဂေမိုဝ်းနဝ်း ဆီဘူင် မှာပ်၊ ဝါယ်အန်တီ အန်ဇဝ်လုဝ်ဆာခိုဝ် အန်ဘောဝီလေးဟာဝ်အန်အူဝီ။

ပန်တီ အန်ဇဝ်ယေဆူတဝ်း "အိုယ်ဂုန့်အုဝ်၊ ဆေန့ပွိုန်၊ ကွဲ့တဲး အုဝ်ကာဒုးဒုက် အီဒီတးနာ အာတ့် နီ၊ အီပီဆီ လာတ့် အီမိုဝ်းဒုက်။ ကွဲ့ တဲး အုဝ်လုဝ်ဒျီင်၊ အုဝ်တူမှာန့် မဲဘူင် ပီအိုင်အုဝ်။ တဲးန့ ဒူပ်ပီအိုင်မဲ။" အန်ဘောဆာခိုဝ် အူယ် စိုပ်ဒီတီနဝ်း အန်ဇဝ်ယေဆူ ဘောကဟွါ့ ဘောမှဲကာဆဝ်၊ အိုမ်ဒီမှုး အီလှဲဒီဒုဝ်ဘူင့်အန်၊ န့ကော ဘဲန်နှာမ်၊ စုဝ်းဒဲင် ကာဒါယ်။ အန်ဇဝ်ဖြာ ဘောဝီစ်ု ဘုဝ်ကာနမ် ဂေလေးလူင်ဝီဝွန်အန်။

ဘောဝီဟဲ့ဟွတ့် အန်ဆာခိုဝ် ဒွန်စိုပ်အန်နပ် ဝီဟာဝ်ယွတ် ဒီဘဲအန်ဂေ၊ မာလဲ ဒီဘဲအန်ဂေ ဟဲပွိုန် ဒီအိတ် ပန်တီ အန်ဇဝ်ယေဆူတဝ်းဒီဂေ၊ ယိတ့် ဒါအီပျာတ့် ကာဒိက်ဆတ်ဇာ အုဝ်၊ ဟဲဇမ်ဒီနီ။ အန်တဝ်းပါယ်တီ။

အာယူဒတ် တွိုန် ဘောဝီဒဲ့ တး ဒူအီတာင် ယူဒါဂေ ဘောဂူနာန်ဂေ၊ ဘောဒူအီဖိုင်ဂေ၊ ဂေဝီ ဂူင့်တး ဘော မာပွါ့လာင်၊ ဘောန့ကြွုန်၊ အာယူဒတ် တွိုန်မိူဝ် ဘောဟာဝ်ခူပ် အန်ဇဝ်ယေဆူ၊ ဘောဝီတဝ်း "အိုယ်ဒါဆရာ၊ မဲဟဲ ကွယ် ဒါခိုယ့်" ဘောဝီပုတ့် အန်ဇဝ် ခုဝ်ဘူင်အန်ပါယ်တီ၊ အန်ဆီတဲး ဒါတာင် ယူဒါ ဂေနပ်ဘောမုး အန်ဇဝ်ယေဆူ။ ပန်တီ အန်ဇဝ်ယေဆူ ဘောဝီတဝ်းဒီအန်၊ "အာယူဒါ မဲညှာန်ရာင် ပုတ့်အုဝ်၊ မဲဟဲပျာတ့် ကာဒိတ်ဆတ်ဇာ အာယ် မုး" အန်ဇီဒီမွှတ်ပါယ်တီ။

ဒေါတးမှေတ့်ဂေ အန်ဇဝ်ယေဆူ တွိုန်၊ အာပေတာရူ ဘောဝီထွတ် မာပွါ့လာင်၊ ဒဲပ်လာယ်ဟွူဝ့် ဒါအူဝီ၊ ဒဲစေန့် ဒါတာင် အီအိုပ်တူတ့် ဒူအီ၊ အီလှူဒီဇဝ်ဖြာ၊ ပန်တီ အန်ဇဝ်ယေဆူ တဝ်း "အာပေတာရူ အုန်မာပွါ့မဲ" အာဒါလုဝ် ဂွင့်ရဲအုဝ်၊ အုဝ်ပွိုန်မှာန် ဘုဝ်ကာနမ်ဂေ၊ အာဒါအူဒပ်၊ ဒီဂုန့်အုဝ်ဇဝ်ဖြာ၊ မာလဲအုဝ်လုဝ် ထူမ်ဂြုဝ်းဂုန့်အုဝ်၊ ဝါယ်အန်တီ အန်ဇဝ်ယေဆူ ဘောဝီဆီနမ်၊ ဒိုဝ်းလာယ်ဟျုဝ့် ဝီတဲး န့ကဲန်။ ဒေါဘူင်အန်ပါယ်တီ ဒါဘဲအန်ဂေဘောဝီလေး ဟာဝ်ဒူင့် အူဇေန်။

A Bible story from: Matthew 26:14-56; Mark 14:10-50; Luke 22:1-53; John 12:6; 18:1-11