၂၃။ လွင် ဂွိုတ် အန်ဇဝ် ယေဆူ

နာင် မာရီ တွိုန်၊ န့ ဟဲ့ မိုဝ်း အီ ဟဲ့ စိူဝ် အာယုဝ်ဆဲပ်၊ အီ ဟဲ့ မိုဝ်း နဝ်း ဆိူဝ် နဝ်း မှာန် ဆေဆေ။ အီ ဟဲ့ ဟွတ့် ဘဲန် အူပါဝ် ဒီ နာင် မာရီ။ အာယုဝ်ဆဲပ် တွိုန်၊ အန် ဘော ယိုဝ် လွင် တူ အး နာင် မာရီ။ ခုဝ် ဂွန် တီ၊ အန် ဟဲ့ နပ် အာဝ် မုး ဂွန် အန်။ ခုဝ် အန် တီ အာယုဝ်ဆဲပ် တွိုန်၊ အန် မိူဝ် တူ ဆီ တဲး နာင် မာရီ မွှိုမ် ဆာယ် ဒီ အာတ့် အီ။ အန် ဘော ခြာမ် ဒီ ဝဲန် နာင် မာရီ၊ ကွဲ့ တဲး အီ နပ် လွင် အန် တီ၊ အန် ဘော ဆုင် ဖျာတ် ပါယ် တီ။ ခုဝ် အန် တီ၊ အာတ့် ညှမ် ဇမ် အာ ခြာဝ် ဒီ ဘူင် အန် ပါယ် တီ။ န့ ယီ မိုဝ်း အာမူ အာမာတ် ဇဝ်ဖြာ အူ ကာဒင် ဝီ တး ကာလာင် ဂြုဝ်း ဒေါ အိတ် မ့ဘာဝ် အန်။

အာမူ အာမာတ် ဇဝ်ဖြာ တွိုန် ဝီ တဝ်း၊ “အိုယ်၊ မဲ အာယုဝ်ဆဲပ်၊ ကွဲ့ တဲး မဲ ယုဝ် ဒီ ဒဲ့ နာင် မာရီ ဒူပ် မဲ၊ ဘဲန် အီဘေန့် မဲ။ ခုဝ်၊ ဂွန် အီ ကွယ် ခဲင် ဝတ့် အန် တီ၊ န့ ဟဲ့ မုး ဂွန် ပီ ဒွါ နဝ်း ဖွိုမ် ဇဝ်ဖြာ။ န့ ဟဲ့ မုး နဝ်း ဖွိုမ် ဇဝ်ဖြာ အီ ဟဲ့ တဲး အန် မိုဝ်း ဘာဒိတ် ဆန်ထေ။ နာင် မာရီ ဒီ မိုဝ်း ဂွန် အီမာယ် အူဝီ။ မဲ လုဝ် တဲး အန် စိူဝ် အာယေဆူ။ (ခုဝ် ဆီဖဝ် အန် တီ ဟဲ့ မုး ဒါ အီ ဒီ ချွတ် ဆေဆေ၊ ဆီဖဝ် အန် ဟဲ့မုး ပါယ် တီ)။ ခုဝ် မှဝ် န့ ပါယ်၊ အန် ဒီ ချွတ် မှာပ် ဂေ ဒူအီ ကိူန်၊ ခုဝ် န့ ဟဲ့ မုး ပါယ် တီ။” အာမူ အာမာတ် ဇဝ်ဖြာ ကာလာင် ပါယ် တီ။

ခုဝ် အန် တီ အာယုဝ်ဆဲပ် တွိုန်၊ အန် ဘော ဝီ ခတ် ဒိုဝ်း နာင် မာရီ။ ဟဲ့ ဟွတ့် အန် ဘော ဒဲ့ ဟာဝ် ဒီ ကာင် အန်။ ပန် တီ အာယုဝ်ဆဲပ် တွိုန်၊ တဲး ကော ဇမ် အာ ခြာဝ် ဒီ ဂွိုတ် ဂွန် အီမာတ် တီ၊ ဂါယ် တူ မိုဝ်း ဒီ အိတ် ရိုမ်။

နာင် မာရီ ဟဲ့ ဇမ် အာ ခြာဝ် ကာတတ် ဒီ ဂွန် အန်။ နာင် မာရီ ဂါယ် အာယုဝ်ဆဲပ် တွိုန်၊ ဂါယ် ဘော လေး ဟာဝ် မိူင် ဘေတ်လဲမ်။ ခုဝ် မှဝ် န့ ပါယ်၊ ခဲင် မိုဝ်း အီဆာရေလ။ ဒူအီ ကိူန် ဂေ တီ၊ ကူပ် ဟဲ့ ဂွင့် ဒါ ဆိုက် ဂေ ဇာရာင်၊ ခုဝ် န့ ဘော ဘဲန် ဟာဝ် ပါယ် တီ။ ဂေ တွိုန် ဒူအီ ကိူန် ဂေ တီ၊ ဂေ ဘော ဟာဝ် ကာဒူင် ကွယ် ဂုန့် ဒါ ဒါ ဂေ။ ခုန်ဒီခမ် တာင် အာဒါဝိတ် တွိုန်၊ အန် ဟဲ့ ဂွိုတ် ခဲင် မိူင် ဘေတ်လဲမ် တီ။ အန် ဟဲ့ မုး ဂုန့် ဒါ ဒါ နာင် မာရီ ဂါယ် အာယုဝ်ဆဲပ် ဘော အာ ဝီ။

နာင် မာရီ ဂါယ် အာယုဝ်ဆဲပ် တွိုန်၊ ဂါယ် ဟဲ့ ဟာဝ် မိူင် ဘေတ်လဲမ်။ ပန် တီ၊ အာ ဒါ ဂါယ် ဆေ ဟဲ့ လွတ် ကာဒူင့် ဘ့လေး ဂေ ဒုဝ်ဆတ်တာဝါ၊ အာဝ် မိုဝ်း ကာဒူင် ဒီ ဟာဝ် ကွယ် ဂါယ်။ နာင် မာရီ တွိုန်၊ ဂွန် အန် ကာဒူင့် တီ၊ ခုဝ် အန် ဘော ဂွန် လေး ဒီ တီ။ နာင် မာရီ တွိုန်၊ ခုဝ် အာဝ် မိုဝ်း န့ အိတ် ကာဒူင့် လုဝ် အိတ် ဂွန် အာင။ အန် ဘော ကာဘန် ဂွန် အန် ဝီ ဘ့လေး အုန် ခဲင် ကာလဲ့ ဟူမ် မက်။ ဂါယ် ဘော တဲး ဂွန် တီ စိူဝ် အာယေဆူ။

ခဲင် မှိုဝ် တီ၊ န့ ဟဲ့ မိုဝ်း နာ ကာဒူင့် ကာပိတ် အန် ဒီ တီ။ ခဲင် နာ တီ န့ ဟဲ့ မိုဝ်း ဒါ အီ ဟျီင် မာဘူ၊ ‌ဂေ ဘော ဘ်ု ယွတ် မာဘူ ဂေ ကွယ် ဒီ တီ။ ဒေါ အန် တီ အာမူ အာမာတ် ဇဝ်ဖြာ အီ ဟဲ့ ဘ့လာင် အူ ကာဒင်၊ ဘော တး ကာပ့လုး ဒီ ဂေ။ ခုဝ် ဒါ အီ ဟျီင် မာဘူ ဂေ တီ မိူဝ် ယုဝ် ကာဆဝ်။ အာမူ အာမာတ် ဇဝ်ဖြာ တွိုန် တဝ်း၊ “ဘေ ကွဲ့ ယုဝ်၊ အုဝ် ဟဲ့ တး ကာလာင် နာ မွှိုမ် ဒီ ဘေ။ ဂွန် ဇဝ်ဖြာ အီ ဟဲ့ အိုပ် ဆေဆေ၊ ဟဲ့ ဟွတ့် ဂွိုတ် ခဲင် မိူင် ဘေတ်လဲမ်။ အာမူ အာမာတ် ဇဝ်ဖြာ ကာလာင် ပါယ်တီ။

“ခုဝ် ဟာဝ် ဇမ် ဟြေတ့် ဂွန်အာင တီ။ ဘေ ဒီ ယိုဝ် ဂွန် အာင၊ အီ ဟဲ့ ကာဘန် ဘိတ်န့စမ် ဒီ အန်၊ ဘ့လေး အန် အိတ် ခဲင် ကာလဲ့ ဟူမ် မက်။” အာမူ အာမာတ် ဇဝ်ဖြာ ဟဲ့ ဟွတ့် ကာလာင် ပါယ် တီ။ အူ ဇေန့် ခဲင် ဂါင်ဟြာဝ် တွိုန်၊ အာမူ အာမာတ် ဇဝ်ဖြာ ဂေ ဘော ဖိုင် ဝီ တး ကာပ့လုး ကော ဟဲ့ နုဝ့် ဒီ အာတ့် ဂေ။ အာမူ အာမာတ် ဇဝ်ဖြာ ဂေ တီ ဘော ပါက် မှုဝ် ဒါခိုယ် ဘော အိူပ် ဇဝ်ဖြာ။ ခုဝ် အာမူ အာမာတ် ဇဝ်ဖြာ ဂေ တီ တဝ်း၊ “ဇဝ်ဖြာ အီ ကွယ် ဂါင်ဟြာဝ် မိုဝ်း အာဖုင် ဒင် ခုဝ် အီ တာင် လွှိုမ် တူတ့်။ ဘော ဂေ ဒူအီ ကွယ် ဒဲင် ကာဒါယ် ဘောကာဂ့ လျီတ့်၊ တဲး ဂေ မိုဝ်း နဝ်း ဂျီတ်။ နဝ်း ဒါခိုယ် တဲး န့ ပီ ပီ ဟဲ့ လုဝ် ဇဝ်ဖြာ”။ ‌ဂေ ပါက် မှုဝ် ပါယ်တီ။

ဝါယ် အန် တီ၊ အာမူ အာမာတ် ဇဝ်ဖြာ ဂေ ဟဲ့ ဟွတ် လေး ဟာဝ်။ ဒါ ဂေ အီ ဟျီင် မာဘူ တီ၊ ဂေ ဘော ဟဲ့ ဟွတ့် ဘ့လေး ဟာဝ် မာဘူ ဂေ၊ ဂေ ဘော ဝီ ဟာဝ် ဟြေတ့် ဂွန် အာင တွိုန်။ အာခြာဝ် အန် ဘော အာဝ် လှေန့်။ ဂေ ဘော ဟဲ့ ဟွတ့် ဇမ် ကာဒူင့် ကွယ် ဂွန် ဒီ တဲတ့် ဇဝ် ယေဆူ တွိုန်၊ န့ ဘော ပီ ပီ ကာလာင် အာမူ အာမာတ် ဇဝ်ဖြာ ဒီ ဂေ။ ဂေ ဘော ယိုဝ် ဂွန် တီ ကွယ် ခဲင် ကာလဲ့ ဟူမ် မက်။ ဂေ တွိုန်၊ နဝ်း ဂေ ဘော ဒီယုး ဒီယေန့်၊ ဟဲ့ ဟွတ့် ဂေ ဘော ဝီ ဟာဝ် ကာဒူင့် ကွယ် မာဘူ ဂေ ခဲင် နာ တွိုန်။ ဒါ အီ ဟျီင် မာဘူ ဂေ တွိုန်၊ အာ ဒါ ပီ ဟဲ့ ယိုဝ် ဂေ ဘောကာဂ့လျီတ်၊ ဂေ ဘော ဝီ အိုပ် အန် ဇဝ်ဖြာ။

ကာဒူင့် တူင့် အန်၊ နာ လေး ဆီငဲ မိူင် အူ မိူင် တီ။ န့ ယီ ဟဲ့ မိုဝ်း အီမာယ် ဟဝ် အီ ဟဲ့ မိုဝ်း အာငျာန် တွိုန်၊ ဂေ ဟဲ့ ဟဲန် ဒီ ယွတ် လွင် ဆီမန့် ဂေ ဟဲ့ မိုဝ်း အာငျာန်။ ဒါ ဂေ အီ မိုဝ်း အာငျာန် တီ၊ ဂေ ဘော ယိုဝ် ဆီမန့် တာင် အူ ဘူင့် အီ တူ ခါ နှဲ ဆီမန့် ဟဝ်။ ခုဝ် အာ တီ တွိုန်၊ ဂေ ဘော တဝ်း၊ “ခုန်ဒီခမ် အာမျုဝ် ဒူအီ ယူဒါ ဂေ ဝီ ကာမာယ် ဒီ ဂွိုတ် ဆီဖဝ် အန် ဟဲ့ ပွိုန် ပါယ် တီ။” ဂေ ဟဲ့ ကာလာင် ပါယ် တီ။ ဝါယ် ဟဲ့ ဟွတ့် ဟာဝ် တူင့် ဂေ၊ ဒါ အီ မိုဝ်း အာငျာန် ဂေ တီ၊ ဂေ ဟဲ့ ဟွတ့် ဇမ် မိူင် ဘေတ်လဲမ်။ ဂေ ဘော ဝီ ယိုဝ် ကာင် ကာဒူင့် ကွယ် ဂွန် ဒီတဲတ့် အာယေဆူ ဘော မာ အန် ဂေ ဘော ဂုန့် အန်။

ခုဝ် ဒါ အီ မိုဝ်း အာငျာန် ဂေ တွိုန်၊ ဂေ ဟဲ့ ဟွတ့် ယိုဝ် ဂွန် ဒီ တဲတ့် အာယေဆူ ဘော မာ အန် ဂေ ဘော ဝီ ဘူင် ဂိုပ် ကြိုပ်။ ဝါယ် အန် တီ၊ ဒါ အီ မိုဝ်း အာငျာန် ဂေ တွိုန်၊ ‌‌‌ဂေ ဘော ဒွါ ကြု၀်ကြာမ် ‌ဂေ အီ င၀်း တာင် တဲး န့ ဘဲန့် လက်ဆွင် ဘော ခြိင်။ ဂေ ဟဲ့ ဟွတ့် လှူ ဂေ ဘော ဝီ ‌‌‌‌‌‌ဝေန့် ဒီ ကာင် ဂေ။

A Bible story from: Matthew 1; Luke 2