၉။ လွင်ဇဝ်ဖြာ ဒဲ့ အာမုဝ်ဆဲ
အာယုဝ် ဟဲ့ဝီယမ်၊ ခုဝ်၊ အာမျုဝ် အန်ဂေဘောကာဂ့လျီတ့်၊ ဟဲ့ကွယ် ခဲင်မိူင်အဲဂိုပ်တွိုန်။ အန်ဂါယ်ဘော လှုက်လှာန် ဂေဟဲ့ကွယ် ခဲင်မိူင် အဲဂိုပ်တီ။ ဂေဘောမိုဝ်း ကိူန့်ဂွန်။ ခုဝ်၊ ဂေဘောဝီတဝ်း ဂေစိူဝ် အာမျုဝ် အီဆာ ရေလ။
ဆီနမ်အန်၊ ဘောလှေန့်ကိူန်ကာဆ၀်၊ ခုဝ်၊ အာမျုဝ် အီဆာရေလ တွိုန် ဒူအီဂေ ဟဲ့ဝီကိူန့်ကာဆဝ်။ အာ ဘမျုဝ် ဒူအီ အဲဂိုပ် ဂေတွိုန်၊ ပီဟဲ့စွယ် အာယုဝ် ဒီဂေ ဘောကာဂ့လျီတ့် ဂေယီတူ ဆီဂုင်ဂေဇူ ဒီအန်။ ဂေတီ၊ ခုဝ်၊ အာမျုဝ်ဒူအီ အီဆာ ရေလ ဂေဟဲ့ကိူန့် ကာဆဝ်၊ ဂေဘောဝီယုဝ်။ အာခါန် တီ၊ ခုန်ဒီခမ် အီ ဟဲ့အိုပ်မိူင် အဲဂိုပ်ဂေ တွိုန်အန်ဘော ဘူင် တဲးအာမျုဝ် ဒူအီ အီဆာရေလ ဂေ ဘဲန်မှာယ် အာမျုဝ် ဒူအီအဲဂိုပ်ဂေ။
အာမျုဝ် ဒူအီ အဲဂိုပ်တွိုန်ဂေ ဘောစ်ု အာမျုဝ် ဒူအီ အီဆာရေလ ဂေဘူင်လူင် ကိူန့်ဂေ မိူင်ကိူန့်။ ဂေဟဲ့ ဘူင် ကိူန့် ကာဆဝ်ဂါန်၊ ဂေဘော ကာဒုးဒုက်မိူဝ် ဇဝ်ဖြာ ယီမွင့်ကာရာ ဒွါဒီဂေ တဲးဂေမိုဝ်းဂွန်ကိူန့်။
ခုန်ဒီခမ် ဖာရု၀် အဲဂိုပ်ဂေ တွိုန်၊ ခုဝ် အန်ဘောယို၀် အာမျု၀်အီဆာရေလဂေဟဲ့ မို၀်းဂွန်ကိူန့်။ အန်ဘော ဝီစ်ု ဒူအီ အန်ဂေ ငဝ်းယမ် ဘျွာဝဲန် ခဲင်ဘ့လဲင်နမ်၊ ဂေတဲး အာမိင် ဒီဂေပါယ်တီ။
အာမျု၀် ဒူအီ အီဆာရေလ အီဘေန့်တာင် အူဝီအန် ဟဲ့ဂွန်၊ ဂွန်အီမာယ် အူဝီ။ ခုဝ်၊ ဂွန်အန်တီ အန်ဘော ခြီင်ခဲင် ပီဘော ပွိုန်အန်ဒီ ခြီင်ဂွန်အန်တီ။
မာဂွန်တီ၊ အန်အာဝ်ဒန် ခြီင် ဘ့လေးအုန် လှေန့်ဂွန်အန်ကွယ်။ ခုဝ်၊ အန်ဘော ဘူင်တဲး အာဆာက် ဂွန် အန်တွိုန် လွှတ်၊ အန်ဘောဝီ ဘူင်ကာတဲ့ အူဘူင့်၊ ဟဲ့ဟွတ့် အန်ဘောဝီဟပ် ဂွန်အန်တွိုန်၊ ဝီဘ့လေး တဲးန့ လှဲ လူင် ဒဲင်အိုမ်။ အီကတ် အန်အီမုးဂွန် အီဘေန့် ဘောဒူပ်ဒီ ယွတ်ဂွန်တီ။
ဂွန်ခုန်ဒီခမ်၊ ဂွန်အီဘိုန့်ဘောဝီယို၀် ကာတဲ့တီ၊ အန်ဘော၀ီယွတ် နာခဲင်အန်၊ အန်ဘောဝီယိုဝ် ဂွန်တွိုန်။ ခုဝ်၊ အန် ဘောတဝ်း ဒီဒိုဝ်း ဟျီင်ဂွန်တီ။ ဂွန်ခုန်ဒီခမ်၊ ဂွန်အီဘေန့်တီ အန်ဘောဒဲ့အာမျုဝ် ဒူအီ အီဆာရေလ တွိုန်၊ တဲးအန်ပွိုန် ဒီဒျီင် အိုမ်ပူ။ ခုဝ်၊ ဂွန်ခုန်ဒီခမ် တွိုန်၊ အန်တူနပ်မုး အီဘေန့်တီ မာ ဂွန်တွိုန်။ ခုဝ် အန်ဝီစ်ု အီဘေန့် တွိုန် ယွတ်ဂွန်တီ။ ခုဝ်၊ ဂွန်တွိုန် ဟဲ့ဇမ် အာခါန် တူလုဝ် ဒျီင်အိုမ်ပူ မာအန်၊ အာဆာက် အန်ဟဲ့ဟွတ့် ပွိုန်၊ ဂေဘောဝီ ဒွါအန်ကွယ်ဒူပ် ဂွန်ခုန်ဒီခမ် ဂွန် အီ ဘေန့်တွိုန်၊ ဂေဘောဝီ တဲးအန် စိူဝ် အာမုဝ်ဆဲ။
အာမု၀်ဆဲတွိုန်၊ အန်ဟဲ့ဟွတ့်တာင်၊အူဆီငဲအန်ဘောယို၀် အာမျု၀်ဒူအီအဲဂိုပ် အူဝီ ဟဲ့မး အာမျုဝ် အီဆာရေလဂေ။ အာမု၀်ဆဲတွိုန်၊ အန်ဘောရိန့် ဒီချွတ်ဘူင်တဲး အာမျုဝ် ဒူအီ အီဆာရေလ တွိုန် ကွဲ့တဲးန့ ဘဲန် မှာယ်အီ။
အာမုဝ်ဆဲ တွိုန်၊ အန်ဟဲ့ထာင် အာဝ်မိုဝ်းအီယိုဝ်၊ အန်ဘောငဝ်းယမ်အာမျုဝ် ဒူအီအဲဂိုပ်ဂေတီ။ ဟဲ့ ဟွတ့်အန်ဘော ဒိုဝ်း ဒုဝ်ဒူအီတီ ဒိပ်ခဲင် ကာဒါယ်။ ခုဝ် အန်တီ၊ န့ဟဲ့မိုဝ်း ဒူအီ အူဝီ ဟဲ့ယိုဝ် ပီဘူင် အာမုဝ်ဆဲတီ။
ပန်တီ၊ ခုန်ဒီခမ် ဖာရုဝ် တွိုန်၊ အန်ဟဲ့ဝီနပ် လွင်ပီဟဲ့ဘူင် အာမုဝ်ဆဲ။ ခုဝ်၊ အန်ဘောတဝ်း၊ ဒီငဝ်းယမ် အာမုဝ်ဆဲ။ ပန်တီ၊ အာမုဝ်ဆဲ ဘောတဝ်လေး ခဲင်မိူင်အဲဂိုပ်တွိုန်၊ ဟာဝ်ဇမ်ခဲင်နင်။ ခုဝ်၊ ခုန်ဒီခမ် ဖာရုဝ် ဂါယ် ဂူနာန် အန်ဂေ၊ ဘောခူးခြး ဒီပန်အန်၊ ဂေယီတူဝီယိုဝ်အန်။
အာမု၀်ဆဲတွိုန်၊ ကာဒူင်ကွယ်အန်ခဲင်နင် ဂါယ်မိူင်အဲဂိုပ်တွိုန်။ ဟဲ့ကာတူင့်။ အန်ဟဲ့ကွယ် ခဲင် နင်တီ၊ အန်ဘော ဘဲန် ဒါအီဟျီင် မာဘူ။ ကာဒူင် ကွယ်အန်တီ၊ အန်ဘောခတ်ဒိုဝ်းဂွန် အီဘေန့် အူဝီ၊ ဂါယ်ဘော မိုဝ်းဂွန် အီမာယ် အာဝီ။
အာမု၀်ဆဲတွိုန်၊ အန်ဟဲ့ ဘဲန် ဒါအီယွတ် မာဘူ၊ အီမုး ဂေန့်အန်။ အူဆီငဲတီ၊ အာမုဝ်ဆဲတွိုန် အန်ဘော ယိုဝ်ခဲင် ပြဲ အာဝ်မိုဝ်း အီကာပျာတ့် န့ယီမိုဝ်း ငဝ်ကာဆိူမ် ဒဲင်ပြဲတီ။ အန်ဘောဝီယွတ့် ဆီချာ တဲး န့ကာပိတ်။ ဟဲ့ဟွတ့် အန်ဘောဝီ ဟာဝ်တဲးန့ ကာပိတ်ပြဲ တွိုန်၊ ပန်တီအန်ဘောဝီယိုဝ် ဂြုဝ်း ဇဝ်ဖြာတဝ်း၊ "အာမုဝ်ဆဲ မဲကွဲ့ တာခူဒိန့်မဲ။ ခုဝ်၊ ကာဒူင့် စွင့်မဲတီ န့ ဟဲ့မုး ကာဒါယ်ဘွတ်"။ ဇဝ်ဖြာကာလာင်ပါယ်တီ။
၀ါယ်အန်တီ၊ ဇဝ်ဖြာပီ ဝီကာလာင် ဒီ အာမုဝ်ဆဲ အန်တဝ်း။ "အုဝ်ဟဲ့နပ် ဒုက်ဒူအီ၊ အုဝ်ဟဲ့နပ် ပီဇေန့် ဇာ ဒူအီ၊ အုဝ်ဟဲ့ယိုဝ် ဂေဒူအီ။ ခုဝ်အုဝ် ဒီတဲး၊ မဲဟာဝ်ဒိုဝ်းလေး ဂေဒူအီ အာမျုဝ် အီဆာရေလ ခဲင်မိူင်အဲဂိုပ်၊ အုဝ်ဒီဘော ဘ့လေး ဟာဝ်မဲ ကာဒူင့်ကွယ် ခုန်ဒီခမ် ဖာရုဝ်။ အုဝ် ဒီဒွါ ဒီဂေဘော မိူင် ကာနန့်တွိုန်။ (အုဝ်ဟဲ့မိုဝ်း ဒီဘ့လေး ကာဒိက်ဆတ်ဇာ ဒီ၊ ဒါအာဘြာန်ဟမ်၊ အာဆဲက်ဂေ အာကူပ်) တွိုန် ဘောကာဒါယ်တီ အုဝ်ဒီဒွါဒီဂေ"။ ဇဝ်ဖြာကာလာင်ပါယ်တီ။
အာမု၀်ဆဲဝီတဝ်း၊ "မဲဇဝ် ဟဲ့ဟွတ့် ဘ့လေးဟာဝ် အုဝ်ဒူပ် ဒူအီ ကိူန့်ဂေတီ၊ ဆေဂေ ဟဲ့နပ်တး အုဝ် မာဆေ အုဝ် ဒီဝီလုဝ်တဝ်း ဒီဂေ"။ အန်ဒီမွှတ်ပါယ်တီ။ ဇဝ်ဖြာဝီတဝ်း၊ "အုဝ်ဟဲ့မုးအုဝ်"၊ အန်ကာလာင်ပါယ်တီ။ ဇဝ်ဖြာပီဝီတဝ်း။ "မဲလုဝ် တဝ်း ဇဝ်ဖြာအီ ဟဲ့ဘ့လေး ဟာဝ် အုဝ်ကာဒူင့် ကွယ်ဘေ"။ အန်ကာလာင်ပါယ်တီ။ ဇဝ်ဖြာပီဝီတဝ်း၊ "အုဝ်ဟဲ့မုး ဇဝ်ဖြာ ပီ ဟဲ့ကြိုပ် ဒါအာဘြာန်ဟမ်၊ အာဆဲက်ဂေ အာကူပ်တွိုန် မဲ လုဝ်ကာလာင် ဘောစိူဝ် အုဝ်အီ ဟဲ့မုးဇဝ်ဖြာ အူစုဝ် ကမ်ဖါ အီဟဲ့ မိုဝ်း ပွုန်တာင်"။ ဇဝ်ဖြာ ကာလာင်ပါယ်တီ ဒီ အာမုဝ်ဆဲ။
အာမု၀်ဆဲတွိုန်၊ အန်ဟဲနပ် ခုန်ဒီခမ် ဖာရုဝ် ဒီငဝ်းယမ် အန်၊ အန်ဘောယုဝ် အာဝ်ဘဲန် ဟာဝ်ဒီအန်။ ခုဝ်အန်တီ၊ နာရေတ့် မိူဝ်အန်ယီတူ ကူပ်ဒီနပ် ကာလာင် ဆီချာ ဂြုဝ်း၊ ဘောအာဝ်ဘဲန် ဟာဝ်ဒီအန် ကာဒူင်ကွယ် ခုန်ဒီခမ် ဖာရုဝ် တွိုန်။ ခုန်အန်တီ၊ ဇဝ်ဖြာဘော ဝီဘ့လေး အီဟဲ့မုး၊ အူကတ် အူဝါဒီ အာမုဝ်ဆဲ၊ အီဟဲ့ စိူဝ် အာရူန်ဟာဝ်၊ တဲးအန်ပွိုန် ဒီစွယ် အာမုဝ် ဆဲ။
A Bible story from: Exodus 1-4