၅။ လွင်ဂွန် ကာဒိက်ဆတ်ဇာ

ဒါအာဘြာန်ဂါယ်နာင်ဆာရာယ်တွိုန်၊ ဂါယ်ဟဲ့ကွယ် ခဲင်အိူင်ကာနန့်တွိုန်။ ဟဲ့နုဝ့်ဂိုဝ်ဆီနမ်။ ခုဝ်၊ ဂါယ်ယီ ညှမ်မိုဝ်းဂွန်။ ခုဝ်အန်တီ အီဘေန့် ဒါအာဘြာန် အီမုး နင်ဆာရာယ် တွိုန်တဝ်း၊ "မှဝ်န့အန်ဇဝ်ဖြာ ပီညှမ်ဒွါဂွန် ဒီ အုဝ်။ မှဝ်အုဝ် ဒီပါယ် ဒီဂွန်အုဝ် ဟဲ့ဟွတ့် ကတ်ကာဆဝ်။ ခုဝ်၊ အုဝ်ဟဲ့မိုဝ်းဂူလီ ပီလုဝ် စ်ုအုဝ်အီဟဲ့ စိူဝ် နာင်ဟာ ဂါ။ မဲလုဝ် ဒိုဝ်း နင်ဟာဂါ တီ ဂွန်ဒွါအာဒါအုဝ်"။ အန်ကာလာင်ပါယ်တီဒီ ဒါအာဘြာန်။

ပန်တီဒါ အာဘြာန်တွိုန် ဘောဝီဒိုဝ်း နာင်ဟာဂါ ဘဲန်အီဘေန့်အန်။ နာင်ဟာဂါတွိုန် အန်ဘောဝီမိုဝ်း ဂွန်အီ မာယ် အူဝီ ဒါအာဘြာန် ဘောတဲး အန်စိူဝ် အာဆာမာန်။ ခုဝ်အန်တီ၊ နာင်ဟာဂါတွိုန် ဟဲ့မိုဝ်းဂွန်ဘော အာဝ်လဝ့် နဝ်း နာင်ဆာရာယ်တွိုန်။ အာဆာမာန်တွိုန် အာဆာက်အန်ဟဲ့ နုဝ့်ဂိုဝ်ဒီအူယ် ဆီနမ်။ ဇဝ်ဖြာမိူဝ်ဘောဝီကာလာင် ဂြုဝ်းပေါအူစိူပ် ဒီဒါအာဘြာန်တွိုန်။

ဇဝ်ဖြာဝီကာလာင်ဂြုဝ်း ဒီဒါ အာဘြာန်တွိုန် အန်တဝ်း၊ "အုဝ်ဟဲ့မုးဇဝ်ဖြာ၊ အုဝ်စိူဝ်ဇဝ် အီတာင်လွှိုမ် တူတ့်ဒွန်မျုဝ်၊ အုဝ်ဟဲ့ဟွတ့် ဘ့လေး ဆာဒိက် ဒီမဲ အူမျုဝ် ဇဝ်ဖြာ ကာလာင်ပါယ်တီ။ အာခါန်တီ ဒါ အာဘြာန် တွိုန် ဟဲ့ခြိုပ်ခြဝ် ဒီအာတ့်ဇဝ်ဖြာ။ ဇဝ်ဖြာ ပီဝီကာလာင်တဝ်း "မဲဒီဘဲန် ဂုန့်ဒင်ဂေ ဒူအီကိူန့်။ အုဝ်ဒီတဲး အာမျုဝ် မဲ ဂေ လှုက်လှာန် မဲအုဝ် ဟဲ့ဟွတ့်ဒွါ ကာဒါယ် ကာနန့်တီ ဒီမဲ။ အုဝ်ဒီဘော ဘဲန်ဇဝ်ဖြာဘေဆေဆေ။ ဆေ န့ မိုဝ်းဂွန် အီမာယ် ခဲင်န့ဟူမ် မဲဘောဂေ လှုက်လှန် မဲအီ ဟဲ့မုးဂွန် အီမာယ်ဒွန်အီဘော လုဝ်ဆွုတ် ဝဲန်ဟုန်ကြုဝ်ဂေ"။ ဇဝ် ဖြာ ကာလာင်ပါယ်တီ ဒီဒါ အာဘြာန်တွိုန်။

ဇဝ်ဖြာ ပီဝီတဝ်း၊ "အီဘေန့်မဲ အီမုး နာင်ဆာရာယ်တွိုန် အန်ဒီမိုဝ်းဂွန် အီမာယ် အူဝီ၊ ဂွန်တီ န့ဟဲ့မုး ဂွန် ပီဒီ ဒွါအုဝ် ဆာဒိက် ဒီမဲ။ မဲလုဝ် တဲး အန်စိူဝ်အာဆဲက်။ အုဝ် ဒီဘ့လေး ဆာဒိက် ဒီအန်။ တဲး အာမျုဝ် အန်ဘဲန် အာမျုဝ်အီဟဲ့တာင်။ အုဝ် ဒီဘော တဲးဘော အာမျုဝ် အာဆာမန်တွိုန်တာင်။ ခုဝ်၊ အုဝ်ဟဲ့ဟွတ့် ဘ့လေးဂြုဝ်း ကာဒိက်ဆတ်ဇာ ဒီအာဆဲက်"။ ဝါယ်အန်တီ ဇဝ်ဖြာဝီတဝ်း ခါအာတ့်နူဂေ ဟဲ့တဲးမဲမိူဝ် ဒါအာဘြာန်။ ဒေါတီနီ အုဝ်ဟဲ့တဲး မဲစိူဝ်ဒါ အာဘြာန်ဟမ်။ ဆီဖဝ်စိူဝ်တီ န့မုး ဂုန့်ဒင် ဒူအီ အာမျုဝ်ကိူန့်။ ဟဲ့ဟွတ့် ဇဝ်ဖြာ ပီဝီတဝ်း အီ ဘေန့်မဲ၊ အီစိူဝ် နာဆာရာယ်၊ မဲလုဝ်ဝီတဲး အန်စိူဝ်နာင် ဆာရာ။

ဆီငဲတီ၊ ဒါအာဘြာန်ဟမ်တွိုန် အန်ဘောဒဲ့ ဒူအီ အီကွယ်ဒူပ် အန်အီမုး အီမာယ် ဘောကာဂ့လျီတ့်။ ဆွါဝဲန် ဟုန် ကြုဝ်ဂေ။ န့ဘော လှေန်အူဆီနမ် အာဆာက် ဒါအာဘြာန်ဟမ် ဟဲ့နုဝ့် အူမာယဝ်းဆီနမ်။ အာဆာက် နာင်ဆာရာတွိုန် ဟဲ့နုဝ့်ဒိမ်ဂိုဝ် ဆီနမ်၊ အန်ဘော ဝီမိုဝ်းဂွန်အူဝီ။ ဂွန်အန်တီ၊ န့ဟဲ့ ပီ၊ ပီကာလာင် ဒီအန်ဘောတဲး န့စိူဝ် အာဆဲက်။

အာဆဲက်တွိုန် ဟဲ့ဟွတ့်တာင်၊ ဇဝ်ဖြာဘော ထေဝ်နဝ်း ဒါအာဘြာန်ဟမ်။ ဇဝ်ဖြာတဝ်း။ "ဂွန်မဲ အူဝီ အီဟဲ့စိူဝ် အာဆဲက်တီ၊ မဲလုဝ်လှူဒီ အုဝ်တဲးန့ ဘဲန်ပီလှူ ဟူမ်ကာလိုမ်ခဲင်ငဝ်"။ ဇဝ်ဖြာ ကာလာင်ပါယ်တီ။ ဒါအာ ဘြာန်ဟမ်တွိုန် မိူဝ်အန်ဘော ထူမ်ဂြုဝ်းဇဝ်ဖြာ။ အန်ဘောဝီဘူင် မာလာင် ကာဒူင်လုဝ်လှူဂွန် အန်ဒီဇဝ်ဖြာ ကာ ဆိုမ်ခဲင်ငဝ်။

ဒါအာဘြာဟမ်၊ ဂါယါအာဆဲက်တွိုန် ဂါယ်ဘောဟာဝ် ကာဒူင်လုဝ် လှူဂါယ်။ အာဆဲက်တဝ်း၊ "အိုယ်၊ ဂုန့် ဟဲ့ဟွတ့်မိုဝ် မာငဝ်ဂေဟေ။ မှဝ်မာဘူ ပီဒီလုဝ် လှူကာဆိုမ်ခဲင် ငဝ်အာယ်"။ ဂုန့်အန်ဒါ အာဘြာန်ဟမ်ဝီတဝ်း။ "ဇဝ်ဖြာ ဒီဒွါပီဒီ လုဝ်လှူ ကာဆိုမ်ခဲင် ငဝ်ဒီအာယ်"။ အန်ကာလာင်ပါယ်တီ၊ ဒီဂွန်အန်။

ဂါယ်ဟဲ့ဟွတ့် ဇမ်ကာ ဒူင်လုဝ်လှူ ဂါယ်ဒီဇဝ်ဖြာ။ ဒါအာဘြာန်ဟမ်တွိုန် ဘောပက်ဂွန် အာဆဲက်အန်၊ ဟဲ့ဟွတ့် အန် ဝီဘ့လေး ဒဲင်မာလာင် လုဝ်လှူ ကာဆိုမ် ဒီဇဝ်ဖြာ။ ပန်တီအန်ဘော ဒိုဝ်းအာတိုမ် စုဝ့်ဒဲအန်။ တဝ်းဒီဆတ် ယမ်ဂွန်အန်။ ဇဝ်ဖြာဝီတဝ်း "ကွဲ့ဘူင် မာဆေဒီဂွန်မဲတီ၊ မဲဟဲ့တဝ်း ဒီဝဲန်ဂွန် မဲပီဟဲ့ဒွါ အုဝ်ဒီမဲ အူဝီ တီ။ အုဝ်ဟဲ့ဟွတ့် နပ်မဲ ဟဲ့ ယုဝ် အုဝ် မဲဟဲ့ထူမ်ဂြုဝ်းအုဝ်"။ ဇဝ်ဖြာကာလာင်ပါယ်တီ။

ကာဘက်ကာအီ အန်ဒီတီဒါ အာဘြာန်ဟမ် ဘောဝီယိုဝ် မာပဲအူဒုဝ် အီဟဲ့ဟဝ့် ဒီဟေ။ ဇဝ်ဖြာ ဝီကာ လာင် တဝ်းမာပဲ တီအန်ဟဲ့ဂပ်ဒါင်ဂွန်မဲ အာဆဲက် ပီလုဝ်လှူမဲဒီအုဝ်။ အာတီအီ ဟဲ့စွယ် ဒါအာဘြာန်ဟမ်တွိုန် ခုဝ်အန်ဘော ဝီဒိုဝ်း မာပဲတီ ဝီလှူတဲးန့ဘဲန် ပီလှူ ကာဆိုမ် အန်ခဲင်ငဝ်၊ အန်ဘောဒါခိုယ်ကာဆဝ်။

၀ါယ်အန်တီ၊ ဇ၀်ဖြာ၀ီကာလာင်တ၀်းဒါအာဘြာဟမ်၊ “မဲလုဝ် ဒွါဒီအုဝ်၊ အာဝ်ဝန်ခဲင်ဂွန် မဲအူဝီ၊ ခဲင် ကွယ်ဘော ဒွန်မျုဝ်ဂေနီ၊ မဲတူအုန်နဝ်း မဲဒီအုဝ် မဲဒွါတူတ့်ဒီအုဝ်၊ ခုဝ်၊ အုဝ်ဒီမွင့်ကာရာ ဒွါဒီမဲ၊ ပီ၊ ပီဟဲ့ဒွါအုဝ် ကာဒိက်ဆတ်ဇာ ဒီမဲ။ တဲး ဂေ လှုက်လှန်မဲ ဒီကိူန့်၊ တဲးဂေကိူန့် ပီဆီမန့် အီဟဲ့ကွယ် ခဲင်ဂါယ်ဟြာဝ်။ မဲဟဲ့ထူမ် ဂြုဝ်းအုဝ်၊ ကူပ်မဲ၊ ဒူအီ အီကွယ် ဒဲင်ကာ ဒါယ် ဘောကာဂ့လျီတ့် ဝါဝဲမဲဂေ အီဘေေန့် မဲဂေဂွန်မဲ၊ အုဝ် ဒီမွင့် ကာရာ ဒွါတူတ့်ဒီဂေ"။ ဇဝ်ဖြာကာလာင် ဂြုဝ်းပါယ်တီ ဒီအန်။

A Bible story from: Genesis 16-22