၄၅ - ဆာထေဖာန်ဂါယ် ဖီလီဖီ
ဆိန့်ဒေါဂုဝ် ဒင်အာဂျအန် ဒါအီဒူပ်နာပန် အန်ဇဝ်ယေဆူ တီ န့မုး ဒါရြုဝ်ဂေ၊ အန်စိုဝ် ဆာထေဖာန်၊ ဂေဒွန်အီ ရုဝ်ဆေအန်၊ အန်ဇဝ်ဖြာ တဲးအာငျာန်ပ့လာင်၊ အန်ဇဝ်ဖြာ ဒွါကိူန်ဘောပွုန်အန်၊ ဘောအာငျာန် ပီတူပဲ ဂေဒီဘူင် ဆာတေဖန်နီ ပဲဒီဘူင်တူတ့်ဒွန်မျုဝ်။ ဒေါမာနုဝ်အန် ဒူအီဂေတဲးဂေမိုဝ်းနဝ်းညှိုမ် ဇဝ်ယေဆူမိူဝ်၊ ဘောအန် ဒူအီဂေ ဝီညှိုမ်အန်။
ဒေါမာနုဝ် ဆာထေဖာန်လွင်အန်ဇဝ်ယေဆူတီ န့မိုဝ်းဒါ အီတူညှိုမ်အန်ဇဝ်ယေဆူဂေ မုးဒူအီယူဒါ ဂေ တး လာယ်ကာငျီင်ဒီအန်၊ ဂေဘောဝီဟာဝ်ကာလာင်လွင် "ဆာထေဖာန်တွိုန် ဝီဝ်ဒီကာလာင်စဝ်လွင် အာမုဝ်ဆဲ ဂါယ် ဇဝ်ဖြာ ယေယိုဝ်တူတ့် ပီတဝ်းအန်"၊ ခုဝ်ဒါတာင်ဂေဘောဝီမှေတ့် ဆာထေဖာန် တိုယ်ဟဝ်အန်ဒီဒါတာင် ရြိုဝ်ဂေ အီဘူင်နာ ဘ့လာင်ဆီဆာနာ့ ဘောဒီဒါတာင်အီဘူင့်ဆီဆာနာ ဂေဟဝ်၊ ဘောဂေ အီဘူင် ဆတ် ဆေအီ ကာလိုပ်ဂေ တွိုန်၊ တး ကာလုဝ်ကာလာင်လွင် ဆာထေဖာန်။
ရြိဝ်ဒါတာင်အီဘူင် ဆီဆာနာတဝ်းဒီဆာထေဖာန်တီ၊ "ပီကာလာင်ဂေလွင်မဲနီန့မုးယိုဝ်"အန်ဒီမွှတ်ပါယ်တီ၊ ဆာထေဖာန်တွိုန် ဘောဝီခဲကိူန် ဘောအာဘြွင်အာပ့ရိုဝ်အန် ဒီဒါရြုဝ်အီဘူင်နာဘ့လာင်ဆီဆာနာ တွိုန်။ အန်တဝ်း စုး ဆိန့်ဒေါမုးဘာန်ဒါအာဘြာန်ဟမ်၊ ကောဝီဇမ်ဘာန် အန်ဇဝ်ယေဆူတီ အန်ဇဝ်ဖြာ ဟဲ ဟွတ် ဘူင်ကိူန် န့ဂြိုဝ်းမွှိမ် အာမ် ဒွန်မျုဝ်ဒီဒူအီဂေ၊ မာလဲ ခေါအူဇေန် ဒူအီဂေ တူဒွိုမ်မိုဝ်း ဒီထူမ်ဂြုဝ်း အန် ဇဝ်ဖြာ၊ ဆာထေဖာန်ဝီတဝ်းဒီဂေ "ဘေစိုဝ်တီဘေမုးဒူအီဒိူဝ် ဆေဆေဘေဝးဂြုဝ်းဇဝ်ဖြာ၊ ဘေမိူဝ်ညိုင် ဆိန့်ဒေါမုးဘာန်ဒါယာဂေဒေါမွိုန်၊ ဂေဘူင် နာကာဘ့လျီ ဒီအန်ဇဝ်ဖြာ၊ ဘေငဝ်းဘောဒါဂေ အီကာလာင် ပီဒီပါယ်ဟာဝ် အန်နာအဲတ့်၊ ခုဝ်တူတဲးအန်ဇဝ်ဖြာ အီမုး မေဆီယာနီ အာခါ န့ကာဆဝ်လွှိုမ် ပီဘူင်ဂေအဲတ့်နီ"၊ အန်တဝ်းပါယ်တီ။
ဒါဂေအီဘူင်ဂါန် နာဘ့လာင်ဆီဆာနာ ဂေတွိုန် ဘောယိုဝ်ဂြုဝ်းအန်တီ ဂေဘောဝီရူ ကာဆဝ် တိူက်၊ ဂေ ဝီခါနှုဝ် လာယ်ဟျုဝ့်ဂေ ဘောဝီဒတ်ဒါင်၊ ဂေတာ ဂူမဝ်ဝိန့်အန်ဂေ လုဝ်ငဝ်းအန်ဂေ ဝီဒိူက် လေး အန်နာရေတ့်မိူင်။
ဒေါငှါအန်ဒီယမ်တီ ဆာထေဖာန် ဘောဝီဒတ်ဒါင်တဝ်း "အိုယ်မဲဇဝ်ယေဆူ တဲးမဲရပ်ဝိညာဥ်ဖွိုမ်အုဝ်နီ"။ အန် ဘောဝီ ဒီဂ့ဂြုတ့်တုတ့် ဘောဝီတဝ်း "အိုယ်မဲဇဝ်မဲကွယ်အုန်နဝ်းမဲ ဒီဒူအီဂေနီ" ဘောဝီဒတ်ဒါင် ဘောအူ ဇောန် ဖွိုမ်အန်မိူဝ် ဘော ဝီတူတ့် ဘောဝီယမ်အူဇောန်။
ဆီငဲတီ ဒူအီဂေဟဲကွယ်ခဲင်မိူင် ဂျေရုဆာလမ် တွိုန် စုးဒီငဝ်းယမ်ဒူအီ အီဒူပ်နာပန်အန်ဇဝ်ယေဆူ၊ ခုဝ် အန် ဒူအီ ညှိုမ်ဂေဘောဝီလေးဟာဝ်ဘောလုဝ့်၊ ဂေဘောဘူင်ဇမ်ပါယ်တီ မာလဲ၊ ဂေနပ်ဝီခဲဟာဝ်လွင် အန်ဇဝ် ယေဆူဘော အူပ့လုဝ့်။
န့မိုဝ်းဒါအူဝီ အီညှိုမ်အန်ဇဝ်ယေဆူ၊ အန်စိူဝ် ဖီလီဖီ၊ အန်မိူဝ်လေးဟဝ်ခဲင်မိူင် ဂျေရုဆာလမ် တီ၊ န့ပီဒူအီ ညှိုမ်ဂေဟဝ်၊ အန်မိူဝ် ဘောဝီဟဝ်နဲယ် ဆာမာရီ၊ နပ်ဝီကာလာင်ဟဝ် လွင်အန်ဇဝ်ယေဆူဒီ ဒူအီ ဂေ အဲကွယ်ဒီတီ၊ ဒူအီညှိုမ် ဂေတွိုန် မိူဝ် ဘောဝဲယ်ကာပွါကိူန်၊ ဘောဝီမုး ပီဟဲဟွတ့်ချွတ်အန်ဇဝ်၊ အာဒါ အူဆီငဲ န့မိုဝ်းဇဝ်စေတမန် အန်ဇဝ်ဖြာအူကာဒင်တးခူပ် ဖီလီဖီ၊ တဝ်းတဲးမဲဟဝ်န့တေန်ပြဲ ကာဟဲတ့်တီ။ အန်မိူဝ် ဘောဝီဟဝ်ဒီတီ၊ ဒေါဟဝ်အန် ဒူပ်န့တေန်တီ အန်ဘောယိုဝ် ဒါအူဝီ ပဝ့်တးလဝ်မန်ပ့ပြွင့်၊ ဒါတီမုး ဒူအီတာင် အူဝီ အီကွယ် အဲဆာယောဖီ၊ အန်ဇဝ်ဖြာ အာငျာန်ပ့လာင်စ်ု ဒါတီ ဟဝ်အာကာလာင်ဒီ ဖီလီဖီ။
ပန်တီအာ ဖီလီဖီ ဘောဝီဟဝ် ခူပ်လဝ်တွိုန်၊ အန်ဟဲ့ဟွတ်နပ်ဒါတီမုး ဒူအီ အဲဆာယောဖီ၊ အန်နပ် ဒီတိးဂြုဝ်း ဇဝ် ဖြာ။ အန်တိး ပီဒဲမ်အုန်ဒါအီမိုဝ်း အာငျာန် ဟေဆာယာ လွင်ပီဒီပါယ်ဟဝ်နာအဲတ့်၊ အန်တဝ်း "ဂေဒီဒဲတ့်ဟဝ် လုဝ်ငဝ်းအန်ပီ မာဘူ၊ မာဘူဂေနီ ဂေတူပါဒီယတ်ဂေ၊ တူတဝ်းမာဆေ၊ အန်မိူဝ်တူပါဒီယတ်အန်ပါယ်တီ။ ဂေဇိုဝ်တီ တူဘူင်ဒါရာဒီအန်၊ ဂေ တူရုဝ် ဆေဘောအန်၊ ဟဲ့ဟွတ်ဂေဝီဒိုဝ်းဘောအာဆာင်အန်" အန်ဘောတဝ်းလေး တိးဘျာပါယ်တီ။
အာဖီလီဖီ ဘောဝီဒါမွှတ် ဒူအီ အဲဆာယောပီ တီ၊ "န့ခါလှုဝ့်ဒီမဲ ပီတိး မဲတီ" ဒါ အဲဆာယောပီ တွိုန်ဝီတဝ်း "ဆေအဝ်မိုဝ်း ဒါအီခဲလွင် အန်နီမိူဝ်၊ အာဝ်ခ့လှုဝ်း ဒီအုဝ်၊ ဖာန်စ်ု မဲ ဟာဝ်တူတ့်ခူပ်အုဝ်၊ ဟဲဆာယာ နီ၊ န့မိုဝ်းဒီဒဲမ် အုန်လွင်ဒါ အူဝီဂေနီ"၊ အန်ဟဲဟွတ့် ကာလာင်ဝီ ဒီမွှတ်ပါယ်တီ။
အာဖီလီဖီ တီမိူဝ် ဘောဝီဟုတ့် ဒဲင်လဝ်တွိုန်၊ ဘောကာလာင် ဘောမုး ဟဲဆာယာတွိုန် အီဒဲမ် လွင်အန်ဇဝ် ယေဆူ၊ အန်ခဲဒီဒူအီ အဲဆာယောပီ တွိုန်။ ဖီလီဖီ တွိုန် ဘောဝီခဲဘော လွင်အန်ဇဝ်ဖြာ ဒီအန်၊ အန်ပါယ်နီ ဒီကာလာင် လွင်ဆီဒါင်ဘွတ် အန်ဇဝ်ယေဆူ ဒီဂေ။
အာဖီလီဖီ ဂါယ် အဲဆာယောပီတွိုန် ဘောဝီဟာဝ်ရိူမ် ဒူပ်န့တေန်၊ ဘောဝီဇမ်ခူပ် ကာဒူင့် မိုဝ်းအိုမ်၊ ဒူအီ အဲဆာ ယောပီတွိုန်တဝ်း "ဘောအိုမ် ဟဲမိုဝ်းအီစျီတ့်၊ န့ပွိုန်တဲးအုဝ် စိူပ်ခဲင်အိုမ်တီ၊ ဘောဟွတ်ကာလာင် ဘောဝီစ်ု ဒါအီ ဝဲတ့်လဝ် တွိုန်စွင့်။
ပန်တီ အာဖီလီဖီတွိုန် ဘောဝီစိူပ် ဒါအဲဆာယောပီတွိုန် ခဲင်အိုမ်၊ ဘောဝီလေးဟုဝ့်ဂါယ်ခဲင် အိုမ်တီ၊ အာငျာန် ဘ့လာင်အန်ဇဝ်ဖြာတွိုန် ဘောဝီဒဲတ့် ဟဝ်ဖီလီဖီ ဘောပ့လုဝ့်၊ ဒီတီမိူဝ် ဖီလီဖီတွိုန် နပ်ဝီကာလာင် ဟာဝ်ပါယ်တီ လွင်အန် ဇဝ်ဖြာ။
ဒူအီ အဲဆာယောဖီတွိုန် ဘောဝီဝိန့်နာကာင်အန်၊ ကူပ်နပ်အန် လွင်အန်ဇဝ်ယေဆူ နဝ်းအန်မိူဝ် ဘောဝီ ခူယ်ကာဆာဝ်။
A Bible story from: Acts 6:8-8:5; 8:26-40