၂၁ - လွင် ဇ၀်ဖြာ ဘ့လေး ကာဒိက် ဆတ်ဇာ ဒီ မေဆီယာ

အူန်ဆိန့်ဒေါဂုဝ် ဇ၀်ဖြာ ဖာန့် ဘ့လေး ကာဒါယ်၊ အန် ဟဲ့ တ၀်း အန် ဒီ ဘ့လေး မေဆီယာ ပေါ အူဇေန့်။ ခု၀်၊ အန် ဟဲ့ တ၀်း ဒီ ဘူင် ပါယ် တီ၊ အန် ဟဲ့ မို၀်း ဒီ ဘ့လေး ကာဒိက် ဆတ်ဇာ ဒီ ဒါ အာဒါမ် ဂါယ် နာင် အေ၀ါ တွိုန်။ ခု၀်၊ အန် ဟဲ့ မို၀်း ဒီ တ၀်း ဒီ နာင် အေ၀ါ လှုက်လှာန် မဲ့ ဒီ ပ့လဲတ့်ကာလဲတ့် ဂိန်ဟန့်။ ခု၀်၊ ဘု၀် ကာနမ် အီ စိူ၀် ဆာတာန့် အန် ဘော ဘဲန် ဟန့်၊ တဲး အန် ပွိုန် ဒီ ကာ လု၀် နာင် အေ၀ါ။ ဇ၀်ဖြာ ဟဲ့ တဲး မေဆီယာ တီ။ ဘူင် တဲး န့ ဟွတ့် တူတ့် ဒွန် မျု၀် ဒီ ဘု၀် ကာနမ် ဆာတာန် တီ။

ဇ၀်ဖြာ ဟဲ့ ဘ့လေး ကာဒိက် ဆတ်ဇာ ဒီ ဒါ အာဘြာန်ဟမ် တွိုန်၊ ဘော ဂေ ဒူအီ အီ ကွယ် ဒဲင် ကာဒါယ် ဘောကာဂ့လျီတ့်၊ အန် ဟဲ့ မွင့်ကာရာ ဒွါ။ ဘော ဂြု၀်း ပီ ကာလာင် အန် ကာဒိက် ဆတ်ဇာ၊ တဲး န့ မှာန် ဆေဆေ။ ခု၀်၊ အန် ၀ီ ဘ့လေး မေဆီယ တွိုန်။ ဟဲ့ ဟွတ့်၊ မေဆီယာ တွိုန် အန် ဟဲ့ မုး၊ ဒါ အီ ချွတ် မှာပ် ဂေ ဒူအီ ဒဲင် ကာဒါယ် နီ ဘောကာဂ့လျီတ့်။

ဇ၀်ဖြာ ဟဲ့ တဲး၊ ဒါ အာမု၀်ဆဲ တွိုန် ဘဲန် ဒါ အီမို၀်း အာငျာန် နပ်ဒီခဲ ဟာဝ်နာအာတ့် အူ၀ီ။ အန် ဟဲ့ ဘ့လေး ကာဒိက် ဆတ်ဇာ ဒီ ဒါ အာမု၀်ဆဲ တွိုန်၊ ခု၀် ဘော လှုက်လှာန် ဒါ အာမု၀်ဆဲ အီ ဒီ တး နာပန် အန်။ အီ ဒီ မို၀်း အာငျာန် နပ်ဒီခဲဟာဝ်နာအာတ့် ပီအန်။ အာ တီ၊ န့ ဟဲ့ မုး မေဆီယာ အီ ဒီ ဘဲန့် ဒါ အီမို၀်း အာငျာန် နပ်ဒီခဲဟာဝ်နာ အာတ့်တီ။ ခု၀်၊ န့ ပါယ် တီ ဇ၀်ဖြာ ဟဲ့ ဘ့လေး ကာဒိက် ဆတ်ဇာ၊ အန် ဒီ ဘ့လေး တး မေဆီယာ။

ဇ၀်ဖြာ ဟဲ့ ဘ့လေး ကာဒိက် ဆတ်ဇာ၊ ဒီ ခုန်ဒီခမ် အာဒါ၀ိတ် တွိုန်။ ခု၀်၊ လှုက်လှာန် မဲ အူ၀ီ ဒီ ဘဲန် မေဆီယာ။ အန် ဒီ အိုပ် ဒူအီ ဒဲင် ကာဒါယ် နီ။ အန် ဟဲ့ မုး ခုန်ဒီခမ် အီ ဟဲ့ ပွိုန် ဒီ အိုပ် ဆေဆေ။

ဇ၀်ဖြာ ဘော ကာလာင်၊ ဒီ ဒါ အီဘျာန် ဂြု၀်း ဇ၀်ဖြာ အာယေရာဟီ အူ ဆီငဲ အန် ဒီ ဘူင် ပီ ဆီ ဖ၀် အန် ပေါ အူမျု၀်။ ဆာဒိက် အန်၊ အီ ကာမာယ် တီ အာ၀် လာ ခါနဲန် ဂါယ် ပီ ဟဲ့ ဘူင် အန် ဒီ အီဆာရေလ ဂေ တွိုန်။ အန် ဂါယ် ဒူအီ ကိူန် ဟဲ့ ဟွတ့်၊ ဆီ ဖ၀် ဒီ ဘူင် ဆာဒိက် အီ ကာမာယ် တွိုန် အန် ဟဲ့ နပ် အန်။ ခု၀်၊ ဒူအီ ကိူန် ဘော ရွက့် အန်၊ ထူမ် ဘော ဂြု၀်း ဒါရာ အန်။ ခု၀် အန် တီ၊ ဂြု၀်း ဒါရာ ဇ၀်ဖြာ၊ ဂေ ဒီ ဘော ထူမ် ဒူပ် ဘော ခဲင် န၀်း ဂေ၊ ကော ၀ီ ပီ ဂေ ဟဲ့ ဒဲမ် အုန် ဒါရာ ဇ၀်ဖြာ ခဲ့ န၀်း ဂေ။ ခု၀်၊ ဂေ ဟဲ့ ဟွတ့် ဘဲန် ဒူအီ ဇ၀်ဖြာ။ ဇ၀်ဖြာ ဘော ၀ီ ဘ့လွှာ ၀ဲန် မှာပ် ဂေ။ ဆာဒိက်အီ ကာမာယ် တီ မေဆီယ ဟဲ့ ဒီ ဘူင် အာ တီ။

ဒါ အီ မို၀်း အာငျာန် နပ်ဒီခဲဟာဝ်နာအာတ့် ဂေ တီ၊ ဂေ ဘော တ၀်း၊ “မေဆီယာ ဟဲ့ မုး ဒါ အီမို၀်း အာငျာန်။ အီ ဟဲ့ တာင်၊ ဘော အီ ဟဲ့ ဘဲန် ခုန်ဒီခမ် အူ၀ီ”။ ဒါ အီ မို၀်း အာငျာန် ဂေ တွိုန် ဂေ ဟဲ့ ထူမ် ဂြု၀်း ပီ ကာလာင် ဇ၀်ဖြာ။ ဟဲ့ ဟွတ့်၊ ဂေ ၀ီ ကာလာင် ဒီ ဒူအီ ဂေ။ ဇ၀်ဖြာ ဟဲ့ တ၀်း၊ ဒီ ဘ့လေး မေဆီယာ တွိုန်၊ အန် တူ မို၀်း မှာပ်၊ အန် ဘော မုး၊ ဒါ အီ မို၀်း အာငျာန် နပ်ဒီခဲ ဟာဝ်နာအာတ့်တီ၊ ဟဲ့ ကျက် တူတ့်။ လွင် ပီ ကာလာင် တီ မုး၊ မေဆီယာ တွိုန် ဟဲ့ မုး၊ ဒါ အီ ယို၀် ဆီချာ ဂြု၀်း ဇ၀်ဖြာ ဘော နပ် လွင် ဂြု၀်း ဇ၀်ဖြာ။ နပ် ဒီ ကာလာင် ဒီ ဒူအီ ကိူန်။

ဒါ တာင် အီဆာရေလ ဂေ၊ ဂေ ဘော တဲး ဒူအီ ကိူန် ကြိုပ် ဇ၀်ဖြာ ဘော အိုပ် ဇ၀်ဖြာ။ လှူ မာ ဒု၀်ပြဲ ကာဆိူမ် င၀် ဒီ ဇ၀်ဖြာ လွင် လှူ ကာဆိူမ် ဒီ င၀် တီ န့ မုး၊ အာဒါ မှာပ် ဒူအီ။ ဂေ အာ၀် လု၀် ကာ ဒူက် မှာပ်။ အာ တီ ဟဲ့ မုး၊ အာ ဒါ မှာပ် ဂေ။ အာ ဒါ ဂေ ဒူအီ ကိူန် ဒါ တာင် ဂေ ဘော ၀ီ ဆီခို၀် ဒွါ ဒီ ဇ၀်ဖြာ။ ပန် တီ၊ မေဆီယာ တွိုန် ဘော ဒွါ ဒု၀် အန် ဒီ ဇ၀်ဖြာ အန် ဘော ဘဲန့် ဒါ တာင် အီ ကျက် ကာဆ၀်။ လွင် ကာလာင် အန် တီ မုး၊ မေဆီယာ တွိုန်၊ အန် တူ မို၀်း မှာပ်။ ခု၀်၊ အန် တူ လု၀် လှူ ဒု၀် ပြဲ ကာဆိူမ် ခဲင် င၀်။ ခု၀်၊ အာ၀် မို၀်း ပီ ဒီ လု၀် လှူ အန် ဒီ ဇ၀်ဖြာ၊ အန် ဘော ၀ီ လှူ ဒု၀် အန် ဒီ ဇ၀်ဖြာ။

ဒူအီ ကိူန်၊ ခုန်ဒီခမ် ကိူန့် ဂေ ဒါ တာင် ကိူန့်၊ ဟဲ့ နပ် ဒီ ဘူင် မှာပ်။ ခုန်ဒီခမ် အာဒါ၀ိတ် တွိုန်၊ အန် ဟဲ့ အိုပ် ဒူအီ အာ မျု၀် အီဆာရေလ ဂေ။ ပန် တီ၊ လှုက်လှာန် ခုန်ဒီခမ် အာဒါ၀ိတ် မေဆီယ တွိုန်၊ အန် ဘော အိုပ် ကာဒါယ် ဘော ဘူင် ဘောကာဂ့လျီတ့်။ ဒူအီ အီ ကွယ် ဒဲင် ကာဒါယ် အန် ဟဲ့ အိုပ် ဆေဆေ။ အန် ဟဲ့ အိုပ် နာ မှာန် ဆေဆေ၊ အန် ဟဲ့ ဘူင် ဒါရာ မွှိုမ် ဆေဆေ။ ခု၀်၊ အန် ဘော အိုပ် ဘော ဒဲင် ကာဒါယ် ဆေဆေ။

ဒါ အီမို၀်း အာငျာန်နပ်ဒီခဲ ဟာဝ်နာအာတ့် ဂေ တွိုန်၊ ဂေ ဟဲ့ ကာလာင် လွင် မေဆီယာ တွိုန်၊ ပေါ မျု၀် ဟာ၀် ဂေ ဟဲ့ ကာလာင် လွင် အန်။ ဂေ ကာလာင် အူဖာမာ လွင် အန် တီ၊ ( မာလာခီ ) တွိုန်၊ အာတ့် တး မေဆီယ တွိုန်၊ န့ ဒီ မို၀်း ဒါ အီမို၀်း အာငျာန် နပ်ဒီခဲဟာဝ်နာအာတ့် အူ၀ီ ဒီ တး။ ဒါ အီ မို၀်း အာငျာန် တီ ဒေါ ထူမ် ဂေ ဂြု၀်း အန် ဂေ ကော ညှိုမ် ဇ၀်ဖြာ။ ၀ါယ် အန် တီ၊ ဒါ အီ မို၀်း အာငျာန် နပ်ဒီခဲဟာဝ်နာအာတ့် ( ဟေရှာယာ ) တ၀်း၊ မေဆီယာ တွိုန် အန် ဒီ ဂွိုတ် ဒီ ဂွန် အီဘေန့် ဒေါ ဆီ မုး အန် ဒီဘျာ အန် တ၀်း ပါယ်တီ။ ဒါ အီမို၀်း အာငျာန် နပ်ဒီခဲဟာဝ်နာအာတ့် ( မိက္ခာ ) တွိုန် တ၀်း၊ “မေဆီယာ ဒီ ဂွိုတ် ခဲင် မိူင် ဘေတ်လဲမ် တွိုန်။ အန် တ၀်း ပါယ် တီ။

ဒါ အီ မို၀်း အာငျာန် နပ်ဒီခဲဟာဝ်နာအာတ့် ( ဟေရှာယာ ) တွိုန် တ၀်း၊ မေဆီယ ဟဲ့ ကွယ် ခဲင် အိူင် ဂါလီလေ။ ဂေ အီ ကွယ် ခဲင် အိူင် ဂါလီလေ တီ၊ ဂေ အီ တူ မို၀်း န၀်း ဒါ ခိုယ်၊ အန် ၀ီ ဘူင် တဲး န၀်း ဂေ ၀ီ ဒါ ခိုယ်။ အန် ဒီ ဘ့လေး၊ လေး ဘော ဂေ အီ ကွယ် ခဲင် ကာပိုမ်။ ဘော ဂေ အီ ဟဲ့ မို၀်း ဆ၀်၊ ဘော ကာနမ် အီ လိုပ် ပ့လိုက် ဒူအီ။ ဂေ ဒူအီ အီမို၀်း ဆ၀် ဘောဒူအီစှဲ ဒူအီစွှဲယ်ဂေ၊ ဘဲန် မျု၀် ဘဲန် မျု၀် အန် ဘော ဘူင် တဲး န့ ဟြာယ် တူတ့်။

ဒါ အီ မို၀်း အာငျာန် နပ်ဒီခဲဟာဝ်နာအာတ့် ( ဟေရှာယာ ) ၀ီ တ၀်း။ “ဂေ ဒူအီ ကိူန် ဂေ ဘော အာ၀် ရွက့် မေဆီယ တွိုန်၊ ဟဲ့ ဟွတ့် ဂေ ဘော ဒီ ၀ီ ၀ဲန် အန်“။ ဘော ဂေ ဒါ အီ မို၀်း အာငျာန် နပ်ဒီခဲဟာဝ်နာအာတ့်ဂေ၊ ဟာ၀် ဘော တ၀်း။ ဘော ဂေ ၀ါ၀ဲ အန် ဒီ ဘူင် အီ တူမွှိုမ် နာ ဒဲင် အန်။ ဂေ ဟဲ့ ကာလာင် ပါယ် တီ။ ဘော ဒါ အီ မို၀်း အာငျာန် နပ်ဒီခဲဟာဝ်နာအာတ့် ( အာဆာခါရာ ) တွိုန် တ၀်း။ “ကူပ် ဟဲ့ ဘူင် ၀ါ၀ဲ အန် ပါယ် တီ ဂေ ဘော ပွိုန် ရွိုန် ဘူင့် အူယ် ဂို၀်း”။ အန် ဟဲ့ ကာလာင် ပါယ် တီ။ ဘော ဒါ အီ မို၀်း အာငျာန် နပ်ဒီခဲဟာဝ်နာအာတ့် ဟာ၀် ပီ ၀ီ တ၀်း၊ “ဒူအီ ကိူန့် ဘော ဒီ င၀်း ယမ် မေဆီယာ တွိုန်၊ ဂေ ဘော ဒို၀်း ခြိုင် ပီ တာ အန်၊ ဂေ ဒီ ဘော လာယ် ကာဒု၀် ခြိုင် အန် တီ”။ ဂေ ဟဲ့ ကာလာင် လွင် အန် ပါယ် တီ။

ဒါ အီ မို၀်း အာငျာန်နပ်ဒီခဲဟာဝ်နာအာတ့် ကိူန့်၊ ဂေ ဟဲ့ ကာလာင် ဘော လွင် မေဆီယာ လု၀် ယမ်၊ ဂေ ဟဲ့ ကာလာင်။ (ဟေရှယာ) ၀ီ တ၀်း၊ “ဒူအီ ကိူန် ဒီ ဘော ပက် နာ အန် ဂေ ဒီ ဘော ကာညး အန်။ မေဆီယာ တွိုန်၊ အန် တူ မို၀်း ဒီ ဘူင် မှာပ် မာဆေ၊ အန် ယီ လု၀် ခမ် ဂေ ဆတ် အန် တာ ဘ့လာလျီး။ အန် ဒီ ဘော ခမ် ဒုက် တာင် အန် ဒီ ဘော ခမ် ဆ၀် ကာဆ၀်။”

မေဆီယာ တွိုန်၊ အန် တူ မို၀်း ဒီ ဘူင် မှာပ် မာဆေ၊ အန် ဘော ဘဲန် ဒါ အီ ဟဲ့ အွင် ဇဲတ့် မျု၀်၊ ဒါ အီ မို၀်း အာငျာန် နပ်ဒီခဲဟာဝ်နာအာတ့်ဂေ ဟဲ့ ကာလာင် လွင် အန် ပါယ် တီ။ ဟဲ့ ဟွတ့်၊ ဇ၀်ဖြာ ၀ီ တ၀်း ကူပ် ဟဲ့ မို၀်း ဂေ ဒူအီ ကိူန် အီ ဟဲ့ ဘူင် မှာပ်၊ ကူပ် မှာပ် ဂေ တီ အန် ဒီ လု၀် ယမ်။ အန် ဘော ဟဲ့ ဟွတ့် ယမ် ဂေ ဒူအီ ကိူန့် ဘောမို၀်း န၀်း ဂျီတ့် န၀်း ဒါခိုယ် ဒီ ဇ၀်ဖြာ။ ပန် တီ၊ ဇ၀်ဖြာ အီ ဟဲ့ ဘူင် တဲး မေဆီယာ တီယမ်။

ဒါ အီ မို၀်း အာငျာန် နပ်ဒီခဲဟာဝ်နာအာတ့် ဂေ ကိူန့်၊ ဘော တ၀်း ဇ၀်ဖြာ ဟဲ့ တဲး၊ မေဆီယာ တွိုန် ယမ် ဟဲ့ ဟွတ့် အန် ဒီ ၀ီ ယေတ့် ၀ီ အိမ် ဂေ ဟဲ့ ကာလာင် ပါယ် တီ။ လွင် အာ တီ၊ န့ ဟဲ့ မုး ဒူအီ ပီ ရ၀်း ပီ တိုယ် ဇ၀်ဖြာ တဲး အန် ချွတ် ဒူအီ တွိုန် အန် ဟဲ့ ဟွတ့် ယမ်၊ အန် ဒီ ဘော ၀ီယေတ့် ၀ီအိမ် အာ တီ န့ ဟဲ့ မုး၊ ဒူအီ ဂေ ဟဲ့ ဘူင် မှာပ် နာ ဒဲင် ဇ၀်ဖြာ။ အာ တီ၊ အန် ဟဲ့ ဘာယ် ၀ဲန့် တူတ့်။ အာ တီ န့ ဟဲ့ မုး၊ ဆာဒိက် ဇ၀်ဖြာ အီ ကာမာယ်။

ဇ၀်ဖြာ ဟဲ့တဲး ဒါ အီ မို၀်း အာငျာန် နပ်ဒီခဲဟာဝ်နာအာတ့် ဂေ ကာလာင် လွင် မေဆီယာ တွိုန်။ မေဆီယာ တီ ဒေါဆီ ကွယ် ဒါ အီ မို၀်း အာငျာန် ဂေ တွိုန်၊ အာခြာ၀် တီ အာ၀် မို၀်း အန်။ ၀ါယ် အန် တီ၊ ဒါ အီ မို၀်း အာငျာန်အီ နပ်ဒီခဲဟာဝ်နာအာတ့် ဂေတွိုန်၊ ဟဲ့ ဟွတ့် ကာလာင် တူတ့် လွင် အန် တီ။ ဟဲ့ လှေန့် ဆီနမ် အန် ဖွုန် မာယ၀်း။ န့ ဘော မှာန် ပီ၊ ပီ တ၀်း၊ ဂေ တီ ဇ၀်ဖြာဘောဘ့လေး လူင် မေဆီယာ တွိုန် ဒဲင် ကာဒါယ်။

A Bible story from: Genesis 3:15; 12:1-3; Deuteronomy 18:15; 2 Samuel 7; Jeremiah 31; Isaiah 59:16; Daniel 7; Malachi 4:5; Isaiah 7:14; Micah 5:2; Isaiah 9:1-7; 35:3-5; 61; 53; Psalm 22:18; 35:19; 69:4; 41:9; Zechariah 11:12-13; Isaiah 50:6; Psalm 16:10-11