၁၄။ လွင် ကွယ်ဟာဝ် ခဲင် နင်

အန်ဇ၀်ဖြာ ဟဲ့ ဘ့လေး ဆာဒိက် ဆတ်ဇာ ဒီ ဒူအီ အီဆာရေလ ဂေတွိုန်။ တဲး ဂေ ထူမ် ဒူပ် ဘော ဒါရာ ပီ ဟဲ့ ကာလာင် အန်။ ဟဲ့ဟွတ်၊ အန် ဘော ၀ီ ယဲတ့် ဟာ၀် ဂေ ဒူပ် န့ တေန့် ကာဒူင့် တူင့် ဒီ နွန် ဆီနာယ် တွိုန်။ ဇ၀်ဖြာ ဟဲ့ ယဲတ့် ဟာ၀် ဂေ မိူင်၊ ပီ ဟဲ့ ဘ့လေး အန် ကာဒိက် ဆတ်ဇာ။ ခု၀်၊ စိူဝ်မိူင် တီ န့မုး ကာနန့်။ ဇ၀်ဖြာ ဟဲ့ တဲး န့ အုတ် တာင် ယဲတ့် ဒီ အာတ့် ဂေ။ ခုဝ်၊ ဂေ ဘော ဒူပ် နာ ပန် န့ အုတ် တီ။

ဇ၀်ဖြာဟဲ့တဲး၊ ဒါ အာဘြာန်ဟမ်၊ ဒါ အာဆဲက်၊ ဒါ အာကူပ် ဂေ ဂါယ် အာမျု၀် လှုက် လှာန် အန်ဂေ။ ခုဝ်၊ ဒူအီ ကိူန့်ဂေတွိုန်၊ ဟဲ့ဟွတ့် ဇမ် ကာဒူင့်ကွယ်၊ ကာဒါယ် ပီဟဲ့ ဘ့လေး၊ ဇဝ်ဖြာ ကာဒိက်ဆတ်ဇာ ဒီဂေ တွိုန်။ ခုဝ်၊ ဒူအီ ကိူန့်ဂေ တီ၊ ဂေဘောတဝ်း ဂေစိူဝ် အာမျုဝ် ဒူအီ ကာနန့်။ ဒူအီ ကာနန့်ဂေတီ။ ဂေတူမိုဝ်း နဝ်းထူမ် ဂြုဝ်းဇဝ်ဖြာ။ နဝ်းအိုပ်ဇဝ်ဖြာ၊ နဝ်း ကြိုပ် ဇဝ်ဖြာ။ ဒူအီ ကိူန့်ဂေတီ။ ဂေဘောဘူင် အာရိုပ်ဇဝ်ဖြာ ပီဟာဝ်၊ ဂေအာရိုပ် ရာင်။ ဟဲ့ဟွတ့် ဂေဘောဝီကြိုပ်။ ခုဝ်၊ ဂေ ဟဲ့ဘူင် အီတူမွှိုမ် ကိူန့်ကာဆဝ်။

ဇ၀်ဖြာ ကာလာင် ဒီ အာမျု၀် ဒူအီ အီဆာရေလ ဂေ၊ အန် တ၀်း၊ “တဲးဘေ ဟဲ့ လိုပ်ခဲင် မိူင် ပီဟဲ့ဒွါအုဝ်၊ ကာဒိက် ဆတ်ဇာ ဒီဘေ။ ခုဝ်၊ ကာဒူင့် တီဘေလုဝ် ဒိုဝ်းဝဲန်၊ အာမျုဝ် ဒူအီ ကာနန့်ဂေ ဘောကာဂ့လျီတ့်။ ခုဝ်၊ ကွဲ့တဲး ဘေ ကာလိုပ်၊ ဒီဘ့လေး ကာဒိက်ဆတ်ဇာ ကွယ်ဒီခိုယ်၊ ကွယ်ရိုမ်ဒူပ်ဂေ။ ခုဝ် ဘေအာဝ် ပွိုန် ခတ်ဒိုဝ်း ဂေတီ။ ဘေဘော လုဝ်ပျာတ့် ဝဲန် တူတ့် အာရိုပ် ရာင်ပီဟဲ့ဘူင် ဂေတီ။ ခုဝ်၊ ဆေဘေ ယီ တူထူမ် ဂြုဝ်း ဒါရာ၊ ပီကာလာင် အုဝ်ဒီဘေ။ ဘေဒီဘော အာဝ် အိုင်၊ တူဝီကြိုပ်အုဝ်။ ဘေဒီဘော အိုင်ဘော ကြိုပ် အာရိုပ် ရာင် ဂေတီ"။ ဇဝ်ဖြာ ကာလာင် ပါယ်တီ။

အာမျု၀် ဒူအီ အီဆာရေလ ဂေတွိုန်၊ ဂေ ဟဲ့ ဟွတ့် ဇမ်၊ ခူပ် မိူင် ကာနန့်တွိုန်။ အာမု၀်ဆဲ ဘော ၀ီ ရ၀်း၊ ဒူအီ အူ မျု၀် အူ၀ီ၊ ဂို၀် ဒီ အာ ၀ီ အန် ဟဲ့ ရ၀်း။ ခုဝ်၊ အန် ဘော စ်ု ဂေ ဒူ အီ တီ၊ ဟာဝ် ယွတ် မှ၀် န့ ပါယ် ခဲင်မိူင် ကာနန့်တွိုန်။ မာဆေ ပီ ဟဲ့ ပဲ ဂေ ဒီ ဘူင် ဂါယ် ပီ တူပဲ ဂေ ဒီ ဘူင်။ အန် စ်ု ဂေယွတ် ပါယ် တီ။

ခုဝ်၊ ဂေ ဒူအီ ဂို၀် ဒီ အာ၀ီ၊ ဂေဟဲ့ ဟာ၀် ခဲင် မိူင် ကာနန့်တွိုန်။ ဟဲ့လှေန့် ဆီငဲ ဖွုန် ဂို၀်။ ခုဝ်၊ ဂေ ဘော၀ီ တး။ မိူင်ကာနန့်တီ၊ ကာဒါယ် ဟဲ့ကျက် ဟဲ့ဘွတ်၊ ဘောငှုဝ် ဟဲ့ကိူန့်၊ ဂေကာလာင်ပါယ်တီ၊ ဒီဒူအီ ကိူန့်ဂေ တွိုန်။ ခုဝ်အန်တီ၊ ဂေဒူ အီ ဂိုဝ်ဝီတဝ်း၊ "မိူင်ကိူန့်ဂေတီ န့ဟဲ့ကျက်၊ ဘောဒူအီ ဟဲ့မိုဝ်း ပ့လူမ် ကိူန့်ခဲင်မိူင်တီ။ ဆေအေ ဒီကာဂုဝ်း ဒီဂေ၊ အေဒီ ဘော စိူမ်၊ အေဒီဘော လုဝ်ကာဒူင့် ဒီငဝ်းယမ်"။ ဂေ ဟဲ့ ကာလာင် ပါယ်တီ။

ဒေါမှာဝ်ဒေါအန်၊ ဂါယ်အာဝီ အာကာလတ် ဂါယ် အာယောရူ ဘော တ၀်း၊ “အာမျု၀် ဒူအီ ကာနန့် ဂေ ဟဲ့ စာ ဟဲ့ မို၀်း ပ့လူမ်။ ခုဝ်န့ ဟဲ့ မှာန် အေဒီ စိူမ် ဒီ ဂေ။ မာလဲ ဇ၀်ဖြာ ဒီ ကာဂု၀်း ဒါင် အေ”။ ဂါယ်ကာလာင် ပါယ် တီ။

ခု၀် အန် တီ၊ ဂေ ဒူအီ ကိူန် တူ ထူမ် ဂြု၀်း ပီ ကာလာင် အာကာလတ် ဂါယ် အာယောရူ။ ဒူအီ ဂေ တီ၊ ဂေ ဘော ရူ ဒီ အာမု၀်ဆဲ ဂါယ် အာရူန်။ ဂေ တ၀်း၊ “ မာ ဆေ ဘေ ပီ ဒဲ့ ဟာ၀် ယေ ဇမ် ခဲ ဒုက်။: မှ၀် န့ ပါယ် ဘေ ပီ ဒဲ့ ဟာ၀် ယေ ကာဒူင် တီ။: န့ ကာအာပ် ယေ ကွယ် ခဲင် မိူင် အဲဂိုပ် တွိုန်။ ဆေ ယေ ဟဲ့ လိုပ် ခဲင် မိူင် တီ၊ ယေ ဘော လု၀် ကာဂု၀်း။ ဟဲ့ ဟွတ့် ယမ်။ အာမျု၀် ဒူအီ ကာနန့် ဂေ၊ အီ ဘိုန့် ယေ ဂါယ် ဂွန် ယေ ဂေ ဒီ ဘော ဘူင် တဲး န့ ဘဲန် မှာယ် ဂေ”။ ဂေ ဟဲ့ ကာလာင် ပါယ် တီ။ ဒူအီ ဂေ တီ၊ ဂေ ဘော လု၀် ဒါတာင် အီ ဟာ၀်၊ ၀ီ ဒဲ့ ဟာ၀် ဂေ မိူင် အဲဂိုပ် တွိုန်။

ခုဝ်၊ ဂေ ဒူအီ ဟဲ့ ကာလာင် ပါယ်တီ၊ ဇ၀်ဖြာ ဘော ရူ ကာဆ၀် ဒီ ဂေ။ အန် ဘော လူင် ခဲင် ထိုပ် ကာဒူင့် လု၀် ယို၀် တွိုန်၊ အန် တ၀်း၊ “ဘေ ဘော လု၀် ၀ီဒီ ဟာ၀် ခဲင် နင်။ ခုဝ်၊ ဒူအီ အာဆာက် အာ ဂို၀် ဟု၀့် နာ ဒဲင် ဒွန် အီ ဒီ ဘော လု၀် ယမ် ဒီ တီ။ ဘေ အာ၀် ပွိုန် လိုပ် ခဲင် မိူင်။ ပီဟဲ့ဒွါ အုဝ်ဒီဘေ။ အာယောရူ ဂါယ် အာကာလတ် ၀ီဟဲ့ ပွိုန် ဒီ လိုပ်”။ ဇ၀်ဖြာ ကာလာင် ပါယ်တီ ဒီဂေ။

ခုဝ်၊ ဂေ ဒူအီ ကိူန့်၊ ဟဲ့ ယို၀် ဇ၀်ဖြာ ဟဲ့ ကာလာင် ပါယ် တီ။ ခု၀်၊ ဂေ ဘော ၀ီ န့ လူ၀်း မှာပ် ဂေ။ ဂေ ဘော ၀ီ ဆုင် ဖျာက်၊ ကာဂု၀်း ဒီ အာမျု၀် ဒူအီ ကာနန့် ဂေ။ ခုဝ်၊ အာမု၀်ဆဲ ဟဲ့ ဘ့လေး ဆီ ဒိတ် ဒီ ဂေ။ မှ၀် န့ ပါယ်ခုဝ်အန်၊ အာ၀် ဘာ ဇ၀်ဖြာ ဟာ၀် ဒူပ်ဂေ။ ခု၀်၊ အန်တီ။ ဂေဘော တူ ထူမ် ဂြု၀်း ပီ ကာလာင် အာမု၀်ဆဲ တွိုန်။

ခုဝ်၊ အာ၀်ဘာ အန် ဇ၀်ဖြာ ဟာ၀် ကာဂု၀်း ဒူပ် ဂေ။ ဂေ ဒူအီ ကိူန့်၊ ဘော ကာဒုး ဒီ င၀်း ယမ်။ ခု၀် အန်တီ၊ အာမျု၀် ဒူအီ အီဆာရေလ ဂေ၊ ဘော ၀ီ ကာဘ့လျီတ် ၀ေန် နာ ပန် မိူင် ကာနန့် တွိုန်။ ၀ီ ဟာ၀် နာ နင်။ ဂေ ဘောကွယ် ခဲင် နင် တီ၊ အာ ဒါ ဆီနမ် ဖွုန်ဂို၀်။

ခုဝ် ဒူအီ အီဆာရေလ ဂေ။ ဘော ဟဲ့ ကွယ်ခဲင်နင် မိူဝ်ဇဝ်ဖြာ ဟဲ့ဆီစွယ်ဂေ။ အန်ဇဝ်ဖြာ ဟဲ့ဘ့လေး၊ လူင်ခါမုန် အီစိူဝ် မာနာခဲင် ဂါင်ဟြာဝ်၊ တဲးဂေပွိုန် ဒီဟူမ်။ ဆေဂေပွိုန် ဒီဟူမ်၊ အန်ဇဝ်ဖြာ ဘ့လေးဟာဝ် ဘော မာဆိန့်၊ ကာဒူင့်ကွယ်ဂေ။ ဇ၀်ဖြာ ဟဲ့ ဘူင် ဒွါ တဲး ခြိုင် ဂေ ခူဒိန် ဂေ၊ ကွဲ့ တဲး န့ ကာပျာတ့်။

အန်ဇ၀်ဖြာ ဟဲ့ ဘူင်၊ တဲး အိုမ်လေး ခဲင် မာဝ်တဲးဂေ ပွိုန်ဒီဒျီင်။ န့ဘောပါယ်တီမိူဝ်၊ ဂေဒူအီတီ၊ ယီ တူယွတ် တူ န့လူဝ်းဇဝ်ဖြာ ဂါယ် အာမုဝ်ဆဲ တွိုန်၊ ဂေဘော ဝှးဟာဝ်။ န့ဘော ပါယ်တီ မိူဝ်၊ ဇဝ်ဖြာ န့ယွတ် ဟာဝ်ဂေ ပါယ်တီ။ ခုဝ်၊ အန် ဇဝ်ဖြာ ဟဲ့ဘူင်ဒွါ၊ ကာဒိက် ဆတ်ဇာ အန်ဒီဒါ အာဘြာန်ဟမ်၊ အာကူပ် ဂါယ်အာ ဆဲက်။ တဲးလှုက်လှာန်ဂေကိူန့်၊ ခုဝ်ဇဝ်ဖြာ ဟဲ့ဘူင်ပါယ်တီ။

ဒေါအန်တီ၊ ဂေ ဒူအီ ကိူန့် အာ၀် မို၀်း အိုမ် ပီ ဒီ ဒျီင်။ ဇ၀်ဖြာ ဘော ၀ီ တ၀်း၊ ဒီ အာမု၀်ဆဲ။ “ဂြု၀်း ဒီ မာ၀် တီ။ ခုဝ်၊ အိုမ် ဒီ ဘော လေး ခဲင် အန်”။ ဇ၀်ဖြာဟဲ့ ကာလာင် ပါယ်တီ။ ခုဝ်အန်တီ၊ အာမု၀်ဆဲ တွိုန်၊ အန် လု၀် ဂြု၀်း ဒီ မာ၀်၊ မာလဲ အန် ယီ တူ ဂြု၀်း၊ အန်ဘောဝီဒိုဝ်း န့ဖျီင် ဝတ့်မာဝ်တီ။ တဲး န့ကာယဝ်း ဘဲန်ဟာအာ။ ခုဝ်၊ ကူပ် ဟဲ့ဘူင် အန်ပါယ်တီ၊ န့ဟဲ့ပီ အန်ဘူင်တဲး ဆာရေဇဝ်ဖြာ ကာပျာက့်။ ခုဝ် အန်တီ၊ အိုမ် ဘောဟဲ့လေး ခဲင်မာဝ်၊ တဲး ဒူအီဂေ ပွိုန်ဒီဒျီင်။ မာလဲ၊ ဇဝ် ဖြာ ယီဟဲ့ ရူဒီ အာမုဝ်ဆဲ။ ဇဝ်ဖြာ ဝီတဝ်း၊ "ကူပ်ဟဲ့ဘူင်မဲပါယ်တီ၊ မဲအာဝ် ပွိုန် ဒီလိုပ်ခဲင်မိူင်၊ ပီဟဲ့ဘ့လေး အုဝ် ကာဒိက် ဆတ်ဇာ"။ ဇဝ်ဖြာ ဟဲ့ကာလာင်ပါယ်တီ။

အာမျု၀် ဒူအီ အီဆာရေလ ဂေ၊ ဟဲ့ ကွယ် ခဲင် နင် တီ၊ ဟဲ့ ၀ီ နု၀် ဆီနမ် အန်ဖွုန် ဂို၀်။ ဂေ ဒူအီ အီ ဟဲ့ ဘူင်၊ ပီ တူ လ၀့် န၀်း ဇ၀်ဖြာ ဟဲ့ ဟွတ့် ယမ်။ ၀ါယ် အန် တီ၊ ဇ၀်ဖြာ ဘော ဒဲ့ ဟာ၀် ဒူအီ ဂေတီ၊ ကာဒူင့် ကွယ် မိူင်၊ ပီ ဟဲ့ ဘ့လေး အန် ကာဒိက် ဆတ်ဇာ။ အာမု၀်ဆဲ တွိုန်၊ အန် ဟဲ့ ဟွတ့် ကတ် ကာဆ၀်။ ခု၀် ဇ၀်ဖြာ ဘော ၀ီရ၀်း တဲးအန်မုး၊ ဒါတာင် အီဟဲ့ ယဲတ့်ဒူအီ ဂေတီ။ ခုဝ်ဇဝ်ဖြာ ဘ့လေးကာဒိက်ဆတ်ဇာ ဒီအာမုဝ်ဆဲ၊ အန်ဒီ ဘ့လေး ဒူအီ ပီရဝ်း အူဝီ။

၀ါယ် အန် တီ၊ ဇ၀်ဖြာဘ့လေး အာမု၀်ဆဲ၊ တဲးအန် ပွိုန် ဒီ ယို၀် မိူင်၊ ပီ ဟဲ့ ဒွါ အန် ကာဒိက် ဆတ်ဇာ ဒီဂေ။ ခုဝ်၊ အန် ဘော တဲး အာမု၀်ဆဲ ဟု၀့် ဒဲင် ကာဒဲတ့် နွန်။ အာမု၀်ဆဲ တွိုန်၊ အန် ဘော ဟဲ့ ပွိုန် ဒီ ယို၀် မိူင်၊ ပီ ဟဲ့ ဘ့လေး ဇ၀်ဖြာ ကာဒိက် ဆိတ်ဇာတွိုန်။ ဇ၀်ဖြာ ယီ တူတဲး အန်ပွိုန်ဒီလိုပ်။ ၀ါယ် အန် တီ၊ အာမု၀်ဆဲ ဘော ၀ီ ယမ်၊ န့ ဘော လှေန့် ဆီငဲ အူယ် ဂိုဝ်။ ဂေ ဒူအီ အီဆာရေလတွိုန်၊ န့ဟဲ့ဘဲန်နဝ်း အာဝ်ဒါခိုဝ် ဒီဂေ။ အာယောရူ တွိုန်၊ အန် ဘောဝီ ဘဲန် ဒါ တာင် အီ ကာမာယ်။ ခုဝ်၊ အန် ဟဲ့ ထူမ် ဒူပ် ဂြု၀်း ပီ ကာလာင် ဇ၀်ဖြာ။ အန် ဘော ဟဲ့ဘဲန် ဒါ တာင် အီ ဟဲ့ ကျက်။

A Bible story from: Exodus 16-17; Numbers 10-14; 20; 27; Deuteronomy 34