၂၈ - လွင် ဒါအီ ခြမ် မိုဝ်း ဒွန် မျုဝ်အူအီ
အူ ဆီငဲ တွိုန် ဂွန် ခြမ် အီ ဒီ တဲတ့် တွိုန် တး ဇမ် ကာဒူင့် ကွယ် ဇဝ်ယေဆူ တွိုန်။ ‘‘အန် တဝ်း တဲး မဲ ဆာရာ ဘွတ့် ဒွါ ဒီ အုဝ် အာဆာက် ဆေဆေ။ မာဆေ ပီ လုဝ် အုဝ် ဘူင်’’။ အန် ဝီ ဒီ မွှတ် ပါယ် တီ၊ ဇဝ်ယေဆူ တွိုန် တဝ်း ဒီ အန်။‘‘ မှဝ် န့ ပါယ် မဲ ပီ ဒဲ့ အုဝ် ဆာရာ ဘွတ့်။ နာ ဒဲင် ကာဒါယ် နီ ဆေ န့ မိုဝ်း ဒါဆာရာ အီ ဘွတ့် အူ ဝီ အန် ဒီ ဘော ဘဲန် ဇဝ်ဖြာ၊ ခုဝ် အန် တီ ဘော မဲ ဆေမဲ ဆီပွိုန် အာဆာက် တူနပ်ဒီကတ် တူနပ်ဒီယမ် အူစုဝ်ဂမ်ဖါ တီ မဲ လုဝ် ဒူပ် ဒါရာ ဇဝ်ဖြာ’‘။ ခုဝ် အန် ဘော ဝီ ကာလာင် ပါယ် တီ။
‘‘မှဝ် အုဝ် ပါယ် ဒီလုဝ် ဒူပ် ဒါရာ’’။ ခုဝ် အန် ဘော ဝီ ဒီ မွှတ် ပါယ် တီ၊ ဒေါ အန် တီ ဇဝ်ယေဆူ တွိုန်။‘‘ အာပွိုန် ငဝ်းအီ ၊ အာပွိုန် ဘူင် ကာပျာတ့် ခဲင် ဟူမ် ကာင်၊ အာ ပွိုန် ပြာ အီ၊ အာပွိုန် ကာလိုပ်ဒီ အီ၊ ဘော မဲ လုဝ် ရုပ်ဆေ ဂုန် မာ မဲ ဘော မဲ လုဝ် ရွက့် အီ ကွယ် ခုပ် ကာင် မဲ တဲး န့ နဲန့် မဲ ရွက့် ခဲင် ဟူမ် မဲ’’။ ခုဝ် အန် ဘော ဝီ ကာလာင် ပါယ် တီ။
ခုဝ် အန် တီ ဒါ ဒီတဲတ့် တွိုန်၊ ‘‘အူ ဆိန့် ဒေါ ဒီ တဲတ့် အုဝ်၊ အုဝ် ဟဲ့ ဘူင် ဒူပ် ဒါရာ တီ၊ အုဝ် နီ ဟဲ့ လုဝ် အာဆာက် အိမ်၊ တူနပ်ဒီကတ် တူနပ်ဒီယမ် အူစုဝ်ဂမ်ဖါ တွိုန် ခုဝ် အန် ဘော ဒီ မွှတ့် မာဆေ မုး ပီ လုဝ် အုဝ် ဘူင် ပွါ’’။ ဒေါ အန် တီ ဇဝ်ယေဆူ တွိုန် အန် ဘော ယိုဝ် ဒူအီ တီ အန် ဘော ရွက့် ကာဆဝ် အန်။
ဇဝ်ယေဆူ၊ ‘‘ကာလာင် တဝ်း ဒီ အန် ကြုဝ်ကြာမ် ခဲင် ပီ မိုဝ်း မဲ ဒွန် မျုဝ် တဲး မဲ ဝီကာဆာင် ဒွါ ဒီ ဒူအီဂိန်။ ဝါယ် အန် တီ၊ တး ကာဒူင့် ကွယ် အုဝ် တး ဘဲန် ဒီ ဘဲ အုဝ်။ ဒေါ အန် တွိုန် ကြုဝ်ခြိဝ် အီ ကွယ် မိူင် ဂါင်ဟြာဝ် မဲ ဒီ ဘော ပွိုန် ဒီ မဲ ခုဝ် အန် ဘော ကာလာင် ပါယ်တီ၊၊
ဒေါ ယိုဝ် ဂွန် ဒီ တဲတ့် ဂေ ပီ ကာလာင် ဇဝ်ယေဆူ တွိုန်၊ ဘော ဘဲန် ဟာဝ် နဝ်း အာဝ် ဒါခိုယ် ဒီ ဂေ၊ ခုဝ် မှဝ် န့ ပါယ် ကူပ် အန် မုး ဒါအီ ခြမ် အူဝီ အန် မိုဝ်း ရွိုန် ဂေ ခြိဝ် ကြုဝ်ကြာမ် အန် ကိူန်၊ ခုဝ် န့ မုး ကူပ် တူ ကာဆာင် ဒွါ အန် ဒီ အီ ဟဝ်၊၊ ခုဝ် အန် တီ အန် ဘော စ်ု ဇဝ်ယေဆူ လေး ဟာဝ်။
ဝါယ် အန် တီ ဇဝ်ယေဆူ တဝ်း ဒီ ဘဲ ကိူန် အန် တွိုန်၊ ‘‘အီ ခြမ် ဂေ တွိုန် အာ ဒါဂေ ဒီ ပွိုန် ဒီ ဟုဝ် မိူင် ဂါင်ဟြာဝ် ဟဲ့ ညှာပ် ကာဆဝ်၊ မာလုဝ် အူဒုဝ် ဟဲ့ငှိုယ်ဒီလုဝ် လိုပ်ခဲင်ကာ ဒဝ်မာလတ့်တွိုန်၊ မာလဲ ဒူအီ ခြမ်ဂေတွိုန်၊ ဟဲ့ညှာပ်လွှိုမ် ဒီလုဝ်လိုပ် ခဲင်မိူင် ဂါန်ဟြာဝ်၊ ခုဝ် အန်ဘော မာနုဝ် ဒီဂေပါယ်တီ။
အာခြာဝ် ဒေါ ယိုဝ် ဇဝ်ယေဆူ ဂြုဝ်း ပီ ကာလာင် ဒီဘဲ အန်၊ အန် ဘော အာမ် ကာဆဝ် ၊ဂေ တွိုန် ‘‘ဆေ န့ ပါယ် တီ အာဆေ ပီ လုဝ် ဇဝ်ဖြာ ဒီ စွယ်’’။ အန် ဘောဒီ မွှတ် ပါယ် တီ။
ဇဝ်ယေဆူတွိုန် အန် ဘော ဝီ ယိုဝ် ဒီ ဘဲ အန် ဂေ တွိုန်။ ‘‘ဒူအီ ကိူန် ဂေ တီ ဂေ မုး တူ ပဲ ဒီ စွယ် ဒုဝ် ဂေ၊ ကူပ် ဇဝ်ဖြာ အ မိုဝ်း ပီ တူ ပဲ ဂေ ဒီ ဘူင် ’’။ အန် ဘော ကာလာင် ပါယ် တီ။
အာပေတာရူ တွိုန် ကာလာင် တဝ်း ဒီ ဇဝ်ယေဆူ။ ‘‘ယေ ဒီ ဘဲ ကိူန် မဲ ယေ ဒီ ဘ့လေး အုန် ဒွန် မျုဝ်ယေဒီ ဒူပ် နာ ပန် မဲ။ မာလဲ အာဒါ ရုးယေ မှာဝ် မဲဒိပါယ်" အန်ဒီမွှတ် ပါယ်တီ။
ဇဝ်ယေဆူ တွိုန် တဝ်း၊‘‘ ဒီ ကာင် ဘေ ၊မာဘေ ၊ ဘောအူကတ်အူဝါ ဘေ၊ ဘော ဂွန် ဘေ ၊ ဘော ကြုဝ် ကြာမ် ဘေ၊ ဘေ ဝဲန် တူတ့် တဲး ဘေ ဘဲန် ဒီ ဘဲ အီ အာဆာက် အိမ်တူနပ်ဒီကတ်၊ တူနပ်ဒီယမ် အူစုဝ်ဂမ်ဖါ တွိုန်။ ဘော ဘေ ဒီ ပွိုန် ရုး။ ရုး တီ တာင် လွှိုမ် ရုး နာရေတ့် အူမာယုဝ်း ဘုန်အန် ဘေ ဒီ ဘော ပွိုန်၊ ပါယ် တီ အီ ဇမ် နာအာတ့် အန် ဘော ဝီ ဇမ် နာပန် အီ ဇမ် နာပန် အန် ဒီ ဝီ တး ဇမ် နာအာတ့် ’’ ခုဝ် အန် ဘောဝီတဝ်း ပါယ်တီ။
A Bible story from: Matthew 19:16-30; Mark 10:17-31; Luke 18:18-30