၄၄ - လွင်အန်နီ ပေတာရူ ဂါယ် ယောဟန် ဆီနမ်တဲး ဒါမှာန်အူဝီ
ဇမ်အူဆီငဲ အာပေတာရူ ဂါယ် အာယောဟာန် ဟာဝ်နာ ဇူင်ကြိုပ်ဇဝ်ဖြာ၊ န့မိုဝ်း ဒါအီစျွှယ် ဒါမှာန် အူဝီ တုတ့်ဘာင် မာလုဝ်း ဇူင်ကြိုပ်ဇဝ်ဖြာ ဂဲပ်ဒီဟူမ်ရွိုန်။
အာပေတာရူ ဘောယွတ် အန်တဝ်း "အုဝ်တူမိုဝ်း ရွိုန်လုဝ် လီဝ်ဒီမဲ၊ မာလဲ အုဝ်ဒီလီဝ် ပီမိုဝ်းအုဝ်ဒီမဲ။ အုဝ်ဒီဂဝ် ပွုန် အန်ဇဝ်ယေဆူ တဲးမဲ ယေတ့်ဟဝ်" အန်တဝ်းပါယ်တီ။
ဒေါမှဝ် ဒေါအန် အန်ဇဝ်ဖြာတဲး ဆဝ်ဒါအီ စွှယ်တွိုန် ဟြာယ်၊ အန်ဘောဝီ ယိတ့်အူဇေန်၊ ကာဘက် ဝီဝ် ကာဘက်ဝေန့် ဘောဂါ ဘောဝီ အိူပ်မျုက်အန်ဇဝ်ဖြာ၊ ခုဝ်ဒူအီ ဂေအီကွယ် ဂ့ဝဲန် ဇူင်ကြိုပ်ဇဝ်ဖြာတီ ဘောဝီအာမ် ကာဆာဝ်။
ဒေါမှာဝ် ဒေါအန် ဒူအီကိူန့်ဂေ ဘောဝီတး ကာဇု အူဇေန်၊ လုဝ်တး ယွတ်ဒူအီ ပီဟဲ့ဟွတ့် ဆီနမ်ဂေတွိုန်၊ အာ ပေတာရူ တဝ်းဒီဂေ "ဒါနီ အန်ဟဲ့ဟွတ့် ခ မာလဲ၊ ကွယ်တဲး န့မွှိုမ်အာမ် ဒီဘေ လွင်အန်နီ၊ ယေတူတာ ပွုန်ယေ ဆီနမ်၊ ဘောအာဝ်မုး ပီမွင့်ကာရာဇဝ်ဖြာ၊ န့မုး ပွုန်အန်ဇဝ်ယေဆူ ယေဆီနမ် တဲး ဒီအန်၊ မှာဝ် န့ပါယ်ခုဝ်အန် ကူပ်ညှိုမ် ယေအန်ဇဝ်ယေဆူ"၊ န့မုးပါယ်တီ။
"ဘေစိူဝ်တီ မုးဒူအီ ကာလာင် ဒီခုန်ဒီခမ် ရုဝ်မာ တဲးဂေ ငဝ်းဝဲန် အန်ဇဝ်ယေဆူ၊ ဘေစ်ု ဂေငဝ်း ဒါအီတဲး အာဆာက် ဒီဒူ အီဂေဒွန်အီ၊ မာလဲ အန်ဇဝ်ဖြာ ဟဲဝီ ဒဲ့တးအန်၊ တလုတ့်ယမ်တီ၊ ပီဘူင်ဘေ တီလဲ၊ ဘေတူနပ် ပီ ဘောဘူင်ဘေ၊ လွင်ပီဘူင်ဘေနီ၊ န့မုး ပီဟဲဟွတ့် ကာလာင်ဂေ အီမိုဝ်း အာငျာန် နာအဲတ့် န့ဟဲ ဘဲန်ပါယ်တီ၊ ဂေ တဝ်း မေဆီယ တီ၊ ဒီခမ်ဒုက် ဘောဝီလုဝ်ယမ် ဂေကာလာင်အုန်ပါယ်တီ၊ အန်ဇဝ်ဖြာ မိူဝ် ဘူင်တဲးန့ ဘဲန် ပါယ်တီ၊ ခုဝ်အန်တဝ်း ဘေဝီဝ် န့လှုဝ်းနဝ်းဘေ၊ ဝီဝ်ကာဘ့လျီတ် ဝီဝ်နာဇဝ်ဖြာ၊ ဆေန့ပါယ်တီ၊ အန်ဇဝ်ဖြာ ကောဝီဘာယ် ဝဲန်မှာပ်ဘေ" အန်တဝ်းပါယ်တီ။
ဒါတာင်ဂေ ဟဲ့ကွယ် ခဲင်ဇူင်ကြိုပ်ဇဝ်ဖြာ တွိုန် ဘောဝီယိုဝ်ဂြုဝ်း ကာလာင် အာပေတာရူ ဂါယ် အာယော ဟန်ဂေ ဘောဝီ ရူကာဆဝ်၊ ခုဝ်အန်ဂေဘောဝီ မှေတ့် အာပေတာရူ ဂါယ် ယောဟန် ဝီဟပ်ခဲင်ထွင်၊ မာလဲ ပီကာ လာင် အာပေတာရူတီ ဒူအီဂေ ဟဲကိူန်ဝီ မိုဝ်းနဝ်း ညှိုမ်ခုဝ် ပူင့်ဒူအီဂေအီ ညှိုမ်အန်ဇဝ်ယေဆူ ကောဝီ ကာပွါနုဝ့် ကာဘက် ဟာဟြဲန်အီ အန်ကောဝီ နုဝ့်ခဲင်တီ။
ဟဲဇမ် ပေါအူဆီငဲ ဒါတာင် ယူဒါ ဂေတွိုန်၊ ဘောဝီဒဲ့ဟဝ် အာပေတာရူ ဂါယ် အာယောဟာန် ခူပ်ဒါတာင် အီ တာင်လွှိုမ်ဂေ၊ အီဘူင်ဘ့လာင် ဆီဆာနာ၊ ဘောခူပ် ဒါတာင် ဂေဟဝ်၊ ဂေစိူဝ်တီ ဝီဒဲ့ဟဝ် ဒါအီစွှယ် အာတ့်နီ တွိုန်၊ ဂေဝီတဝ်း၊ "မာဆေဘေတာ ဒီဆီနမ် ဒါအီစွှယ်နီ"၊ ဂေဒီမွှတ်ပါယ်တီ။
အာပေတာရူ "ဒါအီစွင့်နာ အဲတ့်ဘေတီ၊ န့မုး မေဆီယ ဘောဝီမုး အန်ဇဝ်ယေဆူ တာပွုန်အန်တီ ဝီဆီနမ် တဲးဒီအန်၊ ဘေအာခါ၊ ဘေဒါင် အန်ဇဝ်ယေဆူ ဒဲင်ရွက့်ကာဝဲ့ ဘောဝီငဝ်းယမ် ဇမ်အန်မိူဝ် အန်ဇဝ်ဖြာ တွိုန်နပ်ဝီ တဲးအန်ဝီအိမ်၊ ဘေစိုဝ်တီ ဘောဝီငျီတ် ဇမ်အန်အာဝ် မိုဝ်း န့တေန် ပီဟဝ် လုဝ်ချွှတ်တဲး ဒီအန်ဇဝ်ယေဆူ" အန်ဝီ ကာလာင်တဝ်းပါယ်တီ။
ဒါတာင်ဂေ ဘောဝီအာမ် ကာဆဝ် ဘောယကာလာင် ဂါယ်ဂြုဝ်းဂေတီ၊ ဂေစိုဝ် တီမိူဝ် ဟဲ့ဟွတ့်နပ် ဘောမုး အာပေတာရူ ဂါယ် အာယောဟာန် အာဝ်မိုဝ်း အာငျာန် ဘောမုး ဒူအီလှေး၊ ဘောဒူအီ ဂေနပ် ဘောကွယ်ရိုမ် ဂါယ်ဒူပ်အန် ဇဝ်ယေဆူ၊ ခုဝ်အန်ဂေဝီတဝ်း ဒီဂါယ်၊ "ဘာယ်အာဝ် ပွိုန်ဝီဝ်ဒီ ကာလင်လွင်ဒါနီ၊ ယေဒီတဲး ဒမ်တာင် ဒီဘာယ်" ဂေ ဟဲဟွတ့်တဝ်း ပါယ်တီ၊ ဂေဘောဝီ စ်ုဂါယ်ဟာဝ်ပါယ်တီ။
A Bible story from: Acts 3:1-4:22