၄၇ - ခဲင်မိူင် ဖီလီဖီ န့မိုဝ်း ဆီလဂါယ် ဖီလီဖီ
အာဘောလူတီ ကာနာကွယ်အန် ခဲင်နဲယ် ရုဝ်မာတွိုန်၊ အန်ဝီကာပ့လု့ စိူဝ်အန် ဝီဘဲန် အာဆောလူ။ ဟဲဇမ် အာဒါအူ ဆီငဲတွိုန်၊ အာဆောလူ ဂါယ် ဂိုက်အန်၊ အီစိူဝ် ဆီလ တွိုန်၊ လုဝ်ကာလာင် ဆီဒါင်ဘွတ် လွင်အန်ဇဝ် ယေဆူ၊ ဂါယ်ဘော လိုပ်ခဲင်မိူင် ဖီလီဖီတွိုန်။ ဂါယ်မိူဝ်ဟဝ်လေး နာရေတ့်မိူင် ခူပ်ဘ့လဲက်၊ ကာဒူင်ကာစု ကိူန်ဒူအီ၊ ဒေါကြိုပ်ဆီခိုဝ်ဂေ၊ ဒီတီန့မိုဝ်း ယာအူဝီ၊ အန်မုး ဒူအီကာစိုဝ်း ကာယွင်အန်စိူဝ် လူထီ၊ ယာတီမုး ဒူအီ ဘိုက်ဇဝ်ဖြာ၊ ဘောဝီရုဝ်ဆေ ဒီဇဝ်ဖြာ။
အန်ဇဝ်ဖြာ ဟဲ့ဟွတ့် ဘူင်တဲး လူထီတွိုန် ထူမ်ဂြုဝ်း လွင်အန်ဇဝ်ယေဆူ၊ "အာဘောလူ" ဂါယ် "ဆီလ" မိူဝ် ဘော တဲး ယာတီ၊ ဘောန့ဟူမ်ဂေ ဘောကာဂ့လျီတ် စိုပ်လွှီဝ်ဂေ ခဲင်အိုမ်၊ ဟဲ့ဟွတ့်ယာတီ မိူဝ်ဘောဝီဘာင် အာဘောလူ ဂါယ် ဆီလ ဂ့ချကာင်အန်၊ ဂါယ်မိူဝ်ဝီ ကွယ်ကာင်ယာတီ။
ဒွန်ဆီငဲ ဒူအီ ယူဒါ ဂေယိုဝ် အာဘောလူ ဂါယ် ဆီလ၊ ကာဒူင့်ကြိုပ်ဂေ ဇဝ်ဖြာ၊ ဒွန်ဆီငဲ ဒေါဟဝ်ဂါယ် ဒူပ်န့ တေန်တီ န့မိုဝ်း ယာအူဝီ၊ ကာနမ်စဝ်လိုပ်အန်၊ အန်မုးဒူအီ မှာယ်အီ၊ ဆေဆေယာတီ ဒူပ်နာပန်ဂါယ်။ ယာတီတာ ပွုန်ကာနမ်စဝ်တီ၊ ကာလာင်ပီဒီပါယ်ဟဝ် ဒူအီဂေ နာအဲတ့် ဟြေတ့်တဲး ရွိုန်ဒီဒါကာညာအန်။
"ယာအီမုး ဒူအီမှာယ်တီ၊ အန်တဝ်းဒီဒူအီဂေ၊ "အီဟဝ်ဒူပ် န့တေန်တီ၊ ဂါယ်နီမုး ဒူအီမှာယ် အန်ဇဝ်ဖြာ ဘွတ် မျတ်၊ ဂါယ်ကာလာင် လွင်ပါယ် ဒီလုဝ်ချွှတ် အန်ဒီဘေ" ဘောဝီဒတ်ဒါင် ဘောဝီ အဝ်မိုဝ်း ဒီလုဝ်အန်၊ ခုဝ်နဝ် အာ ဘောလူတွိုန် မိူဝ်အာဝ်ဝီဒါခိုယ်။
ဟဲဇမ်ဆီငဲ ပန်တွိုန်မိူဝ်၊ ဂ့ညာဒေါဝီ ဒတ်ယာအီမုး မှာယ်တွိုန်၊ အာဘောလူ ဘောဝီကာဘ့လျီ့တဝ်း ဒီကာနမ် စဝ်ဟဲကွယ် ခဲင်ဒုဝ်ယာတီ၊ "အုဝ်ဂါဝ်ပွိုန် အန်ဇဝ်ယေဆူ၊ တဲးမဲလေး ခဲင်ဒုဝ်ယာတီ" အန်တဝ်း ပါယ်တီ။ ဒေါမှာဝ်ဒေါ အန် ကာနမ်စဝ်တွိုန် ဘောဝီလေး ခဲင်ဒုဝ်ယာတီ။
ခုဝ်အဝ်ဝီမိုဝ်း ကာနမ်စဝ်၊ ဂေမိူဝ်ဘောဝီ ယွတ်အန်၊ ဂွန်ဘေန့် ဝီမုး မှာယ်တွိုန်မိူဝ်၊ အန်အဝ်နပ် ဒီခဲလွင် ပီဒီ ပါယ်ဟဝ်နာအဲတ့်၊ ခုဝ်ဒါကာညာ အီမုး မှာယ်တွိုန်၊ ဒါကာညာအန်ဘောဝီ ရူကာဆဝ် ဒီအန်၊ မှာဝ်န့ပါယ် ခုဝ်အန်၊ အန်အာဝ်နပ် ဒီခဲလွင် ပီဒီပါယ် ဟဝ်နာအဲတ့်၊ အန်အဝ်ပဲ ဒီပြောတ့် လွှီမ်ရွိုန်ဒီဒါ ကာညာ အန်။
ပန်တီ ဒါကာညာ ဂွန်အီဘေန့် အီမုး မှာယ်တွိုန်၊ ဘောဝီဒဲ့ ဟာဝ် အာဘောလူ ဂါယ် ဆီလ ခူပ်ဒါတာင် ရုဝ်မာဂေ၊ ဘောဝီ ကာယာင်၊ မးဂါယ်၊ ဘ့လိုပ် လိုပ်ဂါယ်ခဲင်ထွင်။
ဂေဘောဝီ ဘ့လေး အာဘောလူ ဂါယ် ဆီလ ကာတိုဝ့်ထွင်၊ ကာဒူင့်ဘာကိူန် ဒူအီဂေ၊ ဂေဘောဝီ ကာခတ်ရိင် ကာ ဘုဝ့်ဂါယ် ပက်ဝဲန်ဒီဂါယ်ပါယ်တီ။ မာလဲ ဟဲဇမ်ကာတဲ ဆွိုမ်တွိုန်၊ အာဘောလူ ဂါယ် ဆီလ နပ်ဝီပါင်မိူဝ် ဇဝ်ဖြာ၊ ဘောဝီ အိူပ် မျုက် ဒီအန်ဇဝ်ဖြာ။
ဒေါမှာဝ် ဒေါအန်တီ၊ မာအျီန် ဘောဝီယေန့်ကာဆဝ်၊ မာလုဝ်းထွင်ဂေ ဒွန်ဘ့လုဝ့် ဘောဝီကာဝိုဝ်း တူတ့် အူဇေန့်၊ ဘောဝန်ဟိမ် ပီပက်ဂေ၊ ဒီဒူအီစုဝ်းထွင်ဂေ၊ ဘောဝီကာ ဒေတ့်တူတ့်အူဇေန်။
ပန်တီ ဒါဘာထွင် ဘောဝီန့ဆိုဝ်း၊ အန်ဝီယွတ် မာလုဝ်းထွင် ဟဲဝီန့ဝိုဝ်းတူတ့်၊ အန်ဝီထာင် ဒူအီစုဝ်းထွင်ဂေ ဟဲလေးတဝ်တူတ့်၊ အန်တဝ်းတာတီ၊ ဒါစုဝ်းထွင်ဂေ ဟဲ့ဟွတ့်လေးတဝ်၊ ယုဝ်ဒါတာင် ရုဝ်မာ ဂေ ပါဟွတ်အုဝ် အန်ထာင် ပါယ်တီ၊ အန်ဘောတဝ်း ဒီဒီဂျာမ်ဒုဝ်အန်၊ ပန်တီအာဘောလူတွိုန် ဘောဝီယိုဝ်အန်တဝ်း "စွင့်ဒီတီ။ ကွယ်ဘူင်တဲးန့ကာဆဝ် ဒီဒုဝ်မဲ။ ယေဟဲ့ကွယ်တူတ့် ဒီနီ" အန်ဘောဝီဒတ်တဝ်းပါယ်တီ။
ဒါအီဘာထွင်တီ ဘောဝီဒီယိန့် ဘောဝီဟဝ် ခူပ်အာဘောလူ ဂါယ် ဆီလ၊ "မာဆေဒီလုဝ် ဘူင်တဲးန့ချွှတ် အုဝ်" ဘောဝီဒါမွှတ်ပါယ်တီ၊ အာဘောလူတဝ်း၊ "တဲးမဲညှိုမ်ဒါအီ မုးကာညာ၊ အီမုးအန်ဇဝ်ယေဆူ၊ ဘောမဲ၊ ဘောန့ ဟူမ်မဲ၊ န့ဒီချွှတ်ဘေပါယ်တီ၊" အန်ကာလာင်ပါယ်တီ။ ဝါယ်အန်တီ ဒါဘာထွင် ဘောဝီဒဲ့ ဝိန့်အာဘောလူ ဂါယ် ဆီလ ကာင်အန်၊ ဘောဝီဘာယ်ဒိမ် ဂါယ်ဟပ်ဆီနမ် ဒီဒိမ်ဂါယ်။ အာဘောလူတွိုန် မိူဝ်ဘောဝီခဲ လွင်ဆီဒါင်ဘွတ် အန်ဇဝ် ယေဆူ၊ ဒီဒူအီဒွန်အီ၊ အီကွယ်ခဲင်ကာင်ဂေတီ။
ဘောဒါဘာထွင် ဘောန့ဟူမ်ဂေဒွန်အီ၊ ဂေဟဲဝီ ညှိုမ်အန်ဇဝ်ယေဆူ အာဘောလူ ဂါယ် ဆီလတွိုန်မိူဝ်၊ ဘောဝီစိူပ် တဲးဂေခဲင်အိုမ်။ ဟဲ့ဟွတ့် ဒါဘာထွင်တွိုန် ဘောဝီဟြီင်ဂါယ်ဟူမ်၊ ပီဒီဟူမ်၊ ဘောဝီခူယ်ရိူမ်ပါယ်တီ။
ဇမ်ပေါအူဆီငဲ၊ ဒါတာင်အီအိုပ်မိူင်ဂေတွိုန်၊ ဘောဝီတဲး အာဘောလူ ဂါယ် ဆီလ လေးတးထွင်၊ ဝီလေးဟဝ်တးမိူင် ဖီလီဖီတီ၊ အာဘောလူ ဂါယ် ဆီလတွိုန်မိူဝ် ဘောဝီဟဝ် ကာလာင်ဒီ အာလူထီ၊ ဘောဒီ ဂိုက်အန်ဂေ၊ ဟဲ့ဟွတ့်ဘောဝီ လေး ဟဝ်ပါယ်တီ။ ဆီဒါင် ဘွတ် အန်ဇဝ်ယေဆူတီမိူဝ် ဝါယ်ဝီကာပွါဟဝ်၊ ဒူအီ ညှိုမ်ဂေမိူဝ် ဝဲဝီကိူန်ဟဝ်ပါယ်တီ။
ဘော အာဘောလူ ဘောဒါတာင် ဒူအီညှိုမ်ဂေ၊ ဂေနပ်လိုပ် လေးဟာဝ်ဒွန်မိူင်၊ ဒွန်အီဂေစိုဝ်တီ ကာလာင် တဲး၊ မာနုဝ်တဲး လွင်ဆီဒါင် ဘွတ် အန်ဇဝ်ယေဆူဒီဂေ။ ဂေမာနုဝ်တဲး ဘောဒူအီဂေအီညှိုမ်၊ ဂေကွယ်ခဲင် ဇူင်ဇဝ်ဖြာ၊ ဝီတဲးဂေ၊ လာယ်မာနုဝ် ဟာဝ်ပါယ်တီ။ ခုဝ်အန် ထမ်မန်ကာလွင့်၊ ဝီဘဲန်ဘပ်ထမ်ဇဝ်ဖြာ။
A Bible story from: Acts 16:11-40