၃၉ - လွင် ဇဲ့ဂေ အန်ဇဝ်ယေဆူ ခဲင်ယုင်

ဒေါအန်တီ န့မုး ကာတဲဆွိုမ်၊ ဂူနာန်ဂေ လုဝ် ဒီမွှတ် ဇဲ့အန်ဇဝ် ဂေ ဝီဒဲ့ဟာဝ် ကာင် ဒါဆာရာတာင် အီဘူင် ဘ့လာင် ဆာဆာနာ၊ ဒေါဒဲ့ ဟာဝ်ဂေ အန်ဇဝ်ယေဆူ ခဲင်ကာင်တီ၊ အာပေတာရူ တွိုန် ဝီဘုတ်ဒီဝါင်ငဝ် ဘာနာရေတ့် တီ။

ဘောဝီဇမ် အန်ဇဝ်ခဲင်ကာင်တီ၊ ဒါတာင် ယုဒဂေ စုးဒီဇဲ့အန်၊ ဂေဒဲ့ဘ့လေး ဘောဒူအီ ဂေ ဒူအီကာလုဝ် နာဘ့ လာင် ဆတ်ဆေ အန်ဇဝ်၊ မာလဲ ပီပိတ်လိပ်ဂေ အန်ဇဝ်ယေဆူ မိုဝ်းမှာပ်၊ ခေါ်အူမျုဝ် မိူဝ်မှာဝ်လာယ် ကာဇီ၊ အန်ဇဝ် ယေဆူ အာခ်ု ဂြုဝ်းခေါဘူင့်မိူဝ်၊ အန်တူမိုဝ်း ဒီ ဂြုဝ်းမာဆေ။

ဟဲ့ဟွတ့်မိူဝ် ဒါဆာရာတာင် အီဘူင့် ဆာဆာနာတွိုန်၊ ဘောဝီယွတ် ဒွင့် အန်ဇဝ်ယေဆူ၊ ဘောဝီတဝ်း "မဲ မုးဂွန်ဇဝ်ဖြာ၊ မေဆီယ မိုဝ်းအာဆာက် အိမ်မုး" အန်ဒီမွှတ်ပါယ်တီ။

အန်ဇဝ်ယေဆူတဝ်း၊ "အိုဝ် အာတီန့မုး အုဝ်အီကွယ် ရိုမ်ဒူပ်ဇဝ်ဖြာ ခဲင်မိူင်ခြီဝ်တီ၊ မဲဒီယိုဝ်"၊ အန်ဇဝ်ဝီတဝ်း ပါယ်တီ။ ဒါဆာရာ အီဘူင့်ဂါန် နာဘ့လာင် ဆာဆာနာတီ၊ ဝီယိုဝ် ဂြုဝ်းအန်ဇဝ်တီ အန်ဘောဝီ ရူကာဆာဝ် အန်ဘော ဒိုဝ်း ခြိုင် အန်ဇဝ်ဘောဝီ ကာယာတ့် ဝဲန်အူဇေန်။ အန်ဘော ဝီတဝ်း ဒီဒါတာင် ဂေဟဝ် "ဘေဘော ကာလျီတ့်ဘေ ဟဲ့ယိုဝ် မုး၊ ဆေန့ပါယ်တီ၊ အာဝ်လုဝ် ဆက်ဆေ ပီဟဝ်၊ မှဝ်အေဒီ လုဝ်ပါယ်ဒီအန်"၊ အန်ဒတ်တာင် ဒီမွှတ်ပါယ်တီ။

ပီဒီမွှတ် ဒါတာင် အီဘူင်ဆာဆာနာ တီ၊ ဘောဒါတာင် ယုဒ ဂေတဝ်း "ဒါတီ ကာအာဝ် အန်မုးဒါယမ်" ဂေ ဝီတဝ်းပါယ်တီ၊ ဝါယ်အန်တီ ဂေဘောပတ့်၊ ကာဖီး ငါယ်အန်၊ ဝီမး၊ ကာယာင် အန်၊ ဝီပတ့် တာန့ပတ့် ဘ့လတ့် ကာ ညးအန်။

ဒေါကွယ်ဘ်ု အာပေတာရူ နာရေတ့် ကာင်တီ၊ ဒူအီ မှာယ်အူဝီ ဘောဝီ ယိုဝ်အန် "မဲမုး ဒူအီ ဒူပ်တး အန် ဇဝ်ယေဆူ" အန်ဒီမွှတ်ပါယ်တီ၊ အာပေတာရူ ဝီငျီ့ဂြုဝ်းအန်၊ ဝါယ်အန်တီမှာယ် ဘောအူဝီ ပီဝီဇဲတ့် ပေတာရူ၊ အန် နပ်ဝီငျီ့ ပါယ်တီ၊ ပန်တီ ဒူအီဂေ ဘောဝီတဝ်း "ဘာယ်ဘော အာအီမုး၊ ဒူအီတး နာ ဂါလီလဲ၊ ယေမိူဝ်ဟဲ့ဟွတ့်နဝ်း ဘောတး ရိုမ်မဲ ဒူပ်အန်ဇဝ်ယေဆူ"၊ ဂေတဝ်းပါယ်တီ။

ပန်တီ အာပေတာရူတဝ်း "အုဝ်တူနပ် အာခ်ု ဒါတီ၊ ဆေအုဝ် ဘောနပ် အန်မိူဝ်၊ တဲးဇဝ်ဖြာ ဒိူင်အုဝ်"၊ အန် ဝီတဝ်းပါယ်တီ၊ ဘောဝီ ဟဲ့ဟွတ့်ဒိူင် အန်ပါယ်တီ။ ဒေါမှဝ် အန်အန်၊ အျီမ်ဘောဝီ ကာတွုန် အူဇေန်၊ အန်ဇဝ်ယေ ဆူဝီမာငး ယွတ် အာပေတာရူတွိုန်။

န့လုတ့် ကာဆဝ်နဝ်းအန်၊ ဘောလေးဟာဝ် တူင့် ဘောဝီယာမ်ဒတ်တာင် ပါယ်တီ၊ ပန်တီ ဒါအီတူမိုဝ်း ကာဒိက် ဆတ်ဇာ ဒီ အန်ဇဝ်ယေဆူ၊ အန်စိုဝ် အာယူဒါ၊ အာယူဒါတွိုန် ဘောယိုဝ် ဒါတာင် ယူဒါဂေ လာယ်ဆင် ချာင်ဒီလုဝ်ငဝ်း အန်ဇဝ် ဘောဝီက့လိုဝ် ကာဆာဝ်လေးဟာဝ်တူင့်၊ ဘောဝီဟာဝ်ဟွယ်မဲင်အန်၊ တဲးအန်ယမ်။

ဒေါအန်တီ အာဖီလတ် မုးခုန်ဒီခမ် ယူဒါ၊ ဘောဝီအိုပ် ဒူအီရုဝ်မာဂေ၊ ဒူအီတာင် ယူဒါဂေတွိုန် ဆီတဲး ခုန် ဒီခမ် အာဖီလတ်၊ တဲးဒမ်ယမ် ဒီအန်ဇဝ်ယေဆူ။ အာဖီလတ် တီ ဘောဝီတဝ်း ဒီအန်ဇဝ် "မဲမုးခုန်ဒီခမ် ယူဒါ ဂေ၊ န့မုး" အန်ဒီ မွှတ်ပါယ်တီ။

အန်ဇဝ်ဘောဝီတဝ်း "ပီကာလာင် မဲတီ၊ ဟဲကာဇီ မာလဲမိူင် ကာဒူင့်ကွယ်အုဝ်၊ အာဝ်မုး ဒဲင်ကာဒါယ်နီ၊ ဆေန့မုး ကာဒါယ်နီ၊ ဒါဘဲ အုဝ်ဂေ၊ ဟဲဝီဟွတ့်ဂုဝ်းဘေ၊ အာဒါအုဝ်၊ ကူပ်တးအုဝ် ဒဲင်ကာဒါယ်နီ၊ အုဝ်လုဝ်ကာလာင် လွင်ဒါရာ အန်ဇဝ်ဖြာ၊ ဒူအီ လေဲတ်ဒါရာ ဂေနီ၊ ဘောဂြုဝ်းအုဝ်ဂေထူမ်" အန်ဇဝ်တဝ်းပါယ်တီ၊ ခုန်ဒီခမ် အာဖီလတ် ဘောဝီတဝ်း "မာဆေလွင် ဒါရာဂေတီ" အန်ဝီဒီမွှတ်ပါယ်တီ။

အာဖီလတ် တွိုန် ဟဲ့ဟွတ့် လာယ်မွှုန် ဒီအန်ဇဝ်၊ အန်ဘောလေး နာအာတ့် ဒူအီမိူင်ဂေ၊ အန်တဝ်း "အုဝ် တူယိုဝ် မာဆေလွင်လုဝ်တဲးဒမ်၊ တဲး အန်ကွယ်ဝီလုဝ် ယမ်နီ"၊ မာလဲ ဒူအီတာင် ယူဒါ ဂေ၊ ဘောဒူအီ ဖိုင်ဂေနပ်တဝ်း "ဒါင်အန်ဒဲင် ရွက့်ကာဝဲ့" ဘောဝီဒတ်တဝ်းပါယ်တီ။ "အန်အာခ်ု၊ တူမိုဝ်းမှာပ်၊ တူမိုဝ်း ဒီကာလိုပ်မာဆေ" ခုန်ဒီခမ် အာဖီလတ် ဘောဝီတဝ်း မာဆေမိူဝ်၊ ဒူအီဖိုင်ဂေ၊ နပ်ဝီ ဒတ်တာင် ပန်တီ ခုန်ဒီခမ် အာဖီလတ် ဘောဝီတဝ်း အူယ် ဇေန်၊ "ဘောတူမိုဝ်း အန်မှာပ်" ဘောဝီတဝ်းပါယ်တီ။

ပါကာဒဲ့အန် ခုန်ဒီခမ် အာဖီလတ်တွိုန်မိူဝ်၊ ယုဝ်ဒူအီဂေ ဝါယ်ဝီ ဘူင်ဆူတ့်၊ အန်ဘောဝီ အိုင်ဂြုဝ်းဂေ၊ ဘောဝီစ်ု ဂူနာန် အန်ဂေ၊ ဂူနာန်ဂေ ဘောဝီ စှိုပ်ခြိုင် ဒီအန်ဇဝ် ဘောဝီ ကာဝက် မာအာတ့် စှိုပ်ဒဲင်ဂိန်၊ အန်ဇဝ် ဟဲ့ ဟွတ့် ဂေဝီတဝ်းတဲးဘေ ယွတ်ခုန်ဒီခမ် ယူဒါနီ"၊ ဘောဝီ ဘ့လာတ် ကာညးပါယ်တီ။

A Bible story from: Matthew 26:57-27:26; Mark 14:53-15:15; Luke 22:54-23:25; John 18:12-19:16