၄၁ - အန်ဇဝ်ဖြာ တဲး အန်ဇဝ်ယေဆူ ဝီယိတ့်ဝီအီမ်

ဂူနာန်ဂေတွိုန်မိူဝ်၊ ဘောဝီဟဲ့ဟွတ့် ဒါင် အန်ဇဝ်ယေဆူ ဒဲင်ရွင့်ကာဝဲ့ ဒါတာင် အာမျုဝ် အီဆာရေလဂေတဝ်း၊ ယေဆူ ဆီမာက့လုဝ်တီ၊ ဂေတဝ်းအန် ဒီဝီအိမ်၊ ခုဝ်ယုဝ် န့မိုဝ်း ဒူအီတး ပြာအန်လုဝ်တဲး၊ ဂေဘ်ုရိတ် အန်၊ ဆေန့ ပါယ်တီ၊ ဂေဒီဝီတဝ်း အန်မုးဒူအီတး၊ တးယမ်၊ ဂေတဝ်းပါယ်တီ။

အာဖီလတ် တွိုန် "ဘောဝီစ်ု ဂူနာန်ဂေ ဘ်ုကာဒါဝ် မာဝ်တီ"၊ ခုဝ်အန် ဂေဘောဝီ ဒွက်ဘောစိူမ် ဘာင်ကာဒဝ် တီ၊ ဘောဂူနာန်ဂေ၊ တဲးဂေ ဘ်ု ရိတ်ဒုဝ် အန်ဇဝ်ယေဆူ၊ ယုဝ်န့မိုဝ်း ဒူအီတးပြာအန်။

ဝါယ်ယမ် အန်ဇဝ်ယေဆူ ဘောအူ ဆီငဲန့မုး ဆီငဲ ဆီလှာဝ် ဆီငဲ ဆီငဲ ပါဆာခါ နီ၊ အာဝ်မိုဝ်း အီဘူင်ဂါန်၊ ဘော ဂိုက် အန်ဇဝ်ယေဆူ မိူဝ် ဂေတူမိုဝ်း ဒီဟာဝ်ခူပ် အန်ဇဝ်ယေဆူ နာကာ ဒဝ်တီ၊ မာလဲ ဆီငဲ ပါဆာခါ ဟဲဟွတ့် ဘောအူ ဆီငဲ ပန်ဒီဝး ဂေန့ပြာယ် ဒုဝ်ဂေ၊ လုဝ်ဟာဝ် ခူပ် အန်ဇဝ်ယေဆူ၊ ဂေလုဝ် ဖဝ်းဒီ လှူ၊ န့ဂြိုဝ်း အုးငှုန်ဒီ ဒုဝ် အန်ဇဝ်ယေ ဆူ။

ဒေါဟာဝ် ဇမ်အီ ဘေန့်ဂေ ဘာင်ကာဒဝ် မာဝ် အန်ဇဝ်ယေဆူတီ၊ မာအျီမ် ဘောဝီ ယေန့်အူဇေန်၊ အာမူအာ မာတ် ဇဝ်ဖြာ ဘောလေးလူင် ခဲင်မိူင် ခြီဝ်အန်ဇဝ်ဖြာ၊ ဘောဝီ ဒိုဝ်းဝဲန်မဝ်တာင် ပီကာဘိက် ဂေ ဘာင်ကာ ဒဝ်တီ၊ ဘောဝီ တုတ့်နာဒဲင် မာဝ်တီ၊ ဂူနာန်ဂေ အီကွယ် ခူပ် ကာဒဝ်တီ၊ ဘောယိုဝ် တာမန် အန်ဇဝ်၊ တာမန် ဇဝ်ဖြာတီ၊ န့ဘ့ လာင် ကာဆဝ် ကောပီ ပ့လအိမ့်ပလေတ့် မာဘြီဝ် ဘ့လာင် ကာဆဝ်၊ ဂူနာန်ဂေ ဘောဝီ ယုဝ်ကာဆဝ် ဘောဝီ ကေး ပီဒါ ယမ်ဒဲင် ကာဒါယ်တီ။

ဒေါဟာဝ်ဇမ် အီဘေန့်ဂေ ဘာင်ကာဒဝ်တီ၊ ဇဝ်တာမန် တဝ်းဒီဂေ "ဘေကွဲကာ စွါကွဲယုဝ်" အန်ဇဝ်ယေဆူ အာဝ်ကွယ် ဒီနီ၊ န့ဟဲကာဇီ ခဲင်ပီတဝ်းအန်၊ အန်ဟဲဝီ ယိတ့်ဝီအီမ် လွှီဝ်ဘေယွတ် ခဲင်ကာဒဝ်နီ အန်တဝ်းပါယ်တီ။ အီဘေန့်ဂေတွိုန် ဝီယွတ် ကာဒူင့်အိတ် အန်ဇဝ်ယေဆူ၊ အာဝ်မိုဝ်း ဒီယိုဝ်ဒုဝ် အန်ဇဝ်ယေဆူတီ။

ဝါယ်အန်တီ ဇဝ်တာမန်တဝ်း ဒီအီဘေန့်ဂေ၊ "တဲးဘေ ဝီကာလာင် ဒီဒါဘဲ အန်ဇဝ်ယေဆူ၊ ဘောဝီဟဲ့ဟွတ့် အန်ဝီယိတ့်ဝီအီမ်၊ အန်ဟဲ့ဟွတ့် ဇမ်ဂါလီလေ ဒီအာတ့်ဘေ"၊ အန်တဝ်းပါယ်တီ။

အီဘေန့်၊ ဂေတီမိူဝ်နဝ်း ဒါခိုယ် ဘောဝီအာမ် ကာဆာဝ်၊ ဘောဝီဒဲန်ဟာဝ် နာဒီဘဲ အန်ဇဝ်ယေဆူတီ၊ လုဝ် ကာလာင် ဆီဒါင်ဘွတ် ဆီဒါင်မွှိမ်တီ။

ဒေါဟာဝ် အီဘေန့်ဂေ ဒူပ်န့တေန် လုဝ်ကာလာင် ဆီဒါင်ဘွတ် ဒီဒါဘဲအန်တီ အန်ဇဝ်ယေဆူ၊ ဘောဝီ ဟဲ့ ဟွတ့် ဇမ်ဒီအာတ့်ဂေ၊ ဂေဘော ခြိုပ်ခြာဝ်ဒီ အာတ့်အန်ဇဝ်၊ ဘောဝီဂူမ်အန်ဇဝ်၊ ပန်တီ အန်ဇဝ်တဝ်း "ဘေကွဲယုဝ် ဟာဝ်ကာလာင် ဒီဒီဘဲအုဝ်ဂေ၊ လွှီဝ်ဂေဟာဝ် ဂါလီလဲ၊ ကာလာင်ဒီဂေ အုဝ်ဒီလာယ်ယိုဝ် ဒီဂေဒီတီ"၊ အန်ဇဝ်တဝ်း ပါယ်တီ။

A Bible story from: Matthew 27:62-28:15; Mark 16:1-11; Luke 24:1-12; John 20:1-18