၁၇ - လွင် ဘ့လေး အန်ဇဝ်ဖြာ ဆာဒိက် ဒီ အာဒါဝိတ်

ဒေါ ဂု၀် အန် န့ မို၀်း၊ ခုန်ဒီခမ် အီ အိုပ် ဂေ ဒူအီ အီဆာရေလ၊ အန် စိူ၀် အာဆောလူ။ အာရိုပ် အန် ဟဲ့ စှိတ်၊ တဲး န့ ပီ၊ ပီ အိုင် ဒူအီ။ ဒေါ ဂု၀် အန်၊ အာဆောလူ တွိုန် ဟဲ့ မုး၊ ဒူအီ အီ အိုပ် အီဆာရေလ အန် ဟဲ့ မုး ခုန်ဒီခမ် ကျက် အီမွှိုမ်။ အာ၀် လှေန့်၊ အန် ၀ီ ဘူင် အီ တူမွှိုမ်၊ အန် အာ၀် ၀ီ ထူမ် ဂြု၀်း ဇ၀်ဖြာ အန် ဘော ဘူင် မှာပ် အီ တူမွှိုမ်။ ခု၀် အန် တီ၊ ဇ၀်ဖြာ ၀ီ ရ၀်း၊ ဒူအီ အီ ကာမာယ်၊ တဲး အန် ဘဲန် ခုန်ဒီခမ်။

ဇ၀်ဖြာ ဘောရ၀်း၊ ဒူအီ အီဆာရေလ အူ၀ီ၊ အန် စိူ၀် အာဒါ၀ိတ် တဲး အန် ပွိုန် ဒီ ဘဲန် ခုန်ဒီခမ် နာပန်ခုန်ဒီ ခမ် အာဆောလူ တွိုန်။ အာဒါ၀ိတ် တွိုန်၊အန် ကွယ် မိူင် မိလေတ်၊ အန် ဟဲ့ မုး၊ ဒါ အီ ဟျီင် မာဘူ အူ၀ီ။ အူ ဆီငဲ အာဒါ၀ိတ် တွိုန်၊ ဘော ယွတ် မာဘူ ဂုန့် အန်၊ န့ ယီ မို၀်း မာ ဒု၀်ပြဲ၊ မာခြာန်ဆီ ဂါယ် မာဂြေးတ၀်း၊ ဒီ က၀့် မာဘူ၊ အန် ဘော င၀်း ယမ် ဂါယ်။ ခု၀်၊ အာဒါ၀ိတ် တွိုန် ဟဲ့ မုး၊ ဒူအီ မှာန် အူ၀ီ ဘော ဒူအီ အီ ညှိုမ် ဘိုင် ဇ၀်ဖြာ။

အာဒါ၀ိတ် တွိုန် ဒွန် မုး၊ အန် ဂွန် အီမာယ် အန် ဟဲ့ ကာ ဂု၀်း ဒီ ဒူအီ အူ၀ီ တာင် အီ စိူ၀် ဂေါလျတ်။ ဂေါလျတ် တွိုန် အန် မုး၊ ဒါ ဆိုက် အီ ဟဲ့ ကျက် ကာဆ၀်။ အန် ဘော မို၀်း ပ လူမ်း။ အန် ဘော စါ ဒိမ်ပေ။ ခု၀်၊ ဇ၀်ဖြာ လု၀် ဒို၀်း လေး ဒူအီ အီဆာရေလ ဂေ အန် ဘော စွယ် အာဒါ၀ိတ် တဲး၊ အာဒါ၀ိတ် ပဲ ဒီ င၀်း ဂေါလျတ် တွိုန်။ ၀ါယ် အန် တီ၊ အာဒါ၀ိတ် တွိုန် အန် ဘော ပဲ ဒီ ကာ ဂု၀်း ဒီ ရန်ဆူ အီဆာရေလ ဂေ။ အာဒါ၀ိတ် တွိုန်၊ အန် ဘော ဘဲန် ဒါ ဆိုက် အီ လှဲယ် ဒီ ကာ ဂု၀်း အူ၀ီ။ အန် ဘော ဘဲန် ဒါ ဆိုက်၊ အီ အိုပ် အာ မာတ် ကာ ဂု၀်း ဒီ အီ။ ဒူအီ ကိူန် ဘောတဝ်း၊ ဂုင် ဂေ ဇုင် ဒီ အန်။

ဒူအီ ကိူန့် ဟဲ့ ရွက့်၊ အာဒါ၀ိတ် တွိုန် န့ ယီ တူ လု၀် န၀်း ခုန်ဒီခမ် အာဆောလူ။ အန် တူ အိုင် ဒူအီ ကိူန့်၊ အိူပ် အာဒါ၀ိတ်။ အူ ဆီငဲ၊ အာဆောလူ ဘော တ၀်း ဒီ င၀်း အာဒါ၀ိတ်။ အာဒါ၀ိတ် ဘော တ၀် ကွဲ့ တဲး ဒါ ဆိုက် ဂေ ပွိုန် ဒီ င၀်း အန်။ အန် ဘော၊ တ၀် ဟာ၀် ခဲင် ပြဲ။ ခုန်ဒီခမ် အာဆောလူ ဂါယ် ဒါ ဆိုက် အန်၊ ဂေ ဘောဟြောတ့် အာဒါ ၀ိတ်။ ဟဲ့ ဇမ်၊ အူ ဆီငဲ အာဆောလူ ဘော လိုပ် ခဲင် ကာဒ၀်မာဝ်။ ကာဒ၀် မာဝ် တီ န့ မုး၊ ကာ ဒူင့် ချြီင် အာဒါ၀ိတ် ဒီ အန်။ ခုန်ဒီခမ် အာဆောလူ တွိုန်၊ အန် ယီ တူ ယို၀် အာဒါ၀ိတ်။ ၀ါယ် အန် တီ၊ အာဒါ၀ိတ် တွိုန် ဘော ဟာ၀် ကာပိတ် ခုန်ဒီခမ် အာဆောလူ တွိုန်၊ အန် ယီ တူ င၀်း အာ ဆာက် အာဆောလူ၊ အန် ၀ီ ဒဲပ် ဒူမ် ဘိက် ဆီ တု၀် အာဆောလူ အီစဲက်။ ၀ါယ် အန် တီ၊ ခုန်ဒီခမ် အာဆောလူ တွိုန်၊ အန် ဘော ၀ီ လေးခဲင်ကာဒ၀်မာဝ်တွိုန်၊ အာဒါ၀ိတ် ဘော ဒတ် တာင် ဒဲ့ အန်၊ ဘျာ ဒူမ် ဘိတ် ဆီ တု၀် ပီ ဟဲ့ ဒဲပ် လေး အန် တွိုန်။ ခု၀်၊ အန် ဘူင် ပါယ် တီ၊ ခုန်ဒီခမ် အာဆောလူ ကော နပ် အာ၀် မုး၊ အာဒါ၀ိတ် တ၀်း ဒီ င၀်း ယမ် အန်။

၀ါယ်ဟဲ လှေန့်၊ အာဆောလူ တွိုန်၊ ဘော ယမ် ဒေါ ကာ ဂု၀်း အန် ဒီ ရန် ဆူ အန်။ ဟဲ့ ဟွတ့် ပန် တီ၊ အာဒါ၀ိတ် တွိုန်၊ ဘော ပွိုန် ဒီ ဘဲန် ခုန်ဒီခမ် အီမွှိုမ်၊ ဒူအီ ဂေ ကိူန့် ဘော ရွက့် အန်။ ဇ၀်ဖြာ ဘော ၀ီ မွင့်ကာရာ တဲး ဒီ အန်၊ တဲး အန် အွင် ရန် ဆူ အန်။ ဘော ဇ၀်ဖြာ စွယ် အန် တဲး အန် အွင် ရန် ဆူ အီဆာရေလ ဂေ တီ။ အာဒါ၀ိတ် တွိုန်၊ အန် ကွယ် အိုပ် မိူင် ယေရူဆာလဲမ်။ အာဒါ၀ိတ် တွိုန်၊ အန် ဟဲ့ ပွိုန် ဒီ ဘဲန် ခုန်ဒီခမ် ဆီနမ် အန်မုး၊ ဖွုန် ဂို၀် ဆီနမ်။ ဒူအီ အီဆာရေလ ဂေ တီ၊ ဂေ ဟဲ့ မို၀်း ပလူမ်း ဂေ ဘော ခြမ် ကာဆ၀်။

အာဒါ၀ိတ် တွိုန်၊ အန် ဘော ဆီ ဆမ် ဟု၀် ကာဒူင့်လုဝ် ကြိုပ်၊ ဂေ ဒူအီ အီဆာရေလ ဇ၀်ဖြာ။ ဂေ ဒူအီ အီဆာရေလ၊ ဂေ ဟဲ့ ကြိုပ် ဇ၀်ဖြာ ခဲင် ထိုပ် ဘိက် ဘွတ် ပဲ့ ဟဲ့ ဘူင် ဘ.လေး အာမု၀်ဆဲ။ အာ ဒါ ဖွုန် မာယ၀်း ဆီနမ် အန်၊ ဂေ ဟဲ့ ကြိုပ် ဇ၀်ဖြာ ပါယ်တီ။

ခု၀်၊ န့ ယီ မို၀်း ဒါ အီ ဘျာန် ဂြု၀်း ဇ၀်ဖြာ၊ အီ စိူ၀် အာနာထာန် အူ၀ီ။ ဇ၀်ဖြာ ဘော ဘ့လေး ဟာ၀် အန် ကာ ဒူင် ကွယ် အာဒါ၀ိတ် တွိုန်။ တ၀်း၊ “မဲ ဟဲ့ မို၀်း ဒီ ကာ ဂု၀်း ကိူန့် ကာဆ၀်။ ခု၀်၊ ဇ၀်ဖြာ တူ တဲး မဲ ဆမ် ဟု၀် အန် တီ၊ ဂွန် မဲ အီ ဒီ ပ့ လု မဲ၊ အန် ဒီ ဆမ် ဟု၀် တီ။ အု၀် ဒီ မွင့်ကာရာ အီ တာင် ဒီ မဲ။ အု၀် ယီ တဲး၊ လှုက် လှာန် မဲ အီ ဒီ တး နာပန် မဲ ကွယ် ဒီ မာလာင် ကာဒူင့် ကွယ် မဲ တီ ဆေဆေ။ ဇ၀်ဖြာ စ်ု အန် ကာလာင် ပါယ် တီ။ န့ မုး၊ ခုန်ဒီခမ် အာဒါ၀ိတ် တွိုန် အူ ၀ီ။ အာမျု၀် အီ ဟဲ့ ပွိုန် ဒီ ဘဲန် ခုန်ဒီခမ် အိူပ် ဆေဆေ။ န့ ဟဲ့ မုး၊ (မေဆီယ) အူ ၀ီ။ ဆီ ဖ၀်း၊ (မေဆီယ) တီ န့ မုး အန် ဇ၀်ဖြာ ဟဲ့ ရ၀်း အီ ဒီ ချွတ် ဒို၀်း ၀ဲန် မှာပ်ဘေဒူအီ ဒီကာဒါယ်တာင် နီ”။

ခုန်ဒီခမ် အာဒါ၀ိတ် ဟဲ့ ဟွတ့်၊ ထူမ် ဂြု၀်း ပီ တ၀်း ဒါ အာနာထာန် အီ ဘျာန် ဂြု၀်း ဇ၀်ဖြာ တီ။ အန် ဘော တဝ်း ဂုင် ဂေ ဇူင် စုး ဒီ အိူပ် ဇ၀်ဖြာ အူဇေန့်။ ခုန်ဒီခမ် အာဒါ၀ိတ် တွိုန်၊ အန် ဟဲ့ အိုပ် ဆီချာ ဒူအီ အီဆာရေလ ဂေ။ ဇ၀်ဖြာ မိူ၀် စွယ် အန် ဘော မွင့်ကာရာ ဒွါ ဒီ အန်။ ခု၀်၊ ခုန်ဒီခမ် အာဒါ၀ိတ် တွိုန်၊ အန် ယီ တူနပ် အာ ခြာ၀် ဇ၀်ဖြာ ဒီ ဘူင် ပါယ် တီ။ ဒူအီ အီဆာရေလ ဂေ တွိုန်၊ ဂေ ဘော နပ် ဂေ လု၀်း နှ၀့် မေဆီယ အာ ဒါ ပေါ အူဟြဲန့် ဆီနမ် အန်။

ခုန်ဒီခမ် အာဒါ၀ိတ် တွိုန်၊ ဆီနမ် အန် ဟဲ့ လှေန့် အန် ဟဲ့ အိုပ် ဆီချာ ဒူအီ အန် ဂေ။ ခု၀်၊ အန် ဟဲ့ ထူမ် တ၀်း၊ ပီ ဟဲ့ ဒဲမ် ဇ၀်ဖြာ။ ခု၀်၊ ဇ၀်ဖြာ ၀ီ မွင့်ကာရာ ဒွါ ဒီ အန်။ ဟဲ့ ဟွတ့်၊ ဆီနမ် အန် ဟဲ့ လှေန့် အာ ဆာက် ခုန်ဒီခမ် အာဒါ၀ိတ် ဟဲ့ ကိူန့်။ အန် ဘော ဘူင် မှာပ် နာ မွှိုမ် ကာအိး ကာဆ၀်။

အူဆီငဲ၊ ခုန်ဒီခမ် အာဒါ၀ိတ် တွိုန် ကွယ် ခဲင် ဟု၀် အန်၊ အန် ဘော ယွတ် နာ ရေတ့်၊ အန် ဘော ယို၀် အီဘေန့် အီ ဟဲ့ စှိတ် ကာဆ၀် အူ၀ီ တာ အိုမ်။ အီဘေန့် တီ အန် ယီ တူ နပ်။ အီဘေန့်တီ စိူ၀် နာင် ဘာဆေဘာ။

အန် လု၀်း ၀း အာ တီ။ မာ လဲ အန် ယီ တူ ၀း၊ အန် ၀ီ စ်ု ဒူအီ အန် အူ၀ီ ဒဲ့ နာင် ဘာဆေဘာ တီ။ ဟဲ့ဟွတ့်၊ အန် ဘော ဒဲ့ နာင် တီ အိတ် ဒူပ် အန်။ ဟဲ့ ဟွတ့်၊ အန် ၀ီ တိုယ် နာင် တီ ‌‌‌‌‌‌‌‌‌‌‌‌ ‌‌‌‌‌‌ဝေန် ခဲင် ကာင် အန်။ အာ၀် ဘော လှေန့်၊ နာင် ဘာဆေဘာ တွိုန် ဘော ကာ လာင် မို၀်း အန် ဘာဒိတ် ဆန်ထေ၊ ဒီ အာဒါ၀ိတ်။

အီမာယ်နာင် ဘာဆေဘာ တွိုန် စိူ၀် အာအူရီယာ။ အာအူရီယာ တီ၊ အန် ဟဲ့ မုး ဂူနာန် ခုန်ဒီခမ် အာဒါ ၀ိတ် အီ ဟဲ့ ကျက် ကာဆ၀်။ အာ ခါန် တီ၊ဂေ ဟဲ့ ကာ ဂု၀်း ဒီ ရန်ဆူ ဂေ။ အာဒါ၀ိတ် တွိုန်၊ အန် ဘော ဒဲ့ အာအူရီယာ တွိုန်၊ အန် ဟဲ့ ကွယ် ဒူပ် ပူင့် တီ ကာ လာင်။ ခု၀်၊ အာအူရီယာ တွိုန် အန် ဟဲ့ ကာဂု၀်း၊ ဒီ ဂူနာန် ဟာ၀် အန် ဘော တူ ၀ီ ၀ေန့် ခဲ့ ကာင် အန်။ ဟဲ့ ဟွတ့်၊ အာဒါ၀ိတ် စ်ု အန် ဟာ၀် ကာ ဒူင် ကွယ် အီ ကာ တတ် ဒီ ရန်ဆူ ကိူန့် တဲး အန် စေ၀် ယမ်။

အာအူရီယာ ဟဲ့ ကာဂု၀်း ဘော ယမ်။ ၀ါယ် အန် တီ၊ အာဒါ၀ိတ် တွိုန်အန် ၀ီ ခတ် ဒို၀်း နာင် ဘာဆေဘာ တွိုန်။ အာ ခြာ၀် အန် ဘော လှေန် နာင် ဘာဆေဘာ တွိုန် အန် ဘော ဂွန်။ ဂွန် အီမာယ် အီ မုး၊ ဂွန် အာဒါ၀ိတ်။ ဇ၀်ဖြာ ယီ တူ အိုင် ပီ ဟဲ့ ဘူင် အာဒါ၀ိတ် တွိုန်။ ဇ၀်ဖြာ ၀ီ စ်ု ဒါ အီ ဘျာန် ဂြု၀်း ဇ၀်ဖြာ အူ၀ီ ဟာ၀် ကာ လာင် လွင် မှာပ် အာဒါ၀ိတ်။ အာဒါ၀ိတ် တွိုန်၊ အန် ဘော ၀ီ ကာ လာင် မှာပ် အန် ဒီ ဇ၀်ဖြာ။ ဇ၀်ဖြာ မိူ၀် ဂ၀်း ၀ဲန် မှာပ် အန်တီ။

ခု၀်၊ ဂွန် အာဒါ၀ိတ် တွိုန် ဘော ယမ် အာ တီ၊ ဇ၀်ဖြာ ဟဲ့ ဒမ် ဒွါ မှာပ် ဒီ အာဒါ၀ိတ် တွိုန်။ ၀ါယ် အန် တီ၊ အာတ့် ယမ် အာဒါ၀ိတ် မာဆေ ပီ ဟဲ့ စိူမ် ဂေ။ ခု၀်၊ အာဒါ၀ိတ် ဘော တူ ထူမ် ဂြု၀်း ဇ၀်ဖြာ။ ဇ၀်ဖြာ ဟဲ့ ဘူင်တဲး၊ န့ ပီ ဟဲ့ ဘ့ လေး အန် ကာဒိက် ဆတ်ဇာ ဒီ အာဒါ၀ိတ်။ ၀ါယ် အန် တီ၊ အာဒါ၀ိတ် ဂါယ် နာင် ဘာဆေဘာ တွိုန်၊ ဂါယ် ဘော ၀ီ မို၀်း ဂွန် ပေါ အူ၀ီ။ ဂါယ် ဘော တဲး အန် စို၀် ဆောလာမူန်။

A Bible story from: 1 Samuel 10; 15-19; 24; 31; 2 Samuel 5; 7; 11-12