၄၀ - လွင် ဒါင်ဂေ အန်ဇဝ်ယေဆူ ဒီရွင့်ကာဝဲ့
ဂူနာန် ရုဝ်မာဂေ၊ ဟဲ့ဟွတ့် ဘ့လာတ်ဇဲတ့် အန်ဇဝ်ယေဆူ၊ ဝီဒါင်အန်နာ ဒဲင်ရွင့်ကာဝဲ့ ဒူယ်ဟာဝ် တူင့်အန်၊ ရွင့်ကဝဲ့ လုဝ်ငဝ်း အန်တီမိူဝ် ဝီစ်ု ဒုဝ်အန်ဝီဂွတ်ဟာဝ်။
ဂူနာန်ဂေ ဒဲ့ဟာဝ်အန် ကာဒူင့်တီစှိုဝ် 'ကာအာင်ဂိန့်' ဟဲဟွတ့် ဝီဒိုဝ်း ဒဲအန်ဂေ ကာဘုတ့် အန်ဝီတာမာ ဟိန် ဒွတ် ဒီရွင့်ကာဝဲ့တီ၊ မာလဲ အန်ဇဝ်ဘောဝီတဝ်း "အိုယ်ဂုန့်မဲဇဝ်ဖြာ၊ ပီဘူင်ဂေ နီမိူဝ်၊ ဂေတူနပ်ဘော ပီဘူင်ဂေ၊ မဲဇဝ် မိူဝ် ကွဲအုန်နဝ်း မဲဒီဂေ၊ ဂေဝီဒွက်ဒိူက် လာပ်မာတ် ဒဲင်ရွင့်ကာဝဲ့ ကာရူယ်ဂိန့် အန်ဇဝ်ယေဆူ၊ န့တဝ်း "န့မုး ခုန်ဒီခမ် ယူဒါ" အာတီမိူဝ်န့မုး ခုန်ဒီခမ် အာဖီလတ် စ်ုဂေဒဲမ်ပါယ်တီ။
ဟဲ့ဟွတ့် အာတီ ဂူနာန် ရုဝ်မာဂေ ဒိုဝ်းခြိုင် အန်ဇဝ်ယေဆူ၊ ဘောဝီလာယ် ကာဒုဝ်၊ ခုဝ်ဘူင်ဂေပါယ်တီ၊ န့တဝ်း "ခြိုင်အုဝ် ဂေနီ ဂေဒီလာယ် ကာယဝ်း၊ ဘောဝီလာယ် ကာဒုဝ် န့ပီဆိန့် အာတ့်နီ ပီဟဲဟွတ့်ဂေ ဒဲမ်အုန် ခဲင်ဘပ် ဇဝ်ဖြာန့ပါယ်တီ။
ဘောဒါဇူမ် ဂါယ်အာအီ၊ ဂေဟွယ်ဝဲန် အာဘ့လာင် အန်ဇဝ်ယေဆူ ဒါဇူမ် အူဝီနပ် ဘ့လတ် အန်ဇဝ်ယေဆူ မာလဲ အာဒါအူဝီ ဝီတဝ်း "မဲတူယုဝ် ဇဝ်ဖြာတဲး မှာပ်ဒီမဲ၊ အာယ် ဟဲဟွတ့် မိုဝ်းဒီဘူင် ကိူန့်မှာပ်၊ အန်အာ ခ်ု အန်တူ မိုဝ်းမှာပ်၊ အန်မုး ဒီအီဆီနာ" ဝါယ်အန်တီ၊ အန်ဝီတဝ်း ဒီအန်ဇဝ်ယေဆူ၊ ပန်ဒီ မုးမဲ ခုန်ဒီခမ် ခဲင်မိူင်မဲ၊ တဲးမဲ ဝီန့လှုဝ်း ဘောအုဝ်၊ အန်ကာလာင်ပါယ်တီ၊ အန်ဇဝ်ယေဆူ တဝ်းဒီအန်၊ "အာတိုဝ်မဲ ဟဲကွယ်ရိုမ် ဒူပ်အုဝ် ခဲင်မိူင်ပါရာဒိက် နီ"၊ အန်ဇဝ်တဝ်းပါယ်တီ။
ဒါတာင် ယူဒါ ဂေ၊ ဘောဒူအီဂေ အီကွယ်ခဲင်ဖိုင် ဒူအီဂေတီ၊ ဂေဘ့လတ် ကာညး အန်ဇဝ်ယေဆူ၊ ဂေဝီတဝ်း "ဆေမဲမုး မှာန်ဂွန် အန်ဇဝ်ဖြာ အာခါခ်ု နီ၊ တဲးမဲ ဝီလေးချွှတ် ဒုဝ်မဲ၊ ဆေန့ပါယ်တီ ယေဒီဝီ ညှိုမ်တူတ့်မဲ"၊ ဂေတဝ်း ပါယ်တီ။
ပန်တီ ကာဒူင့်ကွယ် ဂေတီန့ယီမုး ကာတဲ ဆီငဲ၊ နပ်ဒီအပ် ဂွင့် ဘောဝီ ကာဘိတ်တူတ့် ပါယ်တီ၊ ကာတဲ ဆီငဲတီ၊ နာဒဲင်ဂါင် ဟြာဝ် ကာဘက် အူယ်နာရီ န့အပ်ဂွင့်လပ် ဆိတ်တူတ့် ဘောကာဂ့လျီတ့် ပါယ်တီ။
ပန်တီ အန်ဇဝ်ယေဆူ တဝ်း "အိုယ် အန်ဇဝ်ဖြာဟဲ့ဟွတ့် ခဲနီ၊ အုဝ်အာဝ်နဝ်းဖွိုန် အုဝ်ဒီမဲ ဇဝ်ဖြာ"၊ ဘော ဝီဒတ်တာင်တဝ်း ပါယ်တီ၊ ပန်တီဂိန့်အန်မိူဝ် ဘောဝီဒီလှး အူဇေန်၊ ဖွိုမ်အန် မိူဝ်ဘောဝီ လေးတး ဒုဝ်အန်တီ၊ ဒေါ ယမ်အန်ဘော မာအျီမ် ကွယ်ဝီယေန့် ဘောဘိက် ပီဂွင့်ရဲဂေ၊ ခါနာ ဒူအီဂါယ်ဇဝ်ဖြာ၊ စုနာဒဲင်ကာ ယဲတ့်ဇမ်ဒင်အန်။
လွင်ယမ် အန်ဇဝ်ယေဆူ နီ၊ န့ပီဟဲဝိုဝ်း န့တေန်၊ တဲး ဒူအီဂါယ် ဇဝ်ဖြာ လာယ်ယိုဝ်၊ လာယ်ကာဒုး၊ ဘောဂူ နာန်ဂေ ဘာအန်ဇဝ်ယေဆူ ယိုဝ်တူတ့် လွင်အန်တီ၊ "ဒူအီနီမုး၊ ဒူအီဆီငါ၊ အန်မုးဂွန် ဇဝ်ဖြာ" ဂေတဝ်းပါယ်တီ။
ဒါတာင် ယူဒါ ဂေအီစိူဝ် အာယုဝ်ဆဲပ် ဂါယ် အာနီခုဝ်ဒေမ်တွိုန်၊ ဘောဝီ ဟာဝ်မှာန် ဒုဝ် အန်ဇဝ်ယေဆူ ဒီခုန် ဒီခမ် အာဖီလတ်၊ ဂါယ်မုး ဒူအီညှိုမ် ဘောမုး အန်ဇဝ် 'မေဆီယာ' ဂါယ်ဘောဝီ ဒိုဝ်းဒုဝ် အန်ဇဝ်ယေဆူ၊ ကာဘန်ဘိတ်၊ ဟဲဟွတ့် ဝီဟပ်ဟာဝ် ခဲင် ကာဒဝ်မာဝ် ဟဲ့ဟွတ့် ဝီတာမာဝ် တာင်ကာဘိက်ပါင် ကာဒဝ်တီ။
A Bible story from: Matthew 27:27-61; Mark 15:16-47; Luke 23:26-56; John 19:17-42