၁၀။ လွင်ဒုက်ဂိုဝ်မျုဝ်

ဇဝ်ဖြာတွိုန် ဟဲ့ဟွတ့် ဒမ်အာမုဝ်ဆဲ ဂါယ်အာရုန်၊ ခဲင်ဘောဒိူဝ်ခုန်ဒီခမ် ဖာရုဝ်တွိုန် ဂါယ်ဘောဝီ ဟာဝ် ဇမ်၊ ကာဒူင် ကွယ် ခုန်ဒီခမ် ဖာရုဝ်တွိုန်၊ ကာလာင်လွင် အန်၊ ဂါယ်တဝ်း၊ "လွင်အန်တီ၊ န့ဟဲ့မုး ဇဝ်ဖြာ အီဆာ ရေဆာ ဂေဟဲ့ကာလာင် အာတီ။ တဲးမဲ ဒွါဒူအီ ကိူန့်ဂေတီ လေးဟာဝ်"။ ဂါယ်ကာလာင်ပါယ်တီ။ ခုဝ်အန်တီ၊ ခုန်ဒီခမ် ဖာရုဝ်တွိုန်၊ အန်တူထူမ်ဂြုဝ်း ပီကာလာင်ဂါယ်။ အန်လုဝ်ဒွါ အာမျုဝ် ဒူအီ အီဆာရေလ ဂေဟာဝ်၊ အန်ယီဘောဝီစ်ု၊ ဂေဘူင်ဂါန် ကိူန့်ကာဆဝ်။

ခုန်ဒီခမ်ဖာရု၀်တွိုန်၊ ခုဝ်၊ အန်တူဒွါ အာမျုဝ် ဒူအီ အီဆာရေလ ဂေဟာဝ်။ ခုဝ်၊ အန်ဇဝ်ဖြာ ဘောဘူင်၊ တဲးန့မိုဝ်း၊ ဒုက်ဂိုဝ်မျုဝ်၊ ခဲင်မိူင် အဲဂိုပ်တီ။ နာဒဲင်ဒွါ ဇဝ်ဖြာ ဒုက်ဂိုဝ် မျုဝ်တီ၊ ဒီခုန်ဒီခမ် ဖာရုဝ် ဂါယ်မိူင် အဲဂိုပ် တွိုန်။ အန်ဘောဘျာ၊ မုး အန်ဇဝ်ဖြာ၊ အီ ဟဲ့တာင် လွှိုမ်တူတ့် ဒွန်မျုဝ်။

ပန်တီ၊ ဇဝ်ဖြာ ဘောဘူင်၊ တဲးအိုမ်ဘဲန် တူတ့်နှာမ်၊ ကွဲ့တဲး ဂေ ပွိုန်ဒီ ဒျီင် အိုမ်။ ဇဝ်ဖြာ ဘောဘူင် ပါယ်တီ၊ ခုန်ဒီ ခမ် ဖာရုဝ် တွိုန်၊ အန်ယီ ညှမ်ဒွါ အာမျုဝ် ဒူအီ အီဆာရေလ ဂေလေးဟာဝ်။

ဇဝ်ဖြာ ဘောဝီ ဘ့လေးတဲး၊ ခဲင်မိူင် အဲဂိုပ်တွိုန်၊ တဲးန့မိုဝ်း မာရုဝ့် ကိူန့်။ ပန်တီ၊ ခုန်ဒီခမ် ဖာရုဝ် တွိုန်၊ ဝီတဝ်း ဒီအာမုဝ်ဆဲ၊ "တဲးမဲဆုတ့်လေး၊ မာရုဝ့် တီ"။ အန်ဘောတဝ်းပါယ်တီ။ ခုန်အန်တီ၊ မာရုဝ့်ဂေ ဘောကာဂ့ လျီတ့်၊ ဟဲ့ဟွတ့် ယမ် တူတ့်။ နဝ်း ခုန်ဒီခမ် ဖာရုဝ် တွိုန်၊ န့ဟဲ့ ညှာပ်ဒီအန်၊ ခုဝ်။ အန်ဘောဝီ တူဒွါ အာမျုဝ် ဒူအီ အီဆာရေလ ဂေလေးဟာဝ်။

ခု၀်၊ အန် ဇဝ်ဖြာ ဘော ဝီဘ့လေး၊ တဲးမာကာမုတ် ကိူန့်၊ တဲးန့ ဘဲန်ဒုက်ဒီဂေ။ ဝါယ်အန်တီ၊ ဇဝ်ဖြာ ပီဝီ ဘ့လေး၊ ဘောမာရွယ်ကိူန့်၊ တဲးန့ဘဲန် ဒုက်ဒီဂေ။ ခုန်ဒီခမ် ဖာရုဝ် တွိုန်၊ အန်ဘောဝီ ဒဲ့၊ အာမုဝ်ဆဲ ဂါယ်အာရူန် တွိုန်။ အန်တဝ်း၊ "စူင် ခဲင်တီ၊ ဘူင်စွင့်တူတ့်ဒုက်တီ။ အုဝ်၊ ဒီဘ့လေး ဟာဝ်အာမျုဝ် ဒူအီ အီဆာရေလ ဂေတီ"။ ခုဝ်၊ အန်ဟဲ့ ကာလာင်ပါယ်တီ။ အာမုဝ်ဆဲ တွိုန်၊ အန်ဘောဝီ ဆာခိုဝ် ဒီဇဝ်ဖြာ၊ ဇဝ်ဖြာ ဘောဝီ ဒိုဝ်း ဝဲန် တူတ့်၊ မာရွယ် ဂါယ် မာကာမုတ် တီ၊ ခုဝ် အန်တီ၊ နဝ်း ခုန်ဒီခမ် ဖာရုဝ် တွိုန်၊ ဟဲ့ပီဝီ ညှာပ်၊ အန်ပီဝီ တူဒွါ အာမျုဝ် ဒူအီ အီဆာရေလ ဂေတီလေးဟာဝ်။

၀ါယ်အန်တီ၊ အန်ဇ၀်ဖြာ ဘောဝီတဲး၊ ဒုဝ်ဆတ်တာဝါ ပီဟဲ့ဟျီင်၊ အာမျုဝ် ဒူအီ အဲဂိုပ်ဂေ ဘောကာ ဂ့လျီတ့်။ တဲး န့မိုဝ်း၊ ရောဂါယမ် တူတ့်မိူဝ်၊ နဝ်းခုန်ဒီခမ် ဖာရုဝ် တွိုန်၊ န့ဟဲ့ညှာပ် ဒီအန်။ ခုဝ်၊ အန်ညှမ်ဘ့လေး၊ ဟာဝ်အာမျုဝ် ဒူအီ အီဆာရေလ ဂေတွိုန်။

၀ါယ် အန်တီ၊ ဇ၀်ဖြာ ဘော တဲး အာမု၀်ဆဲဒို၀်း၊ ကာ၀ှာင် ပြတ့် ခဲင်ခုန်။ နာအာတ့် ခုန်ဒီခမ် ဖာရုဝ် တွိုန်။ အန်ဟဲ့ ဟွတ့် ဘူင်ပါယ်တီ၊ န့ဘောဝီ ဘဲန်ဆဝ်၊ ဒီ အာမျုဝ် ဒူအီ အဲဂိုပ်ဂေတွိုန်။ န့ယီ အာဝ် ဘဲန်အာဝ် ပါယ်မှဝ်၊ ဒီအာမျုဝ် ဒူအီ အီ ဆာရေလ ဂေ။ ခုဝ်၊ ဇဝ်ဖြာ ဟဲ့နပ်၊ ဘောညှာပ်နဝ်း ခုန်ဒီခမ် ဖာရုဝ် ဂေတွိုန်။ ခုန်ဒီခမ် ဖာရုဝ် တီ၊ အန်ယီညှမ် ဘ့လေး ဟာဝ်၊ အာမျုဝ် ဒူအီ အီဆာရေလဂေ။

၀ါယ်အန်တီ၊ ဇ၀်ဖြာဘောဝီ တဲးန့ ဂ့လာယ်ခဲင် ဂါင်ဟြာဝ်၊ အန်ဘော ဘ့လေး မာကာဆေး၊ ဂေဘျြီတ် ကိူန့်၊ တဲးန့စုး ဟာဝ် တူတ့် ခဲင်မိူင် အဲဂိုပ်တွိုန်။ ဘောပီဟဲ့ ဆမ်ဂေ၊ တဲးန့ ကာပျာတ့်တူတ့်။ အာဆေဘော လေး အီရေတ့်၊ ဒွန်အီ ယမ်တူတ့် ခုန်ဒီခမ် ဖာရုဝ် တွိုန်။ အန်ဘောဝီ ဒဲ့ အာမုဝ်ဆဲ ဂါယ် အာရုန်တွိုန်။ အန်ဝီတဝ်း၊ "အုဝ်ဟဲ့ဟွတ့်၊ ကာလိုပ်ဒီဘူင် မှာပ်။ ခုဝ်၊ အုဝ် ဟဲ့ဟွတ့်၊ တဲးဘေလေးဟာဝ်"။ ခုဝ်၊ အန်ကာလာင်ပါယ်တီ။ အာမုဝ်ဆဲ တွိုန်၊ အန်ဟဲ့ယိုဝ် ခုန်ဒီခမ် ဖာရုဝ် ဟဲ့ကာလာင်ပါယ်တီ၊ အန်ဘောဝီ ဆာခိုဝ်၊ ဟဲ့ဟွတ့်ဂ့လာယ် ဂေဘ့လေ ကာဆး ဂေဘ့လေဘျြီတ် ဘောစွင့်ဟာဝ်တူတ့်။

ခုန်အန်တီ၊ ခုန်ဒီခမ်ဖာရု၀်တွိုန်အန်ပီ၀ီဘူင်မှာပ် ပေါအူ စိူပ်။ ခုဝ်၊ နဝ်းအန်ဟဲ့ ဝီညှာပ်၊ အန်ပီဝီ တူတဲး၊ အာမျုဝ် ဒူအီ အီဆာရေလ ဂေလေးဟာဝ်။

ပန်တီ၊ ဇ၀်ဖြာဘောဘ့လေး၊ တဲးမာအာဇူင့် ကိူန့်၊ ခဲင် မိူင် အဲဂိုပ်တွိုန်။ ခုဝ်၊ မာအာဇူင့် ဂေတီ၊ ဘောဂ့လာယ် ဂေဘ့လေ ဘျြီတ် တူပဲ ဒီပျာတ့်ဂေ။ မာအာဇူင့် ဂေတီ၊ ဂေဘော ဟူမ်ပီ ဟဲ့ဆမ် ဂေဒူအီ ခဲင်မိူင် အဲဂိုပ် တွိုန်၊ ဘောပီ ဟဲ့ဆမ် ဂေအီဟဲ့ လတ်လေးခဲင်မာန်၊ ဂေခဲင် နား ဘောကာဂ့လျီတ့်။ ဂေ ဟဲ့ဟူမ်တူတ့်။

၀ါယ် အန် တီ။ ဇ၀်ဖြာ‌ ဘော တဲး၊ ခဲင်မိူင် အဲဂိုပ်ဂေတွိုန်၊ ဘောကာဂ့လျီတ့်။ တဲးန့အပ်ဂွင့်၊ အာဒါ အူယ် ဆီငဲ။ န့ဘော အပ်ဝွင့် ကာဆဝ်၊ အာမျုဝ်ဒူအီ အဲဂိုပ် ဂေတွိုန်၊ ဂေယီတူပွိုန် ဒီလေး ခဲင်ကာင် ဂေ။ ခုဝ် အန်တီ၊ ကာဒူင့် ကွယ် အာမျုဝ် ဒူအီ အီဆာရေလ ဂေ၊ န့ယီ ဘ့လာင် ကာဒူင့်ကွယ်ဂေ။

ဇဝ်ဖြာ ဟဲ့ဒွါ၊ ဒုက်ဒီ ခုန်ဒီခမ် ဖာရုဝ် တွိုန်၊ ဟဲ့နုဝ့် ဒိမ် မျုဝ်။ ခုဝ်၊ အန်ယီ ညှမ်ဘ့လေး ဟာဝ်၊ အာမျုဝ် ဒူအီ အီဆာရေလ ဂေ။ ခုဝ်၊ ကူပ်တူထူမ် ခုန်ဒီခမ် ဖာရုဝ် ဂြုဝ်းဇဝ်ဖြာ။ ဇဝ်ဖြာ၊ ဘောဝီ ဘူင်ဒုက် ဒီပန်တူတ့်၊ အန်အူမျုဝ်။ ခုဝ်၊ ဒုက်ပီဒွါ ဇဝ်ဖြာ၊ ဒီပန်တူတ့် တီ၊ အီဟဲ့ဝီတဲး နဝ်း ခုန်ဒီခမ် ဖာရုဝ် တွိုန်ဘျွင်။

A Bible story from: Exodus 5-10