၂၀ - လွင် ကာဒုး ဒီ ဆုတ့် လေး ဂါယ် ကာဒုး ဒီ ၀ီတး

မိူင် အီဆာရေလ ဂါယ် မိူင် ယူဒါ တွိုန်၊ ဂေ ဟဲ့ ဘူင် ကိူန့် ကာဆ၀် မှာပ် နာ ဒဲင် ဇ၀်ဖြာ။ ဘော ဒဲင် နွန်ဆီနာ တွိုန်၊ ဂေ ဘော ပျာက့် ၀ဲန် ဘောဆာဒိက် ဂြု၀်း ပီ တ၀်း ဇ၀်ဖြာ ကာဒိက် ဆတ်ဇာ။ ခု၀်၊ ဇ၀်ဖြာ ဟဲ့ ဘ့လေး ဟာ၀် ဒါ အီမိုဝ်းအာငျာန်နပ်ဒီခဲ ဟာဝ်နာအာတ့် ဇ၀်ဖြာ ကာဒူင့် ကွယ် ဂေ၊ တဲး ဂေ န့ လူ၀်း မှာပ် ဂေး တဲး ဂေ ၀ီ ကြိုပ် အိုပ် ဇ၀်ဖြာ။ ဇ၀်ဖြာ ဟဲ့ ဘ့လေး ဆာဒိ ဒီ ဂေ ပါယ် တီ၊ ဂေ ယီ တူ ထူမ် တူ ဒူပ် ပီ ကာလာင် ဇ၀်ဖြာ။

၀ါယ် အန် တီ၊ ဇ၀်ဖြာ ဘော တဲး မိူင် အာမိူင် တွိုန် တဲး ဂေ မို၀်း ရန်ဆူ၊ တဲး ရန်ဆူ ဂေ တီ တး ပျာက့် ဂေ။ ဟဲ့ ၀ီ မို၀်း အာရူရိ၊ မိူင် တာင် အူမိူင်။ အာမျု၀် ဒူအီ အာရူရိ တီ။ ဂေ ဟဲ့ နပ် ဒီ ဇွင့် မိူင် ဂေ ပေါ အူ မိူင်။ ဂေ ဘော ၀ီ တး ဇမ်၊ မိူင် အီဆာရေလ ဂေ တွိုန် ဂေ ဘော ပျာက့် တူတ့်။ အာရူရိ ဂေ တွိုန်၊ ဟဲ့ ဟွတ့် င၀်း ယမ် ကိူန့် ဒူအီ အီဆာရေလ ဂေ တွိုန်၊ ဂေ ဘော ဒို၀်း ဟာ၀် ပီ ဆီ ပွိုန် ဂေ ဟဲ့ ဟွတ့် ဂေ ဘော ၀ီ ဒု၀်း ကာဆိူမ် ခဲင် င၀်။

ဒူအီ အာရူရိ ဂေ ဒါတာင် ဂေ၊ ဒါ အီခြမ် ဂါယ် ကြု၀်ကြာမ် အီမို၀်း င၀်း အန်၊ ဂေ အီနပ် ဒီ ဖာန်၊ ဂေ ဘော ဒဲ့ ကာဇူ ဂေ၊ ဟာ၀် ကာဒူင့် ကွယ် အာရူရိ တွိုန်။ ခဲင် မိူင် အီဆာရေလ ဂေ တွိုန်၊ ဟဲ့ ဂိတ် ဂေ ဒူအီ အီ တူ မွှိုမ် မို၀်း အီကွယ် ခဲင် မိူင် ဂေ တီ။

၀ါယ် အန် တီ၊ အာ မျု၀် အာရူရိ ဂေ တွိုန်၊ ဂေ ဟဲ့ ၀ီ တ၀်း ဒီ ဘူင် ဂေ ကွယ် ခဲင် ကာဒါယ် မိူင် အီဆာ ရေလ တွိုန်။ ဂေ ဘော ဒဲ့ တး ဒူအီ၊ အီ နပ် ဒီ ရဲန်ဂါန်၊ တဲး ဂေ ဘော ၀ီ ဆမ် မိူင်၊ ကာဒူင့် ကွယ် ဂေ တီ။ အာမျု၀် ဒူအီ အီဆာရေလ ဂေ အီ ဆီ ကွယ်၊ ဂေ ဘော ၀ီ လာ ခတ့် ဒို၀်း ဒီ ဂေ၊ ဒူအီ အီ ဆီကွယ် ခဲင် မိူင် တီ။ အာမျု၀် ဂေ တီ ဂေ ဘော တ၀်း ဂေ စိူ၀် အာမျု၀် ဆာမာရီတာန်။

မိူင် ဒူအီ အာ မျု၀် ယူဒါ ဂါယ် မိူင် ဒူအီ အာမျု၀် အီဆာရေလ ဂေတီ၊ ဂေ ဟဲ့ ၀ီ နပ်၊ ဂေ တူ မို၀်းန၀်း ညှိုမ် န၀်း ထူမ် ဂြု၀်း ဇ၀်ဖြာ။ ခု၀်၊ ဂေ ဟဲ့ ၀ီ ယို၀် မှာပ် ပီ ဟဲ့ ဒွါ ဇ၀်ဖြာ ဒီ ဂေ။ ပန် တီ၊ ဒူအီ ကိူန် ဂေ တွိုန်၊ ဟဲ့ မို၀်း ဇ၀်ဖြာ ကိူန် ခဲင် မိူင် ကာနန့် တွိုန်၊ ဟဲ့ မို၀်း ဘော အာရိုပ် ရာင်။ ခု၀်၊ ဂေ ဘော ၀ီ ကြိုပ် ဟာ၀် အာရိုပ် ရာင် တီ။ ဇ၀်ဖြာ ဘော ဘ့လေး ဟာ၀် ကာဒူင့် ကွယ် ဂေ၊ ဒါ အီမိုဝ်းအာငျာန်နပ်ဒီခဲဟာဝ်နာအာတ့် ဇ၀်ဖြာ စ်ု ဂေ ကာလာင် လွင် ကာဒိက် ဆတ်ဇာ ဇ၀်ဖြာ၊ ဂေ ယီ တူဆီ ထူမ် ဂြု၀်း တီ။

မိူင် အီဆာရေလ တွိုန်၊ ဂေ ဒူအီ အာမျု၀် အာရူရိ ဟဲ့ ဘော ပျာက့် ဟဲ့ နု၀့် ဆီနမ် အူမာယ၀်း။ ဇ၀်ဖြာ ၀ီ ဘ့လေး အာမျု၀် ဒူအီ ဗာဗုလုန် ဘော ခုန်ဒီခမ် ဂေ အီ စိူ၀် အာနေဗုခတ်နေဇာ တဲး ဂေ ကာဂု၀်း ဒီ မိူင် ယူဒါ တွိုန်။ ဗာဗုလုန် ဂေ တွိုန်၊ ဂေ ဟဲ့ မို၀်း ပ့လူမ် ဒီ ကာဂု၀်း ပလူမ် ဂေ ဟဲ့ တာင် ကာဆ၀်။ ခု၀်၊ ခုန်ဒီခမ် ယူဒါ ဂေ တွိုန်၊ အန် ဟဲ့ နပ် ဂေ တူ ပဲ ဒီ ကာဂု၀်း ဒီ ခုန်ဒီခမ် အာနေဗုဒ်ခတ်နေဇာ တွိုန်၊ အန် ဘော ဆီ ဖ၀်း ဒူအီ အန် ဂေ ဘဲန် မှာယ် ခုန်ဒီခမ် အာနေဗုခတ်နေဇာ တွိုန်။ ဂေ ဘော လု၀် ဒွါ ရွိုန်၊ ဒွန် ဆီနမ် ဒီ ဂေ ဒူအီ အာနေဗုဒ်ခတ်နေဇာ တွိုန်။

၀ါယ် အန် တီ၊ ဆီနမ် အန် ဘော အာ၀်လှေန့် ခုန်ဒီခမ် ယူဒါ ဂေ ဘော ဘူင် ပီ တူ အိုင် ခုန်ဒီခမ် ဗာဗုလုန် ဂေ တွိုန်။ ခု၀်၊ အာမျု၀် ဗာဗုလုန် ဂေ ဘော ၀ီ ကာဂု၀်း ဒီ မိူင် ယူဒါ ဂေ။ ဂေ ဟဲ့ ဟွတ့်၊ အိုပ် မိူင် အီဆာရေလ ဂေ တွိုန်၊ ဂေ ဘော ပျာက့် ဟု၀် ဇ၀်ဖြာ။ ခဲ့ ကွယ် ဟု၀် ဇ၀်ဖြာ ဘောကာဂ့လျီတ့် ခဲင် မိူင် ဂေ ဘော ဒို၀်း ရွိုန် ဂေ ခြီ၀် ဂေ ဘော ဒို၀်း ဟာ၀် တူတ့်။

ခုန်ဒီခမ် ယူဒါ ဂေ၊ အီ တူ ထူမ် ဂြု၀်း ခုန်ဒီခမ် အာနေဗုခတ်နေဇာ တွိုန်၊ ခုန်ဒီခမ် အာနေဗုဒ်ခတ်နေဇာ ဘော ဒွါ မှာပ် ဒီ ခုန်ဒီခမ် ယူဒါ ဂေ တွိုန်၊ အန် ဘော တဲး ဂူနာန် အန် ဂေ င၀်း ယမ် ဂွန် ခုန်ဒီခမ် ဒီ အာတ့် ခုန်ဒီခမ်။ ဟဲ့ ဟွတ့်၊ ဂေ ဘော ဘူင် တဲး ဘော ငါယ် ခုန်ဒီခမ် အပ်။ ခု၀်၊ ဂေ ဟဲ့ ဟွတ့် ဘူင် ပါယ် တီ၊ ဂေ ဘော ၀ီ ဒဲ့ ဟာ၀် ကာဒူင့် ကွယ် ခုန်ဒီခမ်၊ ဂေ ဘော ဘ့လေး အန် ကွယ် ခဲင် ကာပိုမ် ဗာဗုလုန်။

အာနေဗုခတ်နေဇာ ဂါယ် ဂူနာန် အန်ဂေ၊ ဂေ ဘော ဒဲ့ ဟာ၀် ဒူအီ ယူဒါ ဂေ ဟာ၀် မိူင် ဗာဗုလုန်။ ဒူအီ ဂေ အီ တူ မွှိုမ် မို၀်း၊ ဂေ ဘော တဲး ဒူအီ ဂေ တီ ကွယ် ဘူင် နာ။ ခု၀်၊ ဒူအီ ဂေ ဟဲ့ လေး ခဲင် ကာဒါယ် ပီ ဒွါ ဇ၀်ဖြာ ကာဒိက် ဆတ်ဇာ အန် ဒီ ဂေ။ အာခြာ၀် တီ န့ ဘော မုး၊ ကာဒုး ဒီ ဆုတ့်လေး။

အန် ဇ၀်ဖြာ ဒွါ မှာပ် ဒီ ဒူအီ ကိူန့် ဂေ တီ၊ ကာဒုး ဒီ ဆုတ့်လေး။ အန် ဘော ဒွါ မှာပ် ဒီ ဂေ ပါယ် တီ၊ အန်ယီ တူ ပီ၀့် ဂြု၀်း၊ ကာဒိက် ဆတ်ဇာ ပီ ဒွါ အန် ဒီ ဂေ။ ဇ၀်ဖြာ ဘော ယွတ် ဟာ၀် ဂေ ပါယ် တီ၊ ဇ၀်ဖြာ ၀ီ စ်ု၊ ဒါ အီမိုဝ်း အာ ငျာန်နပ်ဒီခဲဟာဝ်နာအာတ့်ဇ၀်ဖြာ အူ၀ီ။ အန် တ၀်း “ဆေ ဟဲ့ လှေန့် ဆီနမ် ဘူဂို၀် ကာဒါယ် ဘ့လေး အု၀် ကာဒိက် ဆတ်ဇာ ဒီ ဂေ တွိုန်၊ အု၀် ကော ဒွါ ဂေ ၀ေန့်“။ အန် ဇ၀်ဖြာ ဟဲ့ ဘ့လေး ကာဒိက် ဆတ်ဇာ ပါယ်တီ။

ဟဲ့ ဘော လှေန့်၊ ဆီနမ် ဘူဂို၀် တွိုန်၊ န့ ဘော မို၀်း ခုန်ဒီခမ် ပေရသိ အီ စိူ၀် ( ဇောရာဇ် )။ အန် ဘော ကာဂု၀်း ဒီ ဗာဗုလုန် ဂေ တွိုန်၊ အန် ဘော အွင်။ ခု၀် ( ပေရသိ ) တွိုန်၊ အန် ဟဲ့ အိုပ် မိူင် ကိူန်။ ဒူအီ အာ မျု၀် အီဆာရေလ ဂေ တွိုန်၊ ဂေ ၀ီ တ၀်း ဂေ စိူ၀် ဒူအီ အာမျု၀်ဇူ။ ဂေ ကိူန့် ဟဲ့ ကွယ် ခဲင် မိူင် ဗာဗုလုန် တွိုန် ဘော ဇူန် ဂေ၊ ဂေ ဟဲ့ တ၀်း ဒီ ကွယ်။ ဒူအီ ဂေ ယီ အာ ဆာက် ကိူန် တွိုန် ဂေ ယီ န့ လူ၀်း မိူင် ယူဒါ တွိုန်။

ဒူဆီ အာမျု၀် ပေရသိ ဂေ တွိုန်၊ ဂေ ဟဲ့ မို၀်း ဂူနာန် ကိူန်။ ဂေ ယီ နပ် ဒီ ကာ၀ေ ဒူအီ ပီ ဟဲ့ အိုပ် ဂေတွိုန်။ ( ဇောရာဇ် ) တွိုန်၊ အန် ဟဲ့ ဘဲန် ခုန်ဒီခမ် ပေရသိ ဂေ တွိုန်။ ဆီငဲ အန် ဘော အာ၀် လှေန်၊ ခုန်ဒီခမ် ဘော ကာလာင် လွင် ပွိုန် အာမျု၀် ဇူ ဂေ အာဆေ ဘော လု၀် ၀ဲန် ခဲင် မိူင် ယူဒါ တွိုန်၊ ဟဲ့ ပွိုန် ၀ဲန် အန် ဘော ကာလာင် ပါယ် တီ။ အန် ဘော ဒွါ ဘော ရွိန် တဲး ဂေ ပွိုန် ဒီ ၀ီ ဆမ် ဟု၀် ဂေ။ ဟဲ့ နု၀့် ဆီနမ် ဘူဂို၀် တွိုန်၊ ခဲင် မိူင် ယူဒါ ဂါယ် မိူင် ယေရူ ဆာလဲမ် တွိုန်၊ ဘော မို၀်း ဒူအီ အာ မျု၀် ဇူ ဂေ ဇမ် ခဲင် မိူင် တီ အီ စဲတ်။

ဒူအီ ကိူန် ဟဲ့ ၀ီ ဇမ်၊ ခဲင် မိူင် ယေရူဆာလဲမ် တွိုန်၊ ဂေ ဟဲ့ ဟွတ့် ဆမ် ဟု၀် တွိုန်။ ဟဲ့ ဟွတ့်၊ ဂေ ဘော ၀ီ ဘူင် လှု၀်း မိူင် ဂေ။ ဒူအီ အာမျု၀် ပေရသိ ဂေ တွိုန်၊ ဂေ ဘော အိုပ် ဒူအီဂေ တွိုန်၊ ကာဒါယ် ပီ ဟဲ့ ဘ့လေး ဇ၀်ဖြာ ကာဒိက် ဆတ်ဇာ အန် တွိုန်။ ဂေ ၀ီ တဲး ဒူအီ ဂေ တီ ကွယ် ဒီ တီ၊ တဲး ဂေ ဘော ၀ီ ပွိုန် ဒီ ကြိုပ် ဇ၀်ဖြာ ခဲင် ဟု၀် တွိုန်။

A Bible story from: 2 Kings 17; 24-25; 2 Chronicles 36; Ezra 1-10; Nehemiah 1-13