၃၃ - အာ ဘိုမ်လွင်ဒါဘူင် နာ

အူ ဆီငဲ တွိုန် ဇ၀်ယေဆူ တွိုန် အန် ဟဲ့ ဇမ် ခုပ် အိုမ် တွိုန်၊ အန် တွိုန် ကာဇု ဒူအီ တာင် ကိူန် ‌‌ဂေ တွိုန် အန် ဘော မာနု၀် ဂေ။ ဂေ အီ ထူမ် ဒါရာ ပီ မာနု၀် ဇ၀်ယေဆူ တွိုန် ကာဒူင့် တီ အာ၀် ဟူ မို၀်း ကာဒူင့် ဒီ ကွယ် ဒူအီ ဂေ ယီ ကိူန် ကာဆ၀် ခု၀် အန် တီ ရို၀် ဟဲ့ ကွယ် ခဲင် အိုမ် တွိုန် ကာဒူင့် တီ အန် ဘော ဟု၀့် ဒဲင် ရို၀် တီ အန် ဘော ကွယ် ဒီတီ အန် ဘော မာနု၀် ဂေ ပါယ် တီ။

ဝါယ် အန် တီ ဇ၀်ယေဆူ တွိုန် အန် ကာလာင် လွင် အာဘိုမ် တွိုန်။ ‘’ဒါ ဘူင် မာန် တွိုန် အူ အီ အန် ဘော ‌ ဘြတ် ဆီမာ အန် ဘော လေး နာရေတ့်။ ဒေါ ဘြတ် အန် တွိုန် မင် ဘူင့် စု၀်း ဒီ ခူပ် န့တေန့် ‌ဒေါ အန် တီ မာဆိမ် ဘော တး ဇု၀့် ဟူမ် အူ ဇေန့်“။

“ဆီမာ အန် မင် ဘူင့် တွိုန် ဘော စု၀်း ဟာ၀် ဒဲင် မာ၀် အီ မုး ကာဒါယ် ဒီ ဟြေ၀် တွိုန်။ န့ ဘော လတ့် အူ ဇေန့် ကူပ် ဒီ ဟြေ၀် ကာဒါယ် တီ ဆီငဲ တွိုန် ဟီ ဆောဒါတ်၊ န့ ဘော ကြဲ ဒီ ဟျီ့ ခု၀် ရျီး အန် တူ ပွိုန် ဟာ၀် ခဲင် ကာဒါယ်”။

“ဆီမာ မင် ဘူင့် ဘော စု၀်း ဒဲင် ကာ ဒ၀် မာအာတ့် ဒ၀် မာအာတ့် ယီ ကြဲ ဒီ တာင်၊ ၀ီ ယာပ် ဆီမာ တွိုန် တူ တဲး န့ မို၀်း ကာယူင့် အန် ဘ့လေး အန် ယီ တူ ဘ့လေ’’။

“ဆီမာ မင် ဘူင့် ဘော စု၀်း ဒဲင် ကာဒါယ် ဘွတ်၊ တဲး န့ ဘဲန် ဆီမာ ကာမာယ် အီ လေး အူ မာယ၀်း ဘုန် ဒ၀် ဂို၀် ဘုန် ဘော အူယ် ဂို၀် ဘုန်၊ ပီ တ၀်း အု၀် အာ ဘိုမ် ဒေါ တီ နီ န့ ဒူပ် န့တေန့် ဇ၀်ဖြာ တဲး ဘေ ထူမ် ဆီချာ အန် ဘော ကာလာင် ပါယ်တီ”။

အာဘိုမ် တီ ဇ၀်ယေဆူ ဘော ကာလာင် ဒီ ဒါဘဲ အန် န၀်း ဂေ ဘော ဆုက်ဆာင် ခု၀် အန် တီ ဇ၀်ယေဆူ တွိုန် ဘော တ၀်း ‘’လွင် ဆီမာ တီ န့ မုး ပီ ဟု၀် ဇ၀်ဖြာ ဒါရာ အန် ပီ ဒူပ် န့တေန့် တီ န့ ပီ အန် ဟဲ့ ဒွိုမ် ထူမ် ခု၀် န့ ယီ တူ ကာ လှ၀်း ဒီ န၀်း အန်”။ ကာနမ် တွိုန် အန် ဘော ဒို၀်း ဒါရာ ဇ၀်ဖြာ ဟာ၀် ကာဒူင့် ကွယ် အန် အာ တီ ဒူအီ တွိုန် ဘော တ၀်း အာ တီ န့ မုး အန် အီ တူ တဲး ယေ နပ် လွင် ဒါရာ ပီ ဟု၀် ဇ၀်ဖြာ န့ မုး အန် ခြဲယေ။

“ပီ တ၀်း အန် ကာဒါယ် ဒဲင် မာ၀် တီ အန် ဟဲ့ ဒွိုမ် ထူမ် ဒါရာ ဇ၀်ဖြာ ဆေ အန် ယု၀် ဒီ ထူမ် ဒါရာ တီ န၀်း အန် ဟဲ့ ဒါခိုယ် ကာဆ၀် အန် မုး ဒူအီ ညှိုမ် မာလဲ ဆေ ဒူအီ ဂေ ခုပ် ကာင် အန် ၀ီလာယ် ကာလာင် လွင်အန်၊ အန် တီ ဟဲ့ ကာတူ၀် ဒီ ဇ၀်ဖြာ ကူပ် ပီ ညှိုမ် အန် ဘော ဇူင့် ဟာ၀်ပါယ်"။

ဆီမာ အီ စု၀်း ဒဲင် ကာဒါယ် အီမို၀်း ဒ၀် မာအာတ့် န့ ပီ ဒူအီ အီ ထူမ် ဂြု၀်း ဇ၀်ဖြာ ဟဲ့ အန် ၀ီ မို၀်း န၀်း ကာဟွာ့ လွင် ပီ ဒီ လု၀် အန် ပီ ဒီ ဟူမ် ပီ ဒီ တာ အန်၊ အန် ဒီ ဘော ကာဖာ ကာလိုပ် အန် ထာင် ဆေ အန် ဂျု၀်ဂျာ ဒီ ဘူင် ဘဲန် မျု၀် အီ ဒီ တဲး အန် ခြမ် န့ ဒီ ဘဲန် န၀်း ဒါခိုယ် ဒီ အန် ပီ ဘူင် အန် ဇို၀် တီ န့ တူ တဲး ဂြု၀်း ဇ၀်ဖြာ ကွယ် ခဲင် န၀်း အန် တူ ဘဲန် အာ ဂျို၀် ဒီ အန်၊ အန် ဘော ကာလာင် ပါယ်တီ။

“ခု၀် အန် တီ ဆီမာ အီ စု၀်း ဒဲင် ကာဒါယ် အီ ဘွတ် တွိုန် န့ ပီ အန် ဟဲ့ ဟွတ့် ဒွိုမ် ထူမ် လွင် ဒါရာ ဇ၀်ဖြာ ကူပ် နပ် အန် န့ ပီ အန် ဟဲ့ မို၀်း ကိူန် ဘ့လေး ကာဆ၀်“၊ အန် ဘော ကာလာင် ပါယ် တီ။

A Bible story from: Matthew 13:1-8, 18-23; Mark 4:1-8, 13-20; Luke 8:4-15