၄၉ - ပဋိညာဉ် (ဆာဒိက်) ကာမာယ် အန်ဇဝ်ဖြာ

န့မုးဂွန်ဘေန့်အူဝီ၊ အန်စိုဝ်နာင် မာရီ၊ န့မိုဝ်းစဝ် တမန် အူကာဒင်၊ အန်စိုဝ်နာင် ဒေဝါတွိုန်တဝ်း ဒီအန်၊ မဲဒီ ဂွန်လေး ဂွန်အန်ဇဝ်ဖြာ အူဝီအန်တဝ်းပါယ်တီ၊ အန်တီန့ယီမုး ဒီဘျာ မာလဲ ဘ့လာင်ဆီငါဘွတ် န့မိုဝ်း အာငျာန်တွိုန်၊ တးခူပ်အန်၊ တဲးအန်ဒဲ ပဒိဆာန်ထေ။ အန်ဘောဝီမိုဝ်း ဂွန်အူဝီ၊ အန်ဘောတဲး ဂွန်အန်တီ စိုဝ်၊ အာယေဆူ၊ ခုဝ်အန် ဇဝ်ယေဆူ နီ၊ ဒူအီအန်မုး၊ အန်ဇဝ်ဖြာမိူဝ်အန်မုးပါယ်တီ။

အန်ဇဝ်ယေဆူ တွိုန်၊ လုဝ်တဲးအီနပ်၊ ပီဘောမုး အန်ဇဝ်ဖြာ၊ အန်ဘောဝီ ဘူင်ကိူန် လွင်မွှိုမ်အာမ် ဂေနီ ဒွန်မျုဝ်။ အန်ဘော ဟာဝ်ဘောနာဒဲင် အိုမ်၊ ဘောတဲး ခုန်ဆဲဝှါဂေ ယေန်။ ဘောဒူအီဂေ ဟဲ့ကိူန်အန်ပဲ ဒီပါကဲမ် ဆဝ်ဂေ၊ ဘောကာနမ် စဝ်ဂေအန်ဝဲတ့်လေး၊ ဘောဒူအီဂေ၊ ဟဲ့ဟွတ့်ယမ်၊ အန်တဲး န့ဝီ အိမ်ဘောခါမုန် ဖန်ဘူင့် ဂါယ် မာဂါ အာဒုဝ်တွိုန်၊ အာဒါဟူမ်ဒူအီ ဖန်ဟြဲန်လူယ်ဂေတီ၊ နာဒဲင်ဟူမ်ဂေ၊ ကွယ်ဝီကာလူယ်အန်ဇဝ်ဖြာဖန် တဲးပါယ်တီ။

အန်ဇဝ်ယေဆူနီ၊ အန်မုး ဆာရာဂျအူဝီ၊ ဘောဝီမာနဝ် အန်ဒွန်မျုဝ်တီ၊ အန်တဲးန့ ကာဇီတူတ့်ပါယ်တီ၊ ကူပ် မုးအန်၊ ဂွန်အန်ဇဝ်ဖြာ၊ ဒူအီဂေဒွန် အီမိူဝ်၊ ဒူပ်ဒီထူမ်ဂြုဝ်း ပီကာလာင်အန်တီ။ ဆီဖါဝ်အန် အာခါ၊ အေဒူအီနီ ဒွန်အီ ရွင့် ဒုဝ်အေ၊ အေဘော ရွင့် ဒုဝ်အေ ခဲင်မှာဝ်၊ အေလုဝ်ဝီရွင့်ဒီအီ ဟာဝ်ပါယ်တီ၊ အန်မာနုဝ်တဲးပါယ်တီ။

အန်တဝ်းဒီဂေ၊ ဘေလုဝ်ရွင့် လွှိုမ်အန်ဇဝ်ဖြာ၊ နာဒဲင်ရွင့်ဘေ၊ ပီမိုဝ်းဘေ ကြိုဝ်ကြာမ် ဘေ ဒွန် မျုဝ်တီ၊ အန်မာနုဝ်တဲး ဒီဂေဘောအာတီ။

အန်ဇဝ်ယေဆူ ဘောဝီတဝ်း၊ နာဒဲင့်ပီမိုဝ်း ဘေခဲင်ကွယ် အန်ဒွန်မျုဝ် ဒဲင့်ကာဒါယ်နီ၊ ဆေအေဝီ ကွယ် ခဲင်မိူင်ခြီဝ် အန်ဇဝ်ဖြာတွိုန်၊ န့ဟဲဂျ လွှိုမ်တူတ့်၊ အန်တဝ်းပါယ်တီ။ ကူပ်ဒီလုဝ် ပွိုန်ဘေဒီ လိုပ်ခဲင် မိူင်ခြီဝ်တီ၊ ဘေလုဝ်ချွှတ်မှာပ် ဘေတီဒီအဲတ့်။

ဒူအီဂေ မန်အီ၊ ဘောဝီဟဲ့ဟွတ့်ဂေ ညှိုမ်အန်ဇဝ်ယေဆူ၊ အန်ဇဝ်ဖြာ တွိုန်၊ ဘောဝီဟဲ့ဟွတ့် ချွှတ်ဂေစိုဝ် တီ။ မာလဲဒူအီဂေ မန်အီ ညှာမ်မိုဝ်း ဒီညှိုမ် အန်ဇဝ်ယေဆူ။ အန်တဝ်း ဒူအီဂေနီ၊ ဂေခါနဲန် ဖုန်ကာဒါယ်၊ မှာဝ် န့ပါယ် ခုဝ်အန်၊ ဂေစိုဝ်တီ၊ ဂေယိုဝ်ဂြုဝ်းဆီဒါင်ကျ အန်ဇဝ်ဖြာ၊ ဂေညှိုမ်အန်၊ အန်ဇဝ်ဖြာ ဝီချွှတ်ဂေ။ မာလဲ ဒူအီ မန် အီ အာခါ၊ န့ပီ ဂြုဝ်း ဇဝ်ဖြာတွိုန် စုဝ်း ဒီကာဒါယ်ခ၊ ဆီမာကာအာင်း တွိုန် အဝ်ပဲ ဒီလတ့်။ ဒူအီဂေ စိုဝ်တီ၊ န့ပီဂေ ဂျီ့ ဂြုဝ်း အန်ဇဝ်ဖြာ၊ န့ပီဂေ ဂျီ့ ဘောဒီလုဝ်လိုပ် ခဲင်မိူင်ခြီဝ် အန်ဇဝ်ဖြာ။

အန်ဇဝ်ယေဆူ တွိုန် ဟဲ့ဟွတ့်တဝ်း၊ အန်ဇဝ်ဖြာတီ၊ အန်ရွင့်လွှိုမ် ဒူအီမတ်မိူင်ဂေ လွှိုမ် ဒူအီ ဟာဝ်။ အန်မိူဝ်တူ အုန်နဝ်းအန်ဒီဂေ၊ အန်ဆီတဲး ဂေတီမုးဂွန်အန်။

အန်ဇဝ်ယေဆူတဝ်း၊ အန်ဇဝ်ဖြာတီ၊ အန်ကာအိး န့ဂ့ကြိုဝ်း မှာပ်ဂေနီ၊ အန်မာနုဝ် တဲးပါယ်တီ၊ ကူပ်ဘူင် အာဒမ် ဂါယ် အေဝါ မှာပ်တီ၊ ဒူအီဟဲယိတ့်ဟာဝ် နာအဲတ့်ဂေ တွိုန် မိူဝ်၊ ဝီဘဲန်တူတ့် ဒူအီဘူင် မှာပ်ပါယ်တီ။ ဒူအီ၊ အီကွယ်ဒဲင့် ကာဒါယ်နီ ဒွန်အီ၊ ဟဲမိုဝ်း ဒီဘူင်မှာပ်၊ ခုဝ်လာယ်ကာ တူင့် ဒီအန်ဇဝ်ဖြာ၊ ဒူအီဒွန် အီ ဟဲဝီဘဲန် ရန်ဆူအန်ဇဝ်ဖြာ။

မာလဲ အန်ဇဝ်ဖြာတီ၊ အန်တူဆီတဲး ဒူအီဂေ အီညှိုမ်ဂွန် အန်ဂေ၊ လုဝ်ဝီခမ် မှာပ်ဂေတီ၊ ခုဝ် ခဲင် ဘောရွင့် အန်အေ၊ အန်ခမ်တဲး ဂွန်ပီရွင့် အန်အူဝီ၊ အာဒါအေ ဒွန်အီ။ အဝ်ဝန် ခဲင်တီ၊ ပူင့်ဒူအီ အီညှိုမ် အန်ဇဝ် ယေဆူ ဒွန်အီ၊ ပွိုန်ဒီကွယ် ရိုမ် ဒူပ်အန်ဇဝ်ဖြာ၊ အူစုဝ်ဂမ်ဖါ။

ဘေစိုဝ်တီမိူဝ်၊ ဘေလေ့ဘူင် န့ကြိုဝ်းလီ တူအးတူခါ၊ ခုဝ်န့ထတ် ကာအာပ် လုဝ်ယမ်တီ၊ အန်ဇဝ်ဖြာတွိုန် မိူဝ်၊ ဘောဝီ ဟဲကာအာပ်လုဝ်တဲး ဒမ်ယမ်တွိုန်မိူဝ်၊ အန်ဇဝ်ဖြာတွိုန်မိူဝ်၊ ဘောဝီဒွါ အန်ဇဝ်ယေဆူ၊ ခမ်ယမ်ကပ် ဒါင် အာဒါမှာပ်အေ ဒဲင်ရွင့် ကာဝဲ့။ ခမ်တူတ့် ဒါင်မှာပ်အေပါယ်တီ။

အန်ဇဝ်ယေဆူတီ၊ တူဒွိုမ် ကာလိုပ် ဒီဘူင်မှာပ် ဒေါမှာဝ်၊ မာလဲ ခဲဘောမွှိုမ် ယုဝ်လွင်လုဝ်ယမ်နီ အန်ကာဒုး ဒီခမ်၊ ဘောမှာပ် အေ ဘောကာဂ့လျီ့၊ အန်ဒိုဝ်း ဒီဟိုပ်၊ ဘောဝီ ခမ်ဒီယမ် ဒါင်အေဒွန်အီ။

ဘေစိုဝ်တီ၊ ဘောဝီ ဘူင်ဇမ် နာဘွတ် နာမွှိုမ်မိူဝ်လဲ၊ အန်ဇဝ်ဖြာတွိုန် ဒီဘောဝီချွှတ် ဘေမှာဝ်မုး၊ မဲလုဝ် ဘဲန်ဂိုက် ဒင်အာစအန်၊ ခေါအူမျုဝ် ပီပဲ မဲဒီ ဘူင်မှာဝ်မိုဝ်း၊ ကူပ်အာတီ၊ ဒါင်ဘေ အန်ဟဲ့ဟွတ့် တဲး အာဆာင်အန်ဒဲင် ရွင့်တာဝဲ့၊ အန်ဇဝ်ဖြာတွိုန်တဝ်း၊ အာဆေ ဘောဝီညှိုမ် ဂွန် အန်ဇဝ်ဖြာ ဟဲဝီယိတ့် ဝီအိမ်၊ အီမုးအန်ဇဝ်ယေဆူ၊ ကော ပွိုန်၊ အန်ဇဝ်ဖြာတဝ်းပါယ်တီ။ ဆေဘေ ဘောဝီညှိုမ်အန်၊ အန်ဇဝ်ဖြာ တွိုန်မိူဝ် အာဝ်အုန်နဝ်းအန်ဒီဘေ။

ဘောဝီ ဟဲ့ဟွတ့် ညှိုမ် အန်ဇဝ်ယေဆူ၊ ဘောဝီ တဲး န့ ဘဲန် ဒါဆာရာအန်၊ အန်ဇဝ်ဖြာတွိုန် ဒီချွှတ် တူတ့် ဂေပါယ်တီ။ မာလဲ ဂေလီတူညှိုမ် တွိုန်အာခါ၊ အန်ဇဝ်ဖြာ တူဝီချွှတ်ဂေ။ ဘေစိုဝ်တီ၊ အဝ်အာ ရေ၊ ခြမ်၊ ဂေကိန်၊ အီမာယ်တူတဝ်း၊ အီ ဘိန့်တူတဝ်း၊ တျီင့်တျီင့်၊ တာင်တာင်၊ ဘောဘော ဇမ်ကာဒူင့်မှာဝ် အာဝ်အာရေ ဂေစိုဝ်တီ။ အန်ဇဝ်ဖြာတီ၊ အန်ဆီ ရွင့်မဲ၊ ဘောမဲ အန်ဆီတဲး န့ဘဲန်မာဝါယ်အန်၊ ခုဝ်၊ အန်ဆီတဲး ဘေညှိုမ်အန်ဇဝ်ယေဆူ။

အန်ဇဝ်ယေဆူတွိုန်၊ ခုဝ် ဒဲ့အန်ဒီမဲ၊ တဲးမဲ ညှိုမ်အန်၊ ဘောလုဝ်ဝီစိုပ် ခဲင်အိုမ်၊ ခုဝ် ဒဲ့ အန်ပါယ် တီ။ အန်ဇဝ်ယေဆူနီ၊ မုး မေဆီယ ဘောဝီမုး ဂွန်အန်ဇဝ်ဖြာ အူဝီ၊ မဲညှိုမ်အာတီ။ တဝ်း မဲမုးဒူအီ မိုဝ်း မှာပ်၊ ပီဒီ လုဝ် မဲခမ်၊ ကူပ်မှာပ်မဲတီ၊ မဲထာင် န့ဒီ လုဝ်ခမ် မှာပ်၊ ပီဒွါ အန်ဇဝ်ဖြာ မှာပ် ဒီမဲ၊ အာဒါ ပီဒီလုဝ် ဒိုဝ်းဝဲန် ဟာဝ် တူင့်မှာပ် ပီဘူင်မဲတီ၊ အန်ဇဝ်ယေဆူတွိုန် ဟဲဟွတ့် တဲးအာဆာင် အန် ဒဲင်ရွင့် ကာဝဲ့၊ တဲးမဲ ညှိုမ်လဲအာတီ။

ဘောဝီ ဟဲ့ဟွတ့် ညှိုမ် မဲအန်ဇဝ်ယေဆူတီ၊ ဆေမဲဝီ ဟိုဝ်းလေး တူတ့် ပီဘူင်ဟာဝ် အန်ဇဝ်ယေဆူ ဒီမဲ၊ ကာနမ် စဝ်အီကွယ် ခဲင် ဒုဝ် အပ်ဝွင့် လပ်ဆိတ်တွိုန် အဝ်ပွိုန် ဒီအိုပ်ဟာဝ်မဲ ပါယ်တီ။ တူတီနီ အာခါ၊ အန်ဇဝ်ဖြာတွိုန်၊ န့ပီ ဘ့ လာင် အိုပ်ကွယ် ကာရူယ်မဲ၊ မှာပ် ပီ တွိုန် ဘူင်မဲဂေတီမိူဝ်၊ ဘ့လာင် အန်ဇဝ်ဖြာတွိုန် ဟဲဂွင့်ရဲ၊ ကွဲ တဲး န့ပွိုန် ဒီဘူင်မှာပ်၊ အန်ဝီ တဲး၊ မဲကွယ် ချှီတ်ကွယ် မွှိုမ်၊ အန်တဲး မဲ ကွယ်ဟာဝ်ပါယ်တီ။

ဆေမဲ ဘောဝီဟဲဟွတ့်မုး၊ ဒူအီဒူပ် အန်ဇဝ်ယေဆူတီ၊ ပီဘူင်တဲး အန်ဇဝ်ယေဆူ ဒီမဲ၊ န့ပီ အန်ဇဝ်ဖြာတွိုန် အဝ် အုန်နဝ်း အန်ဒီမဲ၊ တူတီ နီ အာခါ၊ အန်ဇဝ်ဖြာတွိုန် အာဝ် အုန် မဲ မုးရန်ဆူအန်၊ အန်ဟဲ ဝီအုန်မဲ မုး မာဝါယ်ဒင့်အန်။

မဲတီ ဟဲ့ဟွတ် မုး မာဝါယ် ဒင်အန်ဇဝ်ဖြာ၊ ဆေမဲ ဘောဝီဘဲန်မှာယ် အန်ဇဝ်ယေဆူ၊ အီမုးဆာရာမဲ၊ ဘောပီ မာနုဝ်အန် ဒီမဲဒွန်မျုဝ်နဝ်း မဲ ဘောဝီ ဒိုင်ဒီအန်။ မဲဘောဝီမုး ဇမ်ဒူအီ ဒူပ် အန်ဇဝ် ယေဆူတီ မာလဲ ကာနမ်စဝ် တွိုန်၊ နပ်ဝီဝဲ့ တဲးမဲ ကာလိုပ် ဒီဘူင် ဟာဝ်မှာပ်ပါယ်တီ။ မာလဲ ပီတဝ်းဇဝ် ဖြာ ဒီဘူင်၊ ဘောမုး ဇမ်မျုဝ်မှာဝ်၊ အန်နပ် ဘူင် ဟာဝ်ပါယ်တီ။ မဲမိူဝ် ဆေမဲ ဟိုဝ်းတူတ့် မှာပ် ပီဘူင်မဲဒီ အန်၊ အန်မိူဝ်တူအုန် နဝ်း အန်ဒီ မဲ၊ အန်တဝ်းပါယ်တီ။ အန်မိူဝ် ဒီတဲး ဘ့လူမ်ဒီမဲ၊ ကူပ်လုဝ်ဝီဂုဝ်း မဲ အာဒါမှာပ်ဂေတီ။

အန်ဇဝ်ဖြာတဝ်း၊ တဲးဘေဆီခိုဝ်၊ ဘောဝီ ဟေန်၊ ဒိးဘပ်အန်ဇဝ်ဖြာဂေနီ၊ တဲး မဲ ဂြိုပ်ဆီခိုဝ်ဒူပ် ဂေ၊ အီဒူပ် နာပန် အန်ဇဝ်ယေဆူဂေတွိုန်၊ မဲမိူဝ် မဲလုဝ်ကာလာင် ပီဘူင် အန်ဇဝ်ဖြာ အာဒါမဲ၊ ဘော လွင် အန်ဇဝ်ဖြာ မဲလုဝ် ကာလာင်တဲး ဒီအီ၊ ဆေ မဲ ဘောဝီ ဘူင်တူတ့် ဂေစိုဝ်တီ၊ မဲဝါယ်ဝီဘဲန်ကာပွါ၊ မာဝါယ် ဒင်အန်ဇဝ်ဖြာ။

A Bible story from: Romans 3:21-26, 5:1-11; John 3:16; Mark 16:16; Colossians 1:13-14; 2 Corinthians 5:17-21; 1 John 1:5-10