၂၆ - လွင် စုးအန်ဇဝ်ယေဆူ ဒီဘူင်ဂါန်ဇဝ်ဖြာ
ဝါယ် ဟဲ့ ဟွတ့် ဘုဝ် ကာနမ် ကာဆုး ဇဝ် ယေဆူ ဘူင် မှာပ်၊ ဟဲ့ ဟွတ့် အန် ဝီ ဝေန့် အိူင် ဂါလီလေ။ ခုဝ် ကာဒူင့် တီ၊ န့ ဟဲ့ မုး ကာဒူင့် ကွယ် အန်။ ဒီ တီ နဝ်း ဖွိုမ် ဇဝ်ဖြာ၊ ဟဲ့ ဒွါ ပွုန် ကိူန် ဒီ အန်။ ဇဝ် ယေဆူ ဝီ ဟာဝ် ဇမ် အူ ပ့လုဝ့် ဟွတ့် အူ ပ့လုဝ့် မာနုဝ် ဂေ ဒူအီ ကိူန်။ ဂေ ဒူအီ ဒွန်အီ မိူဝ် ဘော ကာလာင် လွင် ပီ ဟဲ့ ကာလာင် အန်။
ဇဝ် ယေဆူ ဟဲ့ ဟွတ့် ဟာဝ် မိူင် နာဆာရေတ့် အီ ဟဲ့ မိုဝ်း ရဝ် ဒီ တဲတ့်။ ခုဝ် ရဝ် ဒီ တဲတ့် တီ၊ ကာဒူင့် တီ န့ ဟဲ့ မုး ကာဒူင့် ဂွိုတ် ကွယ် အူ ဆီ ဒီတဲတ့် အန်။ ဟဲ့ ဇမ် ဆီငဲ ဒီ လှဝ် ဇဝ် ယေဆူ ဘော ဟဲ့ ဟွတ့် ဟာဝ် ကာဒူင့် ကွယ် အူင့် ကြိုပ် ဂေ ဇဝ်ဖြာ။ ခုဝ် ကာဒူင့် တီ န့ ဟဲ့ မိုဝ်း ဒါ အီ ဘျာန် ဂြုဝ်း ကိူန်၊ ဂေ ဘော ဒိုဝ်း ပဲ့ ဆီလွယ် အူ ဆီလွယ် အီ ဟဲ့ ဘာ ဒါရာ ပီ ဟဲ့ ဟုဝ် ဒါ အီ ဘျာန် ဂြုဝ်း ဇဝ်ဖြာ နပ်ဒီခဲဟာဝ်နာအာတ့် အီ ဟဲ့ စိူဝ် အာအီဆာယာ ဒွါ ဒီ ဇဝ် ယေဆူ။ ခုဝ် အန် တီ၊ ဇဝ် ယေဆူ တွိုန်၊ ခုဝ် ပဲ့ ဆီလွယ် အီ ဟဲ့ မိုဝ်း ဒါရာ ဟဝ် အန် ဘော တိး ဘျာ ဒီ ဒူအီ ကိူန် ဂေ။
ဇဝ် ယေဆူ ဝီ တဝ်း၊ “အုဝ် တဲး အုဝ် ပဲ ဒီ ကာလာင် အာဒါ ဒူအီ ဂိန် ဂေ၊ ဇဝ်ဖြာ ဟဲ့ ဒွါ နဝ်း ဖွိုမ် အန် ဒီ အုဝ်။ ဇဝ်ဖြာ ဟဲ့ တဲး ဂေ အီ ကွယ် ခဲင် ကာပိုမ်၊ တဲး ဂေ မိုဝ်း နဝ်း ဒါ ခိုယ်။ ဂေ ဒူအီ ငါယ် အီ တူ ပွိုန် ဒီ ယိုဝ်၊ တဲး ဂေ ဝီ ပွိုန် ဒီ ယိုဝ် ဆီချာ။ ဂေ ဒူအီ အီ ကာဒုး ဒီ ဇွင့် တဲး နဝ်း ဂေ ဝီ ဒါ ခိုယ် ဇဝ်ဖြာ ဟဲ့ ဘ့လေး အုဝ် အာဒါ ဂေ တီ။ အာခြာဝ် ဆီ တူ နီ ဇဝ်ဖြာ ဟဲ့ မိုဝ်း နဝ်း ကာဝေ နဝ်း စွယ် အာဒါ အေ ဟဲ့ ဒီ ဇမ် အာခြာဝ် အန် တီ။ အန် ဟဲ့ တိး ဘျာ ပါယ်တီ။
ဝါယ် အန် တီ၊ ဇဝ် ယေဆူ ဘော တုတ့် ဂေ ဒူအီ ကိူန် ဘော တး ယွတ် အန်။ ဂေ တွိုန်၊ လွင် ပဲ့ ထမ် ပီ ဟဲ့ တိး ဇဝ် ယေဆူ တီ၊ န့ ဟဲ့ မုး လွင် ဇဝ်ဖြာ ဆေဆေ။ ဂေ ဟဲ့ ဟွတ့် နပ် မုး အန် ပါယ် တီ။ ဇဝ် ယေဆူ ဝီ တဝ်း၊ “အုဝ်၊ လွင် ပီ ဟဲ့ တိး ဘျာ အုဝ် ဒီ ဘေ န့ ဟဲ့ ဘဲန် ပါယ် တီ ဆီ တူ နီ။” ဇဝ် ယေဆူ ကာလာင် ပါယ် တီ။ ဂေ ဒူအီ ဒွန် ဘော အာမ် ဂေ ဘော တဝ်း၊ “ဒူအီ နီ အန် တူ မုး ဂွန် အာယုဝ်ဆဲပ် တွိုန်။” ဂေ ကာလာင် ပါယ် တီ။
ဝါယ် အန် တီ ဇဝ် ယေဆူ ဝီ တဝ်း၊ “ဒါ အီ ဘျာန် ဂြုဝ်းနပ်ဒီခဲဟာဝ်နာအာတ့် ဇဝ်ဖြာ အူဝီ ဟဲ့ တာင် ခဲင် မိူင် တီ၊ ခုဝ် ဂေ တူ မိုဝ်း နဝ်း ထူမ် ဂြုဝ်း အန်။ ဒါ အီ ဘျာန် ဂြုဝ်းနပ်ဒီခဲဟာဝ်နာအာတ့် ဇဝ်ဖြာ အာအီဆာယ ဒေါ မွိုန်၊ ခဲင် အီဆာရေလ ဂေ န့ ဟဲ့ မိုဝ်း ယာဆီပြး ကိူန်။ ဒေါ အန် တီ အူယ် ဆီနမ် ဘော ဟဲ့ ဘဲန် အာဝ် မိုဝ်း ဂ့လာယ် တီ။ ဇဝ်ဖြာ၊ ခဲင် အီဆာရေလ ဟဲ့ မိုဝ်း ယာဆီပြး ကိူန် အာဒါ ယာဆီပြး ဂေ တီ။ ဇဝ်ဖြာ ဘော ဘ့လေး တဲး ယာဆီပြး မိူင် ဟဝ် အူဝီ၊ ဟာဝ် ဒူပ် အာအီဆာယာ။” အန် ကာလာင် ပါယ်တီ။
ဇဝ် ယေဆူ ဘော ဝီ ကာလာင် တဝ်း၊ “ဒေါ ဟဲ့ မုး ခဲင် လာဒဲ ဒါ အီ ဘျာန် ဂြုဝ်း အီနပ်ဒီခဲဟာဝ်နာအာတ့် ဇဝ်ဖြာ အာအေလီဆာ တွိုန်၊ ခဲင် မိူင် အီဆာရေလ ဂေ ဒူအီ ကိူန် ဘော မိုဝ်း ဆဝ် ရောဂါ ဟုန် န့လျီတ်။ ဇဝ်ဖြာ ဘော တဲး ခဲင် မိူင် အီဆာရေလ တီ မိုဝ်း ဆဝ် ဒုတ် ရောဂါ ကိူန်၊ အာဝ် မဲ ပဲ ဒီ ဆီနမ် တဲး န့ ကဲန် ဆဝ် တီ။ ရန်ဆူ အီဆာရေလ ဂေ အီ ဟဲ့ မုး အာနေမာန် အူ ဝီ၊ ဇဝ်ဖြာ ဟဲ့ တဲး ဆဝ် အန် တဲး န့ ဟြာယ်၊ တဲး န့ ကဲန်။” အန် ကာလာင် ပါယ် တီ။ ဒေါ အန် တီ၊ ဂေ အီ ဟဲ့ ထူမ် ဂြုဝ်း ဇဝ် ယေဆူ တီ၊ ဂေ ဟဲ့ မုး အာ မျုဝ် ဒူအီ ယူဒါ။ ခုဝ် ဂေ ဟဲ့ ယိုဝ် အန် ကာလာင် ပါယ် တီ ဂေ ဘော ရူ ကာဆဝ်။
ခဲင် မိူင် နာဆာရေတ့် ဂေ ဒူအီ ကိူန် တွိုန်၊ ဂေ ဘော မှေတ့် ဇဝ် ယေဆူ ဝီ ဆုတ့် လေး အန် ကာဒူင့် ဇူင် ကြိုပ် တီ။ ဒူအီ ဂေ တီ၊ ဂေ တဝ်း ဒီ ငဝ်း ဇဝ် ယေဆူ ဂေ ဘော ဒဲ့ ဟုဝ့် အန် ဒဲင် ဒါအာင် စာ။ ဒေါ အန် တီ ဇဝ် ယေဆူ ဘော ဝှး ဂေ၊ အန် ဘော ဝီ လေး ဟာဝ် တ မိူင် နာဆာရေတ့် တီ။
ဝါယ် အန် တီ ဇဝ် ယေဆူ ဝီ ဟာဝ် တး ဇမ် အိူင် ဂါလီလေ။ ဂေ ဒူအီ ကိူန် ဘော ဟာဝ် ဇမ် ကာဒူင့် ကွယ် ဇဝ် ယေဆူ။ ဂေ ဒူအီ ကိူန် တီ၊ ဂေ ဘော ဒဲ့ တး ဒူအီ အီ မိုဝ်း ဆဝ် ဘော ဒူအီ အီ ဟဲ့ ယမ် အူ ဘ့လာင်၊ ကာဒူင့် ကွယ် ဇဝ် ယေဆူ။ ဒူအီ ပီ ဟဲ့ ဒဲ့ တး ဂေ မင် အီ၊ ငါယ် ဂေ ဘော ဟဲ့ အပ်။ မန်အီ ပ့လဝ် ဂေ ဒဲ ဟဲ့ ယမ် အူ ဘ့ လာင်။ ဘော ဂေ အာဟျုဝ့် အီ တူ လိုဝ်း။ ဂေ ဟဲ့ ဘဲန် ဒူအီ စှေ၊ ဇဝ် ယေဆူ ဘော ဘူင် ဒွါ ဂေ ဒူအီ ဒွန် အီ တဲး န့ ကဲန်။
ဝါယ် အန် တီ ဂေ ဘော တး တိုယ် ဒူအီ အီ မိုဝ်း ကာနမ် အီ ဟဲ့ လိုပ် ပ့လိုက် ဒူအီ ဒီ ဇဝ် ယေဆူ။ ဇဝ် ယေဆူ မိူဝ် ဘော ကာလာင် စ်ု ကာနမ် ဂေ တီ လေး ကာနမ် ဂေ တီ မိူဝ် ဘော လေး။ ခုဝ်၊ ကာနမ် ဂေ တီ ဘော အာဝ် လှေန့် အာဝ် လှေန့် ဂေ ဘော တဝ်း၊ မဲ ဟဲ့ မုး ဂွန် ဇဝ်ဖြာ အာခ်ု။” ဂေ ဒတ် တာင် တဝ်း ပါယ် တီ။ ဂေ ဒူအီ ကိူန် ခုဝ် ဂေ ဟဲ့ ယိုဝ် ပါယ် တီ ဂေ ဘော အာမ် ကာဆဝ် ဂေ ဘော အိူပ်မျူက် အန်ဇဝ်ဖြာ။
ဝါယ် အန် တီ ဇဝ် ယေဆူ ဘော ရဝ်း ဒီဘဲ အန် ဂိုဝ် ဒီ အာ ဝီ၊ တဲး ဂေ ဘူင် ဒါင် အန်။ ခုဝ် အန် ဟဲ့ ဒဲ့ ဒူအီ ဂေ တီ ဒီ ဘဲ။ ခုဝ် ဒီဘဲ ဂေ တီ ဂေ ဘော ဟာဝ် ရိုမ် ဟာဝ် ဝီ ဟာဝ် ဝေန့် ဒူပ် ဇဝ်ယေဆူ။
A Bible story from: Matthew 4:12-25; Mark 1:14-15, 35-39; 3:13-21; Luke 4:14-30, 38-44