၁၂။ လွင့်လေးဟာဝ်ဂေ

အာမျုဝ် ဒူအီအီဆာရေလ ဂေတွိုန်။ ခုဝ်၊ ဂေဟဲ့ပွိုန် ဒီလေး၊ ခဲင်မိူင် အဲဂိုပ်တွိုန်နဝ်း ဂေဘော ဒါခိုယ် ခူယ် ကာဆဝ်။ ဂေဟဲ့ဟွတ့် ပွိုန်ဒီလေး၊ ခဲင်မိူင် အဲဂိုပ်တီ၊ ဂေဘောဝီ ဟာဝ်၊ ကာဒူင့်ကွယ် ကာဒါယ် ပီဟဲ့ဒွါ ဇဝ်ဖြာ ကာဒိက် ဆတ်ဇာ ဒီဂေ။ အာမျုဝ် ဒူအီ အဲဂိုပ်ဂေတီ၊ ဂေဘောဒွါတူတ့် ပီဟဲ့မှာန် အာမျုဝ် ဒူအီ အီဆာ ရေလ၊ ခြိဝ်ဂေ ရွိုန်ဂေ၊ ဘော ကြုဝ် ကြာမ် ဂေအီ ဟဲ့မိုဝ်း ငဝ်းတာင် ကာဆဝ်၊ ဂေဘောဒွါ တူတ့် ဘောကာဂ့ လျီတ့် ဒီဂေ။ ဒူအီ အီဆာရေလ ဂေတွိုန်၊ ဘောဂေ ဒူအီဟာဝ်အီ ဟဲ့ညှိုမ် ဇဝ်ဖြာ လေးဟာဝ် ဒူပ် ဒူအီ အီဆာ ရေလ ဂေခဲင်မိူင် အဲဂိုပ်တီ။

ဇဝ်ဖြာ ဘောတဲး ကာတဲ ဆီငဲ၊ တဲးဂေ ယိုဝ် န့အုတာင်၊ အီပီ ရွင့်ယဲတ့် ဒီအာတ့်ဂေ။ န့အုတာင် တီ၊ ဟဲ့ဇမ် ခဲင်မိူဝ်၊ အန်ဝီ ဘဲန်ရွင့် အီဘ့လာင် တာင်ကာဆဝ်။ ခုဝ် န့ပါယ်တီ၊ ဇဝ်ဖြာ ဟဲ့ကွယ် ရိုမ် ဒူပ်ဂေ ဆေဆေ၊ တဲးဂေပွိုန် ဒီဒူပ် ဒီပန်အန်။ ခုဝ်၊ န့ဟဲ့မုး န့အုတာင် အီပီရွင့်တွိုန်၊ အီဟဲ့ယဲတ့် န့တေန့်ဂေ။ ပီဟဲ့ လုဝ်ဘူင်ဂေ ဘောကာဂ့လျီတ့် ဂါန် အူမျုဝ် တီ။ န့ဟဲ့မုး၊ တဲးဂေပွိုန် ဒီဒူပ် ဒီပန်ဇဝ်ဖြာ။

အာဝ်ဘောလှေန့် ခုန်ဒီခမ် ဖာရုဝ် ဂါယ် ဒူအီအန်ဂေ၊ ဘောဝီဘျွင် နဝ်းဂေ။ ဂေဝီ ဆီတဲး ဒူအီ အီဆာ ရေလဂေ၊ ဝီ ဘဲန်မှာယ်ဂေ ပေါအူဇေန့်။ ပါယ်တီ၊ ဂေဘော ခူခြး ဒီပန် ဒူအီ အီဆာရေလ ဂေ။ ခုဝ်၊ န့ဟဲ့မုး ဇဝ်ဖြာ အီဟဲ့တဲး နဝ်းဂေ ဘျွင် ပါယ်တီ။ ခုဝ် ဘူင် အန်ဇဝ်ပါယ်တီ၊ အန်တဲး ခုန်ဒီဇမ် ဖာရုဝ် ပါယ် ဒူအီ အဲဂိုပ် ဂေ၊ နပ်မုးအန် ဇဝ်ဖြာ အီဟဲ့တာင် လွှိုမ် တူတ့်၊ ဘောဝီမိုဝ်း ပွုန်တာင် လွှိုမ်တူတ့်။

အာမျုဝ် ဒူအီ အီဆာ‌ရေလ ဂေ၊ ဘောယိုဝ် ခုန်ဒီခမ် ဖာရုဝ် ဂါယ်ဒါဆိုက် အဲဂိုပ်အန်ဂေ ဟဲ့ဒူပ်တး ဒီပန်ဂေ။ ဂေ ဘောဟဲ့နပ်၊ ဂေဟဲ့ကွယ် ဒီ ကာတဲ ဒါဆိုက် ခုန်ဒီခမ် ဖာရုဝ် ဂါယ် အိုမ် ဒိုင့်ရေန့်၊ အီဟဲ့ တာင်တီ။ ခုဝ်၊ အိုမ်ဒိုင့် ရေန့်တာင် တီ၊ ဟဲ့ကွယ် နာ အာတ့်ဂေ။ နာပန်ဂေဟဲ့ မိုဝ်း၊ ဒါဆိုက် အီဒီ မှေတ့်ဂေ၊ ဘောငဝ်း အာဆာက်ဂေ။ ခုဝ်၊ ဂေ ဘောကာဂ့ လျီတ့်၊ ဘောယုဝ် ကာဆဝ်။ ဂေဘောတဝ်း၊ "မှဝ်န့ပါယ်၊ အေပီလေးဟာဝ် ခဲင်မိူင် အဲဂိုပ်နီ။ အေဒီ လုဝ်ယမ်၊ ဘောကာဂ့ လျီတ့်"။ ဂေဟဲ့ဟွတ့် တဝ်းပါယ်တီ။ ဂေဘောဒတ်ယာမ်တာင်။

အာမု၀်ဆဲ ဘောတ၀်း၊ ဒီ ဒူအီ အီဆာရေလ ဂေတွိုန်။ အန်တဝ်း၊ "ဘေကွဲ့ယုဝ်၊ ဇဝ်ဖြာ ဒီကာဂုဝ်း ဒါင် ဘေ အာ တိုဝ်နီ"။ အန်ဟဲ့ဟွတ့် ကာလာင်ပါယ်တီ။ ဝါယ် အန်တီ၊ ဇဝ်ဖြာ ဝီစ်ု အာမုဝ်ဆဲ။ အန်တဝ်း၊ "ဒဲ့ဟာဝ် ဒူအီ ကိူန့်ဂေတီ၊ ဒူပ် အိုမ်ဒိုင့် ရေန့်တွိုန်"။ ဇဝ်ဖြာ ကာလာင်ပါယ်တီ ဒီ အာမုဝ်ဆဲ။

၀ါယ် အန် တီ၊ န့ အု တာင် တွိုန်၊ ခဲင်မှိုဝ် အန်ဘော ဘဲန်ရွင့် ဘ့လာင်တာင် ကာဆဝ်။ ခုဝ် အန်ဘော ဟာဝ်ကွယ်၊ ဒီကာတဲ ဒူအီ အီဆာရေလ ဂါယ် ဒူအီ အဲဂိုပ်ဂေ။ ခုဝ်၊ ခဲင်မှိုဝ်တီ၊ ဒူအီ အဲဂိုပ်ဂေ၊ ဂေဘော တူပွိုန် ဒီယိုဝ်၊ ဒူအီ အီဆာရေလ ဂေတွိုန်။

၀ါယ် အန် တီ၊ ဇ၀်ဖြာ ဘော ၀ီ စ်ု အာမု၀်ဆဲ၊ စု၀့် ဒဲ အန် ဒဲင် အိုမ် တာင် တွိုန်။ အန်ဟဲ့ ဟွတ့် ဘူင်ပါယ်တီ၊ ခုန်တာင် ဘောဝီတး ဘုတ်တဲး အိုမ်ကာယဝ်း အာဘ့လာင်အန်၊ တဲးန့ဘဲန် န့တေန့်၊ တဲးဂေပွိုန် ဒီဟာဝ် ကာတဲ အိုမ်တီ။

ဒူအီ အီဆာရေလ ဂေ တွိုန်၊ ဘောဝီ ခါလှုဝ်းဟာဝ်၊ ကာတဲ အိုမ် ဒီကာဒါယ် ကာဟဝ်း၊ ဟဲပီရဲင့်တွိုန်။

၀ါယ် အန် တီ၊ န့ အု တာင်တွိုန်၊ဘော ၀ီ ဟြာယ်။ ခုဝ်၊ ဂေ ဒူအီ အဲဂိုပ် ဘော ၀ီ ယို၀်၊ ဂေ ဒူအီ အီဆာ ရေလ ဟဲ့ တ၀်။ ခုဝ် ဂေ ဘော တ၀်း ဒီမှေတ့်၊ ဂေဘောဒူပ် ဒီ ပန် ဒူအီ အီဆာရေလ ဂေတွိုန်။

ခုဝ်အန်တီ၊ ဂေဘော ဒူပ်ဒီပန်၊ ဒူအီ အီဆာရေလဂေ။ ဂေဘောလိုပ် ဟာဝ်ခဲင် အိုမ်ဒိုင် ရေန့်တွိုန်၊ ဒေါ ဆီ မိုဝ်းအန် န့တေန့်။ ဒေါအန်တီ၊ ဇဝ်ဖြာဝီတဲး၊ ဒူအီ အဲဂိုပ် ဂေဟာဝ် ကာဝှ်ု ကာဝျှီန်၊ ကွဲ့ဟူ တဲး ဂေပွိုန် ဒီဟာဝ် ဒါခိုယ်။ ခုဝ်ဇဝ်ဖြာ၊ ဟဲ့ဘူင် ပါယ်တီ၊ ဂေဘောဝီ ယုဝ် ကာဆဝ်။ ခုဝ်၊ ဂေဝီတဝ်း၊ "ဟာဝ်တဲးအေ တဝ်၊ ဇဝ်ဖြာ ဟဲ့ ဝီ ကာဂုဝ်း ဒါင် ဒူအီ အီဆာရေလ ဂေဒီအေ"။ ဂေဟဲ့ဒတ် တာင်တဝ်းပါယ်တီ။

ခုဝ်၊ ဒူအီ အီဆာရေလ ဂေ၊ ဟဲ့ဟွတ့်ဇမ်၊ တူတ့်နာတဒွယ်။ ဇဝ်ဖြာ ဝီစ်ု၊ အာမုဝ်ဆဲ ဝီစုဝ့် ဒဲအန်။ အန် ဟဲ့ဟွတ့် ဘူင်ပါယ်တီ။ အိုမ်အီဟဲ့ ဘဲန်ရဲင့်တွိုန်၊ ဝီစုး ဒီဂေ ဒူအီအဲဂိုပ်၊ တဲး န့ပုန်ဂေ၊ တဲးဂေယမ် တူတ့်ဒွန်အီ။

ဂေ ဒူအီ အီဆာရေလ ဘော ယို၀် ဂေ ဒူအီ အဲဂိုပ်၊ ဟဲ့ဟွတ့် ယမ်တူတ့်၊ ဂေဘော အိုပ် ဇဝ်ဖြာ၊ ဘောညှိုမ် ဇဝ်ဖြာ။ ဂေဘော ဟဲ့နပ်၊ အာမုဝ်ဆဲ ဟဲ့မုး၊ ဒါအီ ဘျာန် ဂြုဝ်းဇဝ်ဖြာ အူဝီ။

ဇ၀်ဖြာ ဟဲ့ ချွတ် အာဆာက်၊ ဒူအီ အီဆာရေလ ဂေ။ နာဒဲင် ချွတ်ဇဝ်ဖြာ အာဆာက်ဂေ၊ ဇဝ်ဖြာ ဟဲ့ချွတ် ဂေ ကွဲ့ တဲး၊ ဂေဘဲန်မှာယ်အီ။ ခုဝ်၊ ဂေ ဒူအီ အီဆာရေလ၊ ဘောကာဂ့လျီတ့် ဟဲ့ခူယ် ဒါခိုယ် ကာဆဝ်။ ဂေဘော ဂါဘော က်ု ဂြိုက် ဘောတဝ်း မှုဝ်ဒါခိုယ်၊ အိုပ်အန်ဇဝ်ဖြာ။ ခုဝ်၊ ဇဝ်ဖြာ ဟဲ့ချွတ်ဂေ၊ ကွဲ့တဲး ဂေဝီ ဘဲန်မှာယ် အီဒေါမှဝ်။

ဇ၀်ဖြာ မှိုဝ် စ်ု ဒူအီ အီဆာရေလ ဂေ။ ဘူင် ဘ့လွယ် အူဆီနမ် အူဇေန့်၊ တဲးဂေ န့လှုဝ်း ဒေါချွတ် လေ အန်၊ ဒီဂေ ခဲင် မိူင် အဲဂိုပ်တွိုန်။ လွင် ဘ့လွယ်တီ၊ ဘ့လွယ် ခါမုန် အီတူဘာ ဆီနမ်ဘြး။ ဘ့လွယ်တီ၊ ဂေဟဲ့ ငဝ်း မာဘူ၊ အီဟဲ့ဘွတ် အူဒုဝ်၊ ဒဝ်းဒီငဝ်း ဘောဝီကာဝှ် ဟူမ်။ ဂေဟဲ့ဘူင်ပါယ်တီ။

A Bible story from: Exodus 12:33-15:21