၁၃။ အန်ဇဝ်ဖြာ ဘူင်ဘ့လေး ဆာဒိက် ဒီဒူအီ အီဆာရေလ

ဇဝ်ဖြာ ဟဲ့ဟွတ့်၊ တဲးဒူအီ အီဆာရေလ ဂေ၊ ကာလုဝ်းဟာဝ် အိုမ်ဒိုင့် ရေန့်တွိုန်။ ဝါယ်အန်တီ၊ အန် ဘောဝီတဲး ဂေ ကာလုဝ်း ဟာဝ်၊ ခဲင် နင် ဝီဟာဝ် ဇမ်နွန် ဆီနာယ်။ ခုဝ် နွန်တီ၊ န့ဟဲ့မုး အူပ့လုဝ် ဂါယ်ကာဒူင် ယိုဝ်၊ အာမုဝ်ဆဲ ငဝ်း အီဟဲ့ ကာဆိုမ် ဒဲင်ပြဲ တွိုန်။ ဂေဒူအီကိူန့်တီ၊ ဂေဘောဝီ ချဒီတီ၊ ဝီဆမ်ထိုပ်ဂေ ဒီဒင်နွန်တီ။

ဇ၀်ဖြာ ကာလာင် ဒီ အာမု၀်ဆဲ၊ ဂါယ် ဒီ ဒူအီ အီဆာရေလ ဂေ ဘောကာဂ့လျီတ့်၊ "ဘေ လု၀် ဘ်ု ဆီချာ ဆာဒိက် ပီ ဟဲ့ ဘ့လေး အု၀် ဒီ ဘေ၊ အုဝ်မိူဝ် ဒီကွယ် ရိုမ်ဒူပ် ဘေဆေဆေ။ ဆေဘေ ဘူင်ဒူပ် ဆာဒိက်၊ ပီဒွါ အုဝ်ဒီ ဘေတီ၊ ဘေဒီ ဘောပွိုန်၊ ပီဒီဒွါ အုဝ်ဒီဘေ၊ ဒါတာင် အီဟဲ့လှူ ဒီဇဝ်ဖြာ ကိူန့်ဂါယ် ဒူအီ ဆီငျာ ပီဟဲ့ရွက့် အုဝ်"။ ဇဝ်ဖြာ ကာလာင်ပါယ်တီ ဒီဂေ။

၀ါယ် အန်တီ၊ ဟဲ့ဝီဇမ် ဆီငဲဟာအူယ်။ ခုဝ်ဇဝ်ဇြာ ဝီတး၊ လူင်ကာဒူင် ကွယ်ဂေတီ။ ဂေဒူအီ တီ၊ ခုဝ် ဂေဘော လုဝ်ယိုဝ်၊ ဒီဇဝ်ဖြာ ဂေဘော မ့ပြာယ် ဆီချာဂေ။ ဝါယ်အန်တီ၊ ဇဝ်ဖြာ ဘောတး၊ လူင်ဒဲင် ကာဒဲတ့် နွန်ဆီနာယ် တွိုန်။ ခုဝ်၊ န့ဘောဝီမိုဝ်း၊ န့အုတ် ဝွင့်ဒဲင် နွန်တီ။ ဘောပ့လမ့ပ့လေတ်ဂေ ဟမ်ကာနမ်။ ဟဲ့ဟွတ့်၊ န့ဘောမိုဝ်းဟမ် ပီဂေ ဘုတ်နိုင် မာပဲ၊ ဟမ်အန် မ့လေးတာင် ကာဆဝ်။ ဝါယ်အန်တီ၊ အာမုဝ်ဆဲ အူဝီ၊ ဘောဝီ ဟုဝ့်ဒဲင် နွန်တီ။

ဇ၀်ဖြာ ဘ့လေး ပီ ဆီ ဖ၀် အန် ဂါယ် ဆာဒိက် ဆတ်ဇာ ဒီ ဒူအီ ဂေ အူမျု၀်။ ဇ၀်ဖြာ တ၀်း၊ “အု၀် ဟဲ့ မုး ဇ၀်ဖြာ ပီ ကြိုပ် ဘေ။ အုဝ် ဟဲ့ချွတ် လေးဘေ၊ ခဲင်မိူင် အဲဂိုပ်။ ကာဒူင့် ပီဟဲ့ ဘဲန်ဘေမှာယ်တွိုန်။ ကွဲ့တဲး ဘေ ကြိုပ် ဇဝ်ဖြာအီဟာဝ်၊ ဘဲန် ကာဒင် ဘဲန် ကာဒင်။ တဲး ဘေကြိုပ် မီအုဝ်"။ ဇဝ်ဖြာ ကာလာင်ပါယ်တီ ဒီဂေ။

အန်ဇ၀်ဖြာ ပီ ၀ီ တ၀်း၊ “ဘေ ကွဲ့ ဘူင် အာရိုပ်၊ တ၀်း န့ မုး ဇ၀်ဖြာ။ ၀ီ ကြိုပ် အာရိုပ် တီ။ မှ၀် န့ ပါယ် ခု၀် အန်။ န့ ဟဲ့မုး အု၀် အူ ကာဒင် ဇ၀်ဖြာ ပီဟဲ့လု၀် ကြိုပ် ဘေ။ ကွဲ့ ကာလာင် စိူ၀် အု၀်၊ ဆေ အာ၀် မို၀်း ဒီ ခု၀် မာဆေ။ ဆေ ဟဲ့ ဇမ် ဆီငဲ ဒီ လှဝ်၊ ဘေ လု၀် တဲး၊ အန်ဘဲန် ဆီငဲဘွတ်။ ခုဝ်၊ ဘေဟဲ့ဟွတ့် ဘူင်ဂါန်ဘေ၊ ဘဲန်မျုဝ် ဘဲန်မျုဝ် ဒဝ်ဆီငဲတီ။ ဟဲ့ဝီဇမ် ဆီငဲန့ ဘူ၊ န့ဟဲ့မုး ဆီငဲဒီလှဝ်။ ကွဲ့ဘူင် မာဆေ၊ ဘေလုဝ် ကြိုပ် အန်ဇဝ်ဖြာ"။ ဇဝ်ဖြာ ကာလာင်ပါယ်တီ ဒီဂေ။

အန် ဇ၀်ဖြာ ပီ ၀ီ တ၀်း၊ “ဘေဘော လုဝ် ရုဝ်ဆေ ဂုန့်မာဘေ။ ကွဲ့ငဝ်း ယမ် ဒူအီ။ ကွဲ့တဲး အီမာယ် လုတ့်အီဘေန့် အီ၊ ကွဲ့တဲး အီဘေန့် မိုဝ်း နဝ်းကိူန့်။ ကွဲ့ပြာ ကြုဝ် အီ။ ကွဲ့ကာလုဝ် ဒေါကာလာင် ဘေဆက်ဆေ လွင်အီဟဝ်။ အီဘေန့်အန်၊ ဘောကာင်အန်။ ဘော ကြုဝ်ကြာမ် အီဟဝ်၊ ကွဲ့တဲး ဘေမိုဝ်း နဝ်းဆီ ပွိုန်မာဆေ"။ ဇဝ်ဖြာ ကာလာင်ပါယ်တီ ဒီဂေ။

ဇ၀်ဖြာ၊ ဟဲ့ ဒဲမ် ဒါရာ ဂို၀် ညွင့် တီ ဒဲင် မာ၀်။ ဟဲ့ ဟွတ့်၊ အန် ၀ီ ဒို၀်း ဒွါဒီ အာမု၀်ဆဲ။ ဇ၀်ဖြာ ဟဲ့ဘျာ၊ ဘော ဒါရာ ပီဟာ၀် ကိူန့်၊ တဲး ဂေ ဒူအီ ထူမ်း ဒူပ်။ ဂေ အီဟဲ့ထူမ်ဒူပ်၊ ပီဟဲ့ဒွါ ဇဝ်ဖြာတီ။ ဇဝ်ဖြာ ဟဲ့ကွယ် ရိုမ် ဒူမ်ဂေ၊ ဘော မွင့်ကာရာ ဒွါဒီဂေ။ ခုဝ် အန်တီ၊ ဂေအီတူ ထူမ် ဒူပ် ဆာဒိက်၊ ပီဟဲ့ဒွါ ဇဝ်ဖြာတီ၊ အန်ဇဝ်ဖြာ ဒီအာရိတ် အာဆာင်ဂေ၊ ဘောဝီ မွင့်ကာရာ တဲး ဒီဂေ။

ဇ၀်ဖြာ ဘော စ်ု၊ ဒူအီ အီဆာရေလ ဂေ ဘူင်၊ ထိုပ် တာင် အူ ဘူင့်။ တဲး ဂေ ပွိုန် ဒီကြိုပ်အန်။ ဇ၀်ဖြာ ဟဲ့ ကာလာင် တူတ့် ဒွန်မျု၀်၊ မှ၀်ဒီ ပါယ် ဒီ လု၀် ဆမ် ထိုပ် တီ။ ထိုပ်တီ၊ ဇဝ်ဖြာ တဲးဂေဘူင်၊ တဲးန့ မိုဝ်း အာအာခါန်။ ဒီကာတဲ အန်၊ န့ဟဲ့မိုဝ်း ထိုပ်ဘိက်ဝွင့် အူဘူင့်၊ ဂေဘောဂွင့် ဘိက်တီ။ ဇဝ်ဖြာ၊ ဟဲ့ကွယ်နာပန် ဘိက်တီ။ န့ဟဲ့မုး၊ ဒါအီ ဟဲ့လှူ ဒီဇဝ်ဖြာ အူဝီ၊ ဟဲ့ပွိုန် ဒီလိုပ် ခဲင် အာခါန် တီ။

ထိုပ်ကာဒူင် လာယိုဝ် ဒီဇဝ်ဖြာ တွိုန်၊ ဂေဒူအီ ဘောဘူင် မာလာင် လှူဂေ၊ တဲးန့ကာဆိုမ် အူဘူင့်။ ဂေ ဒူအီ အီတူ ထူမ်ဒူပ် ဆာဒိက် ဇဝ်ဖြာ။ ဘောဂေ အီဟဲ့ ဘူင်ကာလိုပ် ဆာဒိက် ဇဝ်ဖြာ။ ကာဒူင့် တီ၊ ဂေဘော လုဝ်ဒိုဝ်း တးဒုဝ် ဆတ်တာ ဝါ၊ အီဟဲ့ဘွတ် အူဒုဝ်။ ဝါယ်အန်တီ၊ ဂေဘော လုဝ်တဲး၊ ဒါအီ လှူဒီ ဇဝ်ဖြာ အူဝီ ငဝ်းဒုဝ်ဆတ်တာဝါ တီ။ ဟဲ့ဟွတ့်၊ ဘော လုဝ် ဘ့လေး ဒဲင်မာလာင်။ ဟဲ့ဟွတ့်ဝီဒုဝ့် တာငဝ်တဲး န့ဘဲန် ပီဒီလှူ ကာဆိုမ်ဂေ ဒီဇဝ်ဖြာ။ ဇဝ်ဖြာ ဘောကာလာင်။ န့ဟဲ့မုး၊ ဒုဝ်ဆတ်တာဝါ တီ၊ အီဟဲ့ ကာဘိတ် မှာပ်ဒူအီတီ။ ခုဝ်အန်တီ၊ ဇဝ်ဖြာဘောတူ ဝီယိုဝ် မှာပ်ဒူအီတီ၊ ဇဝ်ဖြာ ဟဲ့ယိုဝ်၊ ဒူအီတီ ဟဲ့မုး ဒူအီ အီဟဲ့ ဆီငျာ ဘွတ်။ ဇဝ်ဖြာ ဘောတဲး၊ အာမုဝ်ဆဲ ဂါယ်အီဟဲ့မုး အူကတ် အူဝါဒီ အန်၊ အီဟဲ့စိူဝ် အာရုန် တွိုန်။ ဘောလှုက်လှာန်ဂါယ်၊ အီဒီ တးနာပန်ဂါယ်၊ ဇဝ်ဖြာ ဟဲ့ရဝ်း၊ တဲးန့ဘဲန် ဒါအီ လှူဒီဇဝ်ဖြာ။

ဒူအီ ဂေ တီ၊ ဘော ဆီဖဝ် ဒီ ထူမ် ဒူပ် ဆာဒိက် ပီဟဲ့ ဒွါ ဇ၀်ဖြာ ဒီ ဂေ။ ခု၀်၊ ဂေ ဟဲ့ ဘဲန် အာမျု၀် ဒူအီ ပီဟဲ့ရ၀်း ဇ၀်ဖြာ။ ဂေ ဘောဝီ ဆီဖ၀်၊ ဒီ ကြိုပ် အီ အန် ဇ၀်ဖြာ အူကာဒင် တီ။

အာမု၀်ဆဲ တွိုန်၊ ဆီငဲအန်ဟဲ့လှေန့်၊ အန် ဟဲ့ ကွယ် ဒဲင် နွန် ဆီနာယ် တွိုန်၊ ဂြု၀်း ဒီ ဇ၀်ဖြာ။ ခု၀် အန် တီ၊ ဂေ ဒူအီ ကိူန့် ဟဲ့ နှဝ့်ပန် ဒီ တးအန်။ ခု၀်၊ ဂေ ဘော ၀ီ တး၊ ကာဒူင့် ကွယ် အာရူန် တွိုန်၊ ဂေ ဘောဒိုဝ်း တးခြိဝ်ကိူန့်၊ ဂေဘော မှာန်တဲး အာရုန်ဘူင်၊ အာရိုပ် ဇဝ်ဖြာ မင်ကာဒင်၊ တဲးဂေ ပွိုန်ဒီကြိုပ်။ ခုဝ်ဂေ ဟဲ့ဘူင် ပါယ်တီ။ အာရိုပ် ဇဝ်ဖြာ။ ခုဝ်ပီ ဟဲ့ ဘူင် ဂေတီ၊ န့ဟဲ့ဘဲန် မှာပ် တာင်ဒီဂေ။

အာရူန် တွိုန်၊ အန်ဟဲ့ဟွတ့်ဒိုဝ်းတူတ့်၊ ခြိဝ်ပီ ဟဲ့ဒွါ ဂေဒီအန်။ ဟဲ့ဟွတ့်၊ အန်ဝီ ဘူင် အာရိုပ် မာမာက်။ ခုဝ်၊ ဂေ ဒူအီ ကိူန့် ဟဲ့ဘူင် ပါယ်တီ။ ဂေဘော ကြိုပ် အာရိုပ်တီ၊ ဂေဘော လှူပီဒီ လှူကာဆိုမ်ငဝ်။ ခုဝ်ဂေဟဲ့ ဘဲန် အူနဝ်း။ ခုဝ် ကူပ် ဟဲ့ဘူင် ဂေမှာပ် ပါယ်တီ၊ ဇဝ်ဖြာ ဘောရူ ကာဆဝ် ဒီဂေ။ ခုဝ်၊ ဇဝ်ဖြာ ဘောတဝ်း၊ ဒီပျာတ့် ဝဲန်ဂေ ဒူအီတီ။ ပန်တီ၊ အာမုဝ်ဆဲ တွိုန်၊ ဝီမှာန် ကွဲ့တဲး၊ အန်ဇ၀်ဖြာ မို၀်း န၀်း ရူ ဒီ ဂေ။ ခု၀်၊ ဇ၀်ဖြာ ဘော ၀ီ ဘျွင် န၀်း၊ အန် အာ၀် ၀ီ ပျာတ့် ၀ဲန်ဂေ ဒူအီ တီ။

အာမု၀်ဆဲ တွိုန်၊ အန် ဘော ၀ီ လေး လူင် ဒဲင် နွန် ဆီနာယ် တီ။ အာမုဝ်ဆဲ ဘော ၀ီ ဒို၀်း တး၊ ပီ ဟဲ့ ဒဲမ် ဒွါ ဇ၀်ဖြာ ဒါရာ ဂို၀် ညွင့် ဒဲင် မာ၀် ဒီ ဖ့လ။ အာမု၀်ဆဲ တွိုန်၊ အန် ဘော ယို၀် အာရိုပ် မာမက် ပဲ ဟဲ့ ဘူင် ဂေတွိုန်။ အန် ဘော ၀ီ ရူ ကာဆဝ်၊ အန် ဝီဒိုဝ်း မာ၀် ဒီ ဖ့လ တီ၊ ဆတ်ကာလာတ့်။

အာမု၀်ဆဲ တွိုန်၊ အန် ၀ီ ဘူင် တဲး အာရိုပ် မာမာက် ပီဟဲ့ဘူင်ဂေတွိုန်၊ တဲးန့ ကာလာတ့် ကာမှုန့်တူတ့်။ ဝါယ်အန် တီ။ အန်ဟဲ့ဟွတ့် ဘူင်ကာမှုန့်တူတ့်၊ အန်ဝီဒင် ကာဝှ် ဒူပ်အိုမ်။ ဟဲ့ဟွတ့်၊ အန်ဝီဒွါဂေ ဒျီင့်အိုမ်ပီ ဟဲ့ဒင် ကာဝှ် အန်တီ။ ဇဝ်ဖြာ ဘောဝီဘူင် တဲးဒူအီဂေ တီ၊ ကာဒုးဒုက် အူမျုဝ်၊ ပန်တီ ဒူအီဂေတီ၊ ဘောဝီယမ်ကိူန့် ကာဆဝ်။

အာမု၀်ဆဲ တွိုန်၊ အန် ဟဲ့ ဟွတ့် ပျာတ့် ၀ဲန် ဆာဒိက် ဂိုဝ်မျုဝ်၊ ပီ ဟဲ့ ဒွါ ဇ၀်ဖြာ။ ခုဝ်၊ အန် ဘော ၀ီ ဘူင် တာဒု၀် အန်၊ အီ ကာမာယ်၊ တဲးန့ ပီမာဝ် ဒီဖ့လတီ။ ဝါယ်အန်တီ။ အာမုဝ်ဆဲ တွိုန်၊ အန်ဘောဝီ ဟုဝ့်ဒဲင်နွန် တွိုန်၊ ဝီဆာခိုဝ် ဒီဇဝ်ဖြာ။ တဲး ဇဝ်ဖြာ ကာဝေ ဘ့လွှာ မှာပ်ဂေ ဒူအီကိူန့်တွိုန်။ ဇဝ်ဖြာ ဘောဝီထူမ် ဂြုဝ်းပီ ဟဲ့ဆာခိုဝ် အာမုဝ်ဆဲ တွိုန်။ ဟဲ့ဟွတ့်၊ အန် ဘော ကာဝေ ဘ့လွှာ ဝဲန်မှာပ်ဂေ။ အာမုဝ်ဆဲ တွိုန်၊ အန်ဘောဝီ ဒဲမ် ဆာဒိက် ဂိုဝ်မျုဝ်၊ ဇဝ်ဖြာ အီကာမာယ် ဒဲင် မာဝ် ဒီဖ့လ တီ။ ဟဲ့ ဟွတ့်၊ အန်ဘောဝီ လူင် ဒဲင်နွန်တွိုန်။ ဝါယ်အန်တီ၊ ဖဝ်ဖြာ ဘောဝီတဲး၊ ဒူအီ အီဆာရေလ ဂေ ဟာဝ်ဒူပ် န့တေန့် ဒဲင် နွ န် ဆီနာယ် ပီ ဟဲ့ဘ့လေး အန်ကာဒိက်ဆတ်ဇာတွိုန်။

A Bible story from: Exodus 19-34