၄၆ - လွင်ဝီဒူပ် အာဆောလူ နာပန်အန်ဇဝ်ယေဆူ
န့မိုဝ်း ဒါအူဝီ အန်ညှမ်မိုဝ်း ဒီညှိုမ် အန်ဇဝ်ယေဆူ၊ အန်စိုဝ် အာဆောလူ၊ ဒေါဒီတဲတ့်အန်၊ အန်ဟဲ့ဟွတ့် ဒွိုမ် ဘာခြိုင်ဂေ၊ အီငဝ်း ဆာထေဖာန်တွိုန်၊ ဝါယ်အန်တီ၊ အန်မိူဝ်မုး ဒူအီဒူပ် ဒီငဝ်းဒူအီ ညှိုမ်ဂေတီ၊ ခဲင်မိူင် ဂျေရူဆာလဲမ် တီ မိူဝ်ဘောအီမာယ် ဘောအီဘေန့်၊ အန်ဝီဒီ ဟုဝ့်ဒွန်ကာင် မှေတ့်ဟပ်ဂေခဲင်ထွင်။ ဟဲ့ဟွတ့်အာတီ၊ ဒါရြုဝ်တာင်အီ ဘူင် နာဘ့လာင်ဆီ ဆာနာတွိုန် ဘောဝီစ်ု အန်ဟဝ်မိူင် ဒမာသက်၊ တဲးအန် မှေတ့်တး ဒူအီအီညှိုမ် အန်ဇဝ်ယေဆူ ခူပ်အန်၊ အန်ကာလာင်ပါယ်တီ။
ခုဝ်အန် အာဆောလူတွိုန် ဘောဝီဟာဝ် မိူင် ဒမာသက် တီ။ အာတ့်ဇမ်အန်မိူင်တီ န့မိုဝ်း ဘ့လာင်တာင် ခဲင်ဂါန်ပြာဝ် ကာဘ့လုး လဲပ်အန်၊ အန်ဘောဝီ ကေးခဲင်ကာဒါယ်၊ ပန်တီ န့ပီ ဒါအူဝီတဝ်း ဒီအန် "အာဆောလူ အာဆောလူ မှာဝ်န့ပါယ် မဲပီဟြေတ့်မှာပ် ဒီအုဝ်"၊ အန်ယိုဝ်ဂြုဝ်း ဒီမွှတ်ဂေ ဒီအန် အာဆောလူတွိုန် ဘောဝီတဝ်း၊ ဒါဆာရာ အဆေမဲမု့ အန်ဟဲ့ဟွတ့် ဒီမွှတ်ပါယ်တီ၊ အန်ဇဝ်ယေဆူတဝ်း "မှာဝ်န့ပါယ် မဲဝီဒီဒူပ်ဒီ ဟြေတ့်မှာပ် အုဝ်မုး ဇဝ်ယေဆူ" အန်ဇဝ်တဝ်းပါယ်တီ။
ပန်ဒီယိတ့် အန်တွိုန်မိူဝ်၊ ငါယ်အန် ဟဲဝီလိုဝ်အဝ်လိုဝ်း ခုဝ် ဝီမုး ဂိုက်အန်ဂေ၊ ဝီဘာဟဝ်အန်၊ နာမိူင် ဒါမာဆက်တွိုန်၊ အာဒါအူယ်ဆီငဲ အာဆောလူ အဝ်မိုဝ်း ဒီပွိုန်ဒီဟူမ် မာဆေ။
"ခဲင်မိူင် ဒါမာဆက်တီ၊ န့မိုဝ်း ဒါဘဲအူဝီ အန်စိုဝ် အာနာနီ။ အန်ဇဝ်ဖြာတွိုန် ဘောဝီစ်ု အန်၊ "တဲးမဲ ဟာဝ်ကာင် အာ ဆောလူ၊ ဒါင်ဒဲမဲ ဒဲင်ဂိန့် အာဆေလူ တဲးငါယ် အန်ဝီလိုဝ်း" အန်ကာလာင်ပါယ်တီ၊ မာလဲ အာနာနီ ဘောဝီတဝ်း၊ "အိုယ်မဲ ဇဝ် အုဝ်ဟဲဒွိုမ်ယိုဝ်၊ ဒါတီဝီဝ် ဒီမှေတ့် ဒူအီ အီညှိုမ်ဂေ၊" အန်ဝီတဝ်းပါယ်တီ။ အန်ဇဝ်ဖြာဝီတဝ်း "အုဝ်ဟဲ့ဟွတ်ရဝ်းအန်၊ တဲး ဒူအီ ယူဒါ၊ ဘောဒူအီ အာမျုဝ်ဟဝ်၊ တဲးဂေဝီ ဘဲန်ဒူအီညှိုမ်၊ တဲးမဲဟဝ် ဒီတီ"၊ အန်ဇဝ်တဝ်းပါယ်တီ။
ခုဝ် အာနာနီတွိုန် ဘောဝီဟဝ် ခူပ် အာဆောလူ ဝီဒိုဝ်းဒဲအန် ဒါင်နာဒဲင်ဂိန့် အာဆောလူ တဝ်း "ဒေါတး မဲဒူပ်န့တေန် ပီယိုဝ်မဲတွိုန်၊ မုးအန်ဇဝ်ယေဆူ ဟဲဘူင် တာအာငျာန် ဘ့လာင် တဲးမဲဝီယိုဝ်အန်၊ အန်စ်ု အုဝ်ဟဝ်ခူပ်မဲ" အန်တဝ်းပါယ်တီ၊ ဒေါ မှာဝ်ဒေါအန်မိူဝ်၊ ငါယ်အာဆောလူ ဘောဝီလိုဝ်းအူဇေန်၊ ဟဲ့ဟွတ့် အန်ဘောဝီစိုပ် အန်ခဲင်အိုမ်၊ ဝါယ်အန်တီ အာဆောလူတွိုန် ဘောဝီပွိုန် ဒီ ဟူမ်ပီဒီဟူမ်၊ ဘောဝီမိုဝ်းဘ့လူမ်အူဇေန်။
ဒေါမှာဝ် ဒေါအန် အာဆောလူ ဘောဝီစုး ဒီကာလာင်လွင်အန်ဇဝ်ယေဆူ၊ ဒီတူအီယူဒါ ဂေဟဲ့ကွယ် ခဲင်မိူင် ဒါမာဆက်တီ၊ အန်တဝ်း "အန်ဇဝ်ယေဆူနီ မုးဂွန်အန်ဇဝ်ဖြာ" အန်တဝ်းပါယ်တီ၊ အာဆောလူတီ အဲတ့်နီ အန်မုးဒူ အီငဝ်း ဒူအီညှိုမ်ဂေ၊ ခုဝ်ဒူအီနီ အာခါ၊ အန်ဟဲဝီမုး ဒူအီညှိုမ်ခုဝ်ဒူအီ ယူဒါ ဂေ၊ ဘောဝီကာလာင် တဲးန့ဆီဘျုဝ်း ဘောမုး အန်ဇဝ်ယေဆူ မေဆီယ ဒီဂေ။
ဆီငဲအန်ဘောဝီလှေန်ဝါယ်တီ၊ ဒူအီ ယူဒါ ဂေဘောဝီစေန်စါပါယ် ဒီလုဝ်ဟြေတ့် ဒီငဝ်းအာဆောလူတွိုန်။ ဂေတီ လုဝ်ငဝ်း အာဆောလူ၊ ဂေဝီစ်ု ဒူအီဂေဘ်ု မာလုဝ်း မိူင်တီ ဒွန်ဘ့လာင်။ မာလဲ အာဆောလူတွိုန် ဟဲ့ဟွတ့်ဝီယိုဝ် ပီခြာမ် ဂေဒီအန်၊ ခုဝ် အန်ဝီစ်ု ဂိုတ်အန်ဂေ စွယ်အန်၊ တဲးအန်ပွိုန် ဒီလေးတဝ်။ အာဆောလူတွိုန် ဟဲဟွတ်လေးတဝ်တး မိူင် ဒါမာဆက်တီတွိုန်မိူဝ်၊ နပ်ဝီကာလာင်ဟဝ် လွင်အန်ဇဝ်ယေဆူ ပါယ်တီ။
အာဆောလူတွိုန် ဘောဝီဟဝ်ယိုဝ် ဒါဘဲအန်ဂေ အီကွယ် ခဲင်မိူင် ဂျေရုဆာလဲမ်၊ မာလဲ ဂေဝီယုဝ် အာဆောလူ တွိုန်။ ဟဲ့ဟွတ့် အာတီ န့မိုဝ်း ဒါအူဝီ အန်စိုဝ် ဗာနဗ အန်မုး ဒူအီညှိုမ်၊ အန်ဝီဒဲ့ဟဝ် အာဆောလူ နီ အန်ယကာလာင် လွင်အန်ဇဝ်ယေဆူ ခဲင်မိူင် ဒါမာဆက်တွိုန်၊ ဒီဒါဘဲအန်ဂေ၊ ပန်တီ ဒါဘဲ အန်ဂေ ဘောဝီ ညှိုမ် အာဆောလူတွိုန်။
ဒူအီ ပီဒီလုဝ်ငဝ်းဂေ ခဲင်မိူင် ဂျေရူဆာလဲမ်၊ ဘောဝီလုတ်လေးတဝ်တး မိူင်တီ၊ ဘောဒူအီ ညှိုမ်ဂေ မင်ကာလွင့် ဂေဝီဟဝ်မိူင် အန္တိအုတ် ဘောဝီကာလာင် လွင်အန်ဇဝ်ယေဆူ။ ဒူအီဂေဟဲကိူန် ကွယ်ခဲင်မိူင် အန္တိအုတ် တီ၊ မင်ကာလွင့် ဂေတူမုး ဒူအီယူဒါ၊ မာလဲ ဂေဝီမုး ဒူအီညှိုမ်ဒင်အာစအန် ဘောဝီ အဝ်မုး ဒူအီ ညှိုမ် ယူဒါ၊ ဗာနဗ ဂါယ် အာဆောလူ တွိုန် ဘောဝီမာနုဝ် ဒီဒူအီညှိုမ်ကာမာယ်ဂေ၊ လွင်အန်ဇဝ်ယေဆူ၊ ဟဲ့ဟွတ့် ဘောဝီကာလာင် တဲးန့ရိတ် ဆီဆာနာ ဇဝ်ဖြာဒီဂေ။ ဒေါအန်တီ ဂေစုးဒီတဝ်း ခါရိရှာန် ဒီဒူအီဂေ၊ အီ ကွယ်အီညှိုမ် ခဲင်မိူင် အန္တိအုတ်တီ။
ဇမ်အာဒါ အူဆီငဲတွိုန်၊ ဒေါဆီ ခိုဝ်ဒူအီ ညှိုမ်ဂေ၊ ဒီအန်ဇဝ်ယေဆူ၊ ဘောဝီယိူန် ပီဒီဟူမ်ဂေ၊ ဒေါဘူင်ဂေ ပါယ်တီ၊ အန်ဇဝ်ဖြာ ဆီငါဘွတ် တွိုန်တဝ်း "ဗာနဗ ဂါယ်အာဆောလူ နီ ဂါယ်ဟဲ့ဟွတ်ဘူင်၊ ပီစ်ု အုဝ်ဒီဂါယ်ဘူင်" အန် ဇဝ်တဝ်းပါယ်တီ၊ ပန်တီဒူအီဂေဟဲ့ကွယ် ခဲင်ဇူင်ကြိုပ်ဇဝ်ဖြာ အာနီအုတ်တွိုန်၊ ဘောဒိုဝ်းဒဲဂေ၊ ဒါင်နာ ဒဲင်ဂါယ် ဘောဝီ ဆီခိုဝ်တဲး ဒီဂါယ်။ ဝါယ်အန်တီဂေ ဝီစ်ု ဂါယ်ဟဝ် ကာလာင် လွင်အန်ဇဝ်ယေဆူ ဘောအူ ပ့လုဝ့်၊ ဗာနဗ ဂါယ် အာဆော လူ တွိုန် ပီမာနုဝ်ဂါယ် ဒူအီဂေဟဲကိူန်၊ ဒူအီဂေတီမိူဝ် ဟဲ့ဟွတ့်ဝီညှိုမ် အန်ဇဝ်ယေဆူ။
A Bible story from: Acts 8:3; 9:1-31; 11:19-26; 13:1-3