၂၂ - လွင် ဂွိုတ် အာယောဟန်

ပီဟဲ့ဟွတ့် ပွုန်ဟာဝ်နာပန် ပီဒီလုဝ် ကာလာင် အန်ဒီ ဒူအီအန်ဂေ၊ အန်ဇဝ်ဖြာ စ်ု ဒူအီ မိုဝ်းအာငျာန် နပ်ဒီခဲ ဟာဝ်နာအာတ့် ဂေတွိုန်၊ ကာလာင် ဒီဒူ အီဂေ၊ လွင်ဂြုဝ်းဒမ် ဒါရာ အန်ဇဝ်ဖြာ ဒီဒူအီဂေ။ ဝါယ် အန် တီ၊ ဇဝ်ဖြာ ဘော အာဝ် ဘူင် ကာလာင် ဂြုဝ်း ဒီ ဂေ ဒူအီ ဆီနမ် အန် ကော လှေန့် ဇမ် ဖွုန် မာယဝ်း။ ဝါယ် အန် တီ၊ န့ ဟဲ့ မိုဝ်း ဒူအီ အီ လှူ ဒီ ဇဝ်ဖြာ အူဝီ၊ အီ ဟဲ့ စိူဝ် အာဆာခါရာ။ ဇဝ်ဖြာ ဘ့လေး ဟာဝ် အာမူ အာမာတ် အန် အူ ဝီ ကာဒူင် ကွယ် ဒါ အီ လှူ ဇဝ်ဖြာ တီ။ အာဆာခါရာ ဂါယ် ပါဝ် အန် အီ ဟဲ့ မုး နာင် အေလီဆာဘေတ် တွိုန်၊ ဂါယ် ဘော ဘူင် ဒီ အိုပ် ဇဝ်ဖြာ။ အာဆာခါရာ ဂါယ် နာင် အေလီဆာဘေတ် တွိုန် ဂါယ် ဟဲ့ ဟွတ့် ကတ် ကာဆဝ်။ နာင် အေလီ ဆာဘေတ် တွိုန်၊ အန် တူ နပ် မိုဝ်း အာ ခြာဝ် ဒီ မိုဝ်း ဂွန်၊ အန် ဟဲ့ မုး အီဘေန့်မှန် အီ တူ နပ် ဒီ မိုဝ်း ဂွန် အူဝီ။

အာမူ အာမာတ် ဇဝ်ဖြာ တွိုန် ကာလာင် ဒီ အာဆာခါရာ တဝ်း၊ “အီဘိုန့် မဲ တွိုန် အန် ဒီ မိုဝ်း ဂွန် အီမာယ် အုဝီ။ မဲ လုဝ် တဲး အန် စိူဝ် အာယောဟန်။ ဇဝ်ဖြာ ဒီ တဲး အန် မိုဝ်း ပွုန် ဇဝ်ဖြာ ဘော နဝ်း ဖွိုမ် ဇဝ်ဖြာ ဇမ် ဒဲင် အန်။ ဂွန် မဲ အာယောဟန် တီ၊ အန် မိူဝ် ဒီ တဲး ဂေ ဒူအီ ကာပ့လုတ် နဝ်း၊ တဲး ဂေ ထူမ် ဂြုဝ်း ဇဝ်ဖြာ ဆေဆေ။ အန် ဟဲ့ န့ပြာယ် တဲး ဂေ ပွိုန် ဒီ ဒူပ် ဇဝ်ဖြာ။ အာဆာခါရာ ဝီ တဝ်း၊ “အုဝ်၊ အီဘိုန့် အုဝ် မှဝ် ယာ ဒီ ပါယ် ဒီ မိုဝ်း ဂွန် ယာ ဟဲ့ ဟွတ့် ကတ် ကာဆဝ်။ မှဝ် အုဝ် ဒီ ပါယ် ဒီ နပ် ဆီချာ၊ ယုဝ် ပီ တဝ်း မဲ ဟဲ့ မှာန်။:” အန် ကာလာင် ပါယ် တီ ဒီ အာမူ အာမာတ် ဇဝ်ဖြာ။

အာဆာခါရာ ဟဲ့ ဟွတ့် ကာလာင် ပါယ် တီ အာမူ အာမာတ် ဇဝ်ဖြာ ဝီ တဝ်း၊ “အုဝ် ဟဲ့ မုး အာကာပြီအေန်၊ အီ ဟဲ့ ဘူင် ဂါယ် ဇဝ်ဖြာ။ ဇဝ်ဖြာ ဟဲ့ တိုယ် အုဝ် တဲး အုဝ် ကာလာင် ဒီ မဲ။ ကူပ် တူ ညှိုမ် မဲ ဂြုဝ်း ပီ ကာလာင် အုဝ် ဒီ မဲ၊ အူ ဆိန့် ဒေါ တီ နီ ကော ဝီ ဇမ် အာခြာဝ် အာတ့် ဂွိုတ် ဂွန် မဲ၊ မဲ တူ ဝီ ပွိုန် ဒီ ကာလာင် ဂြုဝ်း။” အာမူအာမာတ် ဇဝ်ဖြာ ကာလာင် ပါယ် တီ။ ခုဝ် အူ ဇေန့် အာဆာခါရာ တွိုန် အာဝ် ပွိုန် ဒီ ကာလာင် ဂြုဝ်း။ ဝါယ် အန် တီ၊ အာမူ အာမာတ် ဇဝ်ဖြာ ဘော ဝီ ဘ့လေး အာဆာခါရာ။ အာဆာခါရာ တွိုန် အန် ဘော ဝီ ဝေန် ဇမ် ဒီ ကာင် အန်၊ ပန် တီ အီဘိုန့် အန် နာင် အေလီဆာဘေတ် ဘော ဝီ ဒဲ ဘာဒိတ် ဆန်ထေ။

နာင် အေလီဆာဘေတ် ဟဲ့ ဘာဒိတ် ဆန်ထေ ဟဲ့ ဝီ လှေန့် အာ ဒါ ဒဝ် မာဂျီန်။ ခုဝ် အာမူ အာမာတ် ဇဝ်ဖြာ တွိုန်၊ အန် ဘော ကာပ့လုး ဒီ နာင် မာရီ အီ ဟဲ့ မုး အာမျုဝ် နာင် အေလီဆာဘေတ်။ နာင် မာရီ တွိုန် အန် ဟဲ့ မုး ဒီ ဘျာ အူဝီ။ အန် ဟဲ့ ဟွတ့် လာယ် ဘဲန် အူ ပါဝ် ဒီ ကာညူမ် အီ ဟဲ့ စိူဝ် အာယုဝ်ဆဲပ် အူဝီ။ ခုဝ် အာမူ အာမာတ် ဇဝ်ဖြာ ဟဲ့ တး ကာပ့လုး တဝ်း ဒီ နာင် မာရီ၊ “မဲ ဒီ ဒဲ ဘာဒိတ် ဆန်ထေ။ မဲ ဒီ မိုဝ်း ဂွန် အီမာယ် အူဝီ။ မဲ လုဝ် တဲး ဂွန် တီ စိူဝ် အာယေဆူ။ အန် ဟဲ့ မုး ဂွန် ဇဝ်ဖြာ အီ တာင် လွှိုမ် တူတ့်။ အန် ဒီ ဘော အိုပ် မိူင် အန် ဆေဆေ။” အာမူ အာမာတ် ဇဝ်ဖြာ ကာလာင် ပါယ်တီ။

နာင် မာရီ ဝီ တဝ်း၊ “အုဝ် ဟဲ့ ဆီ မုး ဒီဘျာ။ ပီ တဝ်း မဲ ဒွန် မျုဝ် ဇိုဝ် တီ၊ မှဝ် န့ ဒီ ပါယ် ဒီ ဘဲန်။:” အန် ကာလာင် ပါယ် တီ။ ဒေါ အန် တီ အာမူ အာမာတ် ဝီ တဝ်း၊ “နဝ်း ဖွိုမ် ဇဝ်ဖြာ ဒီ တး ကွယ် ဒီ မဲ။ ဘော ပွုန် ဇဝ်ဖြာ အီ တာင် လွှိုမ် တူတ့် ဒီ တး ပ့လိုက် မဲ။ ခုဝ် အန် တီ၊ ခုဝ် ဂွန် တီ အန် ဟဲ့ မုး ဂွန် ဇဝ်ဖြာ အီ တာင် လွှိုမ် တူတ့်။” ဒေါ အန် တီ၊ နာင် မာရီ တွိုန် ဟဲ့ ညှိုမ် ဂြုဝ်း ပီ ဟဲ့ ကာလာင် အာမူ အာမာတ် ဇဝ်ဖြာ တွိုန်။

ဒေါ အန် တီ၊ အာခြာဝ် အန် ဘော ညှမ် လှေန့်။ နာင် မာရီ တွိုန်၊ အန် ဘော ဟာဝ် ကာဒူင့် ကွယ် နာင် အေ လီဆာဘေတ် တွိုန်။ နာင် မာရီ ဘော တဝ်း ဒီ နာင် အေလီဆာဘေတ်၊ “မဲ ဟဲ့ ကွယ် ဘျုဝ် ဒါ ခိုယ်။” ခဲင် ဝတ့် နာင် အေလီဆာဘေတ် တွိုန် ဂွန် အန် ဘော ရာဝီ ရာဝေန် ခဲင် ဝတ့် အန်။ ဂါယ် အီ ဘိုန့် အာ ဝီ တီ၊ ပီ ဘူင် ဒွါ ဇဝ်ဖြာ ဒီ ဂါယ် ဒွန် မျုဝ် တီ၊ ဂါယ် ဘော ဒါ ခိုယ် ကာဆဝ်။ နာင် မာရီ တွိုန်၊ အန် ဟဲ့ ဟာဝ် ဝီ ဒီ လဲင် ဒူပ် နာင် အေလီဆာ ဘေတ် တီ၊ န့ ကော လှေန့် အူယ် မာငျီင်။ ဟဲ့ ဟွတ့် အန် ဘော ဝီ တး ဒီ ကာင်အန်။

ဝါယ် ဟဲ့ ဟွတ့် ဘဲန် တး အန် ပါယ် တီ။ နာင် အေလီဆာဘေတ် တွိုန်၊ ဘော ဝီ ဇမ် အာ ခြာဝ် ဒီ ဂွန် အန်။ အန် ဘော ဝီ ဂွန် လေး ဂွန် အီမာယ် အူဝီ။ အာဆာခါရာ ဂါယ် နာင် အေလီဆာဘေတ် ဂွန် ဂါယ် အီမာယ် တွိုန်၊ န့ ဘော ပီ ပီ ကာလာင် အာမူ အာမာတ် ဇဝ်ဖြာ။ ဂါယ် ဘော တဲး အန် စိူဝ် အာယောဟန်။ ဝါယ် အန် တီ၊ ဇဝ်ဖြာ ဘော ဝီ ဘူင် တဲး အာဆာခါရာ တွိုန် ပွိုန် ဒီ ဂြုဝ်း။ အာဆာခါရာ ဘော ဝီ တဝ်း၊ “ဇဝ်ဖြာ ဟဲ့ စွယ် န့ လှုဝ်း ဂေ ဒူအီ ကိူန် အန် ဘော မွင့်ကာရာ ဒွါ ဒီ ဂေ။ မဲ အီ ဟဲ့ မုး ဂွန် အုဝ် တီ၊ မဲ ဒီ ဘဲန် ဒါ အီ လှူ ဒီ ဇဝ်ဖြာ အူဝီ အီ ဟဲ့ တာင် လွှိုမ် တူတ့်။ မဲ တီ အာ ဒါ ဒူအီ ဂေ၊ မဲ ဒီ ဘဲန် ဒါ အီ ဒီ ကာလာင် လွင် ဒါ အီ ဒီ ဘ့လွာ ဝဲန် မှာပ် ဂေ။” အန် ကာလာင် ပါယ် တီ။

A Bible story from: Luke 1