၄၈ - ဟဲ့ဟွတ့်လာယ်တဲး ကာဒိက်ဆတ်ဇာ မေဆီယာနီ တဲး အန်ဝီဘဲန် ဇဝ်ယေဆူ

ဒေါဖန်ဘ့လေး အန်ဇဝ်ဖြာ ကာဒါယ်တာင်နီ အာခါ၊ ပီတဝ်း မဲန့ကြိုဝ်း လွင်မှာပ် ဂေနီအာဝ်မိုဝ်း၊ န့ဘ့ဘြေတ့် ဝတူတ့်ဒွန်မျုဝ်။ အာဒမ် ဂါယ်နာင်အေဝါမိူဝ်၊ ဂါယ်လာယ်ရွင့်ခါနာဂါယ်၊ ဘောအန်ဇဝ်ဖြာရွင့်ပါယ်တီ၊ အဝ်မိုဝ်းဆဝ်၊ ကတ်၊ ဂေယမ်၊ အာနီမုး ပီဆီပွိုန်အန်ဇဝ်ဖြာ ဒဲင့်ကာဒါယ်တာင်နီ။

ကာနမ်စဝ်တွိုန် ကူပ်လုဝ်ကာလုဝ် အန်နာင်အေဝါ၊ အန်တာ ဟန်စ်ု ဂါယ်လာယ်မွုန်ခဲင်ကာပိုမ်တွိုန်။ ပန်တီမိူဝ်ဂါယ် အာဒမ်၊ ဘောဝီ ကာလိုပ်ဒီဘူင် မှာပ်ဒီအန်ဇဝ်ဖြာ။ ကူပ်ကာလိုပ်ဂါယ်ဒီဘူင် မှာပ်တီ၊ ပူင့်ဂေ အီကွယ်ဒဲင့်ကာဒါယ် တာင်နီ၊ လုဝ်ဝီယမ်တူတ့်ပါယ်တီ။

အာဒမ်ဂါယ်နာင်အေဝါတီ ကူပ်ဘူင်ဂါယ်မှာပ် ဒီအန်ဇဝ်ဖြာ၊ န့ပီ ပီဘူင်ဂါယ်ဝဲ ဝီဝ်ကာပွါ ဟာဝ်ဘောမျုဝ်ခုဝ်၊ ဝီဘဲန်ဂါယ် ရန်ဆူ အန်ဇဝ်ဖြာ။ ကူပ်ပါယ်အန်တီ၊ ဒူအီဂေ ပူင့်ဟဲဂွိုတ်၊ ဆိန့်ဒေါအန်တီ၊ ဂေဟဲ ကာလိုပ်ဒီဘူင် မှာပ် ဘောဝီမုး ရာန်ဆူအန်ဇဝ်ဖြာ၊ ခါနာဒူအီ ဂါယ်အန်ဇဝ်ဖြာ အာဝ်မိုဝ်းဂျီ့ယေန်အန်။ မာလဲအန်ဇဝ်ဖြာ နပ်ဝီဘူင် တဲး န့ဂျီ့ယေန်ပါယ်တီ။

န့ဒီမိုဝ်း အူဝီ ဟဲ့ယိတ့်နာပန်နာင်အေဝါ၊ အန်ဒီညာတ့်ကာတင့် ဂိန့်ကာနမ်စဝ်တွိုန်၊ အန်မိူဝ် ဒီဝီကဝ့်ကာ နှုယ့်ဒါတီ။ အန်ဇဝ်ဖြာ ဟဲ့ဟွတ့်တဲး ကာဒိက်ဆတ်စာ ပါယ်တီ၊ ကာနမ်စဝ်တွိုန် ဘောဝီတာဇမ်မျုဝ် မှာဝ်၊ လုဝ်ငဝ်း မေဆီယ တီမိူဝ်၊ အန်ဇဝ်ဖြာတွိုန်၊ နပ်ဝီဟပ်တဲး ဖွိုန်ဒီအန်။ မေဆီယတီ ဒီဝီဒိုဝ်း တူတ့်ပွုန်ကာနမ် စဝ်ဂေတီ၊ ဆီနမ် အန် ဘောဝီလှေန်ဟာဝ်မိူဝ်၊ အန်ဇဝ်ဖြာ ဒီဝီတဲး မေဆီယာတွိုန်၊ ဘောဝီမုးအန်ဇဝ်ယေဆူ။

အန်ဇဝ်ဖြာတီ၊ တဲးန့ဒီဘဲန် အိုမ်တာင် အိုမ်တူင့် တဲးဂေလုတ့်တး အန်တီ၊ အန်ဘောကာလာင် ဒီနောအေ၊ ဘောန့ ဟူမ် အန်ဂေဘော ကာဂ့လျီ့တဲး ဂေရန်ရိုဝ်ဆမ်ဖုဝ်အူလှင်။ အန်ဇဝ်ဖြာတီ လုဝ်ချွှတ်ဒူအီညှိုမ်ဂေ၊ အန်ပါယ်နီ ဒီချွှတ်ဂေ။ န့ပါယ်နီ၊ ဒူအီနီဒွန် အီမိုဝ်း ဒီဘူင်မှာပ်၊ ခုဝ်န့ထတ်န့ ဒီလုဝ်ယမ်၊ ဒီအန်ဇဝ်ဖြာ ပီဘူင်ဟာဝ်အေဒွန် အီ။ မာလဲ အန်ဇဝ်ဖြာတီ၊ အန်ဘောဝီ စ်ု အန်ဇဝ်ယေဆူ လူင်၊ လုဝ်ဝီချွှတ်ဒူအီ အီညှိုမ်အန်ဒွန်အီ။

ကာဘက် ဆီနမ်ဘီအန် ဟဲလှေန်လဲ၊ ဂေဒါတာင် ဟဲဘူင်နာဘ့လာင် ဆီဆာနာဂေတွိုန်ဂေ ဟဲမိုဝ်း ဒီဘူင်ဒီ လှူဒီဒါန် ဒီအန်ဇဝ်ဖြာ၊ အာနီ အာခါ ဒူအီဂေ ဟဲဟွတ့်ကာလိုပ် ဒီဘူင်မှာပ်၊ မှာပ်ပီဘူင်ဂေတွိုန် ဒီအန်ဇဝ်ဖြာ၊ ဂေထာင် ဟဲဟွတ့်လာယ် ဒီဒါန်ဒမ်ပီတဲးဇဝ်ဖြာဒီဂေ။ မာလဲ တာပီဒီလှူဂေ ဒွန်မျုဝ်တီ၊ အာဝ်ပဲဒီကာဒးမှာပ်ဂေ၊ အာဝ်ပဲဒီချွှတ် အာဆာင်ဂေ။ အန်ဇဝ်ယေဆူတီမုး ဒူအီတာင်နာ ဘ့လာင် ဆီဆာနာ ပီတူပဲဒါတာင်ဂေဟဝ် ဒီဘူင် အန်ဇဝ်ယေဆူ ပဲဒီ ဘူင်တူတ့် ဒွန်မျုဝ်။ ကူပ်ဝီလုဝ် ချွှတ်မှာပ်ဒူအီဂေ ဒွန်အီ၊ အန်ခမ်ကာဂ့ရဝ်း ဒီအာဆာင်အန် လှူဒီအန်ဇဝ်ဖြာ။ မှာပ်အေ ဒွန်အီ၊ တဲးန့ဝီ စုဝ်းတူတ့် ဒဲင်အန်အူဝီ၊ ဒမ်ပီတဲး အန်ဇဝ်ဖြာ၊ အန်ဒိုဝ်းဒီဟိုပ် တူတ့်ဒီအန်အူဝီ။ မဲယွတ့်အာနီ၊ အန်ဇဝ် ယေဆူတီမုး၊ အီတာင် လွှိုမ်တူတ့်၊ ဘောဝီမုး အီဘြေတ့်ဝ တူတ့်ဒွန်မျုုဝ်။

အန်ဇဝ်ဖြာတွိုန် ဘောဝီတဝ်းဒီ ဒါအာဘျာန်ဟမ် "အုဝ်နီစုးဒီမဲ ခဲင်ကွယ်မိူင်ဒွန်မိူင်၊ ဘောဒူအီ အာမျုဝ်ဒွန် မျုုဝ်၊ အုဝ်ဒီမွင့်ကာရာတဲးဒီဂေ" အန်ဇဝ်တဝ်းပါယ်တီ။ အန်ဇဝ်ယေဆူနီ၊ တးဒီအာမျုဝ် ဒါအာဘျာန်ဟမ်။ အန်ဇဝ် ဖြာတီ၊ ပူင့်ဒူအီဂေအီညှိုမ် အန်ဇဝ်ယေဆူ ဒွန်အီ ဘောဝီချွှတ်တဲးမှာပ်ဂေ၊ အာစု ဒူအီကိူန်းဂေတီမိူဝ်၊ တာဒါ အာဘျာန်ဟမ်တီ၊ ဝီတဲးန့မွင့် ကာရာဒီဂေ။ ဒူအီဂေတီမိူဝ် ဒေါဝီညှိုမ်ဂေ အန်ဇဝ်ယေဆူတွိုန်၊ အန်ဇဝ်ဖြာတဝ်း ဂေတီမုး၊ ဒူအီအာမျုဝ်ဒါ အာဘျာန်ဟမ်၊ အန်ကာဒွါ န့ပါယ်တီ။

အန်ဇဝ်ဖြာတွိုန် စ်ုဒုဝ်ဒါ အာဘျာန်ဟမ် တဲး အန်လှူဂွန်အန်၊ ဒီအန်ဇဝ်ဖြာ။ မာလဲ အန်ဇဝ်ဖြာတွိုန်၊ အာဒါပီ ဒီလုဝ်လှူအန်ဂွန်အန်တွိုန်၊ အန်ဇဝ်ဖြာ ဘောဝီလွှီဝ်မာဘူ အူဒုဝ် ဒါင်ဂွန်အန်တီ။ အေဒွန် အီနီမိူဝ် ကာအာပ်အေလုဝ် ယမ် ကူပ်မှာပ်အေ။ မာလဲ အာဒါအေဒီလုဝ်ယမ်နီ၊ အန်ဇဝ်ဖြာ ဘောဝီစ်ု အန်ဇဝ်ယေဆူ၊ ခမ်ယိူန်၊ ခမ်စှိုမ်တူတ့်ဒွန် မျုဝ်ဒါင်အေ။ ခုဝ်အန်အေတဝ်း၊ အန်ဇဝ်ယေဆူနီ အန်မုး မာဘူအန်ဇဝ်ဖြာ။

အန်ဇဝ်ဖြာတွိုန်၊ ဒေါတဲးအန်ဆဝ်ကာပ် ခဲင်မိူင်အီဂျစ်တွိုန်၊ ပန်ဒီဝီဟွတ်အန် စိုပ်ပန်တီ၊ ခဲင်ကွယ်န့ဟူမ် အီဆာရေလဂေ ဒွန်န့ဟူမ်၊ တဲးဂေငဝ်းမာဘူ အူဒုဝ်၊ ဒွန်န့ဟူမ်စီတဲးဂေငဝ်းပါယ်တီ။ မာဘူဂေတီ မိူဝ်ခေါအူဒုဝ် ကွယ် တဲးန့မိုဝ်း ကာဒူင့်စျဲယ်အန်။ ဟဲ့ဟွတ့်အာတီ၊ နှာမ်မာဘူဂေတွိုန်၊ ဝီဒိုဝ်းဖဝ်းနာဒဲင် မာလုဝ့် အာဘ့လာင်အန်။ ဆေအန် ဇဝ်ဖြာ ဘောဝီယိုဝ် နှာမ်ဂေတီမိူဝ်၊ အန်တူဝီငဝ်း၊ ဂွန်ဂိန့် ဟဲ့ကွယ်ခဲင်ကာင်တီ အန်ဒီဝီဝ်ကာလုဝ်းဟဝ်။ လီပီဘူင်ဂေနီ၊ အန်ဇဝ်ဖြာတဝ်း၊ န့မုးဘ့လွယ် ပါဆာခါ၊ အန်တဝ်းပါယ်တီ။

အန်ဇဝ်ယေဆူတီ န့ပီမာဘူဘ့လွယ် ပါဆာခါတွိုန်၊ အန်တီ အာခါ၊ ဒူဒွိုမ်မိုဝ်း ဒီဘူင်မှာပ် ဒေါမှာဝ်၊ ခုဝ်ဒီအန်မိူဝ် အာဝ်မိုဝ်း မာဆေ၊ ပီတဝ်း မဲ န့ကြိုဝ်းပီ ဟဲကာလိုပ်အန်၊ ဒေါမုးဘ့လွယ် ပါဆာခါတီ၊ အန်ကာဒုးငဝ်းယမ်ဂေအန်။ ဘောဝီမုး ဇမ်အာဆေ မာလဲ၊ ပူင့်ဂေအီညှိုမ် အန်ဇဝ်ယေဆူတွိုန်၊ အန်ဇဝ်ယေဆူ တာနှာမ်အန်၊ တဲးန့လာယ်လွ မှာပ်ဂေ။ မှာဝ်န့ပါယ်ခုဝ်အန်၊ န့ပီဒါတီ ကွယ်ခြိုမ် မာလုဝ်း ပီဖဝ်းဂေနှာမ် မာဘူတွိုန်၊ ခုဝ်ဂေ ဘောဝီလုတ့်တး တဲး အန်ဇဝ်ဖြာ တဲးဒမ်ဒီဂေ၊ န့ပါယ်တီ။

အန်ဇဝ်ဖြာတွိုန်ထာင် အန်ဂါယ် ဒူအီ အီဆာရေ ဟဲလာယ်ကာမဲန် ခုဝ်အန်ဘောဝီ ဘူင် ပဋိညာဉ် (ဆာဒိက်) ဒီဒူအီ အီဆာရေလ ဂေတီ။ မာလဲ အန်ဇဝ်ဖြာတွိုန် ဝီဘူင်အီကာမာယ် ပဋိညာဉ် (ဆာဒိက်) အာဒါအေ ဒူအီဒွန်အီ။ အာဝ်မိုဝ်းအာနီ၊ ဘောမုးဇမ် ဒူအီမျုဝ်မှာဝ်၊ ဂေမုးန့ကြိုဝ်းအန်ဇဝ်ဖြာ၊ ခုဝ်အန်မုး ဒူအီညှိုမ်အန်ဇဝ်ဖြာ အန်ဘူင်ပါယ်နီ။

အာမုဝ်ဆဲ တွိုန်အန်ဂဝ်ပွုန်အန်ဇဝ်ဖြာ၊ ကာလာင်ဂြုဝ်းအန်ဇဝ်ဖြာဒီဂေ၊ မာလဲ အီမုး အန်ဇဝ်ယေဆူ အူဝီမုး ဒူအီ ဘွတ်မျတ်တာင် လွှိုမ်တူတ့်ဂေ၊ ဘောမိုဝ်း အာငျာန် ဘောနပ်ဒီခဲဟာဝ် နာအဲတ့်၊ မာလဲ ကူပ်မုး အန်ဇဝ်ဖြာတီ၊ ပီဘူင်အန် ဒွန်မျုဝ်၊ ပီကာလာင်အန်၊ ဂြုဝ်းပီဟိုဝ်းလေးအန် ဒွန်ဘူင့်တီ၊ န့ဘဲန်တူတ့် ဂြုဝ်းအန်ဇဝ်ဖြာတီ။

အန်ဇဝ်ဖြာတွိုန် ဟဲ့ဟွတ့်တဲး ကာဒိက်ဆတ်စာ၊ ဒီခုန်ဒီခမ်အာ ဒါဝိတ်၊ ဒူအီမဲ ဟဲယိတ့် ဟဝ်နာအဲတ့်တီ၊ တဲး ဂေဝီအိုပ်န့ကြိုဝ်း အန်ဇဝ်ဖြာနီ၊ အန်ဇဝ်ယေဆူတီ၊ အန်မုး မေဆီယ ဘောဝီမုး ဂွန်အန်ဇဝ်ဖြာ။ အာဝ်ဝန် ခဲင်တီ ကူပ်မုး အန် န့ကြိုဝ်း ခုန်ဒီခမ် အာဒါဝိဒ်တွိုန် ခုဝ်အန်ပွိုန်ဒီအိုပ်ဟဝ် အူစုဝ်ဂမ်ဖာပါယ်တီ။

ခုန်ဒီခမ် အာဒါဝိတ်တွိုန် အာခါ၊ အန်မုးလဲ ခုန်ဒီခမ် အီဆာရေလဂေ၊ အန်ဇဝ်ယေဆူ အာခါ၊ ခဲင်ကွယ် ဂါန်ဟြာဝ် ဘောကာဂ့လျီ့၊ အန်မုးတူတ့် ခုန်ဒီခမ်ဂေ။

A Bible story from: Genesis 1-3, 6, 14, 22; Exodus 12, 20; 2 Samuel 7; Hebrew 3:1-6, 4:14-5:10, 7:1-8:13, 9:11-10:18; Revelation 21