၁ - ဖန်ဆင်ꩻ

အကျောင်ꩻခရာႏအာယိုနောဝ်ꩻ ဘုရာꩻသျင်ꩻအစရီးသွတ်ꩻကာ စစရာႏရာႏထွာဖန်ဆင်ꩻခါꩻပွုံႏသွူ။ ဘုရာꩻသျင်ꩻနောဝ်ꩻ စကျာႏ၀ဠာႏတန်တွမ်ႏစစရာႏရာႏလို့လို့ယို ထွာဖန်ဆင်ꩻခါꩻသူနီꩻအတွင်ꩻသွူ။ ဘုရာꩻသျင်ꩻ စဖန်ဆင်ꩻခါꩻဖေႏ ကမ္ဘာႏတန်နောဝ်ꩻ တမုဲင်ႏမꩻ လꩻဖန်ဆင်ꩻဗာႏဒွုမ်းတွော့ꩻ ကမ္ဘာႏနောဝ်ꩻ ခေ့ꩻကရစ်ထွူ ဟင်ႏလင်ပြင်ꩻတမုဲင်ႏအဝ်ႏတဝ်းသွူ။ ကွဲႏတွော့ꩻ ဘုရာꩻသျင်ꩻ ထာꩻသေဉာဏ်ႏအရောင်ႏနောဝ်ꩻ ကမ္ဘာႏထီမဲ့ꩻငါလောင်းအဝ်ႏသူနဝ်ꩻသွူ။

နဝ်ꩻဆချာ ဘုရာꩻသျင်ꩻနောဝ်ꩻ “ကမ္ဘာႏယိုထာꩻလေရောင်ႏအဝ်ႏလွဉ်ဟုဲင်း” ဖေႏခါꩻခန်းဗျာဒိတ်တောႏ နုဲင်းနဝ်ꩻသွူ။ နဝ်ꩻတွော့ꩻ ကမ္ဘာႏလောင်းယို ထာꩻလေရောင်ႏအဝ်ႏလွဉ်သွူ။ ဘုရာꩻသျင်ꩻထီႏထာꩻလေရောင်ႏယံတွော့ꩻနိက်သက်သွူတဲင် ဟဲ့ခန်း ‘မွူးယာ’ နဝ်ꩻသွူ။ ထာꩻလေရောင်ႏယို ခွဲꩻထန်ႏသွူ ထာꩻခေ့ꩻတဲင် ထာꩻခေ့ꩻယို ဟဲ့ခန်း ‘မွူးဟာ’ နဝ်ꩻသွူ။ ဘုရာꩻသျင်ꩻနောဝ်ꩻ ထာꩻလေရောင်ႏယို ဖန်ဆင်ꩻခါꩻ ပထမနီꩻသွူ။

ဖန်ဆင်ꩻဒုတိယနီꩻနောဝ်ꩻ ဘုရာꩻသျင်ꩻ “ထီအလောင်းဖြန်ကျဲက်ခါꩻဒါႏထာꩻတဗာႏအဝ်ႏလွဉ်ဟုဲင်း” ဖေႏ ခန်းဗျာဒိတ်နုဲင်းနဝ်ꩻသွူ။ ကထွိုင်ႏရိုꩻနုဲင်းနောဝ်ꩻ ဖြန်ကျဲက်ခါꩻဒါႏထာꩻတဗာႏအဝ်ႏလွဉ်သွူ။ ဘုရာꩻသျင်ꩻနောဝ်ꩻ ကဖြန်ကျဲက်ꩻခါꩻဒါႏ ထာꩻတဗာႏယို ဟဲ့ꩻ “မို့ꩻလောင်း” နဝ်ꩻသွူ။

တတိယနီꩻတွော့ꩻ ဘုရာꩻသျင်ꩻနဝ်ꩻ “ထီကားကအဝ်ႏ စုꩻထွူတထွိုင်းချင်ႏ ဖေႏကပေါႏပေါက်ဟံ့ႏကွုံႏဟုဲင်း” ဒေါ့ꩻသေꩻဗျာဒိတ်နုဲင်း နဝ်ꩻသွူ။ ဘုရာꩻသျင်ꩻဟံႏကွုံႏယိုနောဝ်ꩻ ဟဲ့ꩻ ‘ကမ္ဘာႏဟံႏတန်’ တွော့ꩻထီဖုံႏနောဝ်ꩻ ဟဲ့ꩻ ‘ပင်ႏလယ်ႏ’ သွူ။ ဘုရာꩻသျင်ꩻနဝ်ꩻ ဝွေꩻကဖန်ဆင်ꩻခါꩻဒါႏ စစရာႏရာႏလို့လို့ယို ထီႏခါꩻဒျာႏ ယံယံကျကျတဲင်၊ နိက်သက်မွေးငါႏနဝ်ꩻသွူ။

နောဝ်ꩻဆချာ ဘုရာꩻသျင်ꩻနဝ်ꩻ “ကမ္ဘာႏဟံႏတန်ကို သေင်ႏမွူး တွမ်ႏကဝ်ႏမွူးမျိုꩻစွုမ်ႏယို ယံကဒေါ့ꩻပေါႏပေါက်ဟုဲင်း” ဖေႏခါꩻခန်းဗျာဒိတ်နုဲင်းနဝ်ꩻသွူ။ နဝ်ꩻတွော့ꩻ သေင်ႏမွူး၊ ကဝ်ႏမွူးဖုံႏ ထွာလွဉ်ဒေါ့ꩻပေါႏပေါက်ခန်းနဝ်ꩻသွူ။ ဘုရာꩻသျင်ꩻနဝ်ꩻ ကထွိုင်ႏထီႏ ဝွေကဖန်ဆင်ꩻခါꩻဒါႏ စစရာႏရာႏလို့လို့ယို ထီႏယံနိက်သက်မွေးငါႏနဝ်ꩻသွူ။

ဖန်ဆင်ꩻစတုတ္ထနီꩻတွော့ꩻ ဘုရာꩻသျင်ꩻနဝ်ꩻ “မို့ꩻလောင်းထာꩻလေရောင်ႏ အဝ်ႏလွဉ်ဟုဲင်း” ကထွိုင်ႏဖေႏဗျာဒိတ်နုဲင်းနဝ်ꩻတဲင် မွူး၊ လာ တွမ်ႏ ဆာႏအာယိုပါ အွဉ်ႏပေါႏပေါက်လွဉ်သွူ။ ဘုရာꩻသျင်ꩻရိုꩻ မွူး၊ လာ၊ ဆာႏဖုံႏယိုနဝ်ꩻ ကမ္ဘာႏဟံႏတန်အတာႏ ယံကဖေႏထာꩻလေရောင်ႏအတာႏတွမ်ႏမွူးယာ၊ မွူးဟာ၊ ရာႏသီႏဥတုဖုံႏ၊ မတ်အီသက္ကရာဇ်ဖုံႏ ဖန်ဆင်ꩻခါꩻသွူ။ ဘုရာꩻသျင်ꩻနောဝ်ꩻ ယူႏ စဉ်ꩻစာꩻချာသွူ ဝွေꩻကဖန်ဆင်ꩻခါꩻဒါႏ စစရာႏရာႏလို့လို့ယို ထီႏယံ နိက်သက်မွေးငါႏသွူ။

ငတ်ꩻနီꩻမျောက်တွော့ꩻ ဘုရာꩻသျင်ꩻနဝ်ꩻ “ထီအာကိုအွဉ်ႏဗွေတွမ်ႏ သက်အဝ်ႏတဲင်၊ မို့ꩻလောင်းသူꩻ ဝါးပေႏဖုံႏကျောင်ꩻဟုဲင်း” ဖေႏခါꩻခန်းဗျာဒိတ်နုဲင်းနဝ်ꩻသွူ။ တွမ်ႏအနယ်ꩻယိုတဲင် ဘုရာꩻသျင်ꩻ ထီကိုကယားကွက်ꩻဒါႏ အမျိုꩻအာယိုထွဉ်ႏယားထွူတဲင် ဝါးပေႏဖုံႏယိုတဲ့ꩻ ဖေႏကကျောင်ꩻဒါႏ မာꩻခါꩻဗာႏနဝ်ꩻသွူ။ ဘုရာꩻသျင်ꩻနဝ်ꩻအမျိုꩻအာဖုံႏယိုထီႏယံထွူတဲင် အမျိုꩻအာဖုံႏယို ဖေႏခန်းထာꩻယံ မင်္ဂလာႏနဝ်ꩻသွူ။

ဖန်ဆင်ꩻဆဌမနီꩻတွော့ꩻ ဘုရာꩻသျင်ꩻနဝ်ꩻ “ကအုံဒါႏကောင်လောင်း သတ္တဝါႏအာဖုံႏယို ပေါႏပေါက်လွဉ်ဟုဲင်း” ဖေႏခါꩻခန်းဗျာဒိတ် နုဲင်းနဝ်ꩻသွူ။ နောဝ်ꩻဆချာ ဘုရာꩻသျင်ꩻကဒေါ့ꩻအတွိုင်ꩻ ပေါႏလွဉ်ထွူတဲင် ယဟန်ႏနဝ်ꩻ ထွာတိရိစ္ဆာန်ႏလွူး၊ ယဟန်ႏနဝ်ꩻ တွာလွေꩻဟံႏလောင်း၊ ယဟန်ႏနဝ်ꩻ ထွာတိရိစ္ဆာန်ႏရွိုင်ꩻစွိုင်ꩻထာꩻခြာꩻနဝ်ꩻသွူ။ နဝ်ꩻဆချာ ဘုရာꩻသျင်ꩻနဝ်ꩻ ထွားသွူအမျိုꩻကအာဖုံႏယိုတဲင် နိက်သက်အာႏရမွေးငါႏနဝ်ꩻသွူ။

နဝ်ꩻဆချာဘုရာꩻသျင်ꩻနဝ်ꩻ “လိုꩻဖုံႏကားကအဝ်ႏ ဖေႏကဗွိုန်ခွေနဝ်ꩻ ဖန်ဆင်ꩻဗွိုန်ခွေနမ်းဟုဲင်း၊ဝွေꩻသီးဖုံႏယိုနဝ်ꩻ ကမ္ဘာႏတန်တွမ်ႏ တိရိစ္ဆာန်ႏဖုံႏအလောင်း မဲ့ꩻအုပ်ချွုတ်အုပ်စိုꩻဒျာႏ” ဖေႏခါꩻခန်းဗျာဒိတ်နုဲင်းနဝ်ꩻသွူ။

တွိုႏနဝ်ꩻတွော့ꩻ ဘုရာꩻသျင်ꩻနဝ်ꩻ ထူႏဟံႏ ယဟန်ႏတဲင် မာꩻလိုꩻခိုပွုံႏသွင်ꩻထွူအသက်တွော့ꩻ လိုꩻနဝ်ꩻအမဉ်ꩻနဝ်ꩻ ဖန်ဟဲ့ꩻခန်း ‘အာဒမ်’ နဝ်ꩻသွူ။ ဘုရာꩻသျင်ꩻ ‘အာဒမ်’ အုံတာႏ ဖန်ဆင်ꩻဖေႏခန်း ဥယျာဉ်ႏတန်ထွူ၊ ခင်ႏလမ်း နဝ်ꩻ အွဉ်ႏသꩻချံႏချံႏသာႏသာႏခန်းဝွေꩻ၊ ထွဉ်ႏ အွဉ်ႏရေꩻပါခန်းနဝ်ꩻသွူ။

ဥယျာဉ်ႏတန်ထာꩻဝကို ဘုရာꩻသျင်ꩻနဝ်ꩻ သက်သေင်ႏမွူးတွမ်ႏ အဟဝ်အကုဲင်ကသေနွောင်ꩻဒါႏ ထာꩻသေဉာဏ်ႏသေင်ႏမွူးကရိုꩻ အွဉ်ႏသေꩻခါꩻသေင်းမွူးထူꩻချာꩻ နီမွူးသွူ။ ဘုရာꩻသျင်ꩻနဝ်ꩻ အ ဟဝ်အကုဲင် ကသေနွောင်ႏဒါႏ ထာꩻသေဉာဏ်ႏသေင်ႏမꩻ အလင်ကားကအဝ်ႏ သေင်ႏမွူးယို အံႏလꩻဒျာႏ၊ ကွဲႏတွော့ꩻ မိဉ်ႏအံႏထာꩻသေဉာဏ်ႏသေင်ႏမွူးအရာႏနဝ်ꩻ ‘အာဒမ်’ သီထိုꩻဒါႏပညတ်ခါꩻခန်းနုဲင်းနဝ်ꩻသွူ။

နဝ်ꩻထွူ ဘုရာꩻသျင်ꩻနဝ်ꩻ “မိဉ်ႏထွာလိုꩻတဖြာꩻဒျာႏနဝ်ꩻ ယံတဝ်း” ရိုꩻစားနဝ်ꩻတဲင် တိရိစ္ဆာန်ႏကားကအဝ်ႏဖုံႏနဝ်ꩻ တထွာနွောင်ꩻ တဝ်း ‘အာဒမ်’ သွꩻသွူ။

နဝ်ꩻတွော့ꩻဘုရာꩻသျင်ꩻထွဉ်ႏဗေင်ႏအွီႏသွူ ‘အာဒမ်’ တဲင် ထူႏ ‘အာ ဒမ်’ ရွို့ဆွတ်ꩻတလီးတွော့ꩻ ဖန်ဆင်ꩻထွူလိုꩻမူႏတဖြာꩻ၊ ဟဲ့ꩻလွဉ်ဖေႏ ‘အာဒမ်’ ထျꩻနဝ်ꩻသွူ။

‘အာဒမ်’ နဝ်ꩻ ကထွိုင်ႏထီႏ ဝွေꩻမူႏတဲင် “အဆုဲင်ꩻယိုတဖြာꩻနဝ်ꩻ အဗွိုန်ခွေ ဝွေꩻမူႏယို ဟဲ့ꩻလိုꩻမူႏ” ဒေါ့ခန်းနုဲင်းနဝ်ꩻသွူ။ လိုꩻခိုဖုံႏနဝ်ꩻ စွဉ်ꩻပယ်ႏထိုꩻဝွေꩻသီးဖုံႏအမွိုးအဖာတဲင် ကတဖော့ဗာႏတွမ်ႏလိုꩻမူႏယို လိုꩻမူႏနဝ်ꩻ ပွိုးအဝ်ႏ လိုꩻခိုထျꩻပေါ်လွဉ်နဝ်ꩻသွူ။

ဘုရာꩻသျင်ꩻနဝ်ꩻ လိုꩻခိုတွမ်ႏလိုꩻမူႏယို ဖန်ဆင်ꩻဗာႏ ဝွေꩻပွုံႏစံႏ အတွိုင်ႏသွူ။ ဘုရာꩻသျင်ꩻ ဖေႏဝွေꩻသီးထာꩻဟဝ်တွော့ꩻ “လွူးလွဉ် ပိုဖုံႏ လီꩻဖုံႏတဲင် ယံကထဲင်ထွားဖေႏ ကမ္ဘာႏဟံႏဟုဲင်း” မိန်းရိုꩻနေးနဝ်ꩻသွူ။ နောဝ်ꩻတွော့ꩻ ဘုရာꩻသျင်ꩻ ဝွေꩻကမာꩻခါꩻဒါႏ စစရာႏရာႏယို ယံငါႏ ထီႏနေးနောဝ်ꩻတဲင် စစရာႏရာႏလို့လို့ယို ဟွိုန်ဟဝ်ကေꩻနပ်ငါႏသွူ။ စစရာႏရာႏယိုနဝ်ꩻ ထွာလွဉ်ဖန်ဆင်ꩻ ဆဌမနီꩻသွူ။

ကထွိုင်ႏတွိုႏ နွတ်ꩻနီꩻတွော့ꩻ ဘုရာꩻသျင်ꩻနဝ်ꩻ ဝွေꩻကမာꩻခါꩻဒါႏစစရာႏရာႏ ထွူဖြီႏစီႏ ထိုꩻသွူ။ ဝွေꩻနဝ်ꩻနွတ်ꩻ နီꩻမျောက်ယို ဖေႏသွူထာꩻဟဝ်မင်္ဂလာႏတဲင် မာꩻထွာခန်းမွူးနီꩻတန်မျတ်နဝ်ꩻသွူ။ ပွိုးတမုဲင်ꩻနဲးတဲင် အနီꩻနဝ်ꩻနဝ်ꩻထွာအွဉ်ႏထွူနားလွေꩻ ဖန်ဆင်ꩻလို့လို့နဝ်ꩻသွူ။ နုဲင်းယိုသွူ ဘုရာꩻသျင်ꩻနဝ်ꩻ စကျာႏဝဠာႏတွမ်ႏနဝ်ꩻအကိုစစရာႏရာႏလို့လို့ယိုဖန်ဆင်ꩻခါꩻနဝ်ꩻသွူ။

ကမ္ဘာႏဦꩻကျမ်ꩻ ၁-၂ မꩻ သမ္မာႏလိတ်ကျမ်ꩻ ငဝ်းခြုဲင်းအာ