၃၃ - လုဲင်းသား ငဝ်းခြုဲင်းပွုံႏဝတ္ထု
တွိုႏတနီꩻတွော့ꩻ ‘ကိုယ်ႏတောႏယေရှု’ နဝ်ꩻ အဝ်ႏထီကန်ႏသောင်ထျꩻအတွင်ꩻ ဝွေꩻနဝ်ꩻ သွဉ်သင်ဆွုံꩻမꩻခန်း လိုꩻစွိုꩻဖွုံႏတန်နောဝ်ꩻသွူ။ ‘ကိုယ်ႏတောႏယေရှု’ ငဝ်းသြဝါဒယို နာꩻသားအာလွဉ်ꩻငါႏ တဲင် ခင်ႏလမ်းတတွမ်ႏတဝ်း လဲင်ႏထွာစွဉ်ႏနုဲင်းနဝ်ꩻသွူ။ နဝ်ꩻတွော့ꩻဝွေꩻနဝ်ꩻ ထင်ႏသွူထီကိုကအဝ်ႏဒါႏ ဖြီတဆွိုင်ꩻလောင်းတဲင် အုံသွူခင်ႏလမ်း နဝ်ꩻကိုတွော့ꩻ ဟောꩻသွဉ်ဖေႏခန်းလိုꩻအမျာꩻဖုံႏ နဝ်ꩻသွူ။
နဝ်ꩻဆချာ ‘ကိုယ်ႏတောႏယေရှု’ နဝ်ꩻ ဒေါ့ꩻရိုꩻသွဉ်နယ်ခန်းတွမ်ႏငဝ်းခြုဲင်းနောဝ်ꩻသွူ။ “လုဲင်းသားတဖြာꩻနဝ်ꩻ အီဖြေ့ꩻဝမ်ႏအမွူး ပေႏဖုံႏထန်ႏလွေꩻခန်းအထန်ႏနဝ်ꩻသွူ။ ဝွေꩻနဝ်ꩻ အ ခြွီဖုံႏယို ဖြေ့ꩻနေးတွမ်ႏစူတဲင် ခြွီယဟန်ႏ နဝ်ꩻ ထဲ့ꩻလင်ꩻခန်းလုဲင်းကွန်ႏလောင်း နဝ်ꩻသွူ။ နဝ်ꩻတွော့ꩻ ဝါးဖုံႏနဝ်ꩻ လွဉ်အံႏလွခန်း အ ခြွီဖုံႏနဝ်ꩻသွူ။”
“အ ခြွီ ယဟန်ႏဖုံႏနဝ်ꩻ ဟံႏဗဲ့ꩻဆေ့ꩻငါႏတဲင် ထဲ့ꩻလင်ꩻလွခန်း ဟံႏလုံးလောင်းတွော့ꩻ အ ခြွီခူꩻဖုံႏနဝ်ꩻ ဟံႏလုံးလောင်းယို အသော့ꩻထန်ႏ မွိုင်ရိုꩻကီလဲ့ꩻ အရွီးနွို့ကပ်ယိုတဝ်ႏဟံႏနဝ်ꩻသွူ။ မွူးကထွိုင်ႏထန်ႏလွဉ်တဲင် ယာလျားငါႏ တွော့ꩻ ထာꩻမွူးဖုံႏနဝ်ꩻ နွူႏထိုꩻသွူတဲင် သီထိုꩻလွခန်းနဝ်ꩻသွူ။”
“မျိုꩻခြွီယဟန်ႏဖုံႏနဝ်ꩻ ထဲ့ꩻသော့ꩻထာꩻဆူႏပုံႏကိုတဲင် မျိုꩻခြွီဖုံႏနဝ်ꩻ ဒေါ့စွဉ်ႏရိုꩻကီလဲ့ꩻ အဝ်ႏပတ်အဝ်ႏပစ်ခါꩻခန်းထာꩻဆူႏပုံႏနဝ်ꩻသွူ။ နဝ်ꩻတွော့ꩻ ထဲ့ꩻသော့ꩻသွူ ထာꩻပုံႏကိုတဲင် မျိုꩻခြွီယို ဒေါ့ထန်ႏလွဉ် စွဉ်ႏလဲ့ꩻ အရာႏတရာႏ တဝ်းနဝ်ꩻသွူ။”
“မျိုꩻခြွီဖုံႏယဟန်ႏဖုံႏနဝ်ꩻ ထဲ့ꩻလင်ꩻဟံႏယာႏဟဝ် ခင်ႏလမ်းတဲင် အခူႏနဝ်ꩻဖုံႏနဝ်ꩻ တန်လွဉ်လွꩻသွူတဲင် ပွာꩻ အာႏထဲင်းက မျိုꩻခြွီကဆို့စအဆပေါင်ꩻသွံဆီ သူဆီမကာႏ ပွာꩻအာဗꩻတွိုႏစွဉ်ႏ အဆပေါင်ꩻတရျာꩻနဝ်ꩻသွူ။ မဉ်ႏ လွောက်ꩻလွဉ် ဘုရာꩻသျင်ꩻတဖူꩻစဲဉ်ႏအ တွိုင်ꩻလဲ့ꩻ ယိုခါခွေကဒေါ့ꩻနယ်ဒါႏဖုံႏယို အာရွုဏ်ႏသွင်ဟဝ်လွꩻ ဝင်ꩻ” မိန်း လွေꩻခန်းနုဲင်းနဝ်ꩻသွူ။”
ငဝ်းခြုဲင်းယိုနဝ်ꩻ ‘ကိုယ်ႏတောႏယေရှု’ တပဲ့ꩻဖုံႏသꩻတရေင် ထိုꩻ ခန်းဒျာႏနဝ်ꩻသွူ။ နဝ်ꩻတွော့ꩻ ‘ကိုယ်ႏတောႏ ယေရှု’ နဝ်ꩻ “မျိုꩻခြွီခူꩻကရိုꩻနဝ်ꩻ ထွာဘုရာꩻသျင်ꩻမိန်းသေꩻခါꩻ တရာꩻတောႏဖုံႏတဲင် လွေꩻထောင်ကရိုꩻနဝ်ꩻ ဟွိုန်စွဉ်ႏ ဘုရာꩻသျင်ꩻငဝ်းတရာꩻတောႏဖုံႏရိုꩻလဲ့ꩻ မဲဉ်ဒေါ့ꩻရိုꩻလိုꩻတသေနာႏတဝ်းသားနဝ်ꩻသွူ။” ‘စာတန်’ နဝ်ꩻ ဘုရာꩻသျင်ꩻ တရာꩻတောႏဖုံႏယို ထူႏထိုꩻခန်းလိုꩻဖုံႏထျꩻနဝ်ꩻသွူ။ နေးစွဉ်ႏအနယ်ႏယိုတဲင် ဘုရာꩻသျင်ꩻတရာꩻတောႏဖုံႏယို ဖေႏကသေနာႏ ထွာအရဲႏအဆီႏနဝ်ꩻသွူ။
“လုံးဟံႏကရိုꩻဒါႏလိုꩻနဝ်ꩻ ဟွိုန်ဗာႏ ဘုရာꩻသျင်ꩻတရာꩻတောႏဖုံႏယို သꩻရောင်းသꩻရေꩻ ထွာလိုꩻလက္ခံႏသား နဝ်ꩻသွူ။ ဝွေꩻနဝ်ꩻ အသောင်အရင်ꩻဖုံႏ တွိုက်မုꩻ၊ ခံႏဗာႏ လိုꩻအလင်ꩻဖုံႏ ဒေါ့ꩻရိုꩻမုꩻတွော့ꩻ တွိုႏလွေꩻထိုꩻ တွမ်ႏဘုရာꩻ သျင်ꩻ ကညာꩻဒါႏ ခင်ႏလမ်းတဲင် ဘုရာꩻသျင်ꩻအလောင်း ကအွဉ်ႏဒါႏ ထာꩻယွုမ်းအံႏမုꩻယို ထွူဆွိုးထိုꩻခန်းဒျာႏနဝ်ꩻ သွူ။”
ထာꩻဆူႏပုံႏဖုံႏ ကအဝ်ႏဒါႏ ဟံႏတန်ကရိုꩻနဝ်ꩻ ဟွိုန်ဗာႏသွူ ဘုရာꩻသျင်ꩻတရာꩻတောႏဖုံႏတဲင် ဝွေꩻအကျောင်ꩻ ခရာႏကားကအောဝ်ႏ လꩻသွူသောကတွော့ꩻ ဖေႏကလꩻရွဉ်ခံꩻတွမ်ႏ ထာꩻခြိုꩻလောင်း လင်ꩻဖုံႏယို ကျိုꩻစာꩻထွုန်ႏကျံႏခန်း ဒျာႏနဝ်ꩻသွူ။ အချိန်ႏကထွိုင်ႏတွိုႏလွေꩻ ဝွေꩻနဝ်ꩻ ကေႏညိုႏထဲင်းတဝ်းဒွုမ် ဘုရာꩻသျင်ꩻနဝ်ꩻသွူ။ နဝ်ꩻတွော့ꩻ ဘုရာꩻသျင်ꩻတရာꩻတောႏဖုံႏ လေ့လာကသွဉ်သင်ထူႏဗာႏ အကျောင်ꩻခရာႏဖုံႏနဝ်ꩻ သꩻကေꩻနပ်နပ် ဘုရာꩻသျင်ꩻ တကျိုꩻ စာꩻနွောင်ꩻတဝ်းဒွုမ်သွူ။ ဝွေꩻနဝ်ꩻ တမုဲင်ꩻမွူးမꩻ တရာႏတဝ်း ထွာထိုꩻဗွိုန်နုဲင်းဂျုံမွူးနဝ်ꩻသွူ။” ဒေါ့ꩻဟွိုန်ခန်းနုဲင်းနဝ်ꩻသွူ။
“ကွဲတွော့ꩻ ဟံႏယာႏဟဝ်လောင်း မျိုꩻခြွီခူႏဖုံႏနဝ်ꩻ ဟွိုန်သွူဘုရာꩻသျင်ꩻတရာႏတောႏတဲင် ယွုမ်းသွူတွော့ꩻ ဗွိုန်နုဲင်းအရာႏ ကရာႏဒါႏလိုꩻနဝ်ꩻသွူ။” သျင်ꩻပျꩻနယ်ခန်းနုဲင်းနဝ်ꩻသွူ။
သျင်ႏမဿဲခရစ်နွိ့ꩻ ၁၃:၁-၈, ၁၈-၂၃; မာကုခရစ်နွို့ꩻ ၄:၁-၈, ၁၃-၂၀; သျင်ႏလုကာခရစ်နွို့ꩻ ၈:၄-၁၅ မꩻ သမ္မာႏလိတ်ကျမ်ꩻ ငဝ်းခြုဲင်း