၁၁ - ပွယ်ꩻတောႏ ပသခါ

ဘုရာꩻသျင်ꩻနဝ်ꩻ ‘မောရှေ’ တွမ်ႏ ‘အာရုန်’ သီးယို အွဉ်ႏလွေꩻသွူ ‘ဖာရော’ ခွန်ထျꩻ၊ လွေꩻခွင်ꩻဖေႏသွော့ꩻ ‘ဣစရေး’ လိုꩻမျိုꩻဖုံႏ ထွဉ်ႏဒေါ့ꩻနုဲင်းနဝ်ꩻသွူ။ ‘ဖာရိုခွန်’ လွေꩻခွင်ꩻမဉ်ႏတဖေႏတဝ်း ‘ဣစရေး’ လိုꩻမျိုꩻဖုံႏနောဝ်ꩻ ‘အီဂျစ်’ ကို ကအဝ်ႏဒါႏ လိုꩻတွမ်ႏတိရိစ္ဆာန်ႏသီး ပိုခိုဦꩻဖုံႏယို မဲ့ဘုရာꩻသျင်ꩻ အီမာꩻသီ ဖေႏသတိဒေါ့ꩻဟွိုန်နုဲင်းနဝ်ꩻသွူ။ စကဒေါ့ꩻဟွိုန်နုဲင်းနောဝ်ꩻတဲ့ ‘ဖာရော’ ခွန်နဝ်ꩻ ငြင်ꩻထိုꩻစွဉ်ႏ ထာꩻယွုမ်းအံႏတွမ်ႏ ထာꩻနာႏခံႏ ဘုရာꩻသျင်ꩻ နဝ်ꩻသွူ။

ဘုရာꩻသျင်ꩻနဝ်ꩻ ၀င်ꩻကယွုမ်းဒျာႏဝွေꩻဖုံႏ ပိုဦꩻလို့လို့ယို ဖေႏကကယ်ႏနွောင်ꩻ ဖေႏအနယ်တဗာႏတဲင် လမ်းသားတွိုင်ႏ မာꩻသီဗာႏ အယံသွတ်ꩻ ‘ဗဲ့ꩻ’ တဗာႏစီႏနဝ်ꩻသွူ။

ဘုရာꩻသျင်ꩻနဝ်ꩻ ‘ဗဲ့ꩻ’ သွီႏဖုံႏယို ထွဉ်ႏသူႏဝွေꩻသီးဖုံႏလမ်းတခါꩻထွူ၊ ခွိုင်ꩻသွူအယာႏဖုံႏတဲင် အံရော်ꩻမွိုင်မွိုင်ဗာႏတွမ်ႏတခိုးဖုံႏသွူ။ ဝွေꩻသီးအံႏနဝ်ꩻစား မဉ်ႏထွူတဲ့ အမွိုင်တဗာႏ ဖေႏကထန်ႏနွောင်ꩻ ‘အီဂျစ်’ အတာႏ ထွဉ်ႏဖန်ဆင်ꩻခါꩻခန်းနဝ်ꩻသွူ။

‘ဣစရေး’ လိုꩻမျိုꩻဖုံႏနဝ်ꩻ ဘုရာꩻသျင်ꩻကဒေါ့ꩻခါꩻအတွိုင်ႏ မာꩻလွေꩻခန်းနဝ်ꩻသွူ။ ဘုရာꩻသျင်ꩻနောဝ်ꩻ ထာꩻလွိုက်ꩻမွူးကွို့ꩻနာꩻတွမ်ႏ ‘အီဂျစ်’ ကိုကအဝ်ႏဒါႏ ပိုခိုဦꩻကားကအဝ်ႏယို ထွဉ်ႏသီခန်းဒျာႏနဝ်ꩻသွူ။

ဘုရာꩻသျင်ꩻနောဝ်ꩻ သွီႏကအဝ်ႏဒါႏလမ်းတခါꩻ ‘ဣစရေး’ လိုꩻမျိုꩻတွိုင်ႏသီးလမ်းဖုံႏယို အွဉ်ႏကုဲင်ခါꩻထွူတဲင် လိုꩻကအဝ်ႏသော့ꩻလမ်းကို ဖုံႏနဝ်ꩻတဲ့ လွိုန်းဗဉ်ႏလုံႏခြုံႏဗာႏသွူ။ ဝွေꩻသီးဖုံႏနဝ်ꩻ ကွပ် ‘ဗဲ့ꩻ’ သွီႏတဲင် ခံႏဗာႏကယ်ႏဒင်ႏနဝ်ꩻသွူ။

ကွဲတွော့ꩻ ‘အီဂျစ်’ ဖုံႏနဝ်ꩻ ယွုမ်းအံႏတဝ်း ဘုရာꩻသျင်ꩻ၊ နာႏခံႏတဝ်း ဘုရာꩻသျင်ꩻငဝ်းဖုံႏတဲင် ဝွေꩻသီးလမ်းဖုံႏယို တအွဉ်ႏကုဲင်ခါꩻဖေႏ တဝ်းသွူ။ ဘုရာꩻသျင်ꩻနဝ်ꩻ ‘အီဂျစ်’ လိုꩻမျိုꩻသီး ပိုခိုဦꩻဖုံႏယို အွဉ်ႏသီထိုခန်းနဝ်ꩻသွူ။

‘အီဂျစ်’ လိုꩻမျိုꩻဖုံႏ ကအဝ်ႏဒါႏထောင်ႏကိုပိုခိုဦꩻအစ၊ ခွန်ပိုခိုဦꩻအသွတ်ꩻ သီထိုꩻလွတဲင် ‘အီဂျစ်’ ကိုကအဝ်ႏဒါႏလိုꩻအာဖုံႏနဝ်ꩻ သꩻပေႏမွေးငါႏတဲင် ခြောဝ်ငဝ်းအဝ်ႏငွိုးလွခန်းဝင်ꩻနဝ်ꩻသွူ။

နဝ်ꩻတဟာချင်ႏ ‘ဖာရော’ ခွန်နဝ်ꩻ ဟဲ့သွူ ‘မောရှေ’ တွမ်ႏ ‘အာရုန်’ တဲင် “ဟဲ့ꩻသွူ ‘ဣစရေး’ လိုꩻမျိုꩻဖုံႏ ထန်ႏထိုꩻခန်ႏ ‘အီဂျစ်’ တလဲင်ႏချင်ꩻဟုဲင်း” ရိုခန်းနုဲင်းနဝ်ꩻသွူ။ ‘အီဂျစ်’ လိုꩻမျိုꩻဖုံႏနောဝ်ꩻတဲ့ ‘ဣစရေး’ လိုꩻမျိုꩻဖုံႏဖေႏကထန်ႏတလဲင်ꩻချင်ꩻ နွမ်ႏထန်ႏခန်းဒျာႏနဝ်ꩻသွူ။

ဓမ္မꩻလီꩻ ၁၁:၁-၁၂:၃၂ မꩻ သမ္မာႏလိတ်ကျမ်ꩻ ငဝ်းခြုဲင်း