၅၀ - ကိုယ်ႏတောႏ ‘ယေရှု’ ကျွꩻသဲင်ꩻပြန်ႏချာ

ကမ္ဘာႏတဖြုံႏလွုမ်းကအဝ်ႏဒါႏလိုꩻအာဖုံႏနဝ်ꩻ ‘မေရှိယ’ ကထွာဒါႏကိုယ်ႏတောႏ ‘ယေရှု’ သတင်ꩻဟဝ်ဖုံႏယိုည ထိုꩻစွဉ်နေင်ႏပေါင်ꩻအာလဲ့ꩻအဝ်ႏဟွိုန်နေကဒွိုန်းနဝ်ꩻသွူ။ ဘုရာꩻသျင်ꩻနိဗ္ဗာန်ႏခံꩻ ဝေင်ꩻတောႏနဝ်ꩻလဲ့ꩻတိုꩻပွာꩻစွစ်ꩻတန်ဆွိုက် လွဉ်ယင်းခန်းဒျာႏနဝ်ꩻသွူ။ ကိုယ်ႏတောႏ ‘ယေရှု’ နဝ်ꩻ ကပ်ကမ္ဘာႏမဉ်ႏထွူသွတ်ꩻအ ချိန်ႏနဝ်ꩻ မဲ့ꩻဝွေꩻကျွꩻသဲင်ꩻပြန်ႏချာႏဒျာႏ မိန်းခန်းနုဲင်းနဝ်ꩻသွူ။ ယိုခါခိန်ႏတွင်ꩻလꩻကျွꩻသဲင်ꩻပြန်ႏချာဒွိုန်းရိုꩻကီလဲ့ꩻဝွေꩻကတိတောႏယို ဝွေꩻအီႏတီႏဒျာႏနဝ်ꩻသွူ။

နီဖုံႏအုံပွိုးကိုယ်ႏတောႏ ‘ယေရှု’ ကျွꩻသဲင်ꩻပြန်ႏချာချိန်ႏတွင်ꩻ ဘုရာꩻသျင်ꩻနဝ်ꩻနီဖုံႏယို ဖေႏကဖေႏဝွေꩻထာꩻဟဝ် တွော့ꩻ မဲဉ်ထွမ်ႏအုံ အဝ်ႏလွေꩻငါႏ ဝွေꩻကမိန်းဟွိုန်ခါꩻဒါႏတဖူꩻနယ်အတွိုင်ꩻနဝ်ꩻသွူ။ ဝွေꩻနဝ်ꩻနီဖုံႏယို ဝွေꩻနိဗ္ဗာန်ႏခံꩻဝေင်ꩻ တောႏအကျောင်ꩻယိုလဲ့ꩻမဲဉ်ထွဉ်ႏဒေါ့ꩻနယ်ငါႏလိုꩻအလင်ဖုံႏနဝ်ꩻသွူ။ ကိုယ်ႏတောႏ ‘ယေရှု’ ကအုံအဝ်ႏဒါႏကမ္ဘာႏလောင်း အချိန်ႏတွင်ꩻ “ခွေတပဲ့ꩻတောႏလွိုက်ဆချာသားဖုံႏနဝ်ꩻကမ္ဘာႏလောင်းခင်ႏလမ်းတွိုင်ꩻကအဝ်ႏဒါႏလိုꩻဖုံႏယို ဘုရာꩻသျင်ꩻ နိဗ္ဗာန်ႏခံꩻဝေင်ꩻတောႏယံမွေးငါႏအကျောင်ꩻယိုကမ္ဘာႏလောင်းစွစ်ꩻစဲစ်သွဉ်သင်အွဉ်ႏနယ်ဖေႏသွူတဲင် မဲ့ꩻအီႏတွိုႏလွဉ်ဒျာႏ ကပ်ကမ္ဘာႏအဆုဲင်ꩻသွတ်ꩻအချိန်ႏ” မိန်းခန်းနုဲင်း နဝ်ꩻသွူ။

လိုꩻအာဖုံႏနဝ်ꩻတဟွိုန်ဖိုတဝ်းကိုယ်ႏတောႏ ‘ယေရှု’အကျောင်ꩻဖုံႏ နဝ်ꩻသွူ။ ကိုယ်ႏတောႏ ‘ယေရှု’ ကလားက ကျွꩻသဲင်ꩻ နိဗ္ဗာန်ႏခံꩻဝေင်ꩻတောႏနဝ်ꩻ ဝွေꩻတပဲ့ꩻလွိုက်ဖဲ့ꩻချာသားဖုံႏယို သတင်ꩻဟဝ်ꩻ နဝ်ꩻဖုံႏတဟွိုန်ဖိုတဝ်းလိုꩻဖုံႏယို ဖေႏကဖန်းဖြယ်ဖေႏအတာႏ ဒေါ့ꩻဟွိုန်ခါꩻခန်းဒျာႏနဝ်ꩻသွူ။ “လိုꩻမျိုꩻအဒဝ်ႏဒဝ်ႏဖုံႏယို တပဲ့ꩻဖဲ့ꩻချာသားဖုံႏဖေႏကအဝ်ႏ အတာႏလွေꩻမာꩻဆောင်ႏရွက်သွော့ꩻဟုဲင်း၊ လုဲင်းကွင်ꩻကိုဖုံႏသူနဝ်ꩻအီႏရဲ့ꩻသိမ်ꩻလုဲင်းဖုံႏအတာႏထွာအဆင်သင့်လဲဉ်း” မိန်းခန်းနုဲင်းနဝ်ꩻသွူ။

ကိုယ်ႏတောႏ ‘ယေရှု’ နဝ်ꩻ “အသွဉ်းအသယ်ႏလိုꩻတဖြာꩻယိုအီႏ ထင်မျတ်လွိုကယ်အဗွေႏတအဝ်ႏတဝ်းသွူ။ ကမ္ဘာႏ အကိုအရေꩻကပါဒါႏလိုꩻဖုံႏနဝ်ꩻလွထီႏရောင်သွူခွေတဲင် နာꩻယိုလဲ့ꩻကွပ်ခွေအတွက်တွော့ꩻဝင်ꩻအီႏနှိပ်စက်မာꩻယပ်ဝင်ꩻအီႏ မာꩻသီနဝ်ꩻသွူ။ ကမ္ဘာႏယိုသီဖုံႏခံႏဗာႏထာꩻဒုက္ခရိုꩻကီလဲ့ꩻအွဉ်ႏဆွော့ꩻဆွော့ꩻ ခွေါင်ခွေါင်သွော့ꩻ သီသꩻဓာတ်ဖုံႏနဝ်ꩻသွူ။ ပွိုးတ မုဲင်ꩻနဲးတဲင်ခွေ နဝ်ꩻ ထွာအုပ်ချွုတ်ကမ္ဘာႏယိုသား ထွာထူႏထွူလဲဉ်း ‘စာတန်’ မာရ်ႏနတ်နဝ်ꩻသွူ။ ခွေအလောင်းယိုအဆုံး သွတ်ꩻ ယွုမ်းအံႏမုꩻကအဝ်ႏ ဘုရာꩻသျင်ꩻနဝ်ꩻနာꩻယို အီႏကယ်ႏဒင်ႏဖေႏ” နုဲင်းနဝ်ꩻလဲ့ꩻမိန်းဟွိုန်ခါနဝ်ꩻသွူ။

ကိုယ်ႏတောႏ ‘ယေရှု’ နဝ်ꩻ ကမ္ဘာႏတန်မိဉ်ႏထွူသွတ်ꩻထိုꩻချိန်ႏ တွင်ႏအီႏထွာလွဉ်နုဲင်းမုဲင်ꩻကရိုꩻယိုဖေႏကသျင်ꩻပျꩻ နွောင်ꩻလိုꩻအာဖုံႏအတွက်ဝွေꩻတပဲ့ꩻဖုံႏယို မိန်းဟွိုန်ခါꩻစွဉ်ႏ ငဝ်းခြုဲင်းတစ်ပုဒ်နဝ်ꩻသွူ။ ဝွေꩻနဝ်ꩻ “လိုꩻတဖြာꩻနဝ်ꩻဝွေꩻလုဲင်း ကွင်ꩻကိုယိုဆို့သေꩻခါꩻခန်းထာခြွီꩻဟဝ်ဖုံႏနဝ်ꩻသွူ။ ဝွေꩻဗေင်ႏအွီႏထာꩻချိန်ႏတွင်ꩻဝွေꩻရန်ႏသူႏနဝ်ꩻဂျုံခူꩻဖုံႏအခါႏယိုလွဉ်ဖြဲ့ꩻခါꩻ သွူထာꩻအီႏခူꩻဖုံႏတဲင်ထန်ႏထိုꩻခန်းဒျာႏ” မိန်းခန်းနုဲင်းနဝ်ꩻသွူ။

ထာꩻမွူးဖုံႏကထွိုင်ႏဒေါ့ꩻဖြော့ꩻထန်ႏအချိန်ႏတွင်ꩻ ဝွေꩻအသွဉ်းအ သယ်ႏနဝ်ꩻရီခန်းပါꩻနဝ်ꩻ “ဆရာႏနာꩻလုဲင်းကွင်ꩻ ကိုယိုနဝ်ꩻ ဆို့ဒျာႏထာခြွီဟဝ်မွော့ꩻ ပွိုးထမုဲင်ꩻထာꩻအီႏမွူးဖုံႏအဝ်ႏတွိုႏဟောင်း” နုဲင်း နဝ်ꩻတဲင် ပါꩻနဝ်ꩻနဝ်ꩻ “ခွေရန်ႏသူႏ လွုမ်ꩻထွာဆို့ꩻထာမွူးယိုဖုံႏ တဲင် ကဆို့ꩻဒါႏထာꩻမွူးယိုဖုံႏနဝ်ꩻလဲ့ꩻ ထွာခွေရန်ႏသူႏလွုမ်ꩻ " နေနေဖြေႏပြန်ႏချာခန်းနုဲင်း နဝ်ꩻသွူ။

အသွဉ်းအသယ်ႏနဝ်ꩻဖုံႏနဝ်ꩻ ရီပြန်ႏချာခန်းဝွေꩻသီးဖုံႏအဗွေႏ “နီဖုံႏယို ထွို့ꩻကုဲင်ထိုꩻသင်ꩻနေထာꩻအီႏမွူးဖုံႏ ယိုဟောင်း” နုဲင်းနဝ်ꩻသွူ။ ဆရာႏနဝ်ꩻမိန်းဟွိုန်ချာ “တွမ်ႏမာꩻမွိုန်း၊ သီဖုံႏမဉ်ႏမာꩻနုဲင်းနဝ်ꩻနဝ်ꩻ မဲ့ꩻထွို့ꩻပါထိုꩻဗာႏ ဂျုံမွူး၊ အုံပွိုးဒွုမ်းကရဲ့ꩻလꩻချိန်ႏဟုဲင်း၊ နဝ်ꩻမဉ်ႏထွူ ထာꩻအီႏမွူးဖုံႏယိုဖေႏကလဲ့ꩻနွောင်ꩻမေႏနဝ်ꩻအွဉ်ႏပြုံႏသေꩻသွော့ꩻ တထွောင်းချင်ႏဟုဲင်း။ ကွဲတွော့ꩻ ဂျုံမွူးဖုံႏယိုထူႏလွဉ်သွော့ꩻခွေထာꩻသိမ်ꩻယွုံႏကိုဟုဲင်း” နုဲင်းနဝ်ꩻသွူ။

လွိုက်ဖဲ့ချာသားဖုံႏနဝ်ꩻ ကွပ်သေနာႏတဝ်းငဝ်းခြုဲင်းနဝ်ꩻအ ဓိပ္ပါယ်ႏတဲင်မဲဉ်အွဉ်ႏသျင်ꩻပျꩻငါႏကိုယ်ႏတောႏ ‘ယေရှု’ နဝ်ꩻသွူ။ ကိုယ်ႏတောႏ ‘ယေရှု’ နဝ်ꩻ “လိုꩻကဆို့ꩻဒါႏမျိုꩻခြွီဟဝ်ဖုံႏနဝ်ꩻပျုꩻသွူ မေရှိယ ကိုယ်ႏစာꩻတဲင် လုဲင်းကွင်ꩻတန်ယို ပျုꩻ ခန်း ကမ္ဘာႏတန်ကိုယ်ႏစာꩻနဝ်ꩻသွူ။ မျိုꩻခြွီခူꩻဟဝ်ဖုံႏနဝ်ꩻကိုယ်ႏစာꩻပျုꩻ လိုꩻကနွို့သော့ꩻဒါႏ ဘုရာꩻသျင်ꩻသီးနိဗ္ဗာန်ႏခံꩻဝေင်ꩻ တောႏကိုနဝ်ꩻသွူ။

“ထာꩻအီႏမွူးဖုံႏနဝ်ꩻ ကိုယ်ႏစာꩻပျုꩻသွူ ထာꩻတဟဝ်တဝ်းတွမ်း ကတဲက်ဆဲင်ႏဒါႏလိုꩻဖုံႏတဲင် ထာꩻအီႏမွူးဖုံႏကဆို့ꩻ ခါꩻဒါႏရန်ႏသူႏနဝ်ꩻ ကိုယ်ႏစာꩻပျုꩻ စာတန် မာရ်ႏနတ်နဝ်ꩻသွူ။ ရဲ့သိမ်ꩻဂျုံမွူးဖုံႏကရိုꩻ နဝ်ꩻအွဉ်ႏဖောႏနယ်သွူ ကမ္ဘာႏအသွတ်ꩻ တဲင် လိုꩻကရဲ့သိမ်ꩻဒါႏဂျုံမွူးဖုံႏနဝ်ꩻ ကိုယ်ႏစာꩻပျုꩻ ဘုရာꩻသျင်ꩻသီးတနံဗျဟ္မာႏနဝ်ꩻသွူ။”

“ကမ္ဘာႏတန်ကထွိုင်ႏထွူသွတ်ꩻထိုꩻအချိန်ႏတွင်ꩻ တွမ်ႏတနံကုဲင်ကတဲက်ဆဲင်ႏဒါႏလိုꩻဖုံႏကားကအဝ်ႏယိုဖေႏက ထွာငီꩻဝင်ꩻအတာႏ မဲ့ꩻတနံဗျဟ္မာႏဖုံႏ လယ်ႏစုꩻဗူႏဖေႏဒျာႏနဝ်ꩻသွူ။ တနံဗျဟ္မာႏဖုံႏ နဝ်ꩻ ဝွေꩻသီးဖုံႏယိုမဲ့ꩻအီႏနုဲင်ႏသော့ꩻကလျား မွေးငါႏမေႏကိုနဝ်ꩻသွူ။ ဝွေꩻသီးဖုံႏနဝ်ꩻ အဲင်ႏသွူတငါငွိုးသွူထာꩻတဲင်မဲ့ꩻအီႏခံႏစာꩻဗာႏထာꩻဆင်ꩻရယ်ꩻဒုက္ခဟုဲင်းဟီးနဝ်ꩻသွူ။ ကွဲတွော့ꩻ မဉ်ႏထွာ ကိုယ်ႏတောႏ ‘ယေရှု’ ဖဲ့ꩻချာသား မဉ်ႏထွာလိုꩻမဲဉ်ႏလိုꩻသꩻစွဉ်ႏဖုံႏနဝ်ꩻဖာဘုရာꩻသီးနိဗ္ဗာန်ႏခံꩻဝေင်ꩻတောႏ ကိုသူဗွိုန်းနုဲင်းမွူးမဲ့ꩻအီႏတောင်ႏလေ” မိန်းခန်းနုဲင်းနဝ်ꩻသွူ။

ကိုယ်ႏတောႏ ‘ယေရှု’ နဝ်ꩻ ကလားကတွိုႏကပ်ကမ္ဘာႏထွူသွတ်ꩻချိန်ႏတွင်ꩻ မဲ့ꩻအီႏကျွꩻသဲင်ꩻပြန်ႏချာဒျာႏ ကမ္ဘာႏ လောင်းယိုလဲ့ꩻ မိန်းခါꩻနဝ်ꩻသွူ။ ဝွေꩻနဝ်ꩻ ဝွေꩻကထန်ႏလွေꩻဒါႏအတွိုင်ႏသဲင်ꩻလွဉ်ချာသွူတဲင် ကဒေါ့ꩻဗာႏနုဲင်းယိုနဝ်ꩻ ခန္ဓာႏ နမ်းခြုံအစဲစ်တဗာႏယို ဝွေꩻလꩻသွူတဲင်ပေါႏထန်ႏလွဉ်သွူမို့ꩻလောင်းကီကအဝ်ႏမို့ꩻအေႏလောင်းနဝ်ꩻသွူ။ ကိုယ်ႏတောႏ ‘ယေရှု’ ကထွိုင်ႏပေါႏလွဉ်ချာအ ချိန်ႏတဲင်ကသီထိုꩻလဲဉ်းကထွာဒါႏဝွေꩻဆချာသားဖုံႏယိုလဲ့ꩻအဝ်ႏထာꩻသီမꩻ မွန်ပြန်ႏချာ တွော့ꩻတွမ်ႏဝွေꩻခွဲကျုံꩻခန်းဝင်ꩻနိဗ္ဗာန်ႏခံꩻဝေင်ꩻတောႏသူႏနဝ်ꩻသွူ။

နဝ်ꩻဆချာအသက်ကမွန်နေကဒျာႏ ကိုယ်ႏတောႏ ‘ယေရှု’ ဖဲ့ꩻချာသားဖုံႏနဝ်ꩻလဲ့ꩻ ထင်ႏသွူမို့ꩻလောင်းတဲင် ခွဲကျုံꩻခန်း အဝ်ႏထာꩻသီကမွန်ချာꩻဒါႏကိုယ်ႏ တောႏ ‘ယေရှု’ တွမ်ႏတပဲ့ꩻတောႏဖုံႏနဝ်ꩻသွူ။ ဝွေꩻသီးဖုံႏကားကအဝ်ႏ တွမ်ႏ ကိုယ်ႏတောႏ ‘ယေရှု’ အီႏအဝ်ႏခင်ႏလမ်းနဝ်ꩻကိုတဲင် တွမ်ႏဝွေꩻတပဲ့ꩻဖုံႏအုံအဝ်ႏငီꩻသွူဝင်ꩻတွော့ꩻမဲ့ꩻအီႏလꩻထာꩻဝရငိမ်ꩻချံꩻမုꩻ နဝ်ꩻသွူ။

ကိုယ်ႏတောႏ ‘ယေရှု’ နဝ်ꩻကယွုမ်းဒါႏဝွေꩻလိုꩻတွိုင်ꩻယိုဖေႏခန်းကတိတဗာႏနဝ်ꩻသွူ။ ဝွေꩻသီးဖုံႏနဝ်ꩻ အခရာႏ ကားကအဝ်ႏအလောင်းယိုတွမ်ႏဘုရာꩻသျင်ꩻမဲ့ꩻအီႏအုပ်ချွုတ်ငီꩻသွူဝင်ꩻတွော့ꩻကဗွေပြဲ့ꩻစွုမ်ႏဒါႏငိမ်ꩻချံꩻမုꩻယိုလဲ့ꩻမဲ့ꩻအီႏလꩻ ဝင်ꩻဖုံႏနဝ်ꩻသွူ။

ကွဲတွော့ꩻဘုရာꩻသျင်ꩻနဝ်ꩻ တယွုမ်းတဝ်းကိုယ်ႏတောႏ ‘ယေရှု’ လိုꩻတွိုင်ꩻယိုထွာအီႏဖေႏအပဲစ်တဲင် ဝွေꩻသီးဖုံႏယို နုဲင်ႏဝေါင်းလင်ꩻခန်းငရုဲင်ꩻခန်းနဝ်ꩻသွူ။ ဝွေꩻသီးဖုံႏနဝ်ꩻခင်ႏလမ်းနဝ်ꩻကိုအဲင်ႏတငါငွိုးသွူထာꩻတဲင်အီႏခံႏစာꩻလွေꩻဗာႏ ထာꩻ ဆင်ꩻရယ်ꩻဒုက္ခထာꩻဝရတသက်လွုမ်းနဝ်ꩻသွူ။ မုဲင်ꩻခါမꩻဖေ့ꩻသွတ်ꩻထိုꩻတအဝ်ႏတဝ်းမေႏနဝ်ꩻလဲ့ꩻ ထာꩻဝရတသက်လွုမ်း မဲ့ꩻအီႏခိုးတသေႏသွူတဲင် လုံႏသားဖုံႏ နဝ်ꩻလဲ့ꩻမဲ့ꩻအီႏအံႏသွုံꩻဝွေꩻသီးဖုံႏ ထာꩻဝရတသက်လွုမ်းနဝ်ꩻသွူ။

ကိုယ်ႏတောႏ ‘ယေရှု’ ကထွိုင်ႏကျွꩻသဲင်ꩻပြန်ႏချာအချိန်ႏတွင်ꩻ ‘စာတန်’ မာရ်ႏနတ်တွမ်ႏနုဲင်ႏငံႏတောႏယိုအထွူတꩻ ငါမာꩻကုဲင်ထိုꩻခန်းဒျာႏနဝ်ꩻသွူ။ ဝွေꩻနဝ်ꩻ ‘စာတန်’ မာရ်ႏနတ်ယို မဲ့ꩻအီႏနုဲင်ႏလင်ꩻသော့ꩻငရုဲင်ႏကိုတဲင် တယွုမ်းတဝ်းဘုရာꩻ သျင်ꩻတွော့ꩻ ကလွိုက်လွဉ်ꩻဒါႏ ‘စာတန်’ မာရ်ႏနတ်ဖဲ့ꩻချာလိုꩻတွမ်ႏ ခင်ႏလမ်းနဝ်ꩻကို မဲ့ꩻအီႏထွဉ်ႏခိုးထာꩻဝရငီꩻဗွိုန်နဝ်ꩻသွူ။

‘အာဒံ’ တွမ်ႏ ‘ဧဝ’ သီးနဝ်ꩻလွိုက်နာႏလွဉ်ꩻတဝ်းဘုရာꩻသျင်ꩻ ကွပ်ထူႏလွဉ်အပဲစ်ဖုံႏကမ္ဘာႏယိုအလောင်းတဲင် ဘုရာꩻသျင်ꩻနဝ်ꩻ ကမ္ဘာႏဟံႏယိုတွိုက်ꩻသွူစိင်ႏစာႏတွော့ꩻ အီႏမာꩻကုဲင်ဆွုံꩻ ဖျက်ခန်းနုဲင်းနဝ်ꩻလဲ့ꩻဘုရာꩻသျင်ꩻနဝ်ꩻ မဲ့ꩻအီႏဖန် ဆင်ꩻကဗွေပြဲ့ꩻ စွုမ်ႏဒါႏကမ္ဘာႏတသာနဝ်ꩻသွူ။

ကိုယ်ႏတောႏ ‘ယေရှု’ တွမ်ႏကလွိုက်ဝွေꩻဖဲ့ꩻချာသားဖုံႏနဝ်ꩻမဲ့ꩻအီႏလွေꩻအုံအဝ်ႏသွူကမ္ဘာႏတသာကိုတဲင် အခရာႏကားကအဝ်ႏအလောင်းယို မဲ့ꩻအီႏထာꩻဝရအုပ်စိုꩻလွေꩻဒျာႏနဝ်ꩻသွူ။ ဝွေꩻနဝ်ꩻ ဖုဲင်းထိုꩻဖေႏသွူလိုꩻသီးဖုံႏမဲ့ထီ တဲင်ပါမုဲင်ꩻမုဲင်ꩻတဖြာꩻမꩻတွိုႏထာꩻဒုက္ခ သꩻပေႏခရာႏဖုံႏတအဝ်ႏတဝ်းသွူ။ ဝွေꩻသီးဖုံႏနဝ်ꩻအီႏငွိုးယဲင်းထာꩻတမွေး တဝ်းတအုံဟဝ်တဝ်းဖုံႏ၊ ထာꩻသီဖုံႏနဝ်ꩻလဲ့ꩻ အီႏထွာလွဉ်ထဲင်းတမွေးတဝ်းနဝ်ꩻသွူ။ နဝ်ꩻဆချာ ခင်ႏလမ်းနဝ်ꩻကို လဲ့ꩻတဟဝ်တဝ်းအခရာႏဖုံႏအီႏအဝ်ႏယဲင်းတမွေးတဝ်းသွူ။ ကိုယ်ႏတောႏ ‘ယေရှု’ နဝ်ꩻဝွေꩻနုဲင်ႏငံႏတောႏယိတရာꩻ မဲဉ်ႏမဲဉ်ႏငိမ်ꩻငိမ်ꩻချံꩻချံꩻအီႏအုပ်ချွုတ်လွေꩻသွူတဲင်တွမ်ႏဝွေꩻလိုꩻအာဖုံႏအီႏအဝ်ႏအုံငီꩻထာꩻဝရတသေႏဒျာႏနဝ်ꩻသွူ။

A Bible story from: Matthew 24:14; 28:18; John 15:20, 16:33; Revelation 2:10; Matthew 13:24-30, 36-42; 1 Thessalonians 4:13-5:11; James 1:12; Matthew 22:13; Revelation 20:10, 21:1-22:21