၃၆ - ပြောင်ꩻလုဲင်ႏယောင်ꩻဆင်ႏသဏ္ဍာန်ႏ

တနီꩻတွော့ꩻ ‘ကိုယ်ႏတောႏယေရှု’ နဝ်ꩻ ဟဲ့ꩻလွေꩻခန်းဝွေꩻတပဲ့ꩻသွံဖြာꩻကထွာဒါႏ ပေတရု၊ ယာကုပ်တွမ်ႏ ယောဟန်သီးဖုံႏနဝ်ꩻသွူ။ “တပဲ့ꩻကထွာဒါႏယောဟန်နဝ်ꩻ မာꩻဖေႏ ‘ကိုယ်ႏတောႏယေရှု’ ထီမျွုတ်ꩻမင်္ဂလာႏတမွေး တဝ်းသွူ။” ဝွေꩻသီးဖုံႏနဝ်ꩻ အီဝွတ်ပျုအီဘုရာꩻအတွက် ထင်ႏခန်းကောင်ထိုꩻလောင်းနဝ်ꩻသွူ။

‘ကိုယ်ႏတောႏယေရှု’ ဆုတောင်ꩻဘုရာꩻသျင်ꩻအတွင်ꩻ ဝွေꩻမဲ့ꩻငါနဝ်ꩻနုဲင်းမွူးလေလင်းထိုꩻခန်းဒျာႏနဝ်ꩻသွူ။ ဝွေꩻခွမ်ꩻလာꩻဖုံႏနဝ်ꩻလဲ့ꩻ ကမ္ဘာႏလောင်းကအဝ်ႏဒါႏလိုꩻဖုံႏတမာꩻနွောင်ꩻတဝ်းထာꩻလေမျိုꩻယို လေလင်းလွဉ်ခန်းဒျာႏ နဝ်ꩻသွူ။

နဝ်ꩻဆချာ ‘မောရှေ’ တွမ်ႏ နိမိတ်ထွားဟော်ꩻပညာႏအဝ်ႏသား ‘ဧလိယ’ သီးတွိုႏလွဉ်ခန်းဒျာႏနောဝ်ꩻသွူ။ လိုꩻဖုံႏနဝ်ꩻနဝ်ꩻ ကလားကတွိုႏကိစ္စယိုကာꩻ ကမ္ဘာတန်လောင်း ထွာအုံလွဉ်လဲဉ်းနေင်ႏပေါင်ꩻရျာꩻတန်ꩻနောဝ်ꩻသွူ။ ဝွေꩻသီးဖုံႏတွမ်ႏ ‘ကိုယ်ႏတောႏယေရှု’ နဝ်ꩻ ‘ယေရုရှလင်’ ဝေင်ꩻကို တညတဝ်း ကိုယ်ႏတောႏ အီႏသီသွူ အကျောင်ꩻ ဒေါ့ꩻရိုꩻလွခန်းဝင်ꩻနဝ်ꩻသွူ။

‘မောရှေ’ တွမ်ႏ ‘ဧလိယ’ သီးနဝ်ꩻ တွမ်ႏ ‘ကိုယ်ႏတောႏယေရှု’ ဒေါ့ꩻငဝ်းတွင်ꩻ ‘ပေတရု’ ရိုꩻ ‘ကိုယ်ႏတောႏ ယေရှု’ “ခင်ႏလမ်းယိုကိုနဝ်ꩻ နီဖုံႏအတွက်သင်ꩻမွေးလဲဉ်းနဝ်ꩻသွူ။ နီဖုံႏယို ‘ကိုယ်ႏတောႏယေရှု’ အပါသျောက် သေꩻခန်း မာꩻခွင်ꩻဖေႏသွော့ꩻ ‘မောရှေ’ တွမ်ႏ ‘ဧလိယ’ တွက်တာႏအုံခရာႏသိုမ်းသွံဖြုံႏ” သျောက်ခါꩻခန်းနုဲင်းနဝ်ꩻသွူ။ ကွဲတွော့ꩻ ‘ပေတရု’ နဝ်ꩻဝွေꩻနမ်းတွမ်ႏဝွေꩻ ဒေါ့ꩻတမုဲင်ꩻတဲ့ꩻ တသေတဝ်ႏသွူ။

‘ပေတရု’ ဒေါ့ꩻငဝ်းတွင်ꩻ ကလေလင်းဒါးမို့ꩻအေႏတဗာႏနဝ်ꩻ လင်ꩻလွဉ်သွူတဲင်ဒို့ꩻဗဉ်ႏထိုꩻခန်းဒျာႏ ဝွေꩻသီး ဖုံႏနဝ်ꩻသွူ။ နဝ်ꩻဆချာ “ဝွေꩻနဝ်ꩻနဝ်ꩻ ထွာခွေအရက်သွတ်ꩻပိုခိုတဲင် ဝွေꩻတွက်တာႏခွေသꩻရေꩻမွေးငါႏနဝ်ꩻသွူ။ နာႏ ခံႏလွသွော့ꩻဝွေꩻငဝ်း။ မို့ꩻအေႏအခြာꩻဟွိုန်ခန်းငဝ်းနဝ်ꩻတဗာႏနဝ်ꩻသွူ။” တပဲ့ꩻတောႏသွံဖြာꩻနဝ်ꩻ ငမ်းလွဉ်ꩻငါတဲင် ဝꩻလင်ꩻခန်းဟံႏလောင်းနဝ်ꩻသွူ။

နဝ်ꩻဆချာ ‘ကိုယ်ႏတောႏယေရှု’ နဝ်ꩻ ခွိုင်သွူဝွေꩻသီးဖုံႏတဲင် “ထွိုင်ႏဟုဲင်း တွမ်ႏငမ်းလွမွိုန်း” မိန်းခန်း နုဲင်းနဝ်ꩻသွူ။ ဝွေꩻသီးကထွိုင်ႏထွားတွင်ꩻ အဝ်ႏကုဲင်ကွို့ꩻ ‘ကိုယ်ႏတောႏယေရှု’ တဖြာꩻလွုမ်ꩻသွူ။

‘ကိုယ်ႏတောႏယေရှု’ တွမ်ႏတပဲ့ꩻသွံဖြာꩻဖုံႏနဝ်ꩻ အဝ်ႏကောင်လောင်းလင်ꩻလွဉ်လွခန်းနဝ်ꩻသွူ။ နဝ်ꩻဆချာ ‘ကိုယ်ႏတောႏယေရှု’ ရိုꩻဝွေꩻသီးဖုံႏ “ယိုခါခင်ႏလမ်းယိုကို ကထွာကုဲင်လဲဉ်းဒျာႏ အကျောင်ꩻခရာႏအာယို စွဉ်ႏဒေါ့ꩻ နယ်မွိုန်းတဝ်းပါမုဲင်ꩻမုဲင်ꩻတွမ်ႏ၊ ခွေနဝ်ꩻ တညတဝ်းအီသီထိုꩻရိုꩻကီလဲ့ꩻ အသက်အီမွန်ချာဒျာႏ။ မိဉ်ႏတွိုႏအချိန်ႏနဝ်ꩻ မꩻသီဖုံႏဒေါ့ꩻနယ်သွော့ꩻ လိုꩻဖုံႏနဝ်ꩻဟုဲင်း” မိန်းခန်းနုဲင်းနဝ်ꩻသွူ။

သျင်ႏမဿဲခရစ်နွို့ꩻ ၁၇:၁-၉; မာကုခရစ်နွို့ꩻ ၉:၂-၈; သျင်ႏလုကာခရစ်နွို့ꩻ ၉:၂၈-၃၆ မꩻ သမ္မာႏလိတ်ကျမ်ꩻ ငဝ်းခြုဲင်း