၄ - ဘုရာꩻသျင်ꩻတွမ်ႏ ‘ဧဘရာဟမ်’ သီးဖုံႏ င၀်းကတိ

ထီသန်ထွိုင်ႏထွူ နေင်ႏပေါင်ꩻထွိုင်ႏညပသာ ကမ္ဘာႏလောင်းယိုလိုꩻဖုံႏပေါႏလွဉ်အာချာခန်းနဝ်ꩻသွူ။ ဘုရာꩻသျင်ꩻတွမ်ႏအချင်ꩻချင်ꩻအလောင်ႏ မာꩻဒွုမ်းကအပဲစ်ဖုံႏနဝ်ꩻသွူ။ လိုꩻစားနဝ်ꩻဖုံႏယို ဘုရာꩻသျင်ꩻနဝ်ꩻ ဒေါ့ꩻငါငဝ်းငွါဘာႏသာႏတမျိုꩻလွုမ်ꩻတွော့ꩻ ဘုရာꩻသျင်ꩻကထွဉ်ႏအတွိုင်ႏ ကမ္ဘာႏစွစ်ꩻစဲစ်ꩻ ကလားကမာꩻတိုꩻပွာꩻလိုꩻ ကိုယ်ႏစားစုꩻဗူႏသွူဝင်ꩻတွော့ꩻ တယ်ႏထောင်ႏလွေꩻခန်း ဝေင်ꩻတဝေင်ꩻနဝ်ꩻသွူ။

ဝွေꩻသီးနဝ်ꩻ ကွပ်ကုဲင်ငါႏတဲင် ဝွေꩻသီးအုံဟဝ်ꩻဗာႏနုဲင်းမုဲင်းကရိုꩻ နဝ်ꩻ နာႏခံႏတဝ်း ဘုရာꩻသျင်ꩻငဝ်းအမိန်းနဝ်ꩻသွူ။ ဝွေꩻသီးနဝ်ꩻ တွိုႏနွောင်ꩻတနံခန်းတဲ့ တယ်ႏခန်းလမ်းထိုလမ်းတန်နဝ်ꩻသွူ။ ဘုရာꩻသျင်ꩻ ဝွေꩻသီးကမာꩻခါꩻလမ်းနဝ်ꩻ ထီႏခန်းဒျာႏတွော့ꩻ ဝွေꩻသီးဖုံႏ မဉ်ႏမာꩻညီꩻဝင်ꩻအပဲစ်ယိုနဝ်ꩻ အပဲစ်ယိင်းတန်တန်လွဉ်ကရိုꩻနဝ်ꩻထီႏခန်းဒျာႏနဝ်ꩻသွူ။

တွိုႏနဝ်ꩻတွော့ꩻ ဘုရာꩻသျင်ꩻနဝ်ꩻ ဝွေꩻသီးငဝ်းငွါဘာႏသာႏယို ဖေႏကကွာႏအာနဝ်ꩻ မာꩻလွေꩻထွူတဲင် ကမ္ဘာႏကိုစွစ်ꩻစဲစ်ꩻ လိုꩻဖုံႏစွစ်ꩻတိုးခန်းဒျာႏနဝ်ꩻသွူ။ လိုꩻသီးကတယ်ႏထောင်ႏစဝေင်ꩻအမဉ်ꩻ နဝ်ꩻ ထွာ‘ဘာဘယ်’ တဲင် အဓိပ္ပါယ်ႏနဝ်ꩻ လꩻ ‘သျှူက်တရိမ်’ နုဲင်းနဝ်ꩻသွူ။

နေင်ႏရျာꩻပေါင်ꩻကထွိုင်ႏည ဘုရာꩻသျင်ꩻနဝ်ꩻ ဒေါ့ꩻရီခန်းပါꩻ ‘အာဗြံ’ နဝ်ꩻသွူ၊ “နာꩻနဝ်ꩻအွဉ်ႏကုဲင်သွူ နုဲင်ႏငံႏတွမ်ႏ လမ်းသားတဲင် ခွေကဖေႏနယ်ဒါႏ ခင်ႏလမ်းထျꩻနဝ်ꩻ လွေꩻဟုဲင်း၊ ခွေယိုနောဝ်ꩻ ဖေႏသွူနာꩻထာꩻဟဝ်တဲင်နာꩻအတာႏမာႏဖေႏသွူအမျတ်ꩻယံလွို နုဲင်ႏငံႏတောႏတဲင် နာꩻမဉ်ꩻဖုံႏတဲ့ဖေႏကမျတ်ꩻမာꩻလွေꩻဖေႏဒျာႏသွူ၊ လိုꩻကဖေႏဒါႏနာꩻထာꩻဟဝ်ယို ခွေအီႏဖေႏသညင်ꩻထာꩻဟဝ်ꩻမင်္ဂလာႏတွော့ꩻ၊ လိုꩻကတွိုက်ꩻဒါႏနာꩻ ကျိန်ႏစာႏယို ထွဉ်ႏသင်ꩻဘေꩻနဝ်ꩻသွူ။ ကမ္ဘာႏလောင်းယို လမ်းသားတွိုင်ꩻနောဝ်ꩻ ပွိုးနာꩻယိုတဲင် စံႏစာႏဗာႏအဟဝ်ဖဲ့ꩻ” မိန်းခန်းနုဲင်းနဝ်ꩻသွူ။

နဝ်ꩻတွော့ ‘အာဗြံ’ နဝ်ꩻ ဘုရာꩻသျင်ꩻမိန်းအတွိုင်ႏလွိုက်နာႏလွေꩻဒျာႏသွူ။ ဝွေꩻတွမ်ႏဝွေꩻမာကထွာဒါႏ ‘စာရဲ’၊ ဝွေꩻကူႏလီႏတွမ်ႏ ဝွေꩻကပဲင်ႏဆဲင်ႏမန်ႏသမျ ထူႏလွေꩻထွူတဲင်၊ လွေေꩻခန်းဒျာႏ ဘုရာꩻ သျင်ꩻ ကဖေႏနယ်ဒါႏခင်ႏလမ်း ‘ခါနန်’ ခမ်းနဝ်ꩻသွူ။

‘အာဗြံ’ ထွိုင်ႏတွိုႏ ‘ခါနန်’ နဝ်ꩻ ဘုရာꩻသျင်ꩻရိုꩻခန်း “ထွားပါနာꩻအသောင်အရင်ꩻနဝ်ꩻဟုဲင်း။ ဟံႏယာႏကားကအဝ်ႏယိုနဝ်ꩻ ထွာဖေႏနာꩻတဲင် နာꩻဆုဲင်ꩻချာသားဖုံႏတာႏတနီꩻနီꩻတချိန်ႏချိန်ႏ ဟံႏဖုံႏယို ပဲင်ႏ ဆဲင်ႏတသေႏနွောင်ꩻဒျာႏ” ဒေါ့ꩻရိုꩻခန်းနုဲင်းနဝ်ꩻသွူ။ နဝ်ꩻဆချာတွော့ꩻ ‘အာဗြံ’ နဝ်ꩻ ချꩻခန်းခင်ႏလမ်း နဝ်ꩻကိုသွူ။

ခင်ႏလမ်းနဝ်ꩻနဝ်ꩻ အမျတ်ꩻထိုသွတ်ꩻဘုရာꩻသျင်ꩻသီး ဘာႏသာႏရေꩻအွဉ်ငါသားကထွာဒါႏ ‘မေလခိဇေဒက်’ အဝ်ႏသွူ။ တနီꩻတွော့ꩻ ‘အာဗြံ’ နဝ်ꩻ အဝ်ႏတွိုႏတွိုက်ꩻပွယ်ꩻတပွယ်ꩻကိုတွင်ꩻ ခွဲတွမ်ႏ ဝွေꩻ နဝ်ꩻသွူ။ ‘မေလခိဇေဒက်’နောဝ်ꩻ ‘အာဗြံ’ ယို ဘုရာꩻသျင်ꩻဖေႏထာꩻဟဝ်အတာႏ နိဗ္ဗာန်ႏခံဝေင်ꩻတွမ်ႏ ကမ္ဘာႏဟံႏတန်ယို ပွိုင်ႏစိုꩻထွူ တန်မျတ်မွေးငါႏ ဘုရာꩻသျင်ꩻ ဖေႏ ‘အာဗြံ’ ယို ထာꩻဟဝ် ဟုဲင်း” ဆုꩻတောင်ꩻဒေါ့ꩻလဝ်းဟွိုန်နုဲင်းနဝ်ꩻသွူ။ နဝ်ꩻတွော့ꩻ‘အာဗြံ’ နဝ်ꩻ တွိုက်ꩻပွယ်ꩻကနွောင်ꩻဒါႏ ဆီပုံႏတပုံႏယို ဖေႏခန်းဒျာႏ ‘မေလခိဇေဒက်’ နဝ်ꩻသွူ။

နေင်ႏပေါင်ꩻလာပေါင်ꩻညစွဉ်ႏလဲ့ ‘အာဗြံ’တွမ်ႏ ‘စာရဲ’ သီးယို တလနွောင်ꩻတဝ်းဒွုမ်းပိုသွူ။ ဘုရာꩻသျင်ꩻ နဝ်ꩻ ဖေႏကတိခန်း ‘အာဗြံ’ မို့ꩻလောင်းကီကအဝ်ႏဒါႏ ဆာႏအတွိုင်ꩻ အီႏလꩻပို နုဲင်းနဝ်ꩻသွူ။ ‘အာဗြံ’ နဝ်ꩻ ယွုမ်းအံႏခန်း ဘုရာꩻသျင်ꩻငဝ်းကတိဖုံႏနဝ်ꩻသွူ။ ဘုရာꩻသျင်ꩻနဝ်ꩻ ‘အာဗြံ’ ယိုထွာသူႏတောႏကောင်ꩻ ဝွေꩻငဝ်းကတိယို ယွုမ်းအံႏလိုꩻအကျောင်ꩻ ကေႏငြာႏခန်းဒျာႏနဝ်ꩻသွူ။

နဝ်ꩻဆချာတွော့ꩻ ဘုရာꩻသျင်ꩻတွမ်ႏ ‘အာဗြံ’ နဝ်ꩻ အွဉ်ႏခန်းဝင်ꩻငဝ်းကတိနဝ်ꩻသွူ။ ကတိကရိုꩻနောဝ်ꩻ နီဖဲ့စလွုမ်းတဖြာꩻတွမ်ႏတဖြာꩻ ဖေႏလူႏလုဲင်ႏ၀င်ꩻနဝ်ꩻသွူ။ ကွဲတွော့ꩻဘုရာꩻသျင်ꩻနဝ်ꩻ အကျောင်ꩻ ခရာႏဖုံႏယို ‘အာဗြံ’ ဗေင်ႏအွီႏချိန်ႏတွင်ꩻ တွမ်ႏဘုရာꩻသျင်ꩻထွာဖေႏခါꩻကတိငဝ်းနဝ်ꩻသွူ။ ကွဲတွော့ꩻ ‘အာဗြံ’ နဝ်ꩻ အဝ်ႏဟွိုန်ဒျာႏဘုရာꩻ သျင်ꩻငဝ်းနဝ်ꩻသွူ။ ဘုရာꩻသျင်ꩻနဝ်ꩻ “နေးတွမ်ႏ နာꩻနမ်းခန္ဓာႏအသွီႏအယာႏတဲင် ပိုတဖြာꩻယို ခွေအီႏဖေႏ ပဲင်ႏဆဲင်ႏနဝ်ꩻသွူ။ ‘ခါနန်’ ကရိုꩻဒါႏခင်ႏလမ်းယို ခွေအီဖေႏခါꩻ နာꩻဆုဲင်ꩻချာသားဖုံႏ” မိန်းဒေါ့ꩻလဝ်းဟွိုန်နုဲင်းနဝ်ꩻသွူ။ ကွဲတွော့ꩻ ‘အာဗြံ’ ယို တလနွောင်ꩻတဝ်း ဒွုမ်းပိုတဖြာꩻဖြာꩻသွူ။

ကမ္ဘာႏဦꩻကျမ်ꩻ ၁၁-၁၅ မꩻ သမ္မာႏလိတ်ကျမ်ꩻ ငဝ်းခြုဲင်းအာ