၆ - ဘုရာꩻသျင်ꩻ ပွိုးကူႏညီႏမꩻ ‘ဣဇာက်’

‘အာဗြဟံ’ အရွယ်ႏကထွိုင်ႏဖြား ဝွေꩻပိုခို ‘ဣဇာက်’ နဝ်ꩻလဲ့ အရွယ်ႏလꩻလွဉ်နဝ်ꩻသွူ။ နဝ်ꩻတွော့ꩻ ‘အာဗြဟံ’ နောဝ်ꩻဝွေꩻသွဉ်းသယ်ႏတဖြာꩻယို အမျိုꩻခွိုꩻဖုံႏကအဝ်ႏဒါႏ အွိုးဝွေꩻဇာတိထျꩻသူꩻ ‘ဣဇာက်’ အတွက်တာႏ ဖေႏကထွုမ်ႏဖေႏမာနဝ်ꩻ အွဉ်ႏလွေꩻခန်းဒျာႏနဝ်ꩻသွူ။

‘အာဗြဟံ’ မျိုꩻခွိုꩻကအုံဒါႏအရပ်နဝ်ꩻ ကလွေꩻတဖူꩻနဝ်ꩻတဲ့ ညငါႏထွူတဲင် ဖေႏကတွိုႏ ‘ရေဗက္က’ ထျꩻယို ဘုရာꩻသျင်ꩻနဝ်ꩻ အွဉ်ႏ နယ်ႏဖေႏခန်းတဖူꩻနဝ်ꩻသွူ။ ဝွေꩻမူႏနောဝ်ꩻ ထွာ ‘အာဗြဟံ’ ဖူးတွမ်ႏ လီꩻမူႏရော့ꩻနုဲင်းနဝ်ꩻသွူ။

‘ရေဗက္က’ နဝ်ꩻ အွဉ်ႏကုဲင်သေꩻခန်းဖူးဝေးလမ်းသားတဲင် တွမ်ႏကူႏလီႏယို အီႏလွေꩻ ‘ဣဇာက်’ လမ်းတဲင်တွော့ꩻ သဘောႏတူႏခန်းဒျာႏနဝ်ꩻသွူ။ ‘ဣဇာက်’ နဝ်ꩻလဲ့ ပါꩻမူႏနဝ်ꩻ သဲက်ကတွိုႏ တောႏလမ်းစွဉ်ႏခန်းနဝ်ꩻသွူ။

အချိန်ႏကထွိုင်ႏည ‘အာဗြဟံ’ ထွိုင်ႏသီထွူ၊ ဝွေꩻပိုခိုကထွာဒါႏ ‘ဣဇာက်’ နဝ်ꩻ ဘုရာꩻသျင်ꩻဖေႏခန်း ထာꩻဟဝ် ဖုံႏနဝ်ꩻသွူ။ ပွိုးတမုဲင်နဲးတဲင် ဘုရာꩻသျင်ꩻ ငဝ်းကတိဖုံႏအကိုနဝ်ꩻ ‘အာဗြဟံ’ ယို အီလꩻဗာႏ မျိုꩻဆွိုက်ဖုံႏအာ နုဲင်းနဝ်ꩻသွူ။ ကွဲတွော့ꩻ ‘ဣဇာက်’ မာကထွာဒါႏ ‘ရေဗက္က’ နဝ်ꩻ ပိုအဝ်ႏတဝ်းဒွုမ်းသွူ။

‘ဣဇာက်’ နဝ်ꩻ ‘ရေဗက္က’ အတွက်တာႏ ဆုတောင်ꩻခန်းဘုရာꩻသျင်ꩻထျꩻသွူ။ ဘုရာꩻသျင်ꩻနဝ်ꩻလဲ့ မာꩻဖေႏခန်း ‘ရေဗက္က’ ဖေႏကလွူးပို အမွာနောဝ်ꩻအွဉ်ႏနမ်းလောင်းခန်းထာꩻနဝ်ꩻသွူ။ ပိုအမွာဝင်ꩻနီယိုနဝ်ꩻ အဝ်ႏဟို့ꩻကို မွော့ꩻရုဲင်ꩻငါႏထာꩻဟောင်း ပွိုးတမုဲင်ဟောင်း ‘ရေဗက္က’ သျောက်လဝ်းခန်း ဘုရာꩻသျင်ꩻ နုဲင်းနဝ်ꩻသွူ။

ဘုရာꩻသျင်ꩻရိုꩻ ‘ရေဗက္က’ နုဲင်းယို “နာꩻနဝ်ꩻ အီလွူးပိုဝင်ꩻနီသွူ၊ ဝွေꩻသီးဖုံႏ မျိုꩻဆက်ယို ကွယ်ꩻထိုꩻ ထွာနုဲင်ႏငံႏ နီနုဲင်ႏငံႏထွူ၊ ဝွေꩻသီးအချင်ꩻချင်ꩻ အီပြဲင်ႏဗာႏဝင်ꩻနဝ်ꩻသွူ။ နဝ်ꩻတွော့ꩻ နာꩻပိုတန်တဖြာꩻထျꩻ ကပေါႏပေါက်လွဉ်ဒါႏ နုဲင်ႏငံႏနဝ်ꩻ ကတူႏအီချꩻဦးညွတ်ဗာႏ နာꩻပိုအပေႏတဖြာꩻထျꩻ” ဒေါ့ꩻခါꩻနုဲင်းနဝ်ꩻသွူ။

‘ရေဗက္က’ ကထွိုင်ႏလွူးပိုချိန်ႏနဝ်ꩻ ပိုတန်ယိုတနျာႏတဲက်ꩻတွော့ꩻအဆွဉ်ႏအာတဲင် ပါꩻပေႏနဝ်ꩻဟဲ့ꩻခန်းအမဉ်ꩻ ‘ဧသော’ နဝ်ꩻသွူ။ နဝ်ꩻထွူတွော့ꩻ ပိုခိုပေႏတဖြာꩻနောဝ်ꩻ ခွုမ်လင်ꩻ ‘ဧသော’ ခင်ႏဒွိုႏတဲင် ဟဲ့ꩻခန်း ‘ယာကုပ်’ နဝ်ꩻသွူ။

ကမ္ဘာႏဦꩻကျမ်ꩻ ၂၄:၁-၂၅:၂၆ မꩻ သမ္မာႏလိတ်ကျမ်ꩻ ငဝ်းခြုဲင်းအာ