၂၁ - ဘုရာꩻသျင်ꩻ ဖေႏ ‘မေရှိယ’ ကတိ

ဘုရာꩻသျင်ꩻ ကဖန်ဆင်ꩻကမ္ဘာႏဟံႏတန်နဝ်ꩻကာႏ ဆုဲင်ꩻတနီꩻချိန်ႏ အီအွဉ်ႏလွစ်ဗာႏ ‘မေရှိယ’ ကရိုꩻနဝ်ꩻ သေရီးဒျာႏသွူ။ ‘အာဒံ’ တွမ်ႏ ‘ဧ၀’ သီးထျꩻတဲ့ အီႏမာꩻနုဲင်းယို ဝွေꩻဖေႏခါꩻကတိသွူ။ ‘ဧ၀’ ဆုဲင်ꩻမျိုꩻဆက်သားဖုံႏ အီႏတွဲႏပဲစ်ꩻ ရူးကတူႏ ဝွေꩻဒေါ့ꩻခါꩻနေးနဝ်ꩻတဲင် ‘စာတန်’ နဝ်ꩻ လဲဉ်အံႏအီ ‘ဧဝ’ တာႏ ပြောင်ꩻခန္ဓာႏရူးတွော့ꩻ ပေါႏ လွဉ်စွဉ်ႏလဲ့ ဘုရာꩻသျင်ꩻနဝ်ꩻ ‘မေရှိယ’ ယို မဲ့အနွောင်ꩻ မဲ့ အီႏဝါး ထန်ႏထိုꩻဒျာႏ ‘ စာတန်’ ယူႏခါꩻနုဲင်းနဝ်ꩻသွူ။

ဘုရာꩻသျင်ꩻနဝ်ꩻ ကမ္ဘာႏလောင်းကအဝ်ႏဒါႏ လိုꩻအစုꩻအဗူႏဖုံႏယို အဝ်ႏ ‘အာဗြဟံ’ တဆွိုက် မဲ့ꩻအီခံႏစာႏဗာႏထာꩻဟဝ် ဖေႏခါꩻထွူ ကတိနုဲင်းယိုတဲင်၊ ဘုရာꩻသျင်ꩻနဝ်ꩻ ဆုဲင်ꩻတချိန်ႏ အွဉ်ႏလွစ်သွူ ‘မေရှိယ’ တဲင် ငဝ်းကတိ ယို အီအွဉ်ႏအတီႏမြယ်ꩻသွူ။ ကမ္ဘာႏဟံႏတန်လောင်းကအဝ်ႏဒါႏ လိုꩻဖုံႏ အအာစုꩻယို အပဲစ်ကားက အဝ်ႏ ‘မေရှိယ’ အီႏကယ်ႏဒင်ႏဒျာႏသွူ။

ဘုရာꩻသျင်ꩻနောဝ်ꩻ ဗွိုန်နုဲင်း ‘မောရှေ’ ပညာႏအဝ်ႏသားတဖြာꩻ၊ ‘မောရှေ’ ဆချာ အီအွဉ်ႏလွစ်လွဉ်ယင်း ဖေႏခါꩻ ‘မောရှေ’ ကတိ တဲင် ၊ နိမိတ်ထွားဟော်ꩻ ပညာႏအဝ်ႏသားနောဝ်ꩻ မဲ့အီထွာ ‘မေရှိယ’ သွူ။ ဘုရာꩻသျင်ꩻ နေးအနယ်ယိုတဲင် အီအွဉ်ႏလွစ် ‘မေရှိယ’ ဖေႏထဲင်းယင်း ကတိ နုဲင်းယိုသွူ။

ဘုရာꩻသျင်ꩻနဝ်ꩻ ‘ဒါဝိဒ်’ ခွန် ဆုဲင်ꩻမျိုꩻဆက်ကို တဖြာꩻကရိုꩻနဝ်ꩻ မဲ့အီထွာ ‘မေရှိယ’ ဖေႏထွူကတိတဲင် ဝွေꩻယို ဘုရာꩻသျင်ꩻထာꩻ၀ရလိုꩻသားဖုံႏအလောင်း ခွန်တပါꩻအနေႏ မဲ့ꩻအီအုပ်ချွုတ်ထာꩻဝရဒျာႏသွူ။

ဘုရာꩻသျင်ꩻနဝ်ꩻ နိမိတ်ထွားဟော်ꩻပညာႏသျင်ႏ ‘ယေရဟိ’ ယို တနီꩻသꩻဘောႏတူႏညီႏမုꩻဆုဲင်ꩻတဗာႏမဲ့ꩻအီမာꩻဒျာႏ မိန်းခါꩻနုဲင်းယိုသွူ။ သꩻဘောႏတူႏညီႏမုꩻ တသာနောဝ်ꩻ တဗွိုန်တဝ်း ‘သိနာ’ ကို ကမာꩻဒါႏ ‘ဣစရေး’ သီး သꩻဘောႏတူႏညီႏမုꩻသွူ။ ဝွေꩻယို တွမ်ႏလိုꩻအာ မဉ်ႏမာꩻသꩻဘောႏတူႏညီႏမုꩻတသာချိန်ႏနဝ်ꩻ ဝွေꩻယို နမ်းကိုယ်ႏတိုင်ႏ ထွဉ်ႏသေထွူတွော့ꩻ လိုꩻတွိုင်ႏဖေႏကရက်ဝွေꩻ၊ ဝွေꩻတရာꩻဖုံႏယို မဲ့ꩻထွဉ်ႏလွောက်ꩻနာႏသွူ။ နုဲင်းယိုသွူ ဘုရာꩻသျင်ꩻတရာꩻဖုံႏနဝ်ꩻ မဲ့အီႏထွာ တဲမ်းမတ်ခါꩻ ဝွေꩻသီးသꩻရာႏကို သွိုန်ႏကိုသွူ။ ဝွေꩻသီးယို မဲ့ထွာဘုရာꩻသျင်ꩻလိုꩻ၊ ဘုရာꩻသျင်ꩻနဝ်ꩻ ဝွေꩻသီး အပဲစ်ကားကအဝ်ႏမဲ့ခွေအီႏခွင်ꩻဖေႏသွူ။ တွမ်ႏဝွေꩻသီး သဘောႏတူႏညီႏမုꩻတသာနောဝ်ꩻတဲ့ မဲ့ ‘မေရှိယ’ မာꩻဖေႏဒျာႏမိန်းခန်းနုဲင်း နဝ်ꩻသွူ။

ဘုရာꩻသျင်ꩻ နိမိတ်ထွားဟော်ꩻ ပညာႏအဝ်ႏသားဖုံႏနဝ်ꩻ ‘မေရှိယ’ ယို နိမိတ်ထွားဟော်ꩻပညားသျင်ꩻတွမ်ႏ ဘာႏသာႏရေꩻအွဉ်ငါသားလွုမ်ꩻမကာႏ ခွန်တပါꩻတဲ့ထွာဒျာႏအကျောင်ꩻ မိန်းခါႏနုဲင်းနောဝ်ꩻသွူ။ နိမိတ်ထွားဟော်ꩻ ပညာႏသျင်ꩻကရိုꩻနဝ်ꩻ ဘုရာꩻထျꩻ ငဝ်းသတင်ꩻယိုလိုꩻဖုံႏအထျꩻ ကဖန်းဖြယ်ချာဒါႏ ပုဂ္ဂိုလ်ႏသွူ။ မဲ့ꩻဘုရာꩻသျင်ꩻအွဉ်ႏလွစ်ဒျာႏ ကရိုꩻဒါႏ ‘မေရှိယ’ နဝ်ꩻ အပဲစ်ကင်ꩻ အယံသွတ်ꩻမဲ့ꩻထွာလွဉ် နိမိတ်ထွားဟော်ꩻ ပညာႏသျင်ႏသွူ။ ကဒေါ့ꩻ ဗာႏနုဲင်းယိုနဝ်ꩻ ‘မေရှိယ’ ယို ဘုရာꩻငဝ်း အဟွိုန်သွတ်ꩻ၊ အသေနာႏသွတ်ꩻတဲင် လိုꩻအာဖုံႏအတာႏလဲ့ အယံသွတ်ꩻ ဟော်ပြန်ႏဖေႏချာနွောင်ꩻနဝ်ꩻသွူ။

‘ဣစရေး’ ဘာႏသာႏရေꩻအွဉ်ငါသားဖုံႏနဝ်ꩻ လိုꩻဖုံႏအတာႏ မာꩻ ဆွိုက်ယင်း ပူႏဇောႏထဲင်းယင်းဘုရာꩻသျင်ꩻသွူ။ ပူႏဇောႏမုꩻဖုံႏယို နဝ်ꩻ လိုꩻဖုံႏ အပဲစ်အာ အတာႏ ဖေႏကခံႏဗာႏမွိုန်းအပဲစ်၊ အပဲစ်အတာႏ ထွာထာꩻပူႏဇောႏသွူ။ လိုꩻအမျာꩻအတာႏ ဘာႏသာႏရေꩻအွဉ်ငါသားဖုံႏတဲ့ ဆုတောင်ꩻဖေႏဘုရာꩻသျင်ꩻသွူ။ ကွဲတွော့ꩻ ‘မေရှိယ’ နဝ်ꩻ ဘုရာꩻသျင်ꩻအထျꩻ ဝွေꩻနမ်းတွမ်ႏဝွေꩻ အယံကျသွတ်ꩻ အီထွာ ဆက်သသား ဘာႏသာႏရေꩻအွဉ်သားသွူ။ ကဒေါ့ꩻဗာႏနုဲင်းယိုနဝ်ꩻ ဝွေꩻယို အချိန်ႏမုဲင်ꩻမုဲင်ꩻပေႏတဲ့ မာꩻအပဲစ်မအဝ်ႏ၊ ဆုဲင်ꩻအနာဂါတ်သွူ တမုဲင်ꩻပူႏဇောႏမုꩻတဲ့ မာꩻယင်းခရာႏမလွို ဝွေꩻနမ်းတွမ်ႏဝွေꩻ ပူႏဇောႏချာဒျာႏနဝ်ꩻသွူ။

ကအုပ်ချွုတ်ဒါႏ လိုꩻအစုꩻအဗူႏခွန်တွမ်ႏ အွဉ်ကတူႏသားဖုံႏနဝ်ꩻ မာꩻဒါႏအမာႏသွူ။ ‘ဒါဝိဒ်’ ခွန်နဝ်ꩻ အုပ်ချွုတ်လွုမ်ꩻ ‘ဣစရေး’ လိုꩻမျိုꩻအလောင်းလွုမ်ꩻသွူ။ ကွဲတွော့ꩻ ‘ဒါဝိဒ်’ ခွန် ဆုဲင်ꩻမျိုꩻဆက် ကထွာဒါႏ ‘မေရှိယ’ နဝ်ꩻ မဲ့အုပ်ချွုတ် ထာꩻဝရတသေႏ ကမ္ဘာႏတဖြုံႏလွုမ်းသွူ။ ဝွေꩻယို မာꩻမဲဉ်ႏသေႏသေႏဆွုံꩻဖျက်ချက်တဲင် တရာꩻမျမျတတ မဲ့ꩻအီအုပ်ချွုတ်လွေꩻဒျာႏ ထာꩻဝရတသေႏသွူ။

ဘုရာꩻသျင်ꩻနိမိတ်ထွားဟော်ꩻပညာႏအဝ်ႏသားဖုံႏနဝ်ꩻ ဒေါ့ꩻလွ၀င်ꩻ ‘မေရှိယ’ အကျောင်ꩻခရာႏ ယဟန်ႏဖုံꩻနဝ်ꩻသွူ။ ဥပမာႏအနေႏ ( မာလခိ )နဝ်ꩻ ခါးလား ‘မေရှိယ’ ကလွဉ် နိမိတ်ထွားဟော်ꩻ ဆရာႏတဖြာꩻ အီလွဉ်သွူ။ နိမိတ်ထွားဟော်ꩻပညာႏသျင်ႏနဝ်ꩻနဝ်ꩻ အရေꩻပါမွေးစွဉ်ႏသွူ။ နဝ်ꩻဆချာ နိမိတ်ထွားဟော်ꩻပညာႏသျင်ႏ (ဟေရှာ ယ)နဝ်ꩻ ‘မေရှိယ’ ယို လိုꩻမူႏ မူႏနံꩻစင်ႏစဲစ် အီလွူးဖွာလင်ဒျာႏ မိန်းရိုꩻထွူနုဲင်းနဝ်ꩻတဲင်၊ နိမိတ်ထွားဟော်ꩻ ပညာႏသျင်ꩻ (မိက္ခာ) နဝ်ꩻတဲ့ꩻ ‘မေရှိယ’ ယို အီလွူးဖွာလင်ꩻ ‘ဝေင်ꩻဗက်လင်’ ရိုꩻခါꩻနုဲင်းနဝ်ꩻသွူ။

နိမိတ်ထွားဟော်ꩻ ပညာႏသျင်ꩻ (ဟေရှာယ) နဝ်ꩻ ‘မေရှိယ’ ယို အုံသွူ ခမ်း ‘ဂါလိလဲ’ တဲင် သꩻကပေႏသန်ဒါႏ လိုꩻဖုံႏယို မဲ့ꩻအီႏဖြေႏသꩻဖေႏသွူ။ ဝွေꩻယို ကအဝ်ႏခံဒါႏ အချွုတ်သားဖုံႏသွူတဲ့ အီအွဉ်ႏလွစ်ဖေႏထွူတဲင်၊ တ ခြွိုင်ႏသန်ꩻတဝ်းသားဖုံႏတွမ်ႏ တအာႏ၊ နားတဟွိုန်တဝ်းဖုံႏ လိုꩻနွဲ့၊ လိုꩻခေင်ႏဖုံႏ ဝွေꩻအီကုဖေႏသွူ။

နိမိတ်ထွားဟော်ꩻ ပညာႏသျင်ꩻ (ဟေရှာယ) နဝ်ꩻ လိုꩻအမျာꩻဖုံႏ လွꩻထီႏ ‘မေရှိယ’ တဲင် အီလက်ခံႏတဝ်း၊ မဲ့အီညင်ꩻလွိုဆန်ꩻ နုဲင်းနောဝ်ꩻတဲ့ ဒေါ့ꩻဟွိုန်ခါꩻသွူ။ နိမိတ်ထွားဟော်ꩻ အလင်ဖုံႏနဝ်ꩻ ‘မေရှိယ’ မိတ်ဆွေႏဖုံႏယို မဲ့ꩻသစ္စာႏအီကုဲင်ထိုꩻဝွေꩻ ဒေါ့ꩻထွူတဲင် နိမိတ်ထွားဟော်ꩻပညာႏသျင်ꩻ (ဇာခရိ) နောဝ်ꩻ ဝွေꩻမိတ်ဆွေႏ မာꩻနုဲင်းယိုတဲင် အီလꩻ ရွဉ်သင်္ဂါႏသွံဆီတဲ့ ဒေါ့ꩻခါꩻသွူ။ နိမိတ်ထွားဟော်ꩻ ပညာႏသျင်ꩻယဟန်ႏဖုံႏနဝ်ꩻ လိုꩻဖုံႏ မာꩻသီထွူ ‘မေရှိယ’ တဲင် ဝွေꩻ ခွမ်ꩻလာꩻဖုံႏယို မဲ့ꩻအီမာꩻလွ၀င်ꩻထာꩻလောင်ꩻထာꩻတောႏဖုံႏ နုဲင်း နဝ်ꩻတဲ့ ဒေါ့ꩻခါꩻသွူ။

နိမိတ်ထွားဟော်ꩻ ပညာႏအဝ်ႏသားဖုံႏနောဝ်ꩻ ‘မေရှိယ’ ယို အီႏသီဗာႏတွမ်ႏ အကျောင်ꩻခရာႏနုဲင်းမုဲင်ꩻတဲ့ꩻဒေါ့ꩻခါꩻသွူတဲင်၊ (ဟေရှာယ)နောဝ်ꩻ လိုꩻအမျာꩻဖုံႏယို ‘မေရှိယ’ အလောင်း အီႏတထျိုꩻတွမ်ႏယုဲင်ꩻ အီႏသွမ်ꩻကဲ့ꩻရဲ့ꩻရောင်၀င်ꩻနုဲင်းနောဝ်ꩻတဲ့ꩻ ဒေါ့ꩻခါꩻသွူ။ ဝွေႏသီးဖုံႏယို ‘မေရှိယ’ အပဲစ်တမုဲင်ꩻမုဲင်ꩻတအဝ်ႏတဝ်းတဲ့ꩻ အီႏခံႏဗာႏ ဝင်ꩻထိုးတွမ်ႏဗင်၊ ထာꩻဒုက္ခအတန်စားတွမ်ႏ ထာꩻဆာမုꩻဖုံႏယို အီခံႏစာႏဗာႏသွူ။

‘မေရှိယ’ နဝ်ꩻ ထွာလိုꩻအပဲစ်တအဝ်ႏတဝ်း၊ ထွာလိုꩻပြဲ့ꩻစွုမ်ႏ နိမိတ်ထွားဟော်ꩻ ပညာႏသျင်ꩻသီး ဟော်ꩻခါꩻစားနဝ်ꩻသွူ။ ကွဲတွော့ꩻ ဘုရာꩻသျင်ꩻနဝ်ꩻ လိုꩻဖုံႏအပဲစ်အတာႏ ဖေႏပဲစ်တဲင် မဲ့ꩻအီသီဗာႏ ဒေါ့ꩻခါစားနဝ်ꩻသွူ။ ဝွေꩻမဉ်ႏသီထိုꩻမꩻ ဘုရာꩻသျင်ꩻတွမ်ႏ လိုꩻဖုံႏ အီလꩻနွောင်ꩻ ငိမ်ꩻချံꩻရေꩻသွူ။ ပွိုးနဝ်ꩻမꩻ ဘုရာꩻသျင်ꩻ အစီႏအစဲဉ်ႏယို ‘မေရှိယ’ အီသီဗာႏသွူ။

နိမိတ်ထွားဟော်ꩻ ပညာႏသျင်ꩻဖုံႏနောဝ်ꩻ ‘မေရှိယ’ သီထွူမꩻ ဘုရာꩻသျင်ꩻ သွင်ꩻအသက် ထွဉ်ႏမွန်တချာ နုဲင်းနဝ်ꩻတဲ့ ဒေါ့ꩻဟွိုန်ခါꩻသွူ။ ပွိုးအကျောင်ꩻခရာꩻယိုတဲင်ꩻ ခရစ်တောႏ သီမုꩻတွမ်ႏ မွန်တချာနွောင်ꩻအတာႏနဝ်ꩻ ဘုရာꩻသျင်ꩻအလောင်း လိုꩻဖုံႏကမာꩻဒါႏ အပဲစ်ဖုံႏယို ကမာꩻစင်ဖေႏဒါႏ ထွာသꩻဘောႏတူႏညီႏမုꩻ အတသာ နဝ်ꩻသွူ။

‘မေရှိယ’ အကျောင်ꩻခရာႏအာယို ဘုရာꩻသျင်ꩻ ဖောႏပျနယ်ဖေႏ နိမိတ်ထွားဟော်ꩻ ပညာႏသျင်ꩻ သီးဖုံႏနဝ်ꩻသွူ။ ကွဲတွော့ꩻ ‘မေရှိယ’ နဝ်ꩻ နိမိတ်ထွားဟော်ꩻ ပညာႏသျင်ꩻသီး ကအဝ်ႏချိန်ႏတွင်ꩻနဝ်ꩻ တဖျော်လွဉ်တဝ်းသွူ။ ဖေႏထွူ နိမိတ်ဟော်ꩻချက်ဖုံႏတဲင်တွော့ꩻ နေင်ႏပေါင်ꩻကထွိုင်ႏည လစ်ရျာꩻအချိန်ႏနဝ်ꩻ အချိန်ႏမဲဉ်ႏ အတိအ ကျတဲင် ဘုရာꩻသျင်ꩻ အွဉ်ႏလွစ်လင်ꩻခန်း ‘မေရှိယ’ ကမ္ဘာႏဟံႏတန်လောင်းယိုသွူ။

ကမ္ဘာႏဦꩻကျမ်ꩻ ၃: ၁၅; ၁၂: ၁-၃; တရာꩻဟောꩻကျမ်ꩻ၁၈: ၁၅; ၂ တရာꩻရာႏဇဝင်ႏ ၇; ယေရမိအနာဂတ္တိ ၃၁; ဟေရှာရအနာဂတ္တိ ၅၉: ၁၆; ဒံယေလ ၇; မာလခိအနာဂတ္တိ ၄: ၅; ဟေရှာရအနာဂတ္တိ ၇: ၁၄; မိက္ကာအနာဂတ္တိ ၅: ၂; ဟေရှာရအနာဂတ္တိ ၉: ၁-၇; ၃၅: ၃-၅; ၆၁; ၅၃; ဆာလံကျမ်ꩻ ၂၂: ၁၈; ၃၅: ၁၉; ၆၉: ၄; ၄၁:၉; ဇာခရိအနာဂတ္တိ ၁၁:၁၂-၁၃; ဟေရှာရအနာဂတ္တိ ၅၀:၆; ဆာလံကျမ်ꩻ ၁၆: ၁၀-၁၁ မꩻ သမ္မာႏလိတ်ကျမ်ꩻ ငဝ်းခြုဲင်း