၉ - ဘုရာꩻသျင်ꩻ ဟဲ့ꩻထူႏလွေꩻ 'မောရှေ'

‘ယောသပ်’ ကထွိုင်ႏသီထိုꩻထွူအချိန်ႏနဝ်ꩻ ဝွေꩻအမျိုꩻခွိုꩻဖုံႏကားကအဝ်ႏ ချꩻအုံခန်းခင်ႏလမ်း ‘အီဂျစ်’ နဝ်ꩻသွူ။ ဝွေꩻတွမ်ႏဝွေꩻဆုဲင်ꩻချာသားဖုံႏနဝ်ꩻ ခင်ႏလမ်းယိုအုံဆုဲင်ꩻနေင်ႏပေါင်ꩻညဆွာꩻတွော့ꩻ လွူးလင်ꩻခန်း ပိုခို ပိုမူႏဖုံႏသွူ။ ဝွေꩻသီးဖုံႏယို ဟဲ့ꩻ ‘ဣစရေး’ လိုꩻမျိုꩻသွူ။

နေင်ႏရျာꩻပေါင်ꩻကထွိုင်ႏညထိုꩻအချိန်ႏနဝ်ꩻ ‘ဣစရေး’ လိုꩻမျိုꩻ လိုꩻဖြာꩻပေါင်ꩻတန်အာလွဉ်ခန်း မရေႏမရာႏနဝ်ꩻသွူ။ ‘အီဂျစ်’ လိုꩻမျိုꩻဖုံႏနဝ်ꩻ ဝွေꩻသီးအလောင်း ‘ယောသပ်’ ကမာꩻဖေႏဒါႏ စစရာႏရာႏဖုံႏယို ကေꩻဇူꩻတတင်ႏ တဝ်းဒွုမ်သွူ။ ဝွေꩻသီးဖုံႏနောဝ်ꩻ ‘ဣစရေး’ လိုꩻမျိုꩻအာလွဉ်ငါႏတဲင် ငမ်းလွဉ်တွော့ꩻ နဝ်ꩻအချိန်ႏ ကအုပ်ချွုတ်ဒါႏ ‘အီဂျစ်’ ခွန်နောဝ်ꩻ ‘ဣစရေး’ လိုꩻမျိုꩻယို ဖေႏကထွာ ‘အီဂျစ်’ လိုꩻမျိုꩻ ကူႏလီႏ မာꩻစွဉ်ႏနဝ်ꩻသွူ။

‘အီဂျစ်’ လိုꩻမျိုꩻဖုံႏနဝ်ꩻ လမ်းတွမ်ႏဝေင်ꩻဖုံႏယို ထွဉ်ႏမာꩻစွဉ်ႏ ‘ဣစရေး’ လိုꩻမျိုꩻဖုံႏသွူ။ ထာꩻမာꩻကျံꩻယို မော့ꩻလွဉ်ꩻငါႏ ဆင်ႏရဲꩻဒုက္ခတဲ့ꩻ ဘုရာꩻသျင်ႏဖေႏဝွေꩻသီး ထာꩻဟဝ်ဆုꩻတွော့ꩻ လꩻအာအာယင်းပို လွူးအာအာထဲင်းပိုနဝ်ꩻသွူ။

‘ဖာရောခွန်’ ကထွိုင်ႏထီႏ ‘ဣစရေး’ လိုꩻမျိုꩻ လွူးအာပိုတဲင် ဝွေꩻလိုꩻမျိုꩻဖုံႏ မာꩻသီထွူ ‘ဣစရေး’ လိုꩻမျိုꩻအခို ကားကအဝ်ႏတဲင် ဖေႏကနုဲင်ႏသော့ꩻ နိုင်းထီခြောင်ကို ဖေႏခန်းအမိန်းနုဲင်းနဝ်ꩻသွူ။

‘ဣစရေး’လိုꩻမျိုꩻ လိုꩻမူႏတန်တဖြာꩻနောဝ်ꩻ လွူးဖွာခန်း ပိုခိုတဖြာꩻတဲင်အတတ်နွောင်ႏသွတ်ꩻအွဉ်ႏဗဉ်ႏခါꩻခန်း အပိုပေႏနဝ်ꩻသွူ။

အမွိုးနဝ်ꩻ ထွိုင်ႏအွဉ်ႏသေသူႏနွောင်ꩻတဝ်းဒွုမ်အပိုတဲင် ဝင်ꩻမာꩻသီ ဖေႏကာꩻကာႏကွယ်ႏနွောင်ꩻတွော့ꩻ နိုင်းထီခြောင်သောင် သေင်ႏမွူးအာ အခါႏ ထီလောင်းကပေါနွောင်ꩻဒါႏ တွမ်ႏ ချင်ႏတဖြုံႏတွော့ꩻ အွဉ်ႏကုဲင်ခါꩻသွူ။ အပိုပေႏအဝေးမူႏနဝ်ꩻ အဖူးပေႏအီထွာဆွိုက် နုဲင်းမုဲင်ꩻ အဝ်ႏထွားချာစွူစွူဒျာႏသွူ။

ခွန်ပိုမူႏတပါꩻ မော့ꩻချင်ႏတွော့ꩻ ထွိုင်ႏထွားအကို ထီႏခန်းပါꩻပေႏတဲင် မတ်နုဲင်းပိုရင်ꩻထူႏလွူးခန်းဒျာႏ နဝ်ꩻသွူ။ ဝွေꩻမူႏနဝ်ꩻဟဲ့ငှါးခန်း ‘ဣစရေး’ လိုꩻမျိုꩻ လိုꩻမူႏတဖြာꩻ ထွဉ်ႏထွားထိန်ꩻခန်း ပါꩻပေႏနဝ်ꩻသွူ။ ပါꩻမူႏယို ထွာပါꩻပေႏနဝ်ꩻအမွိုးရင်ꩻယို တသေတဝ်းသွူ။ ပါꩻပေႏယို လွိုႏတဝ်းဒွုမ် မွိုးနဲဉ်းအရွယ်ႏ ကထွိုင်ႏတွိုႏနောဝ်ꩻ ပသာချာဗာႏ ခွန်ပိုမူႏထျꩻတွော့ꩻ ဖေႏခံႏဗာႏ အမဉ်ꩻ ‘မောရှေ ‘ နုဲင်းနဝ်ꩻသွူ။

‘မောရှေ’ အရွယ်ႏကထွိုင်ႏတွိုႏလွဉ်တနီꩻနဝ်ꩻ ကထွိုင်ႏထီႏ ‘အီဂျစ်’လိုꩻမျိုꩻတဖြာꩻ တွဲႏနက် ‘ဣစရေး’ ကူႏလီႏတဖြာꩻတဲင် ‘မောရှေ’ နဝ်ꩻ ကျိုꩻစာꩻကယ်ႏခန်း ဝွေꩻ ‘ဣစရေး’ လိုꩻမျိုꩻနဝ်ꩻသွူ။

‘မောရှေ’ နဝ်ꩻ တမုဲင်ႏတထီႏတဝ်းအချိန်ႏ မာꩻသီ ‘အီဂျစ်’ လိုꩻမျိုꩻတွော့ꩻ နမ်းခန္ဓာႏယို ပလို့ꩻထိုꩻသွူ။ ကွဲႏတွော့ꩻပါꩻတဖြာꩻဖြာꩻနဝ်ꩻ ထီႏထိုꩻခန်း ‘မောရှေ’ ထာꩻမာꩻနဝ်ꩻသွူ။

‘ဖာရိုခွန်’ သေထိုꩻခန်း ‘မောရှေ’ ထာꩻမာꩻတဲင် ကျိုꩻစာꩻမာꩻသီဝွေꩻတွော့ꩻ ‘မောရှေ’ နဝ်ꩻ အဝ်ႏ ‘အီဂျစ်’မꩻ ဖင်းသော့ꩻခန်း ကန္တာရထာꩻခြာကိုတဲင် ‘ဖာရိုခွန်’ စဲ့ꩻ ဖုံႏ ခင်ႏလမ်းနဝ်ꩻ တထီႏတဝ်းဒွုမ် ‘မောရှေ’ သွူ။

‘မောရှေ’ နဝ်ꩻ တွမ်ႏ ‘အီဂျစ်’ ကညာꩻဒါႏထာꩻခြာတန်ကို ထွာထိုꩻ ‘ဗဲ့ꩻ’ တီသားတဖြာꩻတဲင် တောႏလမ်းခန်း ပါꩻမူႏရပ်နဝ်ꩻ တဖြာꩻတွော့ꩻ လွူးဖွာခန်းပိုဝင်ꩻနီနဝ်ꩻသွူ။

‘မောရှေ’ နဝ်ꩻ ထိန်ꩻတီဖေႏ အဖီ ‘ဗဲ့ꩻ’ ဖုံႏနဝ်ꩻသွူ။ တနီတွော့ꩻ ထီႏခန်း မေႏခိုးတကုဲင်တဝ်း သေင်ႏပုံတပုံသွူ၊ ဝွေꩻလွေꩻထွားတွိုက် သေႏသေႏချာချာ သေင်ႏပုံထျꩻသွူ။ ကထွိုင်ႏတွိုက်သေင်ႏပုံတဲင် ဘုရာꩻသျင်ꩻ ဒေါ့ꩻခန်းဝွေꩻနုဲင်းယိုသွူ။ “မောရှေ ဗွိုင်ႏနာꩻခင်ႏဖာႏ ဟုဲင်း၊ နာꩻကအုံနွိုင်းဒင်ႏဒါႏဟံႏယိုနဝ်ꩻ ထွာဟံႏမျတ်ငါႏသွူ”။

နဝ်ꩻဆချာ ဘုရာꩻသျင်ꩻနောဝ်ꩻ “ခွေလိုꩻအာ ကခံႏစာႏဗာႏယို ခွေထီႏဗာႏသွူ။ ‘ဣစရေး’ လိုꩻမျိုꩻဖုံႏ ဖေႏကလွစ်ထန်ႏ ‘အီဂျစ်’ ကူႏလီႏနဝ်ꩻ မဲ့ꩻခွေအီႏအွဉ်ႏလွစ်လွေꩻနာꩻ ‘ဖာရိုခွန်’ ထျꩻ၊ ဝွေꩻသီးယိုမဲ့ꩻခွေအီဖေႏ ‘ခါနန်’ ကရိုဒါႏ (အာဗြဟံ၊ ဣဇာက်တွမ်ႏယာကုပ်သီး ကတိကပျုခါꩻဒါႏ )ဟံႏယို” မိန်းခါꩻနုဲင်းနဝ်ꩻသွူ။

‘မောရှေ’ နောဝ်ꩻ “ကအွဉ်ႏစွꩻလွဉ်ဒါႏခွေယို လိုꩻအမျာꩻ မဉ်ႏမဲဉ်သေနဝ်ꩻ ဖြေႏဗာႏနုဲင်းမုဲင်ꩻ” ရီလဝ်းဘုရာꩻသျင်ꩻတဲင် ဘုရာꩻသျင်ꩻရိုꩻ “ခွေတမုဲင်ꩻနဲး ကရိုꩻနောဝ်ꩻ တမုဲင်ꩻဒျာႏ” ဖြေႏနယ်ချာသွော့ꩻ နုဲင်း နဝ်ꩻသွူ။ “ဘုရာꩻသျင်ꩻ အွဉ်ႏစွလွဉ်ခွေဒျာႏ ဝွေꩻသီးထျꩻတဲ့ ဒေါ့ꩻ နယ်သွော့ꩻနုဲင်းနဝ်ꩻ၊ ခွေနောဝ်ꩻ အာဗြဟံ၊ ဣဇာက်၊ ယာကုပ် သီး ကကိုႏကွယ်ႏဒါႏထွာဒျာႏ “ယာဝေ” “ထာꩻ၀ရ” ဘုရာꩻ၊ ခွေအမဉ်ꩻ နဝ်ꩻ ထွာခွေ “ထာꩻ၀ရ” အမဉ်ꩻ ဒေါ့ꩻနယ်နုဲင်းနဝ်ꩻဟုဲင်းမိန်းလဝ်းလွေꩻနုဲင်းနဝ်ꩻသွူ။

‘မောရှေ’ နဝ်ꩻ ငမ်းတွော့ꩻ ဒေါ့ꩻငဝ်းပေါꩻဒါႏတဝ်းတဲင် မဲဉ်လွေꩻ တဝ်း ‘ဖာရိုခွန်’ ထျꩻနဝ်ꩻမ ‘မောရှေ’ နဝ်ꩻ ကွီအကူႏညီႏ အဖူး ‘အေရွန်’ ထျꩻ အွဉ်ႏလွစ်လွေꩻခန်းအဖူး ‘အေရွန်’နဝ်ꩻ သွူ။

ဓမ္မလီꩻ ၁၄ မꩻ သမ္မလိတ်ကျမ်ꩻ ငဝ်းခြုဲင်း