၂ - ကမ္ဘာႏဟံႏတန် အပဲစ်တရာꩻနွို့ꩻလွဉ်

‘အာဒမ်’ တွမ်ႏ ဝွေꩻမာနဝ်ꩻ ဘုရာꩻသျင်ꩻ ကဖန်ဆင်ꩻခါꩻဒါႏ တရေꩻသာႏယာႏငါႏဥယျဉ်ႏတန်အကို ပျောႏပျောႏသွင်ႏသွင်ႏ အုံကုဲင်ဆုဲင်ꩻခါꩻသွူ။ ဝွေꩻသီး၀င်ꩻနီလွုမ်းနဝ်ꩻ ကꩻတဝ်းဆဲင်ꩻခွမ်ꩻလာꩻသွူ။ ကွဲႏတွော့ꩻ ကမ္ဘာႏဟံႏတန်ယိုအလောင်း အပဲစ်တရာꩻ တအဝ်ႏတဝ်းတဲင် ဝင်ꩻသꩻခရာႏ တခံႏစာꩻဗာႏတဝ်းသွူ။ ဝွေꩻသီးဖုံႏယို ပုံႏမန်ႏ ထောင်တဖူꩻ ဥယျာဉ်ႏကဝ်ႏခြံကိုတဲင် တွမ်ႏဘုရာꩻသျင်ꩻ ဒေါ့ꩻတောႏဝင်ꩻငဝ်းဖုံႏသွူ။

ကွဲႏတွော့ꩻ ဥယျာဉ်ႏတန်ကို ရူးအဝ်ႏတဗာႏတဲင် ရူးနဝ်ꩻနဝ်ꩻသꩻတကျင်ꩻငါႏသွူ၊ ရူးနဝ်ꩻနဝ်ꩻ ရီခန်းပါꩻမူႏ “ဘုရာꩻသျင်ꩻ ဥယျာဉ်ႏတန်ကိုကအဝ်ႏဒါႏ ထာꩻမွူးမျိုꩻမုဲင်ꩻတယဝ်း၊ သေင်ႏရာႏအမျိုꩻမုဲင်ꩻတယဝ်း အံႏလꩻတဝ်း ရဲးဆီꩻခါꩻနေဟောင်း” ရီလဝ်းလွေꩻခန်းနုဲင်းနဝ်ꩻသွူ။

ဝွေꩻမူႏနဝ်ꩻနဝ်ꩻ ‘‘ဘုရာꩻသျင်ꩻ အဟဝ်အကုဲင် ကသေနွောင်ꩻဒါႏ ထာꩻသေဉာဏ်ႏသေင်ႏမွူးမꩻ အလင်သေင်ႏမွူးကားကအဝ်ႏ အံႏသွုံꩻနွောင်ꩻဒျာႏ ဒေါ့ꩻခါꩻနီ နုဲင်းယိုသွူ။ ထာꩻသေဉာဏ်ႏသေင်ႏမွူးယို အံႏတွမ်ႏရိုꩻမွုန်းခွုင်းငါတဲ့ꩻသီဒါႏ ဘုရာꩻသျင်ꩻ ပညတ်ခါꩻဖေႏနီဖုံႏ” ဒေါ့ꩻချာခန်းနုဲင်းယိုသွူ။

နဝ်ꩻတွော့ꩻရူးနဝ်ꩻ ‘‘နဝ်ꩻနဝ်ꩻအမဲဉ်ႏ တမွေးတဝ်း၊ သီဖုံႏတသီနွောင်ꩻတဝ်း၊ သီဖုံႏမိဉ်ႏအံႏအရာႏနဝ်ꩻနဝ်ꩻ ဗွိုန်နုဲင်းဝွေꩻ အဟဝ်အကုဲင်ဖုံႏယို ငမ်းသီသꩻဘောႏပေါက်ထိုꩻ ဘုရာꩻသျင်ꩻသူႏရိမ်ႏငါႏတွော့ꩻ ထွာပညတ်ခါꩻဗာႏ” ဖြေႏ ပြန်ႏချာခန်းနုဲင်းနဝ်ꩻသွူ။

ပါꩻမူႏနဝ်ꩻ သေင်ႏရာႏဖုံႏနဝ်ꩻတရေꩻတွော့ꩻ မဲဉ်အံႏငါႏ ထီႏစားနဝ်ꩻသွူ။ ဝွေꩻမူႏဉာဏ်ႏပညာႏမဲဉ်တန်ငါႏတဲင် အရာႏယဟန်ႏဖုံႏယို ဒဲ့ꩻအံႏထိုꩻသွူ။ တွမ်ႏဝွေꩻမူႏကပါလွဉ်ဒါႏ ဝွေꩻဝါꩻဖြားတယဝ်းဖေႏအံႏတဲင် ‘အာဒမ်’ တဲ့ꩻအံႏ နေနေနဝ်ꩻသွူ။

တလဲင်ꩻချင်ꩻဝွေꩻသီးထာꩻသေဉာဏ်ႏဗွောင်ထိုꩻသွူတွော့ꩻ ဝွေꩻသီးနမ်းကထွာတလီꩻတဲ့ꩻ အွဉ်ႏသတိချာဝင်ꩻသွူ။ ဝွေꩻသီးဖုံႏ တွမ်ႏသေင်ႏလာႏ မာꩻထွူခွမ်ꩻလာꩻ ကျိုꩻစာꩻဒို့ꩻခါꩻခန်းနဝ်ꩻသွူ။

အချိန်ႏနဝ်ꩻ ဘုရာꩻသျင်ꩻထောင်တဖူꩻဥယျဉ်ႏအကို ဝွေꩻတွမ်ႏဝွေꩻမာဟွိုန်ခန်းဒျာႏနဝ်ꩻသွူ။ နဝ်ꩻအချိန်ꩻဝွေꩻသီးဝင်ꩻနီလွုမ်း အုံနွို့ꩻခါꩻ ဘုရာꩻသျင်ꩻသွူ။ နဝ်ꩻတွော့ꩻဘုရာꩻသျင်ꩻရီ “သီဖုံႏအဝ်ႏမုဲင်ꩻကို” နုဲင်းနဝ်ꩻသွူ။ ‘အာဒမ်’ နဝ်ꩻ “နီဖုံႏဘုရာꩻသျင်ꩻ ထောင်တဖူꩻ ဥယျာဉ်ႏတန်ကိုယိုအဝ်ႏဟွိုန်ဒျာႏသွူ။ နီနမ်းဖုံႏတလီꩻထာꩻတွော့ꩻ ငမ်းတဲင် အုံနွို့ꩻခါꩻဗာႏ” ဖြေႏချာနုဲင်းနဝ်ꩻသွူ။

တွိုႏနဝ်ꩻတွော့ꩻ ဘုရာꩻသျင်ꩻနဝ်ꩻ ‘‘သီနမ်းတလီꩻနဝ်ꩻ ပါမုဲင်ꩻဒေါ့ꩻဟောင်း၊ ခွေကရိုꩻအံႏမွိုန်းအရာႏဖုံႏနဝ်ꩻအံႏဗာႏနေ” ရီနုဲင်းနဝ်ꩻသွူ။ နဝ်ꩻတွော့ꩻ ‘အာဒမ်’ နောဝ်ꩻ “ဘုရာꩻသျင်ꩻဖေႏခါꩻခွေ ပါꩻမူႏယို၊ ပါꩻမူႏယိုနဝ်ꩻ ဖေႏခွေသေင်ႏရာႏ” ဖြေႏချာနုဲင်းနဝ်ꩻသွူ။ အဝ်ႏနဝ်ꩻတွော့ꩻ ဘုရာꩻသျင်ꩻ ရီခန်းပါꩻမူႏနဝ်ꩻ “နာꩻမာꩻဗာႏသွူ တမုဲင်ꩻ” ရီခန်းအမာနုဲင်းနဝ်ꩻသွူ။ အမာနဝ်ꩻ “ရူးလဲဉ်အံႏထိုꩻခွေ” ဖြေႏပြန်ႏချာနုဲင်းနဝ်ꩻသွူ။

ဘုရာꩻသျင်ꩻရိုꩻရူး “ခွေအီတွိုက်ꩻနာꩻ ကျိန်ႏစာႏ၊ နာꩻနဝ်ꩻ လွေꩻ တတွာႏထာꩻ တွမ်ႏဟို့ꩻတဲင် အံႏဗာႏဟံႏ၊ နာꩻတွမ်ႏပါꩻမူႏယို တဖြာꩻတွမ်ႏတဖြာꩻ လွꩻထီႏသွူဝင်ꩻတဲင်၊ နာꩻပိုခို ပိုမူႏတွမ်ႏ ဝွေꩻမူႏ ပိုဖုံႏတဲ့ꩻ အချင်ꩻချင်ꩻဖေႏကလွꩻထီႏဗာႏဝင်ꩻ၊ ပါꩻမူႏယို ဆွေႏမျိုꩻအသွုပ်သွုပ်တဲ့ အီယမ်းနာꩻကတူႏ၊ နာꩻတဲ့ꩻ အီႏပေါက်ꩻ ဝွေꩻသီးခင်ႏဒွိုႏ” ရိုꩻစားနဝ်ꩻသွူ။

နဝ်ꩻဆချာ ဘုရာꩻသျင်ꩻရိုꩻ “နာꩻအတာႏ မဉ်ႏလွူးဖွာꩻပို ခွေအီအွဉ်ႏဆာထွူ၊ နာꩻနောဝ်ꩻ ဖေႏကမဲဉ်လꩻ တပ်မက်နာꩻဝါꩻ၊ နာꩻဝါꩻတဲ့ꩻ ဖေႏကနွောင်ꩻ အုပ်စိုꩻနာꩻအလောင်း” မိန်းခန်းနုဲင်းယိုသွူ။

ဘုရာꩻသျင်ꩻရိုꩻအဝါꩻ “နာꩻနောဝ် နာႏကွို့နာꩻမာငဝ်း၊ ခွေနဝ်ꩻ နာꩻလွိုဆန်ꩻသွူ။ ယိုခါ ဟံႏတန် ကျိန်ႏစာႏ တွိုက်ꩻခံႏဗာႏသွူ၊ အံႏတာႏဆို့ꩻခရာႏ ယပ်ငါႏလွိုႏငါႏ ကျိုꩻစာꩻသွူ။ ဆုဲင်ꩻချာ နာꩻမဉ်ႏသီထိုꩻ နာꩻနမ်းခန္ဓာႏလဲ့ အီႏတွိုႏချာ ဟံႏတန်ကိုသွူ”။ အဝါꩻခိုနဝ်ꩻ ဝွေꩻမာယို ဖေႏသက် အဓိပ္ပါယ်ႏလꩻစားနဝ်ꩻတဲင် ဖေႏဗာႏအမဉ်ꩻ ‘ဧ၀’ သွူ။ ပွိုးနုဲင်းမုဲင်ꩻနဲတဲင် ဝွေꩻမူႏယို အီထွာလိုꩻတွိုင်ႏအတာႏ မွိုးသွူ။ ဘုရာꩻသျင်ꩻနဝ်ꩻ ‘အာဒမ်’ တွမ်ႏဧဝယို ထွဉ်ႏကွဉ်ကꩻ ဖေႏတွမ်ႏ တိရိစ္ဆာန်ႏဖျွို့ꩻဖုံႏသွူ။

နဝ်ꩻတွော့ꩻ ဘုရာꩻသျင်ꩻ “ယိုခါ လိုꩻဖုံႏနဝ်ꩻ ဗွိုန်နုဲင်းခွေ အဟဝ်အ ကုဲင် ခွဲချာꩻထီႏဒါႏသွူတဲင် ဝွေꩻသီးဖုံႏယို မိဉ်ႏအံႏ အသက် သေင်ႏမွူးရာႏနဝ်ꩻ ထာ၀ရအသက်မွန်ခွင်ꩻ လွိုႏဖေႏတဝ်း”၊ နဝ်ꩻတွော့ꩻ ဘုရာꩻသျင်ꩻနဝ်ꩻ ဝွေꩻသီးဖုံႏ ယို တွမ်ႏဥယျဉ်ႏကညာꩻရာꩻအရပ် ထွဉ်ႏထန်ႏညာꩻထိုꩻခန်းနဝ်ꩻသွူ။ ဘုရာꩻသျင်ꩻနဝ်ꩻ ပါမုဲင်ꩻမꩻ ဖေႏကအံႏလꩻမွုန်း အသက်သေင်ႏမွူးရာႏတဲင် ဥယျဉ်ႏပေါက်ꩻအနွို့အထမ်ႏယို ထွဉ်ႏပွိုးတွမ်ႏ စွန်ꩻအာႏကတန်ဒါႏ တနံဗျဟ္မာႏဖုံႏ နဝ်ꩻသွူ။

ကမ္ဘာႏဦꩻကျမ်ꩻ ၃ မꩻ သမ္မာႏလိတ်ကျမ်ꩻ ငဝ်းခြုဲင်းအာ